مش معقول بعد ٣٠ سنة من حكم مبارك أو أي حكم مر بينا من إنقلاب 52 إلي كانوا بيمتازو بالشفافية المهولة ، تتغير السياسة في يوم و ليلة و يطلعوا يقولوا إن الصراحة و الشفافية تحتم!!!! ، من إمتى يا شفيق ؟؟؟.
برضوه مقدرش أنسى إنك تعيين مبارك ، و كمان صاحبه الأنتيخ ، يعني مش من السهل أصدقك .
و بعدين من الشفافية إلي قالها الأنتيخ إنه بيحاسب القيادات الأمنية ، و في الأخر يقيل مدير أمن الدولة إلي المفروض إنه إتشال مع العادلي !!!!. و إتعيين بداله الفحام مدير لأمن الدولة ، هية ديه الشفافية الثورية صح بتدينا بنج و لا منوم ضعيف .
و إكتشاف تاني إن وزير الداخلية الجديد ، إلي إتظلم يا عيني على إيد العادلي و بهدله و طلعه على المعاش و مرضاش يجددله ، و لأول مرة يجيبوه وزير داخلية من بيجامة المعاش ، و يطلع في الأخر أنتيخ شفيق و برضوه هية ديه الشفافية الثورية .
مبارك فعلاً عرف يختار رجالته ، عرف مين هيفضل موالي ليه في أي نوع من الأزمات مهماً كانت ، و معلش أنا مبغلطش في ظباط الجيش بس قيادات الجيش دول تعيين مبارك ، مش معقول في مرة واحدة كده قلبوا عليه مش راكبة معايا !!!.
الفيلم ده غريب ، فيه حاجة غلط ، و بعدين التشكيل بتاع الحكومة الجديد برضوه غريب ، جايب الناس بإختيار معين ، ناس مقربين للشعب بطريقة أو بإخرى ، و زاي ما حصل مع وزير الداخلية ، حصل برضوه مع مش فاكر وزير إيه بالظبط واخد وعد من المجلس العسكري إنه لو لقى أي تلاعب هينسحب من الوزارة !!!!.
شفيق بيدينا بنج مغشوش ، زاي الغاز المسيل للدموع منتهي الصلاحية كده ، الأنتيخ بيلعب لعبة غريبة ، هما عاوزين يعملوا إيه بعد الست شهور ؟ إيه المفاجأة إلي بتجهز ؟؟.
و بعدين الليلة ماشية زاي ما مبارك قال عليها قبل التنحي ، لجنة لتعديل لبعض مواد الدستور ، التقرب من شباب ٢٥ يناير و دراسة مطالبهم ، الإنتخابات بعد ست شهور ، مبارك لسه في مصر ، و عيلته إلي هربت في البداية رجعت و إبتدينا نسمع صوتهم بالتهديد تاني، قال أي حد بيزور تاريخ مبارك هيرفعوا عليه قضية .
حلوة خالص اللعبة ديه ، أه نسيت و شفيق كان رئيس الوزرا أيام مبارك و بعد ما إتنحى سبحان الله هوا برضوه رئيس الوزرا.
بلد متعودة على الشفافية على طول ، بس المرة ديه الشفافية محبوكة شوية ، و لا باظت منهم ديه كمان ؟؟؟ .
أي حد كان مضايق الناس بيحولوه للمحاكمة عشان الفساد !!! ، إنما عشان بهدل مبارك و ضيع شرفه العسكري طبعاً لا حاشا و ماشا ، ديه ناس فاسدة دلوقتي و لازم تتحاسب ، إنما قبل ما يتنحى كانوا قمة الوطنية !!!.
طيب الدور بعد كده على مين ؟ ، ممكن على الناس إلي وقفت مع الثورة ممكن ؟.
و أداة الشفافية التحفة ، التليفزيون المصري قال يعني بقى شفاف هو كمان ، من إمتى يا عم الأنتيخ ؟ ، بجد الليلة كده مقلقة نظام الشفافية الثورية مش نافع ، ده نظام بنج ثوري لا أكتر و لا أقل و بعد كده هنفوق على مفاجأة مش معمول حسابها .
أه و من الشفافية الثورية كمان مبارك إفتكر ميعاد تقديم الزمة المالية ، فراح قام من سرير المرض و قال لازم أكون شفاف و راح مقدم الإقرار ، و أخد الفطار على شط البحر ، و عمل كام مكالمة تليفون ، و رجع سرير المرض تاني ، حتى فيلم المرض و بيموت و غيبوبة و بيفوق كل تلات أيام طلع فشنك من ضمن البنج الثوري .
طيب مبارك صادق ، إنما سويسرا الدولة العميلة إلي عندها أجندة خارجية كدابة و بت كلب ، جمدت عشرات الملايين من حسابات مبارك ، إلي هتطلع بعد كده إنها كانت معونة الشتا ، مش بقولكم بنج ثوري .