هو ولا لغز و لا حاجة، ممكن أعرض رأيي؟!؟!؟!.
المشهد إلي الناس شافته، أو أقدر أقول المشاهد إلي الناس شافتها على اليوتيوب و غيره.
المشهد الأول مجموعة من الأشخاص على سطح الداخلية، معاهم بنادق قنص.
المشهد التاني شخص فوق المتحف المصري أيام موقعة الجمل، معاه لاسلكي و بندقية قنص.
المشهد الأخير، ضوء الليزر، و بعديه سقوط الناس.
ممكن يكون فيه مشاهد تانية بس هكتفي بالمشاهد التلاتة دول.
طبعاً الداخلية بتنكر بشدة وجود وحدة قنص عندهم، صح، ممكن يكون الكلام صح، بس منقدرش ننكر إن الشرطة عندها وحدات خاصة، أكيد من ضمن الوحدات ديه لازم يكون فيه قناصة.
ياإما الداخلية بتاعتنا غير أي داخلية في العالم!!!!.
بس فيه كتاب عن الداخلية بيقول إن بعض الأشخاص عندهم أخدوا تدريب على عمليات القنص!!!!!.
حلو جداً الكلام ده، بعض الأشخاص طبعاً ظباط أخدوا التدريب ده، فين؟؟؟؟؟.
في معسكرات تدريب الداخلية أكيد، على إيد مين؟؟؟؟.
يعني أكيد مش متعاقدين مع مدربين أجانب، و ليه لاء، الجيش نفسه بيجيب مدربين أجانب!!!.
طيب فيه إفتراض، ليه ميكنش المدرب من الجيش، و معروف إن الجيش عنده وحدات قناصة، و الأكتر من كده وحدات النخبة أو الحرس الجمهوري، و ده سلاحه متطور شوية،و عنده إمكانية وجود بنادق قنص عالية التقنية و مزودة بالليزر، ليه لاء.
و يقدروا يطلعوا على سطح مبنى وزارة الداخلية، إيه إلي ممكن يمنعهم؟؟؟؟.
و يقدروا كمان يطلعوا على سطح المتحف المصري، و ليه لاء ؟؟؟، و إيه إلي ممكن يقول للحرس الجمهوري لاء؟؟؟؟.
أهه تهمة كويسة خالص ممكن يلبسها جمال، علاء أو حتى مبارك نفسه، هو مش الحرس الجمهوري يتبع مبارك مباشرةً؟؟؟.
إيه المانع من تنفيذ تعليماته و حتى بقتل الناس، ماحرسه قتلوا ناس قبل كده بغرض الدفاع عن الريس، حد عاتبهم أصلاً؟؟.
و بعدين من ضمن الأشخاص إلي بيساعدوا في تأمين مبارك قناصة على الأسطح، منين كانوا؟؟؟؟، من القمر و لا المريخ؟؟؟.
و أفتكر في لقاء مع مبارك بعد محاولة إغتياله، صرح إن القوات المسلحة بتشتري لحرسه أسلحة كويسة جداً!!!.
صباح الخير يا مجلس يا عسكري، إيه متعرفوش عناصر تأمين مبارك، و تسليحهم؟؟؟.
و طبعاً إلي بيطلبوا كشوف السلاحليك بتاع الداخلية، ممكن متلاقوش أي نوع من الأسلحة ديه موجودة فيه!!!.
شوفوا كشوف الحرس الجمهوري أحسن، أو إسألوا المجلس العسكري، ممكن يكون عندهم فكرة عن سلاح الحرس الجمهوري، أو الحرس الخاص بمبارك، معنه مفيش فرق كبير بينهم.
و ده مش هجوم على المجلس العسكري، لاء، أنا قلت جوه نفسي ممكن يكون المجلس العسكري، إلي هو وزارة الدفاع كلها، يكونوا نسوا، أو مجاش في بالهم، ممكن؟؟؟!!!!.