معلومات قليلة جداً إن الناس العادية تعرف إيه رياسة الجمهورية ديه ، عبارة عن إيه ؟؟؟.
كله عارف طبعاً ديوان رئيس الجمهورية ، و أكيد رئيس ديوان رئيس الجمهورية ( زكريا عزمي ) ، و في فترة قريبة إبتديت أخبار عن بعض رجال السكرتارية الخاصة تطلع ، و أشهرهم ( جمال عبد العزيز ) ، ( أبو الوفا رشوان ) .... وإلخ .
نمسك الموضوع واحدة واحدة و أسف إنه ممكن يكون طؤيل و ممل .
بالنسبة لزكريا عزمي ، كان بيتمتع ب13 إختصاص ليه لوحده ، بتبتدي من التصرفات المالية المقررة للوزراء لغاية تنظيم مأدب الريس – و طبعاً عشان زيكو رجل قوي فكان إلي مش من فريقه و تبعوه بيطير على طول بأي طريقة مش مشكلة إيه الطريقة إنما أهم حاجة الطيران ...
طبعاً أول واحد بيطلع على بوسطة الريس كان زكريا عزمي قبل ما تتحط في الشنطة و تروح للريس ، و بالنسبة للشنطة حاجة حكاية مصفحة و ليها شفرة عشان تتفتح ريس بقى . تخيل الشنطة ديه عشان توصل للريس ، لازم تمر على جهاز كشف المفرقعات و بعد كده تتمسح طبياً عشان الريس كان عنده عقدة من الفيروسات ، كل ده عشان البيه يقرا كام ورقة ، ملخصات زاي بتاعت منافستو الغش ، لإن الباشا الريس مكنش بيحب القراءة أصلاً.
نرجع تاني لموضوعنا هيكل الرياسة ، الديوان الرئاسي حاجة مهولة و عبارة عن 3 أقسام .
القسم الأول
ديوان رئيس الجمهورية و بيضم تحتيه 18 قطاع و مكتب و إدارة و قطاعات بتضم
مكتب رئيس الديوان
مكتب سوزان مبارك
مكتب المستشار القانوني
الإدارة المركزية للتحرير و الترجمة
الإدارة المركزية للتخطيط و التنظيم و التفتيش
الإدارة المركزية القانونية
مكتب شئون اللاجئين السياسيين
إدارة الإعلام
مساعد رئيس الديوان للشئون المالية و الأفراد
مساعد رئيس الديوان للشئون الإدارية
مساعد رئيس الديوان للشئون الهندسية
ديوان كبير الياوران ( ده الضابط أبو طقم حديد كتير على كتفه و بيمشي ورا الريس )
ديوان كبير الإمناء
إدارة الخدمات الطبية
الإدارة المركزية للعلاقات العامة
الإدارة المركزية للأمن
الإدارة العامة للطيران ( ديه عشان رحلات الطيران لموظفين الرياسة )
الإدارة العامة للجوازات
الإدارة العامة للمعلومات و التوثيق .
كل الإدارات و المكاتب ديه ريسها زكريا عزمي لوحده و بدون منازع ، و بالنسبة للعاملين برياسة الجمهورية عندهم مكتب سجل مدني خاص بيهم بس .
و كل أسرار الرياسة ، الميزانية السرية ، كل حاجة كانت في إيد زكريا عزمي بس بالإضافة من مهامه التانية ، إصدار و عرض القرارات الجمهورية ، هو الوحيد إلي بإيده ترتيب تحركات الريس جوه مصر و بره ، كل الزيارات الخاصة بكبار الزوار ، تجهيز أماكن الريس و الإستراحات و القصور الرياسية ، عرض أوراق الفرا الأجانب على الريس ، قرارات الريس بمنح الأوسمة و النياشين و قبولها ، مراجعة الأحكام القضائية ، تنسيق العلاقة بين وزارة الدفاع و القائد الأعلى للقوات المسلحة (عن طريق كبير الياوران)، بحث و دراسة الشكاوي و الإلتماسات ( بمعنى أي شكوى بتروح من أي بني أدم في مصر كان إلي بيحلها زكريا عزمي ) ،و مسئول عن شرا عربيات الرياسة .
القسم التاني من الرياسة
مكتب رئيس الجمهورية ، و ده مكون من عدة قطاعات
قطاع الإتصالات
إدارة تأمين و تشفير إتصالات الريس و كبار رجال الدولة
قسم الصحافة ( بيلخص الأخبار و يكتبوها في شكل كروت و كل كارت فيه عنوان الخبر و إسم الجرنال إلي كتبه و تتحط في ظرف مقفول و لو لفت الريس الخبر بيطلب الجورنال عشان يقرا الخبر كامل و ده لو ) !
إدارة الرقابة و المتابعة .
القسم التالت في رياسة الجمهورية
و القسم ده أهم واحد في كل الليلة ديه قسم السكرتارية الخاصة و برضه بتتقسم ل3 قطاعات
أمن رئيس الجمهورية و ده بيضم 3 إدارات
إدارة أمن المقرات و أمن الرياسة
دايرة حراسات الشرطة
إدارة الحراسة الخاصة
قطاع الشئون الإدارية و المالية ( مسئولة عن أكل و سكن الريس و عيلته و أي حاجة عوزينها ) إدارة الطلبات بمعنى أصح ، أو بمعنى تاني إدارة إحلم تلاقي !!!.
و ديه تقسيمة المكاتب و الإدارات و القطاعات جوه رياسة الجمهورية ، بمعنى أخر دولة جوه الدولة ليها ميزانيتها الخاصة جداً جداً ، العاملين ليهم معاملات خاصة جداً و ليهم قوة سلطة غير عادية .