عندما تنازل الملك فاروق عن عرشه تفادياً لوجود حرب أهلية و ده دليل على إنه كان عارف إن ديه بلده ، حكموا عليه بالنفي و سحب الجنسية المصرية منه و من عائلته بالكامل .
دلوقتي حان وقت المعاملة بالمثل سحب الجنسية من أل مبارك و منعهم من دخول مصر نهائياً، و سحب جوازات السفر الدبلوماسية له و لكافة أعضاء نظامه المعزولين ، و تقديمهم للمحاكمة بتهم كتيرة منها تهمة حلوة تليق بيهم إبادة شعب من كل حقوقه ، دلوقتي جه الوقت إن هما كمان يجربوا إبادة حقوقهم و حقوق عيال عيال عيالهم ، مع منع أي حد من أقارب أل مبارك بالإشتراك في الحياة السياسية بكافة أشكالها .
و عن نفسي بقول للملك أحمد فؤاد إنت دلوقتي مواطن مصري بتتمتع بكافة حقوق المواطنة المصرية من حقك إنك تيجي مصر في أي وقت بدون إستئذان من حد ، من حقك إنك تعيش في مصر بلدك بس أنا شايف إنك تعيش في مصر ديه صعبة عليك شوية بس أهوه عرض ، إنما حق المعاملة بالمثل لا رجعة فيه لازم أل مبارك و كل أعوانهم يتمتعوا بالحياة تحت خط الفقر و ده حق ليهم لازم نديهلهم . وحاجة تانية بعيدة عن الشماتة ناس كتير كانت نفسها تشوف مبارك و أل مبارك في الموقف ده ، و كمان لو أل مبارك لسه في مصر و محدد إقامته أنا عن نفسي كفاية عليا ده ، أخيرا شفتك مكتوف الإيد و الرجل و محبوس في مكان و مش عارف تتصرف ، حتى كمان لو رحت بلد تانية برضه هتفضل في سجن كبير غصبن عنك ، تحياتي لأرواح الناس و الناس التي ذهبت على يدك إلى مثل هذه السجون الكبيرة ، تحية لكل من كانت يده مكبلة الأن أيادينا و أروحنا طليقة و ده برضه بعيد عن الشماتة . و برضه بطلب بحق المعاملة بالمثل .
