الأحد، 10 نوفمبر 2013

كله في البطيخ

ثورة 25 يناير كانت البداية ، بفتكر كان إزاي شعوري و أنا بتابع ثورة شعب على الظلم ، و الكبت !!!!!.

سنين طويلة ناس عاشت و ماتت و كانت بتحلم بثورة على الطاغية ، مش مبارك بس .

ده مبارك و إلي قبله و إلي قبله ، و كل طاغية في كل عصر و أوان.

الطاغية إلي في الشغل ، الطاغية إلي في الشارع و حتى الطاغية إلي كان في الدماغ !!!!.

لكن طلعت ثورة في البطيخ !!!!.

في اﻷول كانوا الثوار اﻷطهار ، إلي بيطلعوا نور بعد الظهر.

بعد كده الثوار إلي مش أطهار ، إلي مبيطلعوش نور بعد الظهر !!!!!.

راح مبارك و جه بدل مبارك عشرة اوسخ منه ، كان عنده حق لما قال للأمريكان مفيش بديل يحكم مصر غيره.

جه المجلس العسكري ، طبعا على ذكر المجلس العسكري ، يذكر الوطنية و اﻹخلاص و البتنجان لمبارك و العائلة.

هيطلع شوية متخلفين ، و يقولولك الجيش هو الي حارب هو الي ضحى ، يا حمار منك ليه بقول المجلس العسكري و عشان حموريتكم الجيش كمان.

نتكلم عن المجلس و بعد كده نمسك الجيش !!!!؛

طنطاوي ، عنان ، السيسي ، مميش و غيرهم.

كلهم تعينات مبارك ، كان عمر سليمان و ما قبله ، السيسي و ما قبله ، بيتحروا عن كل واحد بيتم ترشيحه للإنضمام للمجلس العسكري.

يعني بالبلدي كلهم كلاب مبارك.

طبعا المجلس العسكري العظيم المتفائل ، أمن مبارك و عيلته ، سلم البلد للإخوان و حط خريطة الطريق الي إحنا بنفذها بالحرف الواحد.

بنتريق على اﻹخوان إنهم خرفان و لا مؤأخذة طلعنا كلنا خرفان!!!!.

المجلس أخد خروج أمن ، إتفاق تحت الترابيزة مع اﻹخوان و اﻷمريكان و ضرب على القفا للشعب.

إلي حب يطلع من المجلس و يروح ينام و هو مطمن ، يروح.

و إلي نفسه يكمل في وظيفة تحقق طموحه ، يتفضل يكمل.

فاكرين ، زماااااااان ، البنت إلي كانت لابسه سوتيانة زرقا ، إلي الجيش و هو بيضرب في الثوار اﻷطهار و خلعوها هدومها !!!!، أه نسيت إلي هدومها إتقلعت لوحدها.

و لا الراجل إلي كان بيعدي هو و بناته و حاولوا يدافعوا عن البنت إلي هدومها إتقلعت لوحدها ، إطحن هو و بناته و البنت إلي هدومها إتقلعت!!!!.

طبعا إلي كان بيطحن فيهم ، إخوان لابسين لبس الجيش، لاء كانوا حماس في لبس الجيش، لا يا روح إمك كانوا الجيش المصري.

و طلعوا علينا شباب الفيس بوق بحملة " عاوز اجوزك يا ست البنات " ، " كل بنات مصر إتعرت " و إلخ ، إشي برامج عن ست البنات ، إشي توكشوز.

بلاش ، بعد كده عند مجلس الشعب لما الثوار اﻷطهار طلعوا هناك ، كان فيه قوات خاصة من الجيش و لا قوات من المخابرات الحربية !!!!.

مش عارف بيفكرني بإيه مجلس الشعب ؟؟؟؟، أه كشف العذرية الي كان بيتم على إيد الجيش المتنكر ، لاء يا روح إمك الجيش المصري و المخابرات الحربية.

و هو مين إلي كان على راس المخابرات الحربية ، البطل الوطني المرموق، السكسي مان ، قصدي السيسي مان، زاي السوبر مان!!!!.

يعني هو أقل منه ؟؟؟؟.

أهوه السيسي مان كان إيد مبارك ، المجلس العسكري ، اﻹخوان و بعد كده إيد نفسه !!!!!.

لاء و المغفلين ، عاوزينه رئيس ، طيب ماهو قبل كده كنتم عاوزين زويل رئيس ، البرادعي رئيس و جبتوا مرسي رئيس !!!!!.

لاء و الجميل ، الشعب يأمره أن يكون رئيس مدى الحياة !!!!، يخربيت كده.

طيب جربوه مدة اﻷربع سنين ، عجبكوا حطوه أربع سنين كمان و أكيد بعد كده هييجي واحد يكمل مشواره !!!!.

المصيبة ، شيلتوا مبارك ليه؟؟؟، لما هتجيبوا واحد يقعد مدى الحياة و من الممكن التوريث!!!!.

طيب ما مبارك كان أولى ، عارفينه و معشرينه ، و ولاده كانوا راكبين الشعب!!!!.

هتقولوا إشمعنا بقول مبارك ، أصله طلع دكر!!!!.

إنتوا مش قلتوا مصر عاوزة " دكر " ، أهوه مبارك دكر مصر.

طلع يا عيني معندهوش غير معاشه، مأخدش حاجة من البلد غير البهدلة و المحاكمات و ده كله بشهادة أعضاء المجلس العسكري،

المخابرات العامة و المخابرات الحربية، و كله عشان الضمير و الشرف العسكري!!!!.

أما بالنسبة للجيش ، إلي هو ظباط و عساكر.

المجلس العسكري يقول شيلوا الشعب ، يروحوا شايلين الشعب على طول.

و إلا يطلع عين إلي خلفوهم ، محاكمات عسكرية و تقارير زاي الزفت من المخابرات الحربية و في اﻷخر السجن الحربي!!!!.

بذمتكوا أنهيه واحد يضيع نفسه عشان الشعب ؟؟؟؟.

ده غير الشرطة ، فاكرينهم ؟؟؟؟، بيضحوا بنفسهم !!!!، بيجروا ورا الخرفان إلي بيخربوا في البلد!!!!.

إنما أيام مبارك كان الشعب كله خرفان بيخربوا في البلد!!!!.

فعلا الثورة غيرت نفوس الناس ، بس أنهيه واحدة ؟؟؟، 25 يناير ، ولا ذكرى 25 يناير ، ولا مصطفى محمود ، و لا التحرير ، ولا النكسة و لا 30 يونيو.

سعادتكم إحنا بقينا كل يوم فيه ثورة جديدة!!!!، يعني مع كل تجديد في الثورة بيطير واحد!!!!.

25 يناير كنتم عاوزين البرادعي ، صباحي ، ايمن نور ، و بعد كده مع مرور الثورات طار كل منهم بطريقة أو بإخرى.

جبتم اﻹخوان ، عشان الفلول ميرجعوش ، و طار اﻹخوان ، و اصبح إوباما إخوان و إرهابي كمان.

ثم دارت اﻷيام و تجددت الثورات ، و عاوزين السيسي رئيس !!!!، يا ترى هتستقروا عليه و لا مع تجديد الثورات هيطير هو كمان.

و ربنا يسهل تجيبوا جمال مبارك رئيس.

كله في البطيخ ، ثورة جت ثورة راحت ، رئيس جه ، رئيس راح ، كله في البطيخ!!!!.

إقرأ المزيد... Résuméabuiyad GRAKOLLO

الأربعاء، 16 أكتوبر 2013

سيب البيت للصراصير و إهرب

هنعتبر مصر عبارة عن بيت كبير ، اربعة نوم ، ريسيبشن و عفشة مية!!!!.

بس للأسف البيت مليان صراصير ، كل الأحجام و الأنواع.

سعادتك ، هتروح منجعص ، واخد الموبايل من جيبك، و متصل بشركة مكافحة الصراصير العالمية.

هييجوا و معاهم كل المعدات اللازمة للقضاء على الصراصير ، و ينتهي عمل الشركة على خير ، ينصحوك بترك البيت تلت ايام و ترجع سعادتك و الحبايب و تعيشوا بروقان.

بعد تلت ايام ، سعادتك اخدت المدام و العيال و راجعين لبيتكم، و انتم داخلين بسعادة " هوم سويت هوم "، تحدث المفاجأة!!!.

الصراصير مبرطعة في كل حتة و كمان عاملين عزومة كبيرة لصراصير المنطقة.

سعادتك هتمسك الموبايل ، من غير انجعاص و تتصل بالشركة تتطلع عين ابوهم.

الموظف هيحاول يهديك ، سعادتك مش عاوز تهدا ، هيرد عليك بسفالة و هيقفل في وش اهلك السكة.

سعادتك هتروح القسم تعمل محضر ضد الشركة ، و بعد المحضر مفيش حاجة حصلت ، الصراصير لسة في البيت و سعادتك و الشلة بتاعتك إلي برة البيت.

تروح القسم و تحاول ، تتصل بالشركة و تتفاوض ، و برضوه مفيش فايدة سعادتك في الشارع و الصراصير متنعمة في البيت.

القصة ديه ، حال البلد!!!.

سعادتكم طالع عين الي خلفوكم ، عاوزين " عيش ، وظيفة و سكن "، طلبات عادية جدا ، تعتبر أ ب حياة.

و لكن صراصير مجتمعنا ، مستخسرة فينا ، أ ب حياة ، عاوزين كل حاجة و ملناش فيها اي حاجة!!!!.

سعادتكم بقى تقدروا تتخيلوا الصراصير هم الإنقلابيون ، الفلول ، البطيخ و حتى الناس.

كل واحد يتخيل براحتوه ، بس في النهاية ، هنسيب البيت للصراصير و نخلع؟؟؟.

ياريت يكون فيه حل!!!.

إقرأ المزيد... Résuméabuiyad GRAKOLLO

الأحد، 8 سبتمبر 2013

صراع الجبابرة ، شجب ، إدانة و إنكار

ما أجمل سنة 2013 ، سيبك من 13 ، لازم تتفائل!!!!.

نبتدي على بركة الله :.

بيقولك ، منصور يجتمع بمجلس الدفاع الوطني ، لبحث الوضع الأمني!!!!.

المتحدث بإسم الحرية و العدالة :

القضية الأن ليست في عودة الرئيس المعزول / محمد مرسي ، إلى منصبه مرة إخرى ، و لكن القضية الأساسية هي حماية مصر من الدخول في مرحلة الانهيار و عدم  إستقرار!!!!.


لغاية دلوقتي ، يمكن يكون فيه ربط بين الخبرين ، بس الخبر إلي جاي ، أكيد هيكون رابط.

شروط الحرية و العدالة ، للقبول بالهدنة!!!!!.

( حمزة زوبع ) ، متحدث الحرية و العدالة!!!!.

هو مش قالوا كل حاجة تتبع للإخوان إتلغت؟؟؟، و الجماعة بقت على قائمة الإرهاب !!!!، ماعلينا ، نشوف الأخ زوبع عاوز إيه؟؟، عشان محدش يقول مفيش ديمقراطية ، إرهابيين و ليهم طلبات ، و مصر كلها رهينة ، نسمع طلبتهم.
  • عودة الجيش لسكناته.
  • البحث عن شخصيات مستقلة عن التيارات السياسية تتولى إدارة البلاد في المرحلة الانتقالية.
الحج ( زوبع ) ، شايف الجيش ، عامل خسائر ضخمة !!!!، السؤال : هو الجيش نزل ليه؟؟؟، و بيقاوم مين؟؟؟ ، حد يرد على ( زوبع ).

ده غير كده ( زوبع ) مش مهم مرسي يرجع ، بس المهم إنهاء الإنقلاب !!!، طيب لو إنتهى الإنقلاب مش لازم ينتهي بعودة المنتصر / مرسي ، و لا هيسيبوا مرسي يتحاكم؟؟؟.

الحج ( زوبع ) ، لسه عاوز يطبق المطالب الفئوية للشعب  ، الخاصة بالحد الأدنى للإجور!!!!!، طيب هو مش سعادتك الأول توقف نزول مظاهرات التأييد للمرسي!!!، يوقف سعادته إحتلال الميادين !!!، يوقف سعادته القنابل إم ريموت كنترول!!!.

مش مشكلة كل إلي فات ، المهم الحد الأدنى ، و الجيش يرجع ، يولعوا في البلد ، يقتلوا شعب ، مش مشكلة حد!!!، المهم أوباما موافق ، و إم الشعب!!!!.

ده غير إن ( زوبع ) ، بيتخيل إن فيه قوة سياسية بتحرض الجيش ضد الجماعة !!!!، ( زوبع ) عايش في كوكب تاني خالص!!.

كل ده يطلع منك يا ( زوبع ) ؟؟؟؟؟.

نروح للدراع التاني للإخوان ، الدعوة السلفية ، ( ماهو كلهم سعادتك مكملين بعض  ، أنا المخ و إنت العضلات ).

الجماعة السلفية طلعت ببيان تقدر تقول كده ، مناشدة للداخلية.

يعني تقدر تقول :

" يا داخلية ، متقبضوش علينا ، ماليش دعوة ، أنا غلبان !!!!! ".

بص يا سيدي على بداية البيان :

أهابت الدعوة السلفية ، بوزارة الداخلية ، الإلتزام بالقانون و عدم اللجوء إلى إسلوب العقاب الجماعي و إنتهاك حقوق الإنسان للمشتبهين في الرد على عمليات التفجير.

ده غير إن البيان بيتضمن بعض النقط ، يعني أهمها :
  • العبوة الناسفة المستعملة ليست محلية.
  • إحترافية التنفيذ.
  • حسن معاملة الداخلية للمسجونين و المحتجزين.
  • رفض الدعوة السلفية لرفع السلاح.
  • أهابوا لكل الحركات الإسلامية بالتبرؤ من هذا الفعل.
  • الحل الأمني لا يكفي ، و لازم حل سياسي.
ده كان أهم ما جاء في بيان الدعوة السلفية .

كالعادة ، كلمة إستنكار و نرفض و نشجب ، سياسة قديمة مبقاش زمانها دلوقتي خالص ، خاصة إن الدعوة السلفية ليها تاريخ مع القنابل و التفجيرات و الاغتيالات.

ده غير إن كبارات الدعوة ، قالوا إن المراجعات إلي تمت للإفراج عنهم ، ديه تخيلات !!!!، أمن الدولة إخترعتها و أفرجوا عنهم!!!، بجد !!!، أمن الدولة كانوا هبل!!!.

ماعلينا !!!، سيبك من الكلام ده كله ، خد عندك:

( سليم العوا ) ، كلم الجزيرة و قال : " إن إتهام  تيار الإسلام السياسي ، أو جماعة الإخوان المسلمين بمحاولة إغتيال اللواء محمد إبراهيم ، وزير الداخلية ( شيء مضحك !!!)،  و أضاف  " العالم كله يعلم أن الاغتيالات إنتهت من قاموس التيارات السياسية في مصر ".

ده غير إنه شجب ، أدان و أنكر عملية إغتيال وزير الداخلية .

ده غير الأجمل ، إنه حذر قبل فض إعتصامي رابعة و النهضة من لجوء بعض الجماعات للعنف!!!.

طيب الدعوة السلفية أنكرت ، الإخوان أنكروا ، حماس أنكروا ، الهنود الحمر أنكروا  ده حتى هتلر طلع من قبره و أنكر!!!.

إمال مين؟؟؟؟، بس مفيش غيره ، هو الوحيد إلي يقدر يعمل ده و أكتر !!!!.

الطرف الرابع !!!!، أيون  الطرف الرابع ، هو ده الوحيد إلي لسه مأنكرش و لا شجب و لا أدان!!!.






 
إقرأ المزيد... Résuméabuiyad GRAKOLLO

الأحد، 25 أغسطس 2013

الجريمة السياسية

مع إختلافي الكبير جدا مع كل إلي بكتب عنهم ، و لكن !!!!!.

فيلم هندي ( الجريمة السياسية ) ، فاكرين حادث المنصة بتاع جمال عبد الناصر ، قائد إنقلاب 52.

هو 52 إنقلاب ؟؟؟، و لا ثورة ؟؟؟.

ماعلينا .

وقف في بلكونة في المنشية ، و قاعد بيخطب و فجأة رصاص إتضرب، مفيش في نفس اليوم كانوا الإخوان لبسينها مستريح!!!.

إشمعنا الإخوان ؟؟؟؟، مش فاهم الصراحة، و لكن قصة الإخوان كبيرة و كبيرة قويييييييييييييي، قتلوا النقراشي بعد مفيش من حل الجماعة!!!!.

جناح عسكري و سري ، و ياما فيه أجنحة منعرفش عنها أي حاجة.

المهم ، نفس القصة أيام مبارك لما طار ، لو بلاعة إتسدت في مصر ، يبقى مبارك و عياله و نظامه هم السبب!!!، لو عيل شرب سجاير من ورا أبوه ، يبقى مبارك و فلوله هما الإيد الخفية إلي لعبت في مخ العيل!!!!.

أما دلوقتي ففيه فرق ، كبيييييييييييييييييييييييييييييييييييييييير.

أي حاجة لبست الإخوان و مرغي، ( بلطجة ) إخوان ، ( سلاح ) إخوان ، ( رغيف عيش ) إخوان ، ............ إلخ.

معن سبحان الله ، أيام الانتخابات بتاعت مجلس الشعب ، أيام مبارك و فلوله ، كان فيه بلطجية و سبحان الله كانوا بفلوس و من غير!!!!.

كان ظابط مباحث المنطيقة ، يعرف كل المسجلين و أماكنهم و ...... إلخ ، بس الشعب و الشرطة إيد واحدة على طوووووووووووول.

أنا ضد العنف ، لما الإخوان سحلوا الشرطة في كليبات كتيرة على اليوتيوب، و الناس إتعاطفت مع الشرطة و المناظر الصعبة ، شعب بجد قلبه طيب.

معن نفس المناظر إلي الشرطة إتسحلت بيها ، كانوا بيعملوا أفظع منها في أي قسم، ده يا راجل كانوا الظباط بيتنافسوا على تسجيل براءة إختراع لأجهزة التعذيب، فيه منهم كان بيعتمد على تكنولوجيا العصر ( كهربا ، مية  ) ، فيه غيرهم كانوا بيعتمدوا على إستمداد أدوات التعذيب من العصور الحجرية و ما قبلها ( العروسة ، الخاذوق ، السرير الحديد ، القفص ) ، حاجات تفرح!!!.

فعلاً الشعب و الشرطة إيد واحدة و من زمااااااااااااااااااان، يعني واحد بيخترع مش يلاقي متطوعين للتجربة ، سواء متطوع أو غصب!!!، إيد واحدة إيد واحدة الصراحة!!!.

و من التغيير الكبير إلي بنشوفه ، براءة كل نظام مبارك ، و مبارك نفسه!!!.

قاعدين بتحاسبوه على قتل الثوار 26/27/28 ، إنما 30 سنة دم ، لاء عيب ، بتحاسبوه على هدايا من مؤسسات صحفية ، إنما عمولات و رشاوي و غيره لاء عيب ، مفيش أي دليل ، الراجل كان بيدفع من جيب ميراث أبوه على الشعب ، طيلة 30 سنة.

ده إنتوا شعب عاوز الحرق، بتتهموا عيال مبارك ، العيال إلي مبتفوتش فرض من فروض ربنا، الناس إلي كانت بتعمل خير في الشعب كله .

جمال الرجل الطيب أبو وش سمح ، إلي كان يمشي في الشوارع و هي فاضية، عشان الناس بتموت في قاعدة البيت لما جمال بيعدي، و لا أرزاق الناس إلي بتتقفل ، هو عشان راجل كريم كان بيعوض الناس على قعدتهم في البيت، الشرطة و الشعب إيد واحدة ، عاوزين تعويض أكتر من كده؟؟؟؟.

علاء ، ده إنتم محسسني إنه من الخلفاء، راجل طيب و في حاله، و بيصلي ، و مكانش بيشارك حد و لا بيدخل زاي الخازوق في أي حاجة،
ده حتى نكتة صاحب القهوة مكانتش لايقة عليه!!!!.

نرجع للحج جمال ، مكانش طامع في سلطة أبداً ، أبسيلوتلي!!!، و لا إتعمله مكتب خازوق كده في الحزب ، و لا كان بيمشي بحراسة و مأموريات من الشرطة ، و لا أي حاجة من الكلام الفاضي ده!!!!.

نيجي بقه لحبيب قلب  الملايين ( مبارك ) ، إيه مشكلته؟؟؟؟، كان طايح في خلق الله!!!!، و إيه يعني، شعبه و هو حر فيه ، يفرده يكويه، هو حر، مش إحنا إلي إخترناه و أدينا لبسناه!!!!.

ده غير ، شوية هو براءة ، الناس تغلي!!!!.
لاء مش براءة ، الناس تهدى ، شوية!!!!.
لاء ، ده تحت الإقامة المحددة!!!!، تطلع الرياسة تنفي!!!، يطلع الجيش يعترض!!!، ينزل من الطيارة في المكان الذي إختاره لتحديد إقامتهّ!!!!!.

يا سبحان الله، أول مرة أعرف إننا بنحترم حقوق الإنسان ، على إيد مبارك و عياله و جماعة الإخوان ( الكبار منهم في المركز).

أه ، حاجة تانية جميلة جداً، تساقط قيادات الإخوان ، حلو الإعلان ده، ده يا سيدي الفاضل لما جابوا إسمه إيه ده ، حجازي ، معرفتش شكله، إمال إلي مسكه عرفه إزاي؟؟؟؟؟، و إسمي قاعد قدام التليفزيون على طول ، يعني حفظت شكلهم أكتر من شكلي!!!!.

فيطلع علينا حبيب قلبي العكاشة و يقولك التالي :

عسكري في الكمين بيسأله فين تحقيق الشخصية ، ( حجازي ) إرتبك!!!!، كان شايل عدد 2 باسبور ، راح مطلع باسبور حجازي!!!!، بس خلصت الحكاية!!!.

يعني لو ( حجازي ) مرتبكش ، كان زمانه في ليبيا يقاتل أعداء الله ( شعب مصر )!!!!، و العسكري إلي مسكه كان بيعمله باي باي و يعديه الحدود !!!، بس هنقول إيه ( حجازي ) بيشخ على نفسه لما بيشوف عسكري!!!!.

إمال كان عميل لأمن الدولة، و بيتعامل مع عظماء أمن الدولة ، كان إيه، لما بيدخل الجهاز لابس بمبرز؟؟؟؟.

ده غير الحج ( المرشد ) ، يلبس النقاب ، يطلع على رابعة ، يقلع النقاب ، يخاطب الطيارات ، يلبس النقاب ، يرجع على الشقة!!!!.

بس سيبك من كل ده، حجازي و المرشد مع إختلاف الصالون إلي كانوا قاعدين عليه، إلا كان فيه حاجة مشتركة مابينهم ساعة تصويرهم، زجاجة المياه المعدنية ، و البتاعة التانية إلي شكلها عصير و لا زبادي سايب!!!!.

ده غير إنه لازم و هو بيتصور ، ياكل و يشرب ، و إلا مفيش حقوق إنسان!!!!، إستنى !!!، هو  حقوق الإنسان ، ساندوتش و علبة مش عارف إيه و مية معدنية؟؟؟؟، ده مين المتخلف إلي قال كده؟؟؟.

مش مكتوب في وثيقة الإمم المتحدة ، بند حقوق الإنسان ، ( علبة عصير ، مية معدنية و ساندوتش فلافل )، هو يعني على قد علمي البسيط ، حقوق الإنسان ( مراعاة الحقوق ، سواء في التحقيق بعدالة، حفظ الكرامة ، عدم التعذيب، ...... إلخ )، مفيش حد قال حفظ الكرامة بسندوتش طعمية ، و تطيييب خاطره بزجاجة مياه!!!!.

ما علينا ، لسه جداد في قصة حقوق الإنسان!!!، إيه؟؟؟، إستنى يا ريس!!!، هو مبارك أول لما وصل مستشفى المعادي ( مكان إقامته الإجبارية بناء على طلبه !!!)، جابوله سندوتش فلافل ، ميه معدنية و زجاجة مش عارف إيه، يا كفرة!!!، ده راجل متعود على العز، بس لو الساندوتش من الشيراتون!!!، يبقى حقوق إنسان ، حقوق إنسان.

و ياترى بقى، مع قصة حقوق الإنسان ، عرضتوا على شلة الإخوان مكان السجن، يعني يحبوا زنازين بحري، مطلة على منظر طبيعي، عساكر حراسة ألوان؟؟؟، حاجات من النواحي ديه!!!.

شكلكم إكتفيتم بأقل حاجة في حقوق الإنسان ، علبة مش عارف إيه و المية ، و الطعمية، إمال لو طلبوا علبة كشري و لا شوية فسيخ ، كنتم هتعملوا إيه؟؟؟؟.

إمال ماسكين طلعت مصطفى ليه لغاية دلوقتي، هو مش من حقه يطلع إعفا، و لا تسلية لعيال الريس؟؟؟.

يلا عشان ميحسوش إنهم في سجن، كل الحبايب قاعدة مع بعض!!!، إزاي؟؟؟، ده جزار أمن الدولة ( عبد الرحمن بااااااااااااشا)  طلع براءة، ليلة الشرطة مفيش غير ( العادلي باااااشا ) ، ( سرور ، عزمي ، الشريف ) براءة و ربنا يسهل هيختاروا مكان الإقامة الجبرية!!!.

إلي ملحقش إختيار الإقامة الجبرية ( نسيت إسمه ، بس هو السكرتير الخاص لمبارك ) ، مات و هو بين جدران السجن ، مش في الإقامة المختارة ( الله يرحمه ، لا شماتة في الموت ).

ده غير و غير و غير ، الجريمة السياسية طلعت حاجة صغيرة خااااااااااااااااااااالص ، جنب إلي في القلب إتجاه ولاد القلب دول، و بعدين إيه نهاية كل الأفلام ديه؟؟؟، عاوزين إيه؟؟؟؟، عاوزين مبارك و لا عياله و لا الإخوان و لا السلفيين ؟؟؟؟، مقدرش أقول المسيحيين للأسف ، إمال مين إلي هيداس في النصف؟؟؟؟.

كان نفسي أخلص بس إفتكرت حاجة ، المسيحيين!!!!.

يطلع علينا ناس ظراف و يقولوا ، ( إحنا بنعتذر للمسيحيين ، عشان هما إستحملوا الكتير الصراحة )!!!!!، يا سلام!!!!.

طيب سعادتك الحل إيه ؟؟؟، نسيب المسيحيين لغاية لما ينقرضوا من مصر ؟؟؟؟، نفضل نعتذر ليهم ، و نسيبهم يتقتلوا و يتهجروا و يتحرق كنايسهم، و في الأخر ( إحنا أسفين يا مسيحيين )!!!!.

لما يتحرق كنايسهم ، و طلعوا نفس ، يبقوا عملا و طابور خامس!!!.

لما يتقتلوا ، و يطلعوا نفس ، يبقوا عملا و طابور خامس!!!.

لما تتخطف بناتهم ، و يسلموا غصب ، و يطلعوا نفس ، يبقوا عملا و طابور خامس!!!.

لما يتهجروا ، و يطلعوا نفس ، يبقوا عملا و طابور خامس !!!.

يعني على طول الخط عملا و طابور خامس ، ده غير كفاااااااااااااااااااااار على طول!!!!.

إنما لما مش عارف في مالي و لا في أنهيه داهية ، كام مسلم إتقتلوا ، إوووباااا ، لازم نقتل مسيحيين مصر!!!.

بن لادن القوات الأمريكية قتلته و رميت جثته في المجاري ، إووووباااااااا ، لازم نقتل مسيحيين مصر!!!!.

سعادتك لو الأهلي خسر الكاس ، إووووباااا ، لازم نقضي على مسيحيين مصر!!!!.

بقى ده كلام؟؟؟، ماهقولكم إيه؟؟؟، لما إختصارنا حقوق الإنسان على ( طعمية، مية و علبة عصير )، هتيجي على حقوق مسيحيين مصر؟؟؟؟.

و يبقى الحال كما هو عليه، الجيش و الشرطة و الشعب إيد واحدة ، ماعدا مسيحيين مصر!!!!.

يا أخي أأأأ ..............................اااااااااااا.

 
إقرأ المزيد... Résuméabuiyad GRAKOLLO

السبت، 17 أغسطس 2013

مفيش إخوان غير في الفتح

الجيش و الشرطة محاصرين الإخوان في جامع الفتح، جميل مفيش مشكلة، القنوات كلها بث مباشر على جامع الفتح،  جميل مفيش مشكلة.

طيب و الإخوان إلي في باقي المحافظات، عادي مفيش مشكلة؟؟؟.

خبر ماشي على شريط الأخبار، الظواهري الأخ يشرف سجن العقرب!!!.

ياااه لسه فاكرين دلوقتي،  إن فيه ناس كان مرسي طلقهم علينا من كام سنة؟؟؟؟.

بس فالحين، لازم التحرك السريع!!!!،  لما كل حاجة بتتصلح بتاخد وقت، خطة طريق شكلها زاي مشروع النهضة!!!.

إمبارح على قناة النهار،  المزيع كان هيجيله شلل، لما سمع إن مندوب مصر في الإمم المتحدة ( إخواني)،  ياراجل، و مفيش حد حاسس باليلة ديه؟؟؟؟.

بلاش،  سفارتنا في بعض الدول الإوروبية،  بيحصل قدامها وقفات للتنديد بالإنقلاب!!! سبحان الله،  قال يعني السفير إلي جوه السفارة ميعرفش الناس إلي بره دول مين؟؟؟.

قال يعني خلال حكم مرسي و قبل مرسي سفير مصر،  راجل هلهولة مبيعرفش سفارته بتتعامل مع مين؟؟؟.

النهاية، طلع قرار بإعتبار الإخوان جماعة إرهابية، ده البداية.

نظف الخارجية لو عاوز صورة مصر تتحسن خارجياً.

نظف المحليات، النقابات، البلاعات، نظف،  عشان البقع السودة تتشال.

بنقول دلوقتي،  مصر كانت بلد سياحية ، دول الإتحاد الإوروبي بتوقف السياحة لمصر.

خراب بيوت مستعجل للألاف من عاملين قطاع السياحة.

منقدرش نقول شجع السياحة الداخلية، منين يا عمر، نأكل البيت، و لا نفسحه!!!.

قبل التفكير في تحسين الأحوال الخارجية و صورة مصر، فكر تحسين صورة مصر لأهلها الأول، و بعد كده الصورة الخارجية هتتصلح لوحدها.
إقرأ المزيد... Résuméabuiyad GRAKOLLO

الثلاثاء، 23 يوليو 2013

ميركل و مرسي

كلنا ، أو البعض تابع لقاء مرسي و ميركل و نظرتها التشاؤمية ، ده غير المسخرة إلي حصلت !!!!!.

و كمان تابعنا لقاء مرسي بالجالية المصرية و " الدرانج نوت درايف " أو ما شابه.

و على الناحية التانية من رصيف الاستقبال ، مجموعة من المصريين عاملين مظاهرة أو إعتصام على زيارة مرسي.

طبعاً الكل تنبأ بإنها زيارة زاي الخرة على دماغ مرسي!!!!، ده غير إن ميركل قالت إن زيادة الإستثمار الألماني في مصر يجب أن يتوافر ............... إلخ.

المهم،

دلوقتي في وقتما الحاضر ، ميركل بتطلب إطلاق سراح مرسي!!!!!، نعم !!!!!.

سبحان الله ، إمال مكنتيش طايقة نفسك ليه في زيارته ليكي؟؟؟؟.

ده سعادتك كان باين هتقلعي إلي في رجلك و تجري وراه، لولا الملامة!!!!.

نيجي للأهم، هو فيه أهم ؟؟؟؟، طبعاً ، أحب أضع الضوء على حاجات صغيرة خاااااالص، خاصةً الدماعة الأوروبية.

الجماعة الأوروبية هي التنظيم اولي للإخوان في إوروبا، بيتبعوا نظرية حلوة.

" العين الحمرا، تجيب ورا".

بص يا سيدي ، ألمانيا عندها النازيين الجدد، و هما على نفس درجة السلفيين في ألمانيا!!!!.

بمعنى ، دول متاعب و دول متاعب برضوه، ألمانيا فيها أكتر من 40 ألف  سلفي ، كلهم و الحمد الله تحت المراقبة، أما العدد الحقيقي للسلفيين في ألمانيا أكتر من كده بكتير بس ال 40 ألف دول هما وجع الدماغ.

طيب و إيه دخل السلفيين في الجماعة، بص ، الجماعة هي رئيس مجلس الإدارة و الباقيين أعضاء مجلس الإدارة ، فهمت!!!.

عند الألمان رؤوس كبيرة من التنظيم الدولي، ميجوش كتير زاي إلي في إنجلترا، بس فيه إختلاف !!!.

في إنجلترا الرؤوس هناك أغلبيتهم ناس راحت قدمت لجوء ، إتقبل ، أما في المانيا ففي كده و فيه أحفاد قدماء الإخوان!!!، و مش المانيا بس ، ده سويسرا ، فرنسا ، إيطاليا و النمسا.

المانيا تعتبر وحش الإقتصاد الإوروبي، فطبعاً وجود تنظيم هناك ، كان ضرورة قومية للجماعة.

واحد زاي إبراهيم الزيات ، إتقبض عليه عدة مرات، و لا إتثبت عليه أي حاجة.

إتقبض عليه بعد مراقبة قاسية، و لمدة طويلة، و أحب أضيف حاجة مفيش فيكي يا ألمانيا كمبيوتر و لا تليفون و لا حتى حمام زاجل غير و متراقب من المخابرات الألمانية ، ده غير إن المخابرات الالمانية حليف قوي جداً للمخابرات الأمريكية و غيرها.

و تخيلوا بعد كل ده و محدش عرف يثبت عليه أي حاجة، حلو مش كده.

أما المفاجأة لما مرسي وصل للكرسي ، تم رفع إسم إبراهيم الزيات من قوايم الترقب و أصبح ليه مطلق الحرية في الدخول و الخروج من مصر، و سلملي على المخابرات الالمانية.

حادة تانية، أعضاء التنظيم الدولي، غير الصيع بتوع مصر، دكاترة في جامعات عريقة ، مش زاي واحد بيشتغل في ناسا!!!.

رجال أعمال من النوع الضخم جداً جداً.

عارفين إن التنظيم الدولي حاول كتير إن مكتب الإرشاد يكون في ألمانيا ، على الأقل أحسن من مصر، لكن الجماعة في مصر إتصدوا للموضوع ده بكل قوة.

المهم، الدول الأوروبية تقلق جداً من طبقة رجال الاعمال، خاصةً الضخام جداً.

دولة إوروبية ، يهمها إن الفلوس تجري جواها، نسبة البطالة تقل و  السوق يشتغل و يكبر.

عارفين واحد في البطالة بيكلف الدولة كام؟؟؟.

سيبك من أعضاء رابطة البطالة المصرية ، دول بيدفعوا للحكومة عشان يعيشوا ، إنما بطالة إوروبا و خاصةً الغربية بتدفع للناس عشان الناس تعيش!!!، سبحان الله.

إحسب محتاج كام جنيه في الشهر عشان تعيش، و قول جوه نفسك الجنيه = اليورو ، يبقى برضوه إلي هناك محتاج كام يورو عشان يعيش.

بعد كده إضرب الحسبة بتاعتك اليورو = كام جنيه ، و ساعتها هتعرف العيشة الأوروبية نار يا حبيبي نار.

نرجع لحبايبنا بتوع التنظيم الدولي ، إتبعوا النظرية " العين الحمرا ، يجيبوا ورا"، تسمعوا كلامنا و لا ننقل فلوسنا؟؟؟؟.

تروح ميركل ناسية كل حاجة ، و تعتبر إن الجماعة هم جماعة ملائكية على الارض، و تنسى نظراتها لمرسي و تقول بصوت نعووووري " إطلقوا مرسي يا ولاد التيت " ، " الالمان و الاخوان إيد واحدة " و ممكن تعمل إعتصام في رابعة لوحدها.

إيه رأيكم في العين الحمرا ؟؟؟، مش كويسة برضوه ؟؟؟.

و لسه هتلاقوا " فرنسا و الاخوان إيد واحدة" ، إوروبا كلها و أمريكا و بعد كده العالم كله و مش بعيد الفاتيكان!!!.

ده غير إن حبايبنا المصريين المغتربين في إوروبا ، بيعملوا مظاهرات قدام السفارات المصرية تندد بالانقلاب و تتطالب برجوع مرسي، و أخيرها كانت في النمسا.

ماهم الإخوان من المصريين مش من زحل.

تسمع في الراديو العجيب ، المصريين في مصر نزلوا مرسي الارض، المصريين في اوروبا عاوزين ينزلوا المصريين الارض.

من الاخر اوروبا ، امريكا و العالم كله ، معندهوش غير مصلحته.

لو مصلحته مرسي يرجع ، هيعمل حروب و مرسي يرجع!!!، و لو مصلحته مرسي و جماعته يغوروا في ستين داهية، و يختفوا من العالم كله، هتصحوا الصبح ، هتلاقوا الجماعة في كتب التاريخ ، قصدي في مزبلة التاريخ. 
إقرأ المزيد... Résuméabuiyad GRAKOLLO

الجمعة، 19 يوليو 2013

إنتي فين يا رابعة

طبعاً ميدان الجماعة ، رابعة سابقاً ، محدش يتوه عنه أبداً.

و المعروف حالياً بميدان شهداء الرئيس ( فيما سوف يكون ) ، مرسي أفحم الله وجهه!!!!.

نحكي القصة من أولها :

في يوم من الأيام صحى الشعب على إختيار من إتنين ، ياإما فلول أو جماعة.

ناس راحت ورا الفل، و التنين راحوا ورا الجماعة.

بوووووووووووووم طاااااااااااخ طيييييييييييخ طووووووووووووووووخ!!!!.

أصبح بتاع الجماعة رئيس، و نعمة الرؤساء، راجل تقي ، بدقن و زبيبة صلاه قااااااااااااااااااااد كده.

المهم ركب مركب البلد، من السجن للكرسي الكبير، و أصبح مرسي قاعد على الكرسي!!!!!.

طلع علينا بخطاب و إتنين و تلاتة ، أغلبيتهم عظات دينية و مواعظ في الأخلاق الحميدة.

فضل يقول الصندوق و الشرعية ، و الشعب يرد:

" إم الصندوق على إم الشرعية "!!!!!.

الله !!!!، مش هو ده إختياركم؟؟؟.

يرد الشعب و يقول :

" إختيار الشوك و المهانة!!!!".

بلدي أصبحت خربانة، جيراني بمواردي فرحانة، و أنا بشحت القمة، لدرجة الناس بتبص عليا و تووووووووووووووف كمان.

يا إبن الكلب ده إنت بقيت بني أدم بمواردي.

ماعلينا ، طلع الشعب من هدومه، و بتاع الجماعة يرمي فضايحه و فضايح جماعته على الفلول و الزمن!!!!.

عاشوا في السجون ( ده التخيل ) ، و إتحكم على الشعب يعيش التجربة ، و بتاع الجماعة فاشخ ضبه و يقول :

" يعني أنا مش بني أدم و الشعب هم البني أدمين ".

إمك يا إستبن و إم جماعتك، الشعب هو إلي خرجكوا من السجون ، ووصلكم للكرسي.

نيجي للشاطر و هو شاطر ، إتعلم الدرس ، قالك :

" الكلاب تعوي و القافلة تسيير".

ساب الشعب يهوهوهو و هو في الجشع شغال ياكل و يشيل!!!.

ده غير كلاب الجماعة ، إلي بتتصنت على الشعب، و قاعدين يلفقوا التهم ، و أصبح الشعب في سجن كبير.

الجماعة محوطاه و بالهم وكلاه!!!!.

ثار الشعب تاني ، و قال " دين ........ الجماعة على دين .........الصندوق"، و طلبوا من الجيش ينزل و ينصر.

بعد مفاوضات و الذي منه ، و دخل فيها بعض الإتفاقات و المقابلات السرية جداً، و عشان المصلحة الشخصية ، نزل الجيش، و ساند الشعب!!!!.

خلصت الحكاية ؟؟؟؟؟؟.

لاء لسسسسسسسسسسسسسسسه، من هنا إبتدت الحكاية.

سيبك من كل إلي فات، أصحاب الجماعة ناس عندهم خبرة في البهدلة و السجون، تفتكر هيتهزلهم شعرة من شوية شعب؟؟؟؟.

لا يا سيدي يتهزلهم شعر لما ترفع عليهم الجزمة، و توريهم العين الحمرا!!!!.

زاي ما الجيش عمل في أحداث الحرس الجمهوري ، أنا ضد القتل .

بس لو الجيش أو السلطة عاوزة تهد المعبد على قيادات الجماعة ، و الذي منه مش هيكلفهم أكتر من ساعتين إتنين و كل الهيصة ديه هتروح لحال سبيلها.

عجبني واحد في التليفزيون ، و لا فاكر إسمه و لا القناة!!!، قال:

" لو الشعب عمل لجان شعبية إياها، و كل لجنة عارفة المنطقة بتاعتها، و عارفين مين إخوان و مين فلول و مين إيد رابعة، يرجعهم بيتهم و يبقوا تحت الإقامة الجبرية زاي رئيسهم".

و بكده الشعب يحمي ثورته!!!.

ياإما بقى نفتح باب الأمن الوطني ، و نرجعه زاي زمان، نرجع بطش الشرطة، نفتح المعتقلات، نرجعهم السجون و جحيمها ..... و بكده نخلص منهم.

بس يا ترى هنعرف نقضي على سرطان الجماعة، دول عاملين زاي الإيدز ، مالهمش علاج غير الموت.

حاجة تانية ، هما مش ناويين يجيبوا مرسي كده في القفص و هو منور كده بالبدلة البيضا و يرفرف حواليه مرشده و الشاطر ، و كلهم أبيض في أبيض ، دقن و سبحة و زبيبة صلاه، و تتحقق الرؤية ،

تكبيييييييييييييييييييييييييييير.

نرجع لميدان الرابعة، و هبل الإخوان في بهدلة المكان و سلاطة اللسان!!!.

عاملين تدريبات رياضية تفطس من الضحك و يقولك كتائب الإخوان!!!!، لابسين خوز موتوسكلات ، و عوامات إنقاذ، و فاضل المايوه و الترعة و تكتمل النكتة.

ربنا يكون في عون سكان الميدان و المنطقة كلها، إيه ذنبهم في الحصار الإخواني، ده غير التناحة إلي ليها ناسها، إشي مخازن تموين ، مطبخ ، دورات مياه ، ده غير الحكومة الإلكترونية!!!.

فاضل إيه ؟؟؟؟، مضيفات من سمير أميس للخدمة و لا أحسن من التوحيد و النور؟؟؟؟.

أما بالنسبة للخدمات الليلية، عندهم جهاد المناكحة، شيوخ مخهم متركب تحت و بس، سيبك بقى من الشرعية و الذي منه ، رابعة بقت أحسن من الهرم و جامعة الدول.

كله بشرع الله، أفلا تكبروووووووووووووووون!!!!.

أين أنتي يا رابعة؟؟؟؟؟.

 
إقرأ المزيد... Résuméabuiyad GRAKOLLO

الجمعة، 5 يوليو 2013

أين ذهب توفيق عكاشة


أين ذهب توفيق عكاشة

                            توفيق عكاشة مفجر الثورة , مفجر الشعب

                                                            مفجر الوطن و مفجر العروبة

                                                               من الضحك

إختفى كده هو و حياة , محدش يسأل عنه , و لا يدور عليه خلاص هانت عليكم العشرة؟؟؟؟.

الراجل فضل يتكلم كتير و لسنين، أصاب في البعض و أخطاْ في الكثيييييييييييييييييييير.

و لكن كان فيه معلومات كويسة، هي قليلة بس كويسة!!!.

و من ضمن المعلومات للتذكرة :

مرسي هيشيل السيسي.

إنزلوا ساندو الجيش, عشان الجيش ينزل.

كل ده مش توفيق عكاشة قاله؟؟؟.

بلاش و المليونيات إلي كان بيدعوا إليها و يجيلها عشرات الميات من الشعب.

كل ده و مفيش حد يقول يا دقتووور إنتى فين؟؟؟؟.

توفيق عكاشة تعرض لمؤامرة صهيوأمريكإخوانيبتنجانية.

دخل عليه مجموعة من الملثمين، و يمكن بجلاليب!!!!، و توفيق راجل مسالم، مشى معاهم على طووووول.

حياة طلعت رمت أخر رسالة للشعب و راحت جري ورا توفيق.

و إختفى توفيق و حياة و العاملين في الفراعين و الفراعين إكتوبر ، في ظروف غامضة.

                                  إختفوا فجأة!!!!!.

صحن طائر جه أخدهم كلهم و طلع على زحل!!!.

  •  طبعاً بعد فترة ، هيطلع علينا بنوره تاني و يحكي عن المؤامرة الشنيعة الفظيعة ، و رحلته هو و حياة و الطاقم إلى زحل!!!.

  •  طبعاً السيسي حضر صحن طائر ، بقوات خاصة ، و أرسلهم إلى زحل لتحرير توفيق و حياة.

  •  طبعاً إتقتل كل الملثمين أبو جلاليب.

و يرجع تاني مفجر الثورة و الشعب و العروبة

                                                            من الضحك

                                                                                إلى مسرح الأحداث.

                                                       و توتة توتة خلصت الحدوته .


                           توفيق و حياة



 
إقرأ المزيد... Résuméabuiyad GRAKOLLO

الجمعة، 21 يونيو 2013

هجوم شخصي على الدكتور

تحديث

كتبت الموضوع ده في 2011/06/14
و كان قصدي بالدكتور هو الدكتور / مصطفى الفقي.

أيون , و ساعتها وصلني كمية كبيرة من الهجمات المرتدة!!!!.

معن الدكتور مؤيد لسياسة الرأي و الرأي الأخر!!!.

بس لما شفت حلقة الحسيني و إنتقاده للدكتور، إتصال سريع من الدكتور شديد اللهجة، دفاع شرس!!.

المهم، ظهر من كام يوم تسجيل منسوب لحسني مبارك، و جاب الأخر من الدكتور.

راجل كل مشكلته الفلوس، و ده فعلاً، شراكته في الشركة الوطنية للغزل و النسيج، و ديه شركة مقرها الإسكندرية، و صاحبها إلي واخد الصورة الأمامية هو حسام نجيب.

نتكلم شوية عن حسام نجيب، واحد من عيلة ميسورة الحال، و لكن في فترة ما، مبقاش معاه فلوس، عادي ياما رجال أعمال فلوسهم بطير، و بعض رجال الأعمال فلوسهم بترجع، بس لما فلوسه ترجع بعد تربية شوية دقن و مراته تتحجب فيها كلام شوية.

المهم مش هطول عليكم و إنتم تقولولي طول، حسام إنضم للإخوان !!!!، أيون للإخوان ، هتقولوا ماإنت قلت إنه من عيلة ميسورة؟؟؟؟.

أيوة من عيلة ميسورة بس متستحملش إنهم يغزو أفريقيا بصناعة النسيج، ميسمحلهمش بمعرفة القوانين الخاصة بالغزل و النسيج!!!!.

و فضلت الدايرة تلف لغاية لما بان الدكتور من خلف الستار ، و طلع بهيئته البهية.

الدكترو كان ساعتها سايب الرياسة ، بس لسه في مجلس الشعب، رئيس لجنة العلاقات الخارجية، طبعاً كان عضو مجلس الشعب مستقل لا يتبع بتاتاً الحزب الوطني نهائياً.

لا بيتصل بجمال مبارك، و لا كان بيتصل بحد في الرياسة خالص، و لا كان بيدور على أدوار و لا حاجة!!!!.

بس جت كلمة مبارك في وقتها، و بصراحة فرحان إنه إتفضح، كفاية شعبطة و أخد أدوار، محسوب على النظام السابق مية في المية ، مصلحته الشخصية أولاً و بعد كده أي مصلحة تانية تكمل مفيش مشكلة ، البحر بيحب الزيادة.

سيبك من كل ده، شراكته في الشركة الوطنية للغزل و النسيج ، و طبعاً هيطلع مستشار للشركة في الغزل و النسيج، شراكة مع جماعة الإخوان، و لو حد شاكك في الكلام ده يروح و يسأل و يشوف.


لحم كتاف مصطفى الفقي من خير ريسه مبارك، سابوه يلعب و يكبر و ياكل الفلوس، لدرجة مبادلة السلع بالدهب من الدول الأفريقية، و طبعاً راجل وطني زاي مصطفى الفقي كان بيساعد مصر و علاقتها الخارجية مع دول أفريقيا، بس فيه مشكلة، هو مش الدكتور قال إن مبارك كان مهمل العلاقات الخارجية الأفريقية؟؟؟؟؟.

ماعلينا ، هيطلع حجة للموضوع، ماهو مشارك رئيسي في ثورة 25 يناير ، و ربنا يسهل هيسقط مرسي اليومين إلي جايين، و مش بعيد يكون في شراكة مع الجماعة إلي هتتولى شؤون الحكم بعد مرسي و جماعته.

بصوا لحياته و بدايته، و هتلاقوه شخصية متسلقة، تحتيها جثث كتير  قوي.

بيشتكي إن ذكريا عزمي كان بعبع، إمال سعدتك إيه ، ده كل إلي يواجهك تلسعه اللسعة إياها ميطلعش عليه صبح.

و حاجة للعلم ، مشكلته مع ذكريا عزمي ، بدايتها لما مصطفى الفقي حب يبقى رئيس ديوان رئيس الجمهورية و إبتدى يدعم نفسه و يلم الشلة حواليه، و أغلبيتهم من السكرتارية الخاصة لمبارك ، إلي لبسوا البجامة من بدري، و طلعوا على شاشات التليفزيون يشتكوا من مبارك و أفعاله، و يدعموا في دور مصطفى الفقي.

بس للأسف ، ذكريا عزمي دخل السجن، و مصطفى الفقي و الشلة قعدوا في التليفزيون يحكوا القصص عن مبارك و شلته.

مصطفى الفقي كان يشخ على نفسه لو مبارك شد الحزام عليه، و يروح يولول للناس.

زاي مامبارك بيتحاكم ، و شلته بتتحاكم ، و لو كانت المحاكمات مسرحية ، فكان لازم يكون من أبطال المسرحية مصطفى الفقي و الشلة بتاعته.

بس شكلها هتحلو و مصطفى الفقي قرب على المفرمة، بصراحة أجدع من مسرحية المحاكمات.

هنتفرج!!!، و هنشوف.

المقولة الأولى 

 (جيل ٢٥ يناير أخجلنا لأنه استطاع أن يفعل ما فكرنا فيه ولكن كنا نخشاه).

طيب ده إنت على كلامك كنت بتقول لمبارك إنت وحش في وشه، يبقى إزاي تخاف أو تخجل من إلي عمله جيل 25 يناير ، ده حضرتك من المقاومين للفساد المباركي من زماااااااااااااااااااااااان!!!، بس مكنش باين!!!.
طبعاً الدكتور  معروف للكل ، مفيش حد في مصر أو برة مصر ميعرفش الدكتور؟؟؟؟.

خاصة إنه من مؤيدين ثورة 25 يناير ، من زمان ، من قبل ماتقوم بفترة طويلة ممكن يكون مدعمها من ساعة لما كان رياسة الجمهورية؟؟؟؟.

طبعاً إختاروه في رياسة الجمهورية ، ك--------------- نظراً للكفأة!؟!؟، و مش للتقارير الأمنية خالص!!!!!.

و نظراً للشفافية إلي ماشي بيها على طول و طبعاً بقت منتشرة في مصر بعد 25 يناير ، حكى في كل حتة هو ليه مشى من رياسة الجمهورية ، و طبعاً بعد عمو (بوبع الرياسة) لما إتحط في السجن ، طلع إن (بوبع الرياسة) هو السبب في المكيدة الفظيعة إلي مشى بسببها الدكتور من رياسة الجمهورية.

و طبعاً كان فيه لقاءات مع حد من الرياسة و أكد إن الدكتور  كان مظلوم مع (بوبع الرياسة).

بس فيه حاجة تانية يا دكتور ، هو إنت كنت بتحب مبارك و لا كنت مبتحبهوش ؟؟؟، و لما (بوبع الرياسة) كان مطلع عين كل إلي في الرياسة (أغلبية روايات سواقي رياسة الجمهورية)، إمال كان مبارك بيستعين بيك في شوية ملفات ليه؟؟؟؟(أكيد معجب بتفكيرك العبقري) بس هو كان فيه حد أيام مبارك بيفكر؟؟؟.

بلاش ، طبعاً نجاحك في إنتخابات المجالس النيابية، الشعبية ، بعيد كل البعد عن مساعدات الأجهزة الأمنية و أكيد أمن الدولة إلي كان متحكم في الإنتخابات مدخلش طبعاً، حتى لو محصلش تزوير و أمن الدولة مش عاوز المرشح ده ، عنده مليون وسيلة للإستبعاد!!!. بس هنعمل إيه الإستبداد و التزوير بييجي لغاية عندك و يقف!!!.

بس ديه مش مشكلتنا ، المشكلة في معاهم معاهم عليهم عليهم ، قبل 25 يناير بدقيقة كنت مع مبارك، و بعد 25 يناير بيوم كنت مع الثوار!!!!!!!!!!!!!!!!.

و عندنا مثل مشهور جداً للي يزعل مبارك منه ، الدكتور -------------.

يعني لو (بوبع الرياسة) زعل منك ، كان بمنتهى البساطة هيخلي مبارك يزعل منك و يكون مصيرك!!.
طيب و بلاش كده إيه دورك في المجالس النيابية، الشعبية، و خاصةً ما يتعلق بالغزل و النسيج؟؟؟؟.

يعني مفيش حد خالص من حبايبك رجال الأعمال عملتلهم جمايل؟؟؟، مفيش أي حاجة عدت من تحت الترابيزة خالص؟؟؟.
ممكن أكون ظالم ، بس للأسف معتقدش.

أما المقولة الثانية 

لن تنضم لأى حزب سياسى ولن تمارس عملا سياسيا بعد اليوم، مضيفا: (سعدت بنجاح الدكتور -----، وكنت هازعل لو جاء مرشح هفأ كما أننى سأكتفى بالعمل التنويرى فقط).

بجد ربنا ستر يا دكتور، و مكنتش إنت الكسبان!!!.

ممكن أفهم ماهو العمل التنويري ؟؟؟؟، طيب لو رجال الأعمال (قصدي الشعب) ضغطوا عليك لتكملة المسيرة السياسية ، أكيد طبعاً هتتنازل تبعاً لرغبة الجماهير العريضة!!!.

المقولة الثالثة

(ولكن اليوم الثورة تغيرت وظهر أسوأ ما فى الشعب مثل الانتقام والتشفى والابتزاز والتخوين والإقصاء والاستبعاد).

حضرتك مسبتش لا مبارك و لا عيلته، و لا بعبع الرياسة إلا لما قطعت في فروتهم و فروة معارفهم ، هو حضرتك بتقول المقولة ديه لمين سعادتك؟؟؟؟، هو حضرتك سيبت أي حد عملك هش إلا و طلعت عينه!!!؟؟؟.

أما المقولة التالية فلا تنم أبداً عن أي حاجة ، نقدر نقول عليها مقولة عرضية إفقية ، سطحية ، أي حاجة !!!!!!.

(بعد وفاة حفيد الرئيس (الراجل فصل) وانخفض اهتمامه بالحياة السياسية).

طبعاً مقولة تخصص عمل تنويري ، ده حضرتك مبارك مش أي حد إلي سعادتك بتتكلم عليه ، حضرتك كنت شغال سكرتير عنده ، بس هنعمل إيه ؟؟؟.

بمعنى إن السكرتارية الخاصة كانت بتنعم بمميزات كتيرة ، بس طبعاً تبعاً لكلام سواقين رياسة الجمهورية ، ف(بوبع الرياسة) كان البوبع ، بس أنا مشفتش حد من السكرتارية، بمعنى أصح من أمانة رياسة الجمهورية طلع و إشتكى في (بوبع الرياسة) ، ممكن يكونوا راضيين عليه؟؟؟، أو خايفين منه جداً جداً حتى و هو في السجن ما إنت عارف حضرتك إيده طويلة، طيب تخيل لما أعضاء الأمانة العامة برياسة الجمهورية راضيين أو خايفيين، إمال سكرتير الرئيس لل------- يبقى عامل إزاي؟؟؟؟.

و عندنا مثال تاني لواحد كان برضوه في نفس منصب سعادتك، و برضوه كان بوبع الرياسة موجود، و  إتفرج راح فين ( م.ع ) ، ممكن نقله لأمريكا كان نفي من بوبع الرياسة؟؟؟.

و الكلام ده مش دفاع عن مبارك أو بوبع الرياسة، ده هجوم على الدكتور، بأمثلة كانت في نفس المنصب، و مفيش حد منهم لا زم و لا فتح بقه!!!!!. 

و طبعاً الرد المقنع (أنا من زمان بزم فيهم و في وشهم)، و بعد كده يطلع على مشوار حامل لرسالة من مبارك؟؟؟.

إنما الدكتور الشجاع ، ماهمهوش أي حد و إنطلق على البحري، ممكن التعود على التسلق ميزة، و لا عيب، مش عارف؟؟؟؟؟.
و ده هجوم شخصي على الدكتور ، معرفة قديمة !!!.


إقرأ المزيد... Résuméabuiyad GRAKOLLO

السبت، 1 يونيو 2013

حسين سالم تاني مرة

الموضوع ده قديم ، بس لاقيت إن موضوع حسين سالم ماااااااااااااااات ، كانت الأخبار كل يوم :

" سوف تسلم أسبانيا حسين سالم"،

" المحكمة أمرت بتسليم حسين سالم الأسبوع القادم "،

و بعدين بخخخخخخخخخخخخخخخ، كان أخر حاجة لقاء عمرو أديب مع حسين سالم ، ووضح التكاليف الرهيبة إلي بتدفعها الحكومة المصرية لتسلم حسين سالم، و بعد كده الحكومة دخلت نامت، و الفلوس أخدها طائر النهضة و طار.

المهم كان فيه مقال منشور على  المصري اليوم بخصوص حسين سالم أيام هوجة تسليم حسين سالم كمان ساعة ، لاء كمان أسبوع ، لاء كمان شهر و لا أقولك كبر دماغك و إنسي.

يكشف "حسين سالم" أسرار المخلوع ونظامه حيث أكد أن مبارك أراد تأمين سيناء من شر إسرائيل في إطار صفقة الغاز الطبيعي المصري وأراد أن يكشف الأماكن السرية التي دفنت فيها إسرائيل مخلفات مفاعل ديمونة النووي داخل سيناء إبان فترة احتلالها وعلى مدى 12 عاما .

وكشف "سالم" أن إسرائيل أرادت تدمير سيناء وما يمكن قيامه عليها من مشروعات فزرعت بداخلها على حد معلوماته التي حصل عليها من "مبارك" ألغام نووية أرضية لا يمكن أن تتفجر إلا بواسطة إسرائيل حتى ولو حدثت عليها هزات أرضية عملاقة،
 وقال:
" إسرائيل زرعت في منطقتين بالشرق الأوسط الغام أرضية في هضبة الجولان وفى سيناء وأن تلك الألغام لاتزال خفية لا يعلم مكانها أحد في مصر حتى اليوم ".



وقال "حسين سالم" إن مبارك رأى موافقة إسرائيل على التخطيط الهندسي المصري الذى تم وضعه بالمشاركة مع خبراء من إسرائيل لخط سير أنابيب الغاز المارة داخل سيناء سيكون تأكيدًا له على عدم وجود تلك الألغام أو مقابر النفايات النووية في الأماكن القريبة من التجمعات السكنية حول المدن التي يمر بها خط الناقل الرئيسي.
وعلى ذلك حصل على معلومات مؤكدة بلا ثمن لأنهم لو كانوا قد دفنوا الألغام أو النفايات النووية التي دفنت داخل مدفنين تحديدا حتى على بعد مائة كيلو متر من الخط فكان المفروض أنهم سيرفضون التخطيط لأسباب واهية أو هندسية غريبة وساعتها كان سيعرف أين الألغام أو المدافن تقريبا التي من المفترض أنها موجودة في الممرات والمحاور داخل سيناء .
 
وكشف "سالم" أن مفاعل ديمونة النووي المعروف لدى إسرائيل ويجد في مدينة ديمونة جنوب إسرائيل ويوجد صحراء النقب والذى بدأ عمله في الستينيات من القرن الماضي، لا يمكنه أن يتحول لمولد طاقة لإسرائيل لأنه لم يصمم لهذا الغرض وأن المفاعل أساسا يعمل منذ 40 عاما. وهو يعد أقدم مفاعل في العالم حاليا حيث علميا فقد صلاحيته منذ 20 عاما مضت.
وقال المفاعل يهدد مصر حاليا وحدث به 6 حوادث نووية كبيرة خلال الستة أعوام الماضية، ومبارك طلب تفسيرات ولم يعطه أحد أي معلومة سوى في عام 2010 قالوا له إن المفاعل سوف يتم تبريده خلال الثلاثة أعوام المقبلة.
 
وأشار سالم لأول مرة إلى أن إسرائيل جغرافيا لا تتحمل اكثر من مفاعل واحد كبير وأنها ستبدأ عام 2015 في بناء مفاعلها الجديد وسيكون من الجيل الرابع وسيبنى ليتحمل هزات أرضية حتى 9 ريختر على سلم قياسات الزلازل .
 
 
اكد "سالم" أن أرصدة "حسنى مبارك" وعائلته ورموز نظامه، وأرصدة "حسين سالم" شخصيا كشفت بالكامل للإدارة الأمريكية أولا ومن بعدها عدد من الدول الأوروبية كان على رأسها بريطانيا وسويسرا.
وقال سالم عقب أحداث 11 سبتمبر 2001 صدر قانون "العمل الوطني، باتريوت أكت " ، الأمريكي كلف الرئيس الأمريكي "جورج دبليو بوش" الابن جهاز "فاينانشيال كرايم اينفورسمينت نتورك" أو ما يعرف بجهاز شبكة مكافحة الجرائم المالية التابع للمخابرات المركزية الأمريكية "سي آى إيه" بتكوين فريق للبحث وراء مصادر تمويل الإرهاب في العالم .
 
 
وكشف "سالم" إلى أن هذا الجهاز اتضح له أن وزير المالية "يوسف بطرس غالى" كان يعمل لحسابه وأن "مبارك" كان يعلم بذلك.
وأشار "سالم" إلى أنه علم بتلك المعلومات من "مبارك" نفسه عام 2002 حيث أخبره يومها أن هذا الجهاز يراقب 2500 منظمة ومؤسسة مالية حول العالم في سرية تامة ، ويملك الجهاز حول العالم 45000 عميل وجاسوس يتجسسون لحسابه وأن الخطر على "مبارك" وأرصدته بدأ من ذلك الجهاز عقب توقيعه في 25 يونيو 2003 اتفاقية تبادل معلومات مع جهاز المخابرات البريطاني وأن الأثنين شكلا معا فرقة للتدخل المالي باسم فرقة "إف إيه تي إف" وهى الجهة الوحيدة بالعالم منذ عام 2003 وحاليا طبقا لمعلومات "حسين سالم" التي تملك كل المعلومات السرية عن أرصدة مصر المنهوبة وخاصة أرصدة "مبارك" ورموز نظامه .
 
 
وقال "سالم" إن "مبارك" استضاف في قصره عدة مرات أعضاء من فريق "إف إيه تي إف" الأمريكي وأنهم كانوا يحمونه وعائلته ومن يطلب بعلم من المخابرات الأمريكية نفسها كشف أرصدته بنظام "بي إي بي" وقال "حسين سالم" البند 312 من قانون العمل الوطني باتريوت أكت هو من خول للجهاز الأمريكي الكشف عن أرصدة كل مودع بالعالم ومن بينهم مودعو مصر باستثناء مودعي المصرف العربي الدولي الذى كان يترأسه "عاطف عبيد" رئيس وزراء مصر الأسبق وأن ذلك كان برغبة شخصية من "مبارك" نفسه. وفى مفاجأة من العيار الثقيل كشف "حسين سالم" عن مكان أرصدة "حسنى مبارك" وعائلته وقال:
 معظم أرصدة "مبارك وقرينته سوزان ثابت ونجليه ومن يعولان" تم إيداعها في بنوك مجموعة "ولسبرج" العالمية وهى مجموعة مكونة من 12 بنكا عملاقا لا تخضع للقوانين الأمريكية بموافقة أمريكا نفسها ولأسباب تخص الأمن القومي الأمريكي ".
 
وكشف "حسين سالم" أن أرصدة مصر قد تم تهريبها بداية من يناير عام 2010 وأن العمليات اكتملت من مصر في يناير عام 2011 بينما تمت بالكامل في يوليو 2011 من خلال تحريك أرصدة مصر المنهوبة من بنوك أوروبية وعالمية في أمريكا الجنوبية والجزر الفرنسية والبريطانية إلى بنوك تلك المجموعة وبنوك سويسرية بينها بنك فيجلين وبنك يو بى إس .
 
 
وأكد "حسين سالم" أن نصف ثروة "مبارك" موجود لدى بنك "ريجز" الأمريكي منذ عام 1994 .
وحكى "حسين سالم" أن البنك هو من بادر بالاتصال "بحسنى مبارك" حتى إنهم زاروه في مقر قصر الاتحادية بمصر وعرضوا عليه خدماتهم السرية وأقنعوه أن يحول أرصدته إليهم لما يتمتع به البنك من سرية الحسابات وعلاقة البنك المباشرة مع المخابرات الأمريكية المركزية تمنحه الحصانة أمام النظام البنكي الأمريكي فوافق مبارك على تحويل نصف أرصدته إلى بنك "ريجز" .
 
المثير أن أموال الديكتاتور الشيلي "أوجوستو بينوشيه" كانت المخابرات الأمريكية نفسها قد صادرتها في بنك  "ريجز" عام 1998 مما جعل "مبارك" يتأنى فى تحويل المزيد من الأرصدة حتى يوليو عام 2004 ففي هذا العام صادرت أمريكا بنفس الطريقة أرصدة الديكتاتور الغاني "تيودور وبيانج" ورموز حكمه.
فقرر "مبارك" تحويل أرصدته من البنك لكنهم أقنعوه أنه لديه حصانة خاصة من أمريكا ومنعوه من التحويلات بعد أن قدموا له تأكيدات مكتوبة وتعهدات عليهم .
 
أرصدة مبارك كشفها الرئيس الأمريكي "جورج دبليو بوش" الابن عام 2004 وجن جنونه وأراد عقاب بنك "ريجز" الأمريكي المقرب من الأجهزة الأمريكية فأوعز لصحيفة "وول ستريت جورنال" المقربة منه لنشر خبر عن "مبارك" يربطه ببنك "ريجز" حتى يحرجه.
بينما أمر بفتح تحقيقات سرية حول أرصدة "مبارك" في البنك بواشنطن وتمت إدانة البنك ولكن السلطات القضائية اكتفت بالتسوية حيث دفع البنك من أمواله الخاصة مبلغ 16 مليون دولار أمريكي كغرامة على إخفاء بيانات أرصدة "مبارك وعائلته" مقابل عدم تحويل القضية للمحكمة .
ويؤكد سالم أن الرئيس الأمريكى "جورج بوش" كان يكره "مبارك" بشدة وأنه فعل ذلك حتى يخبره أنه يعلم عن مبارك وعائلته ونظامه كل المعلومات التى يمكنها إحراجه بشدة وذلك حتى يصبح "مبارك" ومن معه تحت رحمة الإدارة الأمريكية التى كانت تحتاج لمباركته لغزو "العراق" .
 
وكشف "حسين سالم" أن نظام "بى إي إف بى" المعروف بالنظام البنكي المسمى "شخص أجنبي معرض للمخاطر السياسية" والذى تعمل به البنوك في العالم والمعروف في بريطانيا وأوروبا باسم نظام "بى إى بى" شخص معرض للمخاطر السياسية وهو نظام يمنح المودع على أساسه سرية أكيدة للحسابات ويمنع الكشف عنها هو نفسه النظام الذى كشف أرصدة عائلة "مبارك" التي لا تذكر مما كشف عنه حتى الآن في بريطانيا وسويسرا حيث يقول "سالم" إن تلك الأرصدة لا تساوى 1% من حجم الأرصدة الفعلية.
 
و فجر "سالم" مفاجأة جديدة حيث أكد أنه خضع في مايو عام 2011 ومعه كل أعضاء الحكومة المصرية وأعضاء المجلس العسكري المصري وجميع الوزراء المصريين وضباط الجيش المصري والشرطة من رتبة اللواء فيما فوق وقضاة مصر بداية من الدرجة الأولى مع كل رؤساء البنوك المصرية والشركات الكبرى خاصة الحكومية ورؤساء الأحزاب المصرية والمنظمات المدنية لعمليات كشف وتتبع للأرصدة من قبل أجهزة معلومات أوروبا وأمريكا التي أرادت كشف حقائق الأرصدة المصرية بالتفاصيل الدقيقة .
 
وقال "حسين سالم" لو بقى في مصر فاسد واحد يخفى أرصدة مما ذكرتهم لكانت أوروبا أول من تعلن عنهم الآن ، لأن النظام الأوروبي خاصة البريطاني في الكشف عن الأرصدة هو الأقوى بالعالم حيث يخول فرق البحث لفحص حتى مربيات الأطفال والسائقين لدى الشخص المطلوب البحث عن أرصدته المحتملة وقال سالم حتى المشير طنطاوي خضع للفحص الأوروبي والأمريكي.
 
وكشف "حسين سالم" أن الصعوبة حالياً في التوصل لأرصدة مبارك أن الأجهزة الأمريكية لاتزال لم ترفع حصانتها عن مبارك وعائلته ورموز نظامه القديم كاملا وأن بنك ريجز قد اندمج بداية من 16 مايو 2005 في بنك أكثر سرية وأقوى حصانة وهو بنك مجموعة "بى إن سي" المالية العملاقة بواشنطن وأن أنظمة تلك المجموعة يستحيل معها الكشف عن بيانات أرصدة مبارك وعائلته ورموز نظامه الذين قلدوه ووضعوا هم أيضا أرصدتهم في ذلك البنك .
 

 
تعليق بسيط عن المقال :
 
طيب حسين سالم يعرف الكثير و الكثير عن مبارك، و مصر دفعت مبلغ و قدره عشان تسترده و تمزمز في التحقيق معاه، و بعد كده الحكومة المصرية نامت في مية المخلل.
 
و لو المعلومات إلي في المقال سليمة ، يبقى عنده حق فريد الديب لما يقول " مبارك ملهوش مليم خارج مصر"، ما هو سرية الحسابات و عدم رفع الأجهزة الأمريكية الحصانة عن مبارك للأن ، اثبت يا معلم إذا كان ليه مليم برة مصر.
 
و بعدين أغلبية كلام حسين سالم مش ذم في مبارك بل على العكس ده مطلعه راجل وطني و داهية سياسية و إلخ............... .
 
حسين سالم برضوه بيقول إن في مايو 2011 مصر كلها إتعرضت للكشف عن حسابتها، طيب لما سويسرا طلعت قالت إنها جمدت أرصدة لمبارك و نظامه و مستنية حكم قضائي للتسليم و لم يحصل السويسريين على أي حكم قضائي!!!.
 
إنجلترا نفس الشيء حكم قضائي على مبارك و رموزه ، و لكن البخ هو إلي موجود.
 
هل المجلس العسكري هو السبب، الإخوان هم السبب، مبارك و ليلته هما السبب في تعطيل صدور حكم قضائي؟؟؟؟.
 
المهم المقال قدامكم، كل واحد يفكر فيه بطريقته، و يشوف اللعب وصل لغاية فين ، و الكلام ده قديم مش جديد!!!!. 

 
إقرأ المزيد... Résuméabuiyad GRAKOLLO