الثلاثاء، 29 نوفمبر 2011

أول واحد يطبق عليه الغرامة

imبإذن الله ، و ربنا يسهل كده، هكون أول واحد يطبق عليه غرامة عدم التصويت.

أنا ليه مصوتش

أسباب كتيرة ، يمكن من أهمها، مش متعود على الإنتخاب، كتر خيره مبارك، كان بيقوم بالنيابة عني بالتصويت، و كمان و أنا نايم، يعني مش محتاج أصحى من النوم عشان أروح أصوت.

سبب تاني كمان، يمكن مش معتقد إن صوتي ممكن يروح للشخص إلي أنا عاوزه، أي دولة عندها شوية بتنجان كده من الديموقراطية لما بتعمل إنتخابات، سبحان الله لما واحد بيحط صوته عشان ينتخب مرشح هو عاوزه صوته بيروح للمرشح ده، سبحان الله.

و كمان سبب تاني ، ماهو الأسباب الأسباب كتيرة و الحمد الله، مش معتقد ، أو بمعنى أصح مش مؤمن بالشفافية الثورية، أو الشفافية الإنتخابية.

و ضحكني جداً كلمة عصام شرف على الفيس بوك، إنه إستنى اليوم ده، و إستحمل كل حاجة في سبيل اليوم ده، معلش هنعمل إيه، ماهو شعب خاين، خان مبارك ، و بعد كده الشعب برضوه هو إلي خان الثورة، إنما سعادتك و المجلس العسكري ، لاء مالكومش في نظام الشعب الخاين ده.

و من الأسباب برضوه، إني عاوز أساهم في دفع مبلغ الغرامة، لإن مبلغ الغرامة هيروح فين؟؟؟؟، أكيد لرفع المرتبات!!!، و أنا عاوز أساهم في رفع المرتبات.

ده غير إني ملاقيتش مرشح يلبي إحتياجاتي الشخصية، أه سيبك من الشعارات الوردي ديه، ملاقتش حد يرشيني بتلفزيون فلات عالي التقنية!!!!.

كله كان لحمة، شوية فلوس متجبش تمن الغرامة، قصدي غرامة المشوار، مش المساهمة في رفع المرتبات.
إيه الرشاوي الخيبانة ديه، أنا عاوز رشوة كده تملى العين، و بعدين صوت و لا مصوتش ماهو إلي هينجح في الإنتخابات هينجح في الإنتخابات.

و بعدين هما بيجروا ليه على الإنتخابات ديه؟؟؟؟، طيب أيام مبارك مجلس الشعب ده كان حاجة كده تفرح، بيديك شقة و عربية و عروسة كمان، إنما بعد الثورة هيديك إيه؟؟؟؟.

إيه هتبقى مقرب من المجلس العسكري!!!، طيب و إيه يعني!!!.

يعني المرشح و الأحزاب بعد الصرف ده كله و الإشتغالات ديه كلها ، إيه المكسب، أكيد مش شقة و عربية و لا حتى عروسة إستعمال الخارج، أكيد حاجات أكبر بكتير من الكلام ده.

طيب نرجع و نقول تاني، لو أعضاء مجلس الشعب المنتخب بالطريقة الشفافة إلي كلنا شفناها من أول يوم، لو الشيطان لعب بدماغهم و فشلوا في المرحلة القادمة كالعادة، نحاسبهم زاي سليمان الحلبي في ميدان التحرير.

و لا هنرجع نعمل إنتخابات شريفة و شفافة تاني ، زاي إلي حصلت في 2005، و دلوقتي كمان!!!!.

و لا هنعمل ثورة جديدة!!!!.

بجد حرام، الفرح إتحول لميتم، و لا عزاء……………………. .

إقرأ المزيد... Résuméabuiyad GRAKOLLO

السبت، 26 نوفمبر 2011

ريد بوول

طبعاً فيه ناس كتير متعرفش إيه الريد بوول ده؟؟؟.

ده مشروب لتقوية!!!!!!...... مش عارف قوي هو لتقوية إيه؟؟.

بس ممكن ينفع مع المشير، ينفع حد يدل المشير على المشروب ده؟؟.

أصله ممكن ينشط عنده التفكير و على ما أعتقد الذاكرة كمان!!!.

المشير شكله بطل يفكر زاي زمان، ماهو كل وقت و ليه….حكمه.

بس على أيام مبارك المشير ده كان شعلة من التفكير، بس مش عارف التفكير ده كان نابع من مخه و لا لاء.

متفرقش دلوقتي، و كان أيام مبارك شعلة من التذكر، زاي المفكرة بالظبط، بس دلوقتي………….أصبح بينسى حاجات كتيرة.

و يمكن من الحاجات إلي نساها إن فيه شعب مصري أصلاً، أصل التقاليد العسكرية إلي المشير لسه فاكرها هي الطاعة العميا، زاي أسف في المثل ده، كان ظباط الشرطة و خاصة المباحث يقولوا إن المخبر الفلاني مفتاحه مع الظابط العلاني،هو مش بالظبط كده بس ده كمثال ليه أدب شوية.

أهو المشير ده بقى زاي المخبر بتاع الظابط، كان مفتاحه مع مبارك، إمشي كده يا مشير، معندهوش غير حاضر يا فندم، تعالى كده شوية يا مشير ، حاضر يا فندم، إثبت يا مشير حاضر يا فندم.

بس خلاص المشير نسى أيام زمان خلاص!!!!!!.

بلاش كده، نيجي لنقطة التفكير، ده لو كان فيه حد عنده مخ أيام مبارك الكبير و الصغير كمان!!!!!!!.

إعمل كده يا مشير، حاضر يافندم!!!.

كانت كلمة حاضر يافندم بتطلع منه زاي العسكري إلي بيع……….على نفسه!!!.

حد ياإخوة يكسب ثواب في المشير و يدله على المشروب ده، يمكن يرجعله التفكير و الأهم من التفكير، الذاكرة هو شكله نسى كل حاجة إلا المفتاح مع مين!!!.

إقرأ المزيد... Résuméabuiyad GRAKOLLO

الأحد، 20 نوفمبر 2011

إشتري إلي نفسك فيه


بعد بورتو طرة، بقى عندنا تحرير لاند!!!!.

كل إلي نفسك فيه، هتلاقيه على أرض واحدة!!.

سينما متحركة، مشاهد حربية على أعلى مستوى، سينما كوميدية، ينفرد بيها التحرير لاند.

أسواق متحركة، على أربع عجلات، و الجديد محل متحرك شايله واحد بس!!!.

و الأجمل كل واحد، أو مجموعة عاوزين يعملوا منصة، مفيش مشكلة إختار المنطقة، ناصية التحرير لاند أو حتى سنتر التحرير لاند، و المفاجأة الشعب علينا، من أول ألف، لغاية كام مليون.

و لما تعوز تفرق الشعب، مفيش مشكلة، الشرطة و الجيش في خدمتك، رصاص حي و مطاطي، عصيان و طوب، و المفاجأة أي عصلجة من الشعب عندنا غاز، مهدي للأعصاب، و مسيل للدموع كمان!!!.

و لو قفلت قوي، و لا يهمك، عندنا المدرعات جاهزة، و المستشفيات كمان جاهزة.

ده غير التمارين الصباحية، حوالين التحرير لاند، وسط الشارع، و الخضرة، هي مش خضرة قوي، بس أهه نقول عليها خضرة!!!.

صحف صفرا و خضرة و حمرا كمان، لتغطية أحداث تحرير لاند.

و الجديد تليفزيون بيجيب الجزيرة بس، ده غير أشكال كتيرة من الناس، تقدر تختار الشكل إلي إنت عاوزه، سيس بقى، فلول، زاي ما إنت عاوز.

أه نسيت، كمان فيه حمامات على أعلى مستوى، من التشطيب و السباكة، بس مش عارف هي لسه موجودة و لا الجيش أخدها معاه.

ده غير المسارح المفتوحة، عروض ٢٤ ساعة يومياً، الممثلين مابيزهقوش أبداً.

ده غير طبعاً وجبة كنتاكي الشهية، تاكلها مع حفلات الموسيقى المنتشرة في كل أركان تحرير لاند.

أه أسواق تجارية متنقلة، من الماج، لغاية علم سوريا؟؟؟، أه و السعودية؟؟؟، و أخيراً مصر!!!.

ده غير ندوات الشعر، و فاضل نعمل زار، و نحضر العفاريت كمان.

التحرير لاند إشتري إلي نفسك فيه!!!.
إقرأ المزيد... Résuméabuiyad GRAKOLLO

الجمعة، 18 نوفمبر 2011

مفيش حاجة تتفهم


imagيثبes


الواحد مبقاش فاهم أي حاجة خالص دلوقتي، هو مين مع مين؟؟؟، ومين ضد مين؟؟؟؟.

هو سؤال، هو وفد القوى السياسية المدنية!!!، بيتشغل إيه ؟؟؟؟.
أصل المصري اليوم نشرة خبر: 

إلتقى وفد من القوى السياسية المدنية، بالدكتورعلي السلمي،  لتسليمه  وثيقة المباديء الدستورية؟؟؟؟، و معايير تأسيس اللجنة  التأسيسية؟؟؟؟.


الناس، قصدي 50 شخصية عامة عملوا إجتماع لمناقشة تعديلات السلمي، و إتفقوا على تعديل المواد…إلخ!!!.

هو ال50 شخصية عامة، هما برضوه ال80 مليون إياهم، يعني ال50، هما تعداد شعب مصر!!!.

طيب كويس جداً، عشان الرئيس إلي جاي ميفضلش يذل أهلنا بالتعداد الرهيب في السكان!!!، أهوه عنده مصر كلها بقيت 50 شخصية عامة!!!.

يمكن كان فيه تصويت جماعي على إختيار ال50 شخصية عامة، و أنا مأخدتش بالي من التصويت ده!!!.

ممكن يكون تصويت إختيار 50 شخص يتكلموا على لساني و لسان غيري، بس كان إختيارهم إختيار سري للغاية!!!.

الأجمل من كده، إنهم غيروا مواد، و عدلوا مواد تانية، و خلوا الجيش جهة إستشارية!!!، يا سبحان الله، و في الأخر شعب مصر كله إشترك في التغيير!!!!، و لا عزاء.

طيب أنا ناوي أعمل مسيرة تتكون مني، و بس، و هدخل تعديلات على الوثيقة، أنا الشعب!!!.

أنا عاوز أحكم نفسي بنفسي، أهوه الجنان وصل لإختزال الشعب في شخص واحد، حد عنده مانع؟؟؟.

هو إيه الفرق مابين ناس بتتكلم بإسم الشعب!!!، و الشعب مش فاهم أي حاجة!!!، و مابين رئيس جمهورية قعد تلاتين سنة يحكم، و برضوه سبحان الله الشعب برضوه مش فاهم حاجة!!!.

يعني ال50 شخصية هما إلي عارفين إيه إلي في صالح ال80 مليون مش فاهم حاجة، قصدي إلي فيهم ناس مش فاهمة حاجة!!!.

طيب كويس، ولو طلع إن الكلام إلي معتقدينه إنه في صالح ال80 مليون، و طلع الإختيار غلط، إيه نديلهم فرصة الإستعانة بصديق، و لا نطبق عليهم قانون سليمان الحلبي في ميدان التحرير؟؟؟؟.

إقرأ المزيد... Résuméabuiyad GRAKOLLO

الأربعاء، 9 نوفمبر 2011

السيد، الفقيد، الرفيق، الشهيد / الشبيه

كل مرة يموت رئيس،قائد أو أي شخص مهم، موتة مش طبيعية، يطلع مصدر موثوق، أو غير موثوق و يقول إن إلي مات هو الشبيه (رابط)!!!.


أما القائد، الرئيس (رابط) ..........إلخ، هو بخير حي يرزق!!!!!، يا سلام.


فكرة وجود الأشباه، موجودة مفيش مشكلة، حتى فيه فيلم نزل من قريب عن قصة حقيقية لواحد شبيه إبن صدام، و هو لاجيء في إنجلترا حالياً، ممكن تكون قصة للشهرة، و ممكن تكون قصة حقيقية!!!!.


بس الفكرة هو كل العظماء إلي بيموتوا، لازم يكون ليه شبيه بيموت بداله، يعني الموت مبيوصلش ليهم أبداً، إيه هما بقوا من ألهة الإغريق، ولا وصلوا لتركيبة طقية الإخفا!!!!.


مثال صدام لما إتمسك، أي كان قصة القبض عليه، خيانة، تسليم يد أو حتى هو إلي سلم نفسه مش مشكلة، بس أمريكا جاهلة قوي كده، بعد الفحص و التحليلات و الذي منه، يطلع بعد موته مش هو، لاء البديل!!!، عند الموت بس يظهر البديل، طيب الأصل فين؟؟؟، راح يشتري فراخ و راجع كمان شوية؟؟؟؟.


طيب على كده بقى بن لادن (رابط) كان غلبان، مكنش معاه فلوس يشتري واحد بديل؟؟؟؟، أو حتى يغير في شكله شوية!!!!، هو فعلاً قصة موته ناس كتيرة مش مبلوعة ليهم، بس مع كوباية مية، تمشي و فيه واحد حالياً بيدور على جثته في المكان إياه و ربنا يوفقه و يلاقيها؟!؟!.


أخر حاجة بجد، كانت عن القائد، ملك ملوك أفريقيا (رابط)، طلع إن إلي مات الشبيه؟؟؟؟، و ده من مصدر روسي!!!.


طيب العقيد موجود فين حالياً، ده لو مكنش كل الفيديوهات ديه متفبركة!!!، بس حتى الناس إلي ظهرت في الفيديوهات ديه متفبركة كمان؟؟؟.


ده حتى مبارك (رابط) طلع عنده شبيه!!!!، أه بس مبارك أجدع (رابط)، كل الناس ديه الشبيه مات بدالهم، إحنا بقى عندنا المفاجأة، مبارك مات بدل الشبيه!!!!، و ديه قضية رافعها محامي عاوز يثبت الكلام ده!!!، بيفكرني بلي عاوز يلاقي جثة بن لادن (رابط)!!!!.
يعني على كده ممكن يكون المشير، مش المشير (رابط)؟؟؟؟.


ماهو كلهم تلاميذ مبارك (رابط)!!!!، ممكن مبارك قبل مايموت بدل الشبيه، أخد معاه المشير الأصلي و ساب بداله المشير التقليد!!!!.


إشمعنا المشير إلي أخدته كمثال، لاقيت إن أكتر واحد كان الفترة الصغيرة إلي قضاها مبارك في الحكم، كان المشير معاه خطوة بخطوة!!!.


و مرة واحدة أصبح المشير بدل مبارك (رابط)!!!!، يمكن المحامي قصده إن شبيه مبارك إلي موجود ، يكون هو المشير؟؟؟؟، هو الحول وصل للدرجة ديه؟!؟!؟.


على رأي عادل إمام (رابط)، هو فيه رئيس بيموت!!!!.


و على فكرة، المشير راجل وطني جداً!!!!، أه زاي مبارك كده في الوطنية!!!.


ماهو لما مبارك مات و ساب الشبيه يعيش، المشير كتلميذ مطيع لمبارك، و مش أقل منه وطنية!!!!، مات برضوه و ساب الشبيه يعيش.


بصراحة طلع الفقيد في الليلة ديه، الشبيه للأسف (رابط)!!!!!!!!!!.

إقرأ المزيد... Résuméabuiyad GRAKOLLO

الأربعاء، 2 نوفمبر 2011

هو مين إلي حمى الثورة

  عن نفسي بقول إن إلي حمى الثورة هو الله وحده.

و بعدين الناس العادية، لا منتمين الأحزاب، و لا حتى العسكريين.

لأن ببساطة منتمين الأحزاب و العسكريين (رابط) هما من الشعب، و لا من حتة تانية خارج المجرة!!!.

عجبني جداً كلمة لخالد أبو النجا، " لما الجيش مأخدش أمر بضرب الثوار، يبقى الجيش حمى الثورة إزاي؟؟".

هي كلمة صح، و عنده حق!!!، بس فيه حاجة نسيتها، ممكن؟؟؟؟.

الجيش ممكن ميكونش أخد أمر بضرب الثوار، إنما لو الجيش ضرب في الثوار، كان زمان فيه ألاف أو ملايين من أصحاب الشنبات الحجم الكبير حلقينها و قاعدين في البيت.

المشير في مرة بيقول" الجيش سلاحه قاتل "(رابط)، يعني مش زاي الشرطة المدنية، طبنجات، أو حتى الألي بتاع الشرطة المدنية، لاء ده دبابة، مدفع حاجة كده من إلي بتضرب، ناس كتيرة بتطير، يعني فعلاً سلاح قاتل، و مش معنى كده دفاع عن الجيش أو دفاع عن الثورة، أنا رجل حقاني زاي المشير، و شهادتي لازم تكون تاريخية زاييه!!!.

المهم مش كل من إتصور جنب دبابة، و لبس الكوفية الفلسطيني يبقى حمى الثورة، فيه ناس كتيرة حمت الثورة و لا نسمع عنهم أي حاجة، مش زاي إلي حموا الثورة و نزلوها في مجلات ميكي!!!.

نيجي لأصحاب الجماعات و الأحزاب، كل واحد دلوقتي داخل و شايل بطنه معاه، قصدي البطيخة الصيفي، و عارفين كويس جداً، إن كل واحد فيهم بيقول إنه عارض مبارك و عمل و سوى، و مبارك مش هيقدر يرد عليهم، عشان مشغول شوية، أصل في سركم عنده شوية فلوس عاوز يخبيها، و بيجري وراه 80 مليون عاوزين نصيبهم، فيبقى فاضي للرد على كام واحد بيقولوا إنهم كانوا بيعارضوه؟؟؟، و لا يخبي الفلوس من 80 مليون واحد؟؟.

المهم، كنت كتبت عن الفرق بين الجاهل و الجاهل(رابط) أصحاب النخبة، بس للأسف عن نفسي بقول إن إلي حمى الثورة هو الله أولاً و أخيراً، و بعد كده الناس العادية جداً!!!.

و معاك إذا كان الجيش بيقول إنه حمى الثورة، مش مشكلة، كفاية على الأقل إنه وقف يتفرج، و مستخدمش أسلحته سواء مع أو ضد!!!.

أما أصحاب المصالح العليا أهل النخبة، بقول البلد بلدكم إخربوها، زاي إلي قبلكم (رابط)!!!.


إقرأ المزيد... Résuméabuiyad GRAKOLLO