طيب و قبل أحداث ٢٥ يناير كانت إيه الحجة ؟؟ ، في خلال ٣٠ سنة من حكم مبارك و بطش الشرطة كانت الحجة إيه بجد ؟ حد يفهمني .
ده لما الواحد بيدخل القسم عشان يعمل بطاقة و لا محضر بيبقى مش عارف هيخرج تاني و لا لاء ، كانت برضه أوامر من قيادات ؟؟ ، و الفيديوهات إلي طلعت على اليوتيوب الظباط و هما بيهزروا مع بعض عن طريق تعذيب البني أدمين كانت تعليمات ؟
الظلم و عدم الأمانة و عدم وجود الضمير كانت تعليمات ؟ إيه القيادة بتاعتكم قالت سيبوا ضميركم و قلبكم في البيت و إنتم رايحين الشغل؟
و ظباط المباحث المشهورين بتلفيق التهم و الإعتقالات ، و السجن الخفي إلي في كل قسم ( ما يسمى بالتلاجة ) ، و أدوات التعذيب إلي واخدة براءة إختراع نتيجة لتفننكم في تصنيع أدوات التعذيب التي تتناسب مع المواطن أو المواطنة المصري برضوه كانت أوامر ؟
أمن الدولة إلي داخله مفقود و الخارج منه ( إن خرج ) مولود ، و حفالات التشريف إلي بيستقبلوا بيه ضيوفهم من المواطنين من كرم و ضيافة حيث الضرب و البهدلة بصراحة كرم ضيافة نشكر عليه أمن الدولة بينفذوا الأوامر طبعاً خوفاً على امن البلد من ال٨٠ مليون عميل .
شرطة المرور بتاعة أي حاجة تاخد عليها مخالفة مشيت صح أو غلط في كلتا الحالتين سحب رخصة و دفع غرامة يعني تعمل غلطة تتحاسب عليها إتنين و تلاتة برضوه أوامر ؟
شرطة النجدة إلي بترد على التليفونات بالصدفة يعني لو حصل حاجة نتصل بمكدونالدز يوصل أسرع من شرطة النجدة برضه أوامر ؟
كفاية بقى إنتم جهاز كله فساد من أصغر واحد فيكم لأعلى واحد فيكم ، إنتم في الكلية الظاهر بيغسلوا دماغكم و يغسلوكم من أي حاجة تمت للمشاعر الإنسانية و يزرعولكم مشاعر حيوانية بديلة .
المفروض فعلاً جهاز الشرطة بالكامل يتحاكم ، أه بالكامل ، و مينفعش أي حد من الجهاز القذر ده يرجع تاني لشغله ، أما بالنسبة لأمن الدولة المفروض يتعدموا في ميدان عام .
لاء و إلي يفقع فعلاً المرارة إنهم زعلانين جدا إن الناس هجمت عليهم ، ماهو من أفعالكم الشنيعة مستنيين إيه من الناس ؟ يجيبلك بوكيه ورد و يعري قفاه معاه !! و غير كده مشفتش واحد ظابط دكر طلع يقول أنا أسف ! لاء زعلانين من الناس الوحشة ، بصراحة حرام فيكم الرحمة و دلوقتي الشعب عنده أوامر إنه مينفعش معاكم الرحمة .