الحمد الله مصر كلها بقت تتكلم في السياسة ، يعني كان لازم تحصل ٢٥ يناير عشان الناس تعرف السياسة ، و لا كانت أمن الدولة السبب؟؟؟؟؟.
حلو الموضوع ده ، بس للأسف الكل بقى يعرف السياسة و نسى يعرف معاها إقتصاد ، عشان تبقى سياسة و إقتصاد ، حتى الكلمة مبلوعة.
جميل النمو السياسي ، و الفظيع أكتر الهبوط الإقتصادي ، و الأجمل من كده عضو في المجلس العسكري إجتمع مش عارف بمين عشان يعرف قدرة الإقتصاد مع توقف الإنتاج !!!!.
معناه إيه الكلام ده ، الأسعار في العالم بتطلع لفوق و مبتنزلش تاني ، و الناس في العالم بتصوت من الغلو ده ، و إقتصادهم شغال و عجلة الإنتاج شغالة.
إمال في مصر الناس مع الإقتصاد الواقع وصلوا لفين ؟؟؟؟ ، تحت الأرض ؟؟؟؟.
إمبارح دخلت على موقع إطلب دوت كوم ، عشان أسترجع ذكرياتي مع شكل الأكل المصري ، و مع الشكل أفتكر الطعم كمان ، و أعرف إيه الأماكن الجديدة إلي فتحت ، و الأسعار كمان حب معرفة ، لاقيت أسامي كتيرة و أشكال أكل تخليك تجوع من منظرها ، و أماكن قليلة جداً من أيامي و أماكن كتيرة جداً مابين المتوسطة و العالية .
المهم بعد كل اللت ده ، شفت الأسعار .... أن ... أن .... ان ..... ااااااهههه.
أخدت حتة صدمة ؟؟؟؟ عجيبة جداً جداً !!!! ، إيه إلي حصل ؟؟؟.
گيلو الكباب و الكفتة ب١٠٠ جنيه ليه ؟؟؟؟ ، بتتكلم ؟؟؟ ، و لا بتاكل نفسها ؟؟؟؟ .
طبق الشوربة ، إلي هي عبارة عن شوية مية و مكسبات طعم في مطعم إسمه معووج شوية بمبلغ و قدره .
بلاش عرفت ليه إشاعة وجبة كنتاكي ، لإن الوجبة العائلية أصبحت حلم لإسرة نفسها في الوجبة ديه ، عاوزين يحوشولها لفترة !!!!.
إمال سندوتش الفول و الفلافل وصل بكام دلوقتي ؟؟؟ ، أخر سعر ممكن أفتكره ممكن يسبب جلطة فكرية للبعض !!! ، كان ب ١٥ قرش ، أه و حضرته لما غلى قوي ووصل ب٢٠ قرش ، و حضرت برضه إرتفاع كان قاسي جداً لسندوتشات الشعب ووصل لمبلغ قياسي جديد ب٢٥ قرش .
و لو إتكلمت على أسعار الكباب و الكفتة على أيامي فيه ناس ممكن تضرب نفسها بالنار .
يا ريت الناس تدور على الإقتصاد جنب السياسة ، و إلا الله أعلم الأسعار ممكن توصل لإيه ؟؟؟ ، إحنا عندنا ناس كتيرة جداً تحت خطوط الفقر ، مش خط فقر واحد ، لما بتدور عجلة الإقتصاد الخير بيعم على الكل .
و ياريت نعمل حظر ثوري على السياسة ، و نجعلها سياسة و إقتصاد !!!.