السبت، 24 ديسمبر 2011
الاثنين، 19 ديسمبر 2011
بحب المجلس العسكري
قلت قبل كده المجلس العسكري فاشل في تلبيس العمة للشعب، حتى مع وجود إخت تامر بتاع غمرة!!!.
إلي عجبني أكتر في الفيلم المعروض، البنت إلي مشكلتها مع جوز إمها، إلي حاول إنه يعمل معها حاجات وحشة خالص، طيب إيه دخل موضوع جوز إمها في المبنى الأثري؟؟؟؟.
ممكن يكون جوز إمها شغال هناك!!!!!؟؟؟.
طيب مش مشكلة، موضوع إعجابي بالفيلم مش البنت بتاعة جوز إمها، و لا إخت تامر بتاع غمرة، حاجة تانية خالص، الموسيقى الخلفية إلي كانت ورا البنت بتاعة جوز إمها!!!!.
واحد أو واحدة ، شغالين صويت، متعلقين شكلهم تعليقة محترمة، أكيد ماهو الجيش و الشرطة معلقينهم!!!، و طبعاً البنت بتاعة جوز إمها بتسمع الصويت ، و شكلها مش عارفة تركذ مع الصويت و لا مع الكاميرا؟؟؟.
أنا لو منها ، عشان أنا شجاع، هقول الشعب المصري كله عميل لدولة أجنبية!!!!، أه يعني هيعتقلوا الشعب كله؟؟؟؟.
الأهم أنا متعرضش للتعليق من إتحاد الجيش و الشرطة!!!.
طبعاً فشل المجلس العسكري في كل مؤتمر صحفي ، بيثبت فشلهم!!!.
أه و كنت قبل كده إتكلمت على ( البيجامة أيام مبارك) و قلت إن إلي لبس البيجامة أيام مبارك ، المفروض ميرجعش تاني، كنت غلطان يا إخوة !!!!.
المفروض كمان إلي كان و مازال شغال من أيام مبارك ، المفروض هو كمان يتكل على الله ، عشان ببساطة من غير مبارك المجلس العسكري فاشل!!!!.
فعلاً مبارك كان عنده رؤية مستقبلية فظيعة، كان إختياره للناس على أساس الفشل الدماغي، و هو أول من أنشأ البرنامج العالمي للفوتوشوب في المصالح الأمنية و العسكرية.
و قمة التقدم العلمي أيام مبارك، إنه كان عامل فوتوشوب للأمخاخ!!!.
إختياره للناس كان على إسس علمية ثابتة و متطورة، أي حد مسؤول ميكونش عنده مخ، أيون، عشان يكون المخ المركزي هو المسيطر!!!.
بس للأسف مخ الفوتوشوب بتاع المجلس العسكري، أثبت فشله التام من غير مبارك!!!!.
فعلاً لو المجلس العسكري عاوز ينتشل نفسه من الفشل، يتنازل عن الحكم لمبارك تاني، و أكيد مبارك هيخليكوا عبرة للشعب و للثورة، زاي سليمان الحلبي!!!!، بس للأسف هتعرفوا قصة سليمان الحلبي منين بعد حرق المبنى الأثري؟؟؟؟.
ممكن تستعينوا بكتب تاريخ المدارس، على ما أعتقد هتلاقوها في مرحلة إبتدائي، فعلاً لازم أكررها تاني ، أنا بحب المجلس الفاشل، أه قصدي المجلس العسكري!!!!.
البيجامة أيام مبارك
كل يوم تطلع علينا الصحف، و خاصة موقع الداخلية الجديد على الفيس بوك!!!!، بتقارير عن الحملات الأمنية، و خاصة حملات ظبط السلاح.
الداخلية كل يوم بتظبط جيش!!!!، أه جيش كامل.
مدافع جرينوف، صندوق ذخيرة، بندقية آلية ، قنابل و حتى صواريخ!!!.
هي كل الأسلحة ديه إتسرقت من الأقسام؟؟؟؟؟.
طبعاً وزارة الداخلية، و صفحة الفيس بوك، بقت بتتسم بالشفافية التامة!!!، بقى عندهم أمانة شفافة!!!، من إمتى يا محسن؟؟؟.
طيب زمان أيام الوحش مبارك، كان رجال المباحث الشرفاء!!!!، جداً، يروحوا على تجار السلاح، و يطلب منه تسليم عدد معين من السلاح، و إلا!!!!.
طبعاً بعد ثورة 25 يناير المجيدة، العظيمة و التي لم تحدث من قبل في العالم كله!!!!، أصبحت وزارة الداخلية، قوة لا يستهان بها في حماية الثورة و شباب الثورة!!!.( إيه الكلام الفاضي إلي أنا بقوله ده).
معلش أصلي خايف من قفل البلوج يا إخونا، لازم تشعروا بنفس الشعور، لو إتقفلت البلوج هكون عميل للنظام إزاي، أنا بحب المشير، الداخلية و الثورة!!!، بس مش بحب الفوتوشوب!!!!.
أقولك مش مشكلة إقفلوها، ربنا يخليلنا الحج جوجل، مخلي كل حاجة مجاناً، يعني بدل البلوج هفتح 265 بلوج ، أه كل يوم بلوجاية!!!.
المهم نصب المجلس العسكري ، الداخلية و الحكومة الجديدة، عاوز يخوف الناس، عاوز يبيين إن الأمن بيحاول جاهداً إنه يرجع الأمن المختفي في ظروف غامضة!!!.
و ممكن نعتبر إختفاء الأمن بيرجع لوجود، مؤامرة و إيد خفية!!!!!.
إشمعنا ديه مفيهاش المؤامرة و الإيد الخفية، يعني إختفاء الشرطة من الشارع(مكانش مؤامرة)، سرقة السلاح من الأقسام على إيد الظباط ، الإمناء و العساكر( مكانش مؤامرة).
عاوزين الصراحة، نظام مبارك كان أذكى منكم بكتير، يا فشلة التفكير!!!!.
ده إنتوا فشلة في تنظيم مؤامرة، أو بمعنى أصح فشلة في تلبيس العمة للشعب، بعد ثورة 25 يناير المجيدة الفظيعة.
أما الناس إلي ماتوا بالرصاص، خليكوا أذكية شوية، إطلعوا علينا بتقرير عاجل، و قولوا :" فعلاً كان فيه رصاص حي، بس عشان الشعب جاهل في إسلوب تغيير الإتجاه بالسرعة المطلوبة، فكان الشباب بيقفوا قدام الرصاصة، قدر الله ماشاء فعل!!!!".
نصيبهم.
و يا سلام لو كان العادلي بقى، مكانش هيطلع ببيان من أصله و إلي مش عجبه، المعتقلات موجودة و يخبط فيها راسه للصبح، بل كان النظام متعاون جداً و بيخبطلك راسك في الحيطة بنظام إوتوماتيكي!!!!.
فعلاً النظام بعد الثورة، بيثبت كل يوم إن المسؤولين إلي مبارك لابسهم البيجامة في أيامه، فعلاً مينفعش يكونوا في الحكومة تاني!!!!.
و ده نداء للحكومة، و لكل واحد طامع في منصب حكومي، " إلي لبس يا إخونا البيجامة أيام مبارك، ميفكرش في منصب حكومي، و يمتنع عن الترشيح"، أحسن ليه و أحسن للناس!!!!.
لما كان واحد من الناس العظماء دول بيلبس البيجامة، عمرنا ماكنا نتوقع إنه يرجع تاني!!!!، إنما الثورة العظيمة المجيدة، المحمية من الشرطة و القوات المسلحة، إتغير النظام ده، و أصبح كل واحد لبس البيجامة أيام مبارك، بقى من العظماء، بقى من الشخصيات أصحاب الحصان الأبيض، بتاع هياخد الشعب على الحصان و ينطلق بيه نحو بحر الظلمات!!!!.(حلم كل فتاة، مش حلم كل شعب!!!).
المشكلة إن كل مسؤول رجع بعد البيجامة، إفتكر إن الزمن رجع بيه تاني، و عاوز يرجع أمجاده إلي إتمحت، عشان واحد تاني جه بعديه، و مسحها بأستيكة!!!!.
ممكن يكون نسى إن الزمن جرى بسرعة، طيب حد يسلفه ألة الزمن!!!،أو سبحان الله ، المؤامرة و الإيد الخفية إنتقلت لمخ المسؤول!!.
يا ريت نرجع حكم البيجامة أيام مبارك، و أطالب بوضع مادة ليها في الدستور الجديد.
تحت بند،( البيجامة أيام مبارك)، ممكن؟؟؟.
الأحد، 18 ديسمبر 2011
أنا الإيد الخفية
الرد المعتاد و العجيب، مصر راحت مش راجعة تاني!!!!، خلاص الرد ده كافي و لا ؟؟؟؟.
نرجع للموضوع!!!، طبعاً المشكلة الحالية إلي مصر بتواجهها، إن فيه مؤامرة خبيثة عليها!!!!!.
من الفلول، و خاصة إن مبارك قال كلمة للتاريخ،" يا أنا، يا الفوضى".
ديه كانت كلمة رئيس الفلول، أما المؤامرة الخبيثة جداً، فهي من الإيد الخفية!!!!.
طيب هو المجلس العسكري، و الوزرا، و الذي منه ، مستني إيه؟؟؟؟، واحد يطلع من طابور العيش و يقول ،" لو سمحت، أنا الإيد الخفية!!!".
السؤال الغريب، هي الأجهزة الأمنية ، إلي كانوا مصدعين أهلينا بمسلسلات، أغاني و حتى الدي جيه!!!!، مش عارفين يمسكوا واحد معاه ولاعة!!!، مش غريبة إن الأجهزة الأمنية السيادية، أصبحت لا مؤاخذة ،" هلهولة".
و سبحان الله ربنا رزقنا برئيس وزرا، تايه، مش موجود في مصر، أكيد عنده ستالايت بيجيب قنوات كتيرة غير قنوات مصر الفاشلة.
ممكن كان بيتفرج على فض إعتصام ،" وول إستريت"، عشان كده طلع فاتح صدره ، و قال زاي الأسد، " مكانش فيه إستخدام رصاص".
طيب و هو بيتفرج محسش إن الشوارع كانت نظيفة عن الشوارع المصرية!!!، بلاش إن شكل الناس و البوليس مختلف!!!، و ممكن كمان يكون الحول وصل لتليفزيون معاليه!!!، طبعاً مش معاليه أحول!!!.
ممكن يكون تليفزيون معاليه من النوع الأجنبي الكبير أبو شاشة فلات، تابع للإيد الخفية، و ماشي بنظام الفوتوشوب!!!.
بس أدينا إكتشفنا أول إيد خفية!!!!، تليفزيون معاليه أبو شاشة فلات، إحنا لازم نوجه إعتصام لمنزل معاليه، و نطالب بتسليم التليفزيون العميل، بتاع الفوتوشوب!!!!.
طبعاً تليفزيون معاليه عامل مقولة مشهورة،" إلي ميعرفنيش يسأل أهله عني؟!؟!؟".
هم يبكي و هم يضحك!!!!!.
أكيد كان فيه ناس كتيرة عندهم أمل، قصدي كان عندهم أمل، إن الثورة تكون تغيير!!!!، بس للأسف كان التغيير في الوشوش بس!!!.
إنما الفكر واحد، مقولة عمرو أديب،" كلنا فشلة".
فعلاً أنا بعترف إن أنا من كبار الفشلة، فشلت في الأمل، فشلت في الإحساس و فشلت في إني أكون بني أدم!!!!.
بس إيه الحل؟؟؟، لا قادر أوصل كلامي، و لا قادر أغير حتى في فشلي، بس لاء أنا هتغلب على الفشل، أيوة!!!، أنا نويت أجيب تليفزيون فلات زاي بتاع معاليه، عشان يعمل الفوتوشوب للثورة إلي أنا عاوزها، و أخيراً مش هكون فاشل تانيييييييييييييي!!!!!.
إنتوا عارفين حاجة؟؟، إعلاميين كتير دلوقتي، عشان إحنا بنتهم الإعلام بإنه من الفلول، بقوا مجموعتين:
المجموعة الإولى: عاوزة تتقرب من المجلس العسكري، و تبين إنهم رجالته في الإعلام!!!.
المجموعة التانية: عاوزة تتقرب من الناس الخاينة إلي في الشارع إلي بيحلموا إنهم بيموتوا بالرصاص ، عشان شايفيين إن القوة في إيد الشعب!!!.
بس عاوزين الصراحة، الإتنين عندهم حق!!!!، لما السياسيين بيعملوا كده، الناس العادية في الأشغال بتعمل كده!!!!.
بس مين في المجموعتين هياخد على قفاه؟؟؟.
سيبك مش مشكلة!!!!.
أهوه كله بقى فوتوشوب!!!!،في الأخر عشان بصراحة عندي ملل كبير، أنا بعترف ،" أنا الإيد الخفية!!!"، أيوة!!!، أول لما أجيب التليفزيون الفلات أخو بتاع معاليه هكون مشترك مع الأيادي الخفية، و عاوزين بقى حاجة كمان، هداري عليه من أجهزة الأمن السيادية، " الهلهولة".
عشان أمشي الثورة بطريقة فوتوشوب إلي أنا عاوزها!!!!!!!!!!!.
الأربعاء، 14 ديسمبر 2011
يا سلام هو ده الكلام
عجبني مقال أو بمعنى أصح خبر على المصري اليوم، على الرابط ده:
فعلاً حاجة تفرح و تحزن في نفس الوقت ، المفرح فيها إن أجهزة الأمن إلي على طول بتنكر التجسس و التصنت بقى فيه إثبات إنها إخترقت كل حاجة في مصر.
الخبر المحزن ، هو النشطاء!!!!!، زاي ماهو باين ناشط و ناشط تاني بينهم رسايل متبادلة عن الفلوس و أساليب بعض النشطاء في توزيع و صرف الفلوس.
بس فيه كام حاجة كده خطرت في بالي
أولاً لما الأمن المصري إخترق كل حاجة و عارف كل حاجة ليه ساب الفلوس تدخل من أصله، و لو إفترضنا إن أمريكا ضغطت على النظام المصري لدخول الفلوس !!! و ده غريب شوية، طيب كان فيه أكيد حل تاني ، هو النظام المصري كان هيغلب
الحاجة التانية ممكن يكون النظام و الأمن ساب الفلوس تدخل و الناس تعيش، ممكن يكون شاف أساليب الصرف فقال نسيبهم يعيشوا حياتهم و أهوه كله بثوابه، و أكيد مخهم هيكون في حاجة تانية غير النظام المصري!!!!.
و بعدين السفيرة الأمريكية بقيت مشتركة في حاجات كتيرة قوي، منها التشاور مع الإخوان المسلمين، التشاور مع النشطاء، التشاور مع البلطجية، و ممكن تتشاور في أزمة أنابيب البوتجاز.
طيب لما أمريكا كانت شايفة إن نظام مبارك وحش و فاشل و الذي منه ، كانوا بيدعموه ليه، و لا أمريكا ماشية أضحك في وشك و أديك على قفاك!!!!.
طيب هي المنح ديه كانت ليه أصلاً؟؟؟؟؟، يعني الفريدوم هاوس كانت بتبعت الفلوس ديه لعمل إيه بالظبط؟؟؟؟.
طيب المعونة الأمريكية مفهومة و نظامها مفهوم، إنما منح الفريدوم هاوس كانت عشان إيه و نظامها كان إزاي، الحاجة التانية إن النعونة الأمريكية و أوجه صرفها كان فيه رقابة من هيئة المعونة الأمريكية.
طيب منح الفريدوم هاوس مكانش فيه أي رقابة عليه؟؟؟؟، يعني إلي عاوز فلوس يعبي و يمشي!!!!.
و لا كورسات كيف تحمي نفسك من قنابل الغاز، هي أوجه الصرف؟؟؟؟.
بصراحة دورات اليوم الواحد مكلفة جداً؟؟؟؟، كفاية فلوس المدرس إلي بيدي المحاضرة ، الساعة بتعد و الحسابة بتحسب!!!.
الأحد، 4 ديسمبر 2011
يا المشير يا بلاش
حد عنده
مشكلة إن المشير يبقى رئيس الجمهورية.
عن نفسي
مفيش مشكلة!!!!.
ليه بقى؟؟؟؟.
مبارك راح،
جه مكانه مبارك جديد!!!!.
الدستور
إلي عليه تم إختيار مجلس الشعب، الدستور
القديم، إلي هو ملطع و مخرم،
أكيد كلنا عارفينه.
كان الأمل
في إنتخابات عدله، كان الأمل دستور
قبل الإنتخابات العدله!!!!.
لكن تأتي
الرياح بما لا تشتهيه السفن!!!!.
ده حتى
إنتخابات ٢٠٠٥ ، طلع علينا الإتحاد
الإوروبي و الولايات المتحدة، و قالوا
ده إختيار الشعب!!!، الإنتخابات تمت بإسلوب
شفاف!!!!.
و لو حد يفتكر
كام واحد من المراقبين الدوليين إترموا
في السجون طبعاً، إتمسكوا تحري من غير
بطاقة.
و دلوقتي
نفس الفيلم بيحصل تاني، نفس
التصريحات!!!.
ده طلع
الشفافية الخارجية، زاي الشفافية
الداخلية بالظبط.
فطبعاً
لو عملنا إنتخابات رئاسية، و المشير
أو جمال مبارك رشحوا نفسهم وواحد
منهم كسب متزعلوش!!!، ديه إرادة
الشعب!!!؟؟؟؟
الثلاثاء، 29 نوفمبر 2011
أول واحد يطبق عليه الغرامة
بإذن الله ، و ربنا يسهل كده، هكون أول واحد يطبق عليه غرامة عدم التصويت.أنا ليه مصوتش
أسباب كتيرة ، يمكن من أهمها، مش متعود على الإنتخاب، كتر خيره مبارك، كان بيقوم بالنيابة عني بالتصويت، و كمان و أنا نايم، يعني مش محتاج أصحى من النوم عشان أروح أصوت.
سبب تاني كمان، يمكن مش معتقد إن صوتي ممكن يروح للشخص إلي أنا عاوزه، أي دولة عندها شوية بتنجان كده من الديموقراطية لما بتعمل إنتخابات، سبحان الله لما واحد بيحط صوته عشان ينتخب مرشح هو عاوزه صوته بيروح للمرشح ده، سبحان الله.
و كمان سبب تاني ، ماهو الأسباب الأسباب كتيرة و الحمد الله، مش معتقد ، أو بمعنى أصح مش مؤمن بالشفافية الثورية، أو الشفافية الإنتخابية.
و ضحكني جداً كلمة عصام شرف على الفيس بوك، إنه إستنى اليوم ده، و إستحمل كل حاجة في سبيل اليوم ده، معلش هنعمل إيه، ماهو شعب خاين، خان مبارك ، و بعد كده الشعب برضوه هو إلي خان الثورة، إنما سعادتك و المجلس العسكري ، لاء مالكومش في نظام الشعب الخاين ده.
و من الأسباب برضوه، إني عاوز أساهم في دفع مبلغ الغرامة، لإن مبلغ الغرامة هيروح فين؟؟؟؟، أكيد لرفع المرتبات!!!، و أنا عاوز أساهم في رفع المرتبات.
ده غير إني ملاقيتش مرشح يلبي إحتياجاتي الشخصية، أه سيبك من الشعارات الوردي ديه، ملاقتش حد يرشيني بتلفزيون فلات عالي التقنية!!!!.
كله كان لحمة، شوية فلوس متجبش تمن الغرامة، قصدي غرامة المشوار، مش المساهمة في رفع المرتبات.
إيه الرشاوي الخيبانة ديه، أنا عاوز رشوة كده تملى العين، و بعدين صوت و لا مصوتش ماهو إلي هينجح في الإنتخابات هينجح في الإنتخابات.
و بعدين هما بيجروا ليه على الإنتخابات ديه؟؟؟؟، طيب أيام مبارك مجلس الشعب ده كان حاجة كده تفرح، بيديك شقة و عربية و عروسة كمان، إنما بعد الثورة هيديك إيه؟؟؟؟.
إيه هتبقى مقرب من المجلس العسكري!!!، طيب و إيه يعني!!!.
يعني المرشح و الأحزاب بعد الصرف ده كله و الإشتغالات ديه كلها ، إيه المكسب، أكيد مش شقة و عربية و لا حتى عروسة إستعمال الخارج، أكيد حاجات أكبر بكتير من الكلام ده.
طيب نرجع و نقول تاني، لو أعضاء مجلس الشعب المنتخب بالطريقة الشفافة إلي كلنا شفناها من أول يوم، لو الشيطان لعب بدماغهم و فشلوا في المرحلة القادمة كالعادة، نحاسبهم زاي سليمان الحلبي في ميدان التحرير.
و لا هنرجع نعمل إنتخابات شريفة و شفافة تاني ، زاي إلي حصلت في 2005، و دلوقتي كمان!!!!.
و لا هنعمل ثورة جديدة!!!!.
بجد حرام، الفرح إتحول لميتم، و لا عزاء……………………. .
السبت، 26 نوفمبر 2011
ريد بوول
طبعاً فيه ناس كتير متعرفش إيه الريد بوول ده؟؟؟.
ده مشروب لتقوية!!!!!!...... مش عارف قوي هو لتقوية إيه؟؟.
أصله ممكن ينشط عنده التفكير و على ما أعتقد الذاكرة كمان!!!.
المشير شكله بطل يفكر زاي زمان، ماهو كل وقت و ليه….حكمه.
بس على أيام مبارك المشير ده كان شعلة من التفكير، بس مش عارف التفكير ده كان نابع من مخه و لا لاء.
متفرقش دلوقتي، و كان أيام مبارك شعلة من التذكر، زاي المفكرة بالظبط، بس دلوقتي………….أصبح بينسى حاجات كتيرة.
و يمكن من الحاجات إلي نساها إن فيه شعب مصري أصلاً، أصل التقاليد العسكرية إلي المشير لسه فاكرها هي الطاعة العميا، زاي أسف في المثل ده، كان ظباط الشرطة و خاصة المباحث يقولوا إن المخبر الفلاني مفتاحه مع الظابط العلاني،هو مش بالظبط كده بس ده كمثال ليه أدب شوية.
أهو المشير ده بقى زاي المخبر بتاع الظابط، كان مفتاحه مع مبارك، إمشي كده يا مشير، معندهوش غير حاضر يا فندم، تعالى كده شوية يا مشير ، حاضر يا فندم، إثبت يا مشير حاضر يا فندم.
بس خلاص المشير نسى أيام زمان خلاص!!!!!!.
بلاش كده، نيجي لنقطة التفكير، ده لو كان فيه حد عنده مخ أيام مبارك الكبير و الصغير كمان!!!!!!!.
إعمل كده يا مشير، حاضر يافندم!!!.
كانت كلمة حاضر يافندم بتطلع منه زاي العسكري إلي بيع……….على نفسه!!!.
حد ياإخوة يكسب ثواب في المشير و يدله على المشروب ده، يمكن يرجعله التفكير و الأهم من التفكير، الذاكرة هو شكله نسى كل حاجة إلا المفتاح مع مين!!!.
الأحد، 20 نوفمبر 2011
إشتري إلي نفسك فيه
كل إلي نفسك فيه، هتلاقيه على أرض واحدة!!.
سينما متحركة، مشاهد حربية على أعلى مستوى، سينما كوميدية، ينفرد بيها التحرير لاند.
أسواق متحركة، على أربع عجلات، و الجديد محل متحرك شايله واحد بس!!!.
و الأجمل كل واحد، أو مجموعة عاوزين يعملوا منصة، مفيش مشكلة إختار المنطقة، ناصية التحرير لاند أو حتى سنتر التحرير لاند، و المفاجأة الشعب علينا، من أول ألف، لغاية كام مليون.
و لما تعوز تفرق الشعب، مفيش مشكلة، الشرطة و الجيش في خدمتك، رصاص حي و مطاطي، عصيان و طوب، و المفاجأة أي عصلجة من الشعب عندنا غاز، مهدي للأعصاب، و مسيل للدموع كمان!!!.
و لو قفلت قوي، و لا يهمك، عندنا المدرعات جاهزة، و المستشفيات كمان جاهزة.
ده غير التمارين الصباحية، حوالين التحرير لاند، وسط الشارع، و الخضرة، هي مش خضرة قوي، بس أهه نقول عليها خضرة!!!.
صحف صفرا و خضرة و حمرا كمان، لتغطية أحداث تحرير لاند.
و الجديد تليفزيون بيجيب الجزيرة بس، ده غير أشكال كتيرة من الناس، تقدر تختار الشكل إلي إنت عاوزه، سيس بقى، فلول، زاي ما إنت عاوز.
أه نسيت، كمان فيه حمامات على أعلى مستوى، من التشطيب و السباكة، بس مش عارف هي لسه موجودة و لا الجيش أخدها معاه.
ده غير المسارح المفتوحة، عروض ٢٤ ساعة يومياً، الممثلين مابيزهقوش أبداً.
ده غير طبعاً وجبة كنتاكي الشهية، تاكلها مع حفلات الموسيقى المنتشرة في كل أركان تحرير لاند.
أه أسواق تجارية متنقلة، من الماج، لغاية علم سوريا؟؟؟، أه و السعودية؟؟؟، و أخيراً مصر!!!.
ده غير ندوات الشعر، و فاضل نعمل زار، و نحضر العفاريت كمان.
التحرير لاند إشتري إلي نفسك فيه!!!.
الجمعة، 18 نوفمبر 2011
مفيش حاجة تتفهم
الواحد مبقاش فاهم أي حاجة خالص دلوقتي، هو مين مع مين؟؟؟، ومين ضد مين؟؟؟؟.
هو سؤال، هو وفد القوى السياسية المدنية!!!، بيتشغل إيه ؟؟؟؟.
أصل المصري اليوم نشرة خبر:
إلتقى وفد من القوى السياسية المدنية، بالدكتورعلي السلمي، لتسليمه وثيقة المباديء الدستورية؟؟؟؟، و معايير تأسيس اللجنة التأسيسية؟؟؟؟.
الناس، قصدي 50 شخصية عامة عملوا إجتماع لمناقشة تعديلات السلمي، و إتفقوا على تعديل المواد…إلخ!!!.
هو ال50 شخصية عامة، هما برضوه ال80 مليون إياهم، يعني ال50، هما تعداد شعب مصر!!!.
طيب كويس جداً، عشان الرئيس إلي جاي ميفضلش يذل أهلنا بالتعداد الرهيب في السكان!!!، أهوه عنده مصر كلها بقيت 50 شخصية عامة!!!.
يمكن كان فيه تصويت جماعي على إختيار ال50 شخصية عامة، و أنا مأخدتش بالي من التصويت ده!!!.
ممكن يكون تصويت إختيار 50 شخص يتكلموا على لساني و لسان غيري، بس كان إختيارهم إختيار سري للغاية!!!.
الأجمل من كده، إنهم غيروا مواد، و عدلوا مواد تانية، و خلوا الجيش جهة إستشارية!!!، يا سبحان الله، و في الأخر شعب مصر كله إشترك في التغيير!!!!، و لا عزاء.
طيب أنا ناوي أعمل مسيرة تتكون مني، و بس، و هدخل تعديلات على الوثيقة، أنا الشعب!!!.
أنا عاوز أحكم نفسي بنفسي، أهوه الجنان وصل لإختزال الشعب في شخص واحد، حد عنده مانع؟؟؟.
هو إيه الفرق مابين ناس بتتكلم بإسم الشعب!!!، و الشعب مش فاهم أي حاجة!!!، و مابين رئيس جمهورية قعد تلاتين سنة يحكم، و برضوه سبحان الله الشعب برضوه مش فاهم حاجة!!!.
يعني ال50 شخصية هما إلي عارفين إيه إلي في صالح ال80 مليون مش فاهم حاجة، قصدي إلي فيهم ناس مش فاهمة حاجة!!!.
طيب كويس، ولو طلع إن الكلام إلي معتقدينه إنه في صالح ال80 مليون، و طلع الإختيار غلط، إيه نديلهم فرصة الإستعانة بصديق، و لا نطبق عليهم قانون سليمان الحلبي في ميدان التحرير؟؟؟؟.
الاشتراك في:
الرسائل (Atom)