مشكلة كبيرة دلوقتي المادة التانية ، ناس عاوزة تلغيها و ناس على جثتها لو إتلغت !!!.
المشكلة دلوقتي بقت في مادة في الدستور ؟؟؟ ، المفروض بدل التمسك على المادة الواحدة ، نغيير الدستور كله .
إنما الدستور المرقع إلي إحنا ماشيين بيه ده مينفعش يشغل عربية فول ، كل مادة في الدستور الحالي إتعدلت بدل المرة 120 مرة ، طيب و بعدين ، هيفضل الوضع زاي ماهو كده ؟؟؟.
لجنة العواجيز إلي بتعدل في الدستور متنفعش ، الدستور لازم يكون فيه من الشباب إلي يعطوا روح للدستور ، روح العصر المتطلبات إلي الشباب لبكرة عاوزينهم .
مفيش أي شباب طالعين من كلية الحقوق و معاهم دراسات علبا في القانون ؟؟؟ خلصوا من البلد خلاص ؟؟؟ مبقاش فيه غير شوية العواجيز العقد ديه ؟؟؟؟ .
إمال ليه طلعتوا بثورة 25 يناير ؟؟؟ مادام عواجيز مبارك هما إلي هيغيروا و هما إلي ماسكين الوزارة و و و ......إلخ .
فين الطلبات إلي إطلبت ؟ ؟ ؟ ، فين الحقوق ؟؟؟ ، فييييييييييييييين؟؟؟؟.
مفيش حاجة إتغيرت و قلت قبل كده ده البنج الثوري ، مفيش أي حاجة فعلياً إتغيرت بجد ، حسني مبارك قاعد في مصر و مازال بيحكم.
كان فيه سؤال حلو جداً فين ورقة رسمية للتنحي المزعوم ده ؟؟؟؟ ، لما الملك إتنحى و إطرد نشروا في كل الصحف ورقة التنحي .
فين بقى الورقة بتاعت مبارك ؟؟؟ ، و الدليل على وجود مبارك في السلطة شفيق الأنتيخ !!! ، مينفعش دولة عايشة فترة طويلة بدون أي نوع من الصدق أو الشفافية إنها في يوم و ليلة تبقى شفافة كده ، و بتحاكم الفساد ، مادام بيحكموا الفساد ياخدوا شفيق يحاكموه على المليارات بتاعة المطارات ، زكريا عزمي و شلة السكرتارية الخاصة بحسني مبارك فين ؟ ميحاكموهم ، و و و فين و و و فين ......
إيه الفرق إلي موجود دلوقتي ؟؟؟ ، فرق واحد بس إن مبارك مبيطلعش في التليفزيون !!! ، هو ده الفرق ؟ أنا بجد حاسس إن مبارك إشترى الشعب ، ملكية خاصة ليه ، و ممكن عبيد عنده أو رقعة شطرنج بيحركها بمزاجه !!! ، بجد مش عارف .
لازم عشان نتحول للمدنية و الشفافية يبقى كل نظام مبارك بالكامل يمشي من السلطة ، 80 مليون بني أدم و بني أدمة مفهمش 30 وزير و وزيرة ينفعوا غير مجموعة حسني مبارك ؟؟؟ ، مفيش ناس في مصر خلاص عزلوا و راحوا ليبيا يعني ؟؟؟ .
للأسف مش المادة التانية من الدستور هي إلي باقية ، لاء ده نظام مبارك كله لسه باقييييييييييييييييييييييييييي !!!!!!!!!!!.