كانوا بلأمس نجوم !!! عجبت لك يا زمن !! بجد مش قادر أصدق ، خايف يكون حلم و أصحا منه . بقالي كام يوم كده حاسس إن مبارك هيرجع تاني
( مش للقلق ديه حاجة جواية ) ، أصل الوضع غريب واحد كنت باشوفه على طول في البيت معايا بيطلع في التليفزيون ، في الشارع معايا صوره في كل حتة ، في الشغل معايا برضوه صور ، عاوز تستخبى منه بيطلعلك زاي العفريت في أي حتة ، يعني لو جبت مجلة طبيخ تفاجيء إنهم حطنله صورة جوه ، أخبار طول الوقت الريس فتح ، الريس مش عارف فين ، الريس الريس .... لما حاجة كانت تخنق ، و فجأة ............ الريس مش موجود!!!!!!!!!!.
و بعدين يا ريت كان هو و بس لاء و مراته ، و إبنه ، و خالته ، و العيلة كلها ، و أهم من كل ده إلي حواليه ، كانوا مبيظهروش غير معاه و بس و بعد كده أصبح ليهم نصيب إن إحنا نشوفهم برضوه في البيت ، الشغل و كنت خايف ألاقيهم في الحمام بصراحة بس الحمد الله مكنوش هناك .
عشرة طويلة ، الغريب لسه شايف حوار مع أحمد عز مش عارف حسيت إن ده مش أحمد عز ، فين الراجل المعووج ، أبو ياقة كان على طول بصراحة بشوفه بياقة قميص عريضة ، و منفووووووخ و قرفان من الناس ، فينه ؟؟ و إلي عجبني أكتر إنه عمل زاي سيده ، هو ملهوش دعوة بالفساد !!!! إمال مين ؟؟ إمي هي إلي إخترعت الفساد و عممته !!.
و غير كده حبيب الشعب العادلي طالع في المصري اليوم إنه مفيش أي تحقيقات معاه ، و إنه برضوه مش مسؤول عن إلي حصل ، الناس هيا إلي خانتوه !! ، و تتطلع اليوم السابع و يحكي عن التحقيقات إلي حصلت مع العادلي ، برضوه نفس إلي كان بيحصل ، جرنال يقول أه و جرنال يقول لاء ، أصدق مين ؟؟؟ مش عارف .
الناس ديه لغاية يوم 25 يناير الظهر ، كانوا كبار رجال الدولة ، المسؤولين عن الشعب ( إلي هو إحنا ) ، و كان كل واحد يطلع منهم في الحياة بتاعتنا و يتكلم من مناخيره و يقول أنا مسؤول و بدافع و بحاسب ..... و بيضرب الودع كمان ، النهاردة بيطلعوا برضوه مناخيره في الأرض و بيقول و هو في قمة التواضع أنا مش مسؤول عن إلي حصل ده ، ده هو يا بيه !!!!!.
بصراحة بصراحة مشفتش الناس ديه في التواضع ده قبل كده مش مرتاح للتوضع ده ، يعني كان لازم ياخدوا بالجزمة عشان يتواضعوا ، أه أه و نسيت ........ دلوقتي بقوا هما الوحشيين و النظام قال أخيراً هيحاسب الناس الوحشة ديه !!!! يا سلااااااااااااااااااام !!!!! .
طيب متحاسب الناس من البداية ، من بداية عهد مبارك لغاية يوم لما تنحى ، و تحاسب مبارك و أل مبارك ، الغريبة أنا النهاردة قريت قال إيه عيلة أل مبارك متضايقة جداً إن سيرتهم بتيجي في الجرايد !!! عجيبة ، ماهو سيرتهم على طول بتيجي في الجرايد ، و لا إتعودوا على الجرايد إلي بتقول ماما سوزان و بابا مبارك ، حلوة ديه ، إنما أخبار بحق و حقيقي وحشة إخييييييييييييييييييييييييه .
و الأعجب منه إنه بيتقال إن فيه إتفاقية مابين أل مبارك و المجلس العسكري ، إن مبارك و أل مبارك و إلي كانوا مقربين حواليه معصومين من المحاكمات !! ليه إيه إلي يمنع ؟؟ هو مكنش هيسيب السلطة أو كرسيه من غير الوعد ده ؟؟؟ هو المجلس العسكري مش هيمشي نهائي و لا إيه ؟ ، يعني إلي هيجي لرياسة الجمهورية بلإنتخاب هيفضل محافظ على كلمة المجلس العسكري لمبارك و أل مبارك ؟؟.
أسئلة بصراحة لو كان الكلام ده حقيقي إنه معصوم من المحاكمات ، مش هيدور في دمغه الكام سؤال دول ؟؟ و لا إحنا في فيلم ؟؟ و لا نايمين و هنصحى نلاقي مبارك تاني ؟؟. أهوه هو ده إلي مخوفني أصحى من النوم !!! .