مين ده ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

أنا لغاية دلوقتي مش قادر أتخيل بجاحة بني أدم زاي ده . هو كان بيتكلم مع مين ؟ هو الراجل ده سمع أصلا أي هتاف كان بيتقال ؟ 

أو حد طيب كتبله ملخص للحصل و نسى يكتبله إن الناس عاوزاه يمشي ؟ ممكن الفكرة ديه تمشي مع إسلوب البيان أو التهييس إلي إتقال ده واحد من البهايم إلي حواليه كتبله الملخص المعتاد عن حالة الشعب العميل و أكيد حكاله بإسلوب مجازي بسيط عن أسباب المشكلة و في الأخر خاف يقول المطالب فإستشهد و قاله الناس زعلانة من الحكومة و بيبوسو رجلك خليك قاعد على قلبهم بلاش تمشي من غيرك الشعب هيتيتم ممكن ده ؟؟؟؟ طيب و لو ممكن مبيشوفش تلفزيون !!!!! ، مفيش أي رئيس دولة إتصل بيه و قاله عندك مظاهرات و الناس مش عوزاك !!!!!!!!!!!! بجد مش عارف التهييس إلي إتقال ، مخليني بجد مش فاهم أنا شكلي أنا كمان بهييس !!!!! بس هخلي الفيديو ده عشان كل يوم أشوفه و أحس إني مكنتش بهييس ، عندي بجد قاموس شتايم كتير عاوز أقوله بس للأسف مبطلها بقالي فترة زاي السجاير كده مش عاوز أرجع تاني !!!

و بعدين قبل التهييس ده كان فيه تهييس عالمي سبقه ، أنا حاسس إني إتجنيت ، أنا قريت على الويب يمكن أغلبية الجرايد الإوروبية و كانت كلها كلام يعني زاي الفل ،  ( نظام إستبدادي ) ، ( ديكتاتورية ) ، ألفاظ كده كانت تفرح لدرجة إن جرنال ألماني شهير جدا قال 

" إنه المفروض يفوقوا من تدعيم النظام الإستبدادي " ، و بعدين كام ساعة يمكن أغلبية الأنظمة في العالم بتطالب السيد الرئيس........ إلخ ،  و نظامه نظام جميل و فل وورد و ملايكة و جنة ديه حاجة حلوة خالص ،  بجد بجد الناس مقصرتش نهائي بس حسني مبارك شكله أطرش أعمى قلب و عين ، مخه بهيمي مبيقدرش يستوعب  ، بجد مش عارف ، بس الجميل في كل ده إن يمكن الناس إلي بتفهم في العالم أكيد فهمت نظام مبارك الفاشل ده عبارة عن إيه ؟ بتعديلات إقتصادية و سياسية و بتنجانية و فراخ مقلية و

إقرأ المزيد... Résuméabuiyad GRAKOLLO

يا رب يارب

بجد فرحان جدا لأول مرة من سنين طويلة أبقى فرحان بالمنظر ده . 

أخيراً الناس قامت ، أخيراً بقينا إيد واحدة . 

كان نفسي أكون موجود حتى لو كان أخر يوم في عمري حتى لو في النهاية خلص الفوقان ده و كل واحد روح بيته .

كان نفسي أشوف المنظر ده من زمان جدا . 

و فعلا لو كان فيه ناس أنا أعرفهم شخصياً و للأسف كلنا كان لينا نفس المصير بس للأسف مجموعة مننا كان ليها مصير تاني ، راحت من غير ما حد يعرف عنهم حاجة على إيد النظام الفاشل ده و للأسف برضه محدش يعرف حتى هما مدفونين فين لكن كانت الأخبار الأكيدة إنهم ماتوا على إيد نظام فعلاً فاشل . 

و لو كانوا موجودين دلوقتي مش هقدر أوصفلكوا قد إيه كانوا هيكونوا فرحانين بالمنظر بس ، و فعلا مش عارف أقول إيه بس لو مسموح ليا أنا بشكركم بالنيابة عن زمايلي و إخواتي .

التكاتف ده أكيد هما شايفينوه دلوقتي من مكان ما زاي ما أنا و إلي فاضل شايفينوه .

و بجد فعلا أنا بتوجه بالشكر لكل من وجه شعب إنه يتكاتف بالمنظر ده و أكيد هيجي اليوم إلي الناس تعرف حقيقة خافية عن ناس كتير جدا ، عن وجه نظام ليه أوجه كتيرة قليلة جدا هيا الناس إلي تعرف الوجه الحقيقي للنظام الفاشل ده .

و أتمنى فعلاً لكل واحد أو واحدة إنهم يوصلوا للهما عاوزينه و ينزل النظام الفاشل ده من قلعته الحصينة و الكل يعرف الوجه الحقيقي و الأسرار المدفونة و إلي ماتت ، بس الظلم مش ممكن يموت و حق المظلوم لازم هيرجع مهما طال الوقت ، و مصير شهداء نظام فاشل مظلومين لازم في يوم من الأيام يتكرموا و فعلا نهايتك يا ظالم أخيراً جت و على الأقل ديه البداية شكرا ليكوا كلكم و فعلاً من كل قلبي بقول يارب يارب .

إقرأ المزيد... Résuméabuiyad GRAKOLLO

الفتنة الطائفية

الظاهر أنا بقالي فترة طويلة جدا بعيد عن مصر و البركة كلها تعود للنظام الفاشل ، من فترة طويلة جدا فكرة إنت مسلم و إنت مسيحي مش هقدر أقول مش موجودة ، أكون أكيد كداب بس يعني كانت حياة عادية موجودة و من فترة طويلة بس كانت مش ظاهرة بالشكل ده ، و لكن الغريب إلي إحنا فيه دلوقتي .

إيه إلي حصل ؟ نفسي أعرف ! كنا كلنا واحد فعلا ، و برضه كان فيه فتنة طائفية إلي هيا تحت مسمى الإحتقان الطائفي ، الأصحاب كانوا واحد مسيحي مسلم مفيش مشكلة ؟ لاء كان فيه مشاكل كتيرة ، بس كانت تحت السجادة من زمان ، في البيوت إوعى تاكل مع المسيحي ، متلعبش مع المسيحي ، حتى البنات كانت النصيحة ليهم متقلعيش هدومك قدام صحبتك المسيحية ، و كإن مرة واحدة كده حصل تغيير !!!!! ، طيب ماشي و أسبابه إيه بقى التغيير ده ؟؟؟؟– مفيش شغل؟؟ – مفيش فلوس؟؟ – مفيش سياسة عادلة ؟؟ ، حاجة تانية خالص يإ ما متشددين جدا يا إما منحرفين جدا !!! مفيش وسط أبدا وبعدين كل حاجة طبعا مرمية على الموساد !!! هو الموساد مخترق مصر على مستويات عالية بس ده من زمان مش حاجة جديدة ، و بعدين البلد متهلهلة و نظام مبارك كان و مازال نظام عتيق و فاضل بس عشان الأمن شغلته الوحيدة المحافظة على العيلة الرئاسية بس إنما فاضي من جواه و إسرائيل عارفة كده كويس ، يعني ممكن تضرب النظام ده بمنتهى السهولة و تقدر تقضي عليه بس ليه ؟ النظام ده أو مبارك نفسه أحسن من إلي هييجي غيره ، و ماشين بمثل إلي تعرفه أحسن من إلي متعرفهوش ، أنا مبدافعش عن إسرائيل بس مش كل خيبة عندنا نقول أقرب شماعة فين و أخاف أن أقول النظام عندي هوا إلي غلط . و بعدين الجديد حزب الله !!! و بعدين المد الشيعي و المخابرات الإيرانية ، و الإخوان المسلمين و ده من زمان ، جميل طيب الإخوة إلي طلعوا بمظاهرات ضد البابا شنودة كانوا قاعدة ولا مد شيعي و لا موساد و لا مخابرات إيرانية و لا إيه ؟؟؟!!! ، لما المسيحيين من زمان ساكتين نضرب فيهم و ساكتين و نرجع نقول لاء مفيش حاجة أله كده فيه حاجة غلط ، زاي كده لما الإخوان المسلمين بقوا كخة دلوقتي معن كل نظام من الأنظمة إلي مش كتير إلي مرت علينا كانت لازم تاخد بركة الإخوان المسلمين دلوقتي بقوا وحشين و مجموعة محظورة .

المستفيد الوحيد من الإحتقان الطائفي هوا مبارك و الشلة ، زاي زمان كان لما ييجي يرفع ضرايب أو يصدر قانون جديد كان يرفع سعر البنزين ، يرفع سعر العيش أي حاجة تلهي الناس في حاجة يعني أفتكر في مرة كان فيه قانون للجمارك على ما أعتقد و رفع سعر البنزين في نفس يوم صدور القرار و أفتكر إن كان فيه زحمة كبيرة على محطات البنزين عشان تاني يوم البنزين هيغلى ، يعني الناس كانوا كل فكرهم في زيادة البنزين و بس ، إنما في حالة صدور أي قانون مش مشكلة ،  و بعدين إحنا داخلين على إنتخابات رياسة الجمهورية فلازم يكون موضوع اللهي أكبر بقى من موضوع غلو البنزين حاجة كده تشغل الناس جامد جدا و في خلال الإنشغال ده يغيير حاجات مهمة مش واخدين بالنا منها المهم كل ده بيكمل موضوع الطائفية بمعنى إنتخابات مجلس الشعب إلي فاتت يعتبر مجلس الشعب كله حزب وطني يعني مفيش أي نوع من المعارضة خاصة ممكن أي قانون دلوقتي يطلع من غير ماحد يتناقش و طبعا كالعادة موافقون ، فلو الناس فاضية هتسمع و تشوف كل حاجة و تعارض و كمان ممكن يقوموا على النظام ده لإنهم عارفين طبعا إن الناس كارهه النظام ده فمكانش قدامهم غير الضرب على نقطة الدين أهم نقطة في الجنس المصري بالذات .

لدرجة إن واحد من الناس هنا بتكلم معاه عن أخر الأحداث في مصر فقالي فاضل حاجة و فعلا مصر تقوم بفتنة طائفية كبيرة مش هيقدر نظام مبارك على صدها و ساعتها بقى أي نظام معارض لمبارك إلي عاوزة فتنة طائفية فعلا يضرب جامع و تعلق في العربية أو المنتحر صليب و فعلا ساعتها هتقوم مجازر و نظام مبارك ساعتها مش هيقدر يعمل أي حاجة غير إنه يايقتل الشعب كله ياإما ينتحر و أنا عن نفسي أتمنى التانية ديه جدا .

و لكن المهم هوا سياسة الإلهاء الناس تفضل عايشة في عالم تاني خالص غير الواقع و الناس راحت للتخطيط ده و فعلا أحيي مبارك و أعوانه إنهم فاهميين عقلية شعبهم  ، إيه إلي ممكن يجمعهم و إيه إلي ممكن يفرقهم و عمرهم مافكروا إيه إلي ممكن يريح الناس ، و عشان نظام فاشل فشكله نسى إن فيه ناس غير الشعب خالص قاعدة مستنية غلطات النظام الفاشل ده فأصبح فكر التأمين جوه البلد بس و بطلوا قصة بره البلد خالص حتى الشبكات الجاسوسية و المخابرات العامة و القصص الفاشلة بقت بالصدفة ، و الأجمل من كده دعاة التغيير مصدقوا حاجة حصلت و فتحوا على الأخر ، طيب كنتوا فين من زمان و لا مستنيين لما ملف يتفتح تاخدوه ، و قبل كده يعني ملف الفتنة الطائفية او الإحتقان الطائفي حاجة جديدة محصلتش قبل كده ، فعلا بقالي فترة طويلة بعيد جدا و فعلا فيه حاجات كتيرة فاتتني بجد أسف .

إقرأ المزيد... Résuméabuiyad GRAKOLLO

نفسي أرجع لبلدي

نفسي أرجع بلدي ، نفسي أشوف أصحابي يا ترى فكريني بعد كل السنين الطويلة ديه ، نفسي أتمشى في الاماكن إلي كنت بمشي فيها ، عارف إن الدنيا باظت عارف إن كل حاجة إتغيرت عارف إن ناس زمان غير ناس دلوقتي ،  نفسي أرجع بلدي ده مش عشان أنا وطني و الكلام الفاضي لاء ، أنا عاوز أشوف أهلي و ناسي و أصحابي و إلي فاضل من إلي فاكره هما دول بلدي ، إنما غير كده معرفش حد و أكون بكدب على نفسي قبل ما أكون بكدب على حد تاني .

بس للأسف لا الديكتاتور و لا كلابه هيسيبوني و لو يوم واحد ، و أكتر حاجة نفسي فيها هوا نهاية الديكتاتور و كل أشكاله و كلابهم معاهم و مينفعش أقول إلى مزبلة التاريخ لإن دول هما التاريخ القذر لفترة طويلة و كمان المزبلة إتملت و يمكن يجي اليوم إلي ميذكرهمش التاريخ . 

إنما إزاي و إلي هيجي بعده لازم يكون من تلامذته يمكن كمان يتعداه في طغيانه كلهم كلاب مع الإعتذار للكلاب لإنهم اوفا من البني أدم ، و ممكن يكون إحساسي غلط إن مع نهاية الديكتاتور أقدر أرجع بلدي على الأقل زيارات ، لكن لو جه إلي بعده منهم مش هقدر حتى أفكر بالزيارة و لا بالحلم في زيارة ، بس يمكن لو الديكتاتور راح يمكن تكون راحة ليا  ؟؟؟ يمكن ؟؟؟ معرفش ، لإني فعلاً تعبت جداً .زهقت من الهروب بقى ، نفسي الرسالة بتاعتي توصلك . 

إقرأ المزيد... Résuméabuiyad GRAKOLLO

مع الإعتذار الشديد للحيوان بجد

نفسي أعرف حاجات كتيرة بجد هوا الحيوان إلي ربنا خلقه حتى المتوحش منه عنده رحمة ، جميل جدا طيب الإنسان إلي ربنا خلاقه على أحسن شيء و عطاله أجمل المكونات من تركيب في الخلايا و العقل و الأحاسيس و النظام الدموي ( الغير مةجود حالياً) بس إستغفر الله العظيم نقص من البني أدم الرحمة . الصورة إلي قدامكم ديه ده يرضي ربنا !!!!!! ده يدل على إيه ؟؟؟؟؟ هوا ده الجهاد في سبيل الله ، هوا ده الشكل إلي الناس ديه هتدخل بيه الجنة ؟؟؟؟؟ نفسي حد يجاوبني الناس ديه مصنوعة من إيه ؟؟؟ و إيه ذنب الست ديه ؟؟؟
مين فينا قبل ما يتولد إختار شكله و لا عيلته و لا دينه ؟؟؟ مين نصب الناس ديه إنها تاخد حق الله ؟؟؟ هل ربنا عاجز إنه ياخد حقه ؟؟؟ هل ربنا هيعتمد على الوحوش ديه عشان تاخد حقه ؟؟
كل مشكلة الست ديه إنها مسيحية بجد مشكلة فظيعة كانت لازم تمةت بالبشاعة ديه . طيب حد يقولي بجد لو الست ديه دخلت الاسلام كانت هتدخله ليه ؟ عشان أمنت برحمة الاسلام و لا عشان كانت خايفة من الموتة بالمنظر ده !!! أنا أحييها و أتمنى ليها الرحمة لإنها ماتت و هيا على المعتقد بتاعها و أصبحت ليست ضحية بل شهيدة أيوة شهيدة و السبب عدم رحمة البني أدم ( ما إخذ بالسيف ، بالسيف يُإخذ ) حرام فعلا الرحمة بقى كفاااااااااية ظلم ، و في الاخر بتقولوا نظام مش عارف مين ظالم ، ده إنتم إلي ظلمة و ربنا بيرد عليكم الظلم بيديكوا حكام طغاة يستعبدوكوا و يستعبدوا عيالكم و ياخدوا فلوسكم من غلاظة قلوبكم ، إرحموا بعض يرحمكوا إلي في السما ، و لكن بتكلم مع مين بتكلم للأسف مع بني أدمين مش هيفهموا و لكن لو إتكلمت مع الحيوانات كانت فهمت و فعلاً مع الإعتذار الشديد للحيوانات .   ( نزلت  الصورة كما هي عشان الكل يشوف قساوة قلوبكم و عدم رحمتكم يا حماة حقوق الله ) .
بجد نفسي حد يكون عنده على الأقل أو يكون فاضل عنده بواقي إنسانية و يرد عليا . 

إقرأ المزيد... Résuméabuiyad GRAKOLLO