أه عادي بعد كل القلبان ده ممكن في الأخر يطلع أحمد عز راجل شريف و قلبه على شعب كنتاكي العظيم و كان بيتبرع من فلوسه لشعب كنتاكي العظيم ، إيه إلي فيها ؟؟
و بعدين ممكن يكون شعب كنتاكي العظيم ساعد عز بالفلوس ديه إيه المشكلة يعني ؟؟ هو مش الشعب لبعضه!!!.
بجد هفرقع واحد من شلة الإنس ثروته ٦٠ مليار جنيه في ٦ سنين !!! يا بلاش يعني السنة ب١٠ مليار بس يا بلاش!!.
معندهمش وظيفة ليا ب١٠ مليون في السنة أنا مش طماع ،،،،،.نظام فاشل و هيفضل فاشل و تفكيره عقيم ، تخيل نظام قاعد بيعمل فرقعات إعلامية ، ساب إيه بقى لقناة الجزيرة ،و قبل ثورة شعب كنتاكي العظيم كان عز زاي الفل و راجل عثل عثل!!!، يا عم مبارك يعني بذكائك الناس هتتلهي في عز و تسيبك إنت ؟؟ ، عن نفسي ممكن أسامح عز إنما إنت لاء و ألف لاء. عمر ما الناس هتتلهي في عز و تسيبك قاعد على الكرسي و بعدين ما إنت السبب في وجود عز و غيره و بعدين متمسك إبنك كمان مع عز و تحوله للتحقيق و لا إنت نسيت حوارك من أربع سنين لقناة العربية إن جمال بيساعدك ، يعني معنى كده إنك إنت كمان لازم تتحول للتحقيق مع عز و لا إيه؟؟، طبعا فيه ناس متفاجإتش من الأرقام المهولة ديه بس مش كتير ، إنما فيه ناس كتيرة مش متخيلة حجم الفلوس إلي كنتم بتلعبوا بيها، أرقام جبارة بمليارات و ناس بتدور على كام جنيه عشان العيش يخرب بيت كده .و بعدين عندي سؤال تاني بعيد عن عز شوية هوا العادلي كان بيشتغل إيه؟؟؟ هو مش كان وزير داخلية برضوه !! جاب منين ٨ مليار جنيه؟، يعني معروف إن وزير الداخلية بياخد من كل الفلوس إلي بتدخل لجهاز الشرطة ، يعني نقول كده مثلا مرتب شهري مليون جنيه عادي في كام سنة هتبقى الحصيلة كام عشرة مليون جنيه كده، مش ٨٠٠٠ مليون ؟؟؟؟؟. يخرب بيتك يا مبارك و زعلان إن الناس مش عاوزاك !!! ، ده إنت البعيد معندهوش دم بدل كده متعمل فيها دور شجيع السيما و تتنحى على خيبتك ، وعلى فكرة مفيش و لا مليم من الفلوس ديه في البلد !! لإنهم ببساطة عارفين إن الكرسي مش دايم شكلك بصراحة بقى وحش جداً ولازم برضوه الفلوس تكون في أمان عشان شعب كنتاكي العظيم ميشتريش كنتاكي بالفلوس ديه، و المفروض في الوقت الراهن الناس تسيب أحمد عز ياكل وز فهذه مناشدة لشعب كنتاكي العظيم و عجبي ..