شغلة الحارس الخاص شغلة كويسة جداً ، من حيث المرتب والإمتيازات ، و عشان يتمتع بكل ده شغلته الأساسية إنه يموت بالنيابة عن إلي بيحميه !!! . و طبعاً لو كان الحارس الخاص لرئيس الجمهورية بيبقى الوضع مختلف كتير عن حارس خاص لفنان أو رقاصة ( أسف للتشبيه ) .
شوفت فيديو على اليوتيوب إعتراف للحارس الخاص للرئيس التونسي الهارب ،و بيعترف فيه إنه جتله أوامر إنه يروح يقتل ناس ،بس هوا طبعاً عشان عنده ضمير كان بيهرب الناس ، و يساعد مش عارف مين على مش عارف إيه ،و طبعا الريس بتاعه بيأمره و هو مبينفذش المطلوب منه ،و يشاء القدر إنه قال إيه لسه عايش !!!! ،أقدر أصنفه إنه فيديو رومانسي من النوع الهابط ، صح ؟؟؟.
يعني ناس معروف عنهم بالبطش و التخلف العقلي في بعض الأمثال ، هيسيبوا الحارس بتاعهم الشخصي مينفذش أوامرهم كده ، طيب لما هما مسامحين قوي كده شعوبهم زعلانة منهم ليه ؟؟؟ ، تبطل على النعمة؟ هواية عند الشعوب تغيير الرؤساء ممكن ؟؟.
ده مثال لواحد عارف إنه لو راح أي حتة في العالم مهما كانت فين هيلاقي توانسة هناك و مش هيسيبوا أهله ، و طبعاً مكنش فيه قدامه غير إنه يطلع بالفيديو العجيب و يستعطف الشعب إلي هوا القوة الفعلية دلوقتي . زاي رجال البوليس بتوعنا طلعوا دلوقتي و بيقولوا أوامر ، هيعملوا إيه ؟؟ .
السؤال هنا حرس مبارك الخاص عملوا إيه بقى ؟؟؟؟؟.
و هيطلعوا إمتى يستجدوا عطف الشعب ؟؟
و بلاش حرس مبارك ، طيب حرس جمال و علاء و صفوت و سوزان ووووو.......!!!.
يعني مثال القناصة بتوع الداخلية كانوا بيصطادوا الناس ، ليه ؟؟ ، عشان الأوامر طبعاً ، ولا ولائهم ليهم ؟؟ و لا إيه ؟ ؟ . إيه إلي يفرق حرس مبارك أو أي حرس خاص تاني لأي شخصية من الناس إلي كانت كبيرة إنهم يكون عندهم ولاء ، معروف برضوه إن الحرس الخاص لمبارك ليه إمتيازات كتيرة و حوافز ضخمة ، غير الأراضي و حاجات كتيرة جداً و ، و أكيد كان عندهم أوامر برضوه .
ممكن بعد كده نلاقي مقابر جماعية كتيرة ليه لاء ، عندنا ناس كتيرة إختفت و لا حد يعرف عنها حاجة ، ممكن يكونوا إختفوا في أمن الدولة ، و ممكن يكونوا إختفوا على إيد الجهاز الأمني الخاص جداً بحسني مبارك و أهوه كله أجهزة أمنية سيادية ، و كله حارس خاص.