السبت، 22 سبتمبر 2012

ضحكوا عليك فقالوا

ضحكوا عليك فقالوا , عدم سيطرة الإخوان على الحكم.

سمعت كتير من ناس أكتر , إن الإخوان مش هيقدروا الإستمرار في الحكم!!!.

كان ردي,: مش هينفع يسيبوا الحكم تحت أي ظرف!!!.

تنظيم الإخوان فضل مستمر لأكتر من ٩٠ سنة, همهم في الأول و الأخر الوصول للحكم, و بعد مايوصلوا للحكم يسيبوه كده بالساهل!!!.

لا يمكن أبداََ.

ده لو البنا كان عايش لغاية دلوقتي, مكانش هيصدق بوصول جماعته للحكم.

إنما للأسف مات, بس فكره و جماعته فضلت كل السنين ديه, و طبعا الكل عارف نشأة جماعة الإخوان و دور المخابرات الإنجليزية ي تكوين و دعم الجماعة.

الغريب إن المخابرات الإنجليزية كانت مقتنعة , ان بموت البنا, جماعته و فكره انتها!!!.

العقول الامنية عندها شوية غباء!!!.

الاغرب, من اكتر البلاد استقبال لطلبات اللجوء السياسي لأعضاء الجماعة , هي انجلترا!!!.

استضافتهم لسنين طويلة, عطتهم الحماية و الجنسيات الانجليزية!!.

اه و استقبلت مؤتمراتهم!!!.

ليه كل ده؟؟؟, سؤال اجابته عند الانجليز.

شكلهم حبوا البنا و جماعته, و اصبح حاليا الهاربين من نظام مبارك و الممنوعين من دخول مصر, ينزلوا مصر و يطوروا الجماعة كمان بما يتناسب مع العصر.

المضحك , ان واحد عراف, من بتوع التنجيم, تنبأ إن مرسي هيتحرك عسكريا ضد سوريا, و الاخوان هيستمروا في الحكم حتى بعد مرسي.

يعني حتى في التنجيم اصبحوا امر واقع!!!.

ضحكوا عليك فقالوا, سياسة مبارك في افريقيا فاشلة.

و طبعا السبب الي يثبت ان سياسة مبارك فاشلة, موضوع سد القرن بتاع اثيوبيا, و عدم زيارته للدول الافريقية.

مفيش مشكلة, بس عندي شوية نقط و بعد كده نحكم ايه سبب الفشل.

1- السفير المصري في اثيوبيا و السفير المصري في اريتريا, بيتحركوا في مواكب و لا مواكب الرؤساء, وده حسب ماسمعته من شاهد عيان و بيأكد ان أغلبية الدول الافريقية بيكون وضع السفير المصري فوق العادة و الطبيعي من النفوذ.
( غريبة ان دولة عندها مشاكل سياسية مع مصر, يكون سفيرها بيتمتع بنفوذ فوق العادة, ده كان المفروض يمشي تحت الحيط).

2- توريد مصر مبارك, لصفقات سلاح, لدول افريقية كتيرة, يعني مبارك و جهاز مخابراته كانوا تجار سلاح في دول افريقية منها اثيوبيا و اريتريا.
(تاجر سلاح و مسؤول عن توريد صفقات سلاح و تسليح جيوش افريقية, يعني علاقاته قوية بانظمة الحكم!!!, صح؟؟؟).

3- استثمار قطر في الفترة الاخيرة من حكم مبارك في كل من اثيوبيا و اريتريامليارات, في دولتين تسودهم الفقر و الجهل!!.
نقلا عن مواطن من احدى الدولتين, دولته ليها شواطيء و لا يعرف أكلات بحرية, زاي الجمبري و الكابوريا و إلخ,  ليه؟؟؟, عشان الشواطئ ملك للمستثمرين و بس, بتصب ملايين على حكام تلك الدول, اما الشعب فليه الله!!!.
قطر اجرت عدة جزر من اريتريا!!!.

المشكلة مابين مصر و اثيوبيا , او دول حوض النيل كانت بسبب قطر, و لعبها من تحت الترابيزة.

الغريب,

1- إسرائيل ساندت مبارك ضد مشروع سد دلقرن الاثيوبي, مش غريبة ديه!!!.

2- مبارك كانت ليه زيارات سرية كتيرة لكذا دولة افريقية, حسب تقارير تحرك الطائرة الرئاسية!!!. 
ياترى كانت سياسة مبارك في افريقيا فاشلة؟؟؟, و لا عدم الاهتمام بها اعلاميا, كان وراه سبب تاني؟؟.

ضحكوا عليك فقالوا , مكافحة الارهاب

دلوقتي بقى فيه إرهابيين في سينا,  معاهم سلاح, صواريخ و الذي منه.

لازم الجيش ينزل لتطهير سينا من الارهاب, مكافحة ارهاب بقى!!!.

امال مسمعناش عن موضوع الارهابيين ايام لما مبارك كان في سينا!!!.

يمكن الارهابيين كانوا مستخبيين من الدولة البوليسة بتاعت مبارك, الي كانت متمركزة في سينا.

يمكن هما دوله المجموعات الي جندتها إسرائيل عشان تهرب مبارك من شرم الشيخ؟؟؟.

شكل الارهاب و مكافحته بقوا مواسم زاي زراعة القصب!!.

كنت اسمع في سينا عن , تهريب بني ادمين, سلاح, بانجو, انما ارهابيين منظمين, كانت صعبة شوية, خاصة وجود قبضة حديدية من المخابرات العامة, المخابرات الحربية و امن الدولة, و الخ من الانظمة الامنية المعروفة و غير المعروفة.

بعدين مش وزارة الدفاع كانوا بيقولوا انهم بعتوا الفرقتين 777 و ال 999 لعرقلة اي نشاط ارهابي؟؟؟, بجد الفرقتين دول ربنا يكون في عونهم, يامنوا مبارك و لا مرسي و لا سينا؟؟؟؟.

بعدين هو مش الجيش موجود في سينا من زمان بكارنيهات شرطة؟؟؟.

و فيه قوات دولية هناك, يعني الارهابيين دلوقتي بقوا يجاهدوا ضد الجيش المصري و سايبين القوات الدولية؟؟؟.

كل ده منفعش مع الارهابيين المكارين, فكان واجب ان الدولة تكافح الارهاب!!!.

انهيه ارهاب؟؟؟, ارهاب الدولة!!!.

زاي مااحنا سياسة الالهاء موجودة.

نلهي الشعب, حدودنا مع إسرائيل ملتهبة, الجيش يقوم بمهمات عسكرية, إسرائيل تشجب و تحشد قواتها.

خلاص هنحارب إسرائيل,  و في الاخر بخخخ!!!.

النوم العميق!!!.
إقرأ المزيد... Résuméabuiyad GRAKOLLO

الخميس، 13 سبتمبر 2012

مين هيطفي النار و مين هيولع النار

مش هتكلم عن محتوى الفيلم , إلي أثار العالم الإسلامي و غير الإسلامي.

كتير إتفرج عليه, بس هو عبارة عن ١٤ دقيقة و يقال إنه عبارة عن ساعتين.

بس فيه كام نقطة شدوا إنتباهي, أكتر من موضوع الفيلم شوية!!!.

١- مين أنتج الفيلم؟؟, بناء على صحيفة , من مصدر, من ممثل, ممكن يكون واحد يهودي, إسرائيلي أو مصري!!!.
من المعلومات إنه بيتكلم عربي مع بعض الناس, و تطلع علينا برضوه الصحف إن عندها أخبار مش عارف من مين, إن المخرج إلي هو المنتج إلي هو المؤلف مستخبي و محدش عارف يوصله!!!.
معن في نفس الوقت, الممثلين بيتصلوا بيه و بيرد عليهم!!.
فعلا من الصعب الوصول ليه!!!.

٢- برضوه عن نفس الصحف و نفس الممثلين, إنهم ياعيني كانوا بيمثلوا الفيلم, و هما مبيعرفوش عنه أي حاجة!!!.
كل الممثلين أمريكان.

إيه المخرج إلي هو المنتج إلي هو المؤلف, تعاقد معاهم على تمثيل من غير نص!!!, يعني فيلم حركات من غير صوت؟؟؟.
٣- بقى بذمتكوا ده فيلم متكلف ٥ مليون دولار؟؟؟, و لا حتى ألف جنيه, مش مشكلة التكلفة.

للأسف لا معروف أي حاجة, يعني كله بناء على كلام بعض الممثلين, إلي من الواضح إن أي حد ممكن يشتريهم مقابل إنهم يقولوا أو يمثلوا أي حاجة بدون مناقشة.

بقى ده مصدر!!!!, و كمان للمعلومات!!!.

سيبك من كل الكلام ده, إلي طلع ١٠٠,١٠٠ الراجل إلي هو بيشتغل كل حاجة من إخراج و تأليف و يمكن كمان تصوير, جاب الأطراف صح و راح ملبسهم في بعض, و هوبا الليلة لبست في مسيحيين مصر, قصدي إلي عايشين في مصر, أما هو ياعيني خايف على نفسه من الظهور!!!.

كتبت قبل كده عن برنامج البالتوك ياريت تقرأوه و تفهموا, اللعب من زمان, بس للأسف الوقت دلوقتي خصب لكل حاجة أما بالنسبة للناه فهما كالتالي:

١- موريس صادق
هو سعادتكم مشفتوش الراجل ده على اليوتيوب من زمان؟؟؟, سيبك من السيرة الذاتية , إنه مستشار و الذي منه.
الراجل ده بالنسبة للمعروف عنه حتى من أقباط أمريكا, مجنون و متسلق , بدون أي أهمية, إلي شهره جنانه, و أكتر من جنانه موضوع تقسيم مصر و إعلان الدولة القبطية!!!.

٢- القس الأمريكي بتاع حرق القرآن.
( بالنسبة للقس الأمريكي, فيه شبه بينه و بين هوجان بتاع المصارعة).

أنا بقول شبه بس, لحسن ناس تفتكر إنه هوجان, و نجيب لهوجان مصيبة و هو ملهوش ذنب, ماهو دلوقتي قول أي بتنجان و الناس هتجري وراه.

الراجل بقى بتاع كله عرف يختار صح, واحد عنده عداء للمسلمين و التاني مجنون شهرة.

أما للتعصب فموجود جوه كل واحد فينا, طبعا سيبك من الكلام الفاضي بتاع السلمية و ثور بتحضر و الكلام إلي مبيجبش تمنه!!.
الغلط في الرموز الدينية
عجبني واحد بيقول '' إحنا بنطالب الرئيس مرسي, إنه يصدر تشريع إن أي حد يغلط في الرسول أو زوجاته أو الصحابة, ياخد إعدام!!''.

كلام جميل فعلا , لازم نصون الرموز الدينية.

طيب و الأطراف الإخرى ؟؟؟ , إيه النظام؟؟؟.

لو غلطنا في رموزهم الدينية, يعني ربنا يسامحنا , ما أصلهم كفرة!!.

لاء زاي ماإنت مش عاوز حد يغلط في رموزك الدينية , متغلطش في رموزهم الدينية.

أما بالنسبة كافر أو غير كافر, فسعادتك مش الله عشان تحكم.

كل واحد شايف إن دينه أعظم دين في الكون, سواء إسلام , مسيحية أو حتى يهودية.

إعبد الله بالطريقة إلي تريحك, بس سيب الناس تعبد بالطريقة إلي تريحهم.

إنما ليه؟؟, ما إحنا عايشين في مجتمع ملائكي , لا بنسب الدين لبعض و لا بنكفر بعض, و لا أي حاجة غلط بنعملها لبعض, بل بالعكس إحنا مابينا سلام و حب و تقوى, إحلموا و خلوني أحلم!!!.

إنتوا طبعا عارفين لو إطبق التشريع السابق ذكره, يبقى حكمنا بالإعدام على ناس كتيرة,

١- المسيحيين غير معترفين بالإسلام , لكنهم مؤمنين ب الله.
٢- الشيعة غير معترفين بالصحابة أو زوجات الرسول, لكنهم مؤمنين ب الله.
٣- البهائيين غير معترفين لا بالمسيحية و لا بالإسلام و لا اليهودية, لكنهم مؤمنين ب الله.
٤- اليهود غير معترفين لا بالإسلام و لا المسيحية, و لكنهم مؤمنين ب الله.

كل دول إتحكم عليهم بالإعدام, بمجرد إصدار التشريع إلي بيجرم إزدراء الاسلام او الرسول او الصحابة او زوجاته, و ده غير الملحدين و عبدة الشيطان, و غيرهم.

طيب و ياترى هتعملوا إيه مع بعض البعثات الدبلوماسية, زاي الهند و الصين و اليابان؟؟؟؟, إيه إعدام دول كمان؟؟؟.

هو ياإخوة الله ( إستغفر الله العظيم ) مبيقدرش على حماية الرموز الدينية , مبيعرفش ياخد حقهم , فعلشان كده بيعتمد على شوية تراب ياخدوا حق الرموز الدينية؟؟.

الله ( إستغفر الله العظيم ) قاصر إنه يقتل الكافر و المرتد و إلخ.

و لا وكل التراب, إنهم يقوموا بعمل الله؟؟.

بس ياريت حد يفهم , و مش مطالب إنك تسكت على الازدراء,  هو مش سعادتكم عاوزين دولة يسودها القانون , و لا عاوزين دولة يسودها قانون الغاب؟؟.

كل واحد ياخد حقه بإيده, و كمان يقوم بدور الله , في أخد حق الله و رموزه!!!.

كفروا إلي إنته عاوزينه, و إعلنوا إلوهية إلي انتم عاوزينه!!!.

كده كويس؟.

عالم متخلفة , إمال هتقابلوا الله إزاي؟؟؟, هو الله هينزل لشوية تراب , و يسألهم مأخدتوش حقي ليه على الأرض؟؟؟.

و لا هو مين الي خلق الارض بكل ما عليها و ما حولها؟؟؟, مش الله, و لا شوية التراب؟؟؟.

يعني الله قادر على انه يقتل الكافر و الغير مؤمن بيه, الله قادر على كل شيء,  فكفاية بقى الله لم يوكل حد لحمايته او حماية رموزه او كتبه.

قوموا الاول بلي عليكم اتجاه الله, و بعد كده حاسبوا نفسكم الاول, و بعد كدة حاسبوا البشرية كلها.

و بعدين شريعة ايه الي عاوزين تطبقوها, الشريعة ياتطبق كاملة يا اما لاء, مش سطر اه و سطر لاء, ده غير انكم مش هتمشوا عليها!!!.

انتوا عاوزينها عشان تطبقوها على الناس, و تحاسبوهم , انما تحاسبوا نفسكم بيها لاء.

عاملين زاي خبر من فترة, ان فيه فنان في المانيا رسم صور مسيئة للرسول , راح عمل قنبلة يدوية, وراح على سفارة المانيا و رماها.

طيب السفير و طقم السفارة كلهم اتفاجإوا بوجود الرسوم زاي بالظبط صاحب القنبلة.

ايه ذنبهم ؟؟؟, عملوا ايه؟؟؟, ماإلا انهم بيمثلوا دولتهم في مصر, بس ديه مشكلتهم.

طبعا صاحب القنبلة و غيره حاسس بالشرف و الحزن في نفس الوقت!!!.

الشرف انه دافع عن الرسول.

الحزن انه مقتلش حد.

انتوا عارفين يعني ايه روح؟؟؟, عارفين يعني ايه تقتلوا روح خلقها الله؟؟؟.

يا شوية تراب.

كلنا هنقف بين ايد الله في النهاية, و الله واحده هو الي هيحاسب خليقته, مش هيعمل لجنة من شيوخ اليومين دول, عشان يساعدوه في حساب الخليقة!!!.

كفاية بقى , إنتوا ايه يا شوية تراب؟؟؟, شغلوا البتاع الي محطوط فوق رؤوسكم, الي بيطلقوا عليه المخ, مش محطوط زينة!!!.

اما بالنسبة لغير المسلمين, فبقالهم سنين طويلة, بيسمعوا شتايمهم بودانهم, سواء في التليفزيون, الشارع, الراديو و الميكروفونات, و حاطين الجزمة في بقهم!!, ليه؟؟.

لان لو واحد منهم قال '' اي'' , ازاي يقول اي في بلد الاغلبية فيها مسلمة.

طبعا بيتشتموا مش من الناس العادية بس, انما من شيوخ الاسلام كمان!!!.

مرة كنت في مكان, و لاقيت طفل صغير قاعد مع نفسه و شغال عياط, قربت منه و سألته'' مالك يابابا؟؟؟, انت تايه؟؟, حد عملك حاجة؟؟؟''.

قالي'' لا يا عموا, الولاد دول مش عاوزني العب معاهم , عشان مش مسلم زيهم!!!''.

نعم!!, إيه؟؟؟.

لما العيال بيعملوا كده في بعض, امال الكبار هيعملوا ايه؟؟؟.

الكلام ده كان من سنين طويلة, إمال دلوقتي مع التقدم المذهل في التكفير و التعصب, وصلوا لإيه؟؟؟.

بلاش, تصحى الصبح, يوم جمعة, كنت بحب عدد الاهرام بتاع يوم الجمعة , تفتح كده المقال بتاع مشاكل الناس, تشوف طلبات الوظائف, تفاجأ,  باعلان في اهرام يوم الجمعة, واخد مساحة كويسة, بيقول '' مطلوب شباب مسلم للعمل ب ..........إلخ''.

كل ده و اصحاب الملل الأخرى ساكتين, لا كمان لو واحد من رجال اعمال الملل الأخرى يكون بيشغل اصحاب ملته, ازاي؟؟؟, فين الوحدة و البتنجان.

بلاش مرة شفت لقاء مع نجيب ساويرس , واحدة من المتصلين بتقول انها بتترفض من اصحاب الاعمال بسبب دياناتها!!!.

اتوقعت ان نجيب هيقولها '' تعالي بكرة مكتبي, و انتي تشتغلي على طول''.

اجابته كانت مختلفة,

'' انا اصحابي مسلمين , و بيشغلوا مسيحيين كتير, بس انتي الي واخده الموضوع بحساسية شوية!!!''.

ادي الي بيقولوا ان كل شركاته بيشتغل فيها مسيحيين بس!!!.

وامثلة تانية تالتة و مليون.
إقرأ المزيد... Résuméabuiyad GRAKOLLO