الناس دلوقتي عندها إنشغال عن موضوع كبير و هو فلوس مبارك فين ؟ و كام ؟ . نمسك الجزئية الإولى الفلوس كام كنت قريت مقال حلو في الدويتش فيلا ، المقال ده بإختصار عن حساب ثروة مبارك ، بيقولوا إن الثروة ديه ممكن تكون من 40 إلى 70 مليار دولار ، و هو رقم مش كبير للمدة إلي قعدها في الحكم يعني 30 سنة لو كل سنة بيطلع ب 2 مليار أو أزيد شوية يبقى المبلغ مرتاح يبقى ال70 مليار .
و بعدين الراجل تعب في تحويشة العمر ديه ، طبعا هوا إلي داس على زرار الضربة الجوية و ... إلخ . بس بشوية عقل كده الناس مستغربة ليه ، أفتكر كان فيه قضية بتاعت مدير بنك الإئتمان الزراعي على ما أعتقد ، كان المرتب الشهري بتاعه مليون جنيه و لقوا عنده 8 مليون جنيه مصاريف البيت !!!. بلاش ده مدير الأمن أو مساعد الوزير بيوصل بند المكافأت الشهرية نصف مليون جنيه ، و طبعا ديه أشغال دنيا بالنسبة لوظيفة رئيس جمهورية أو بمعنى أصح فرعون مصر الأول ، يعني لما العيال إلي تحتيه مرتبتهم الشهرية بالملايين ، طيب هو هيطلع أقل منهم ، لاء طبعاً .
و بعدين لو ماشين بنظم دول الفرنجة و مماشينها بالساعة فطبعا ً ساعته بالشيء الفلاني و ده غير فلوس الأجازات و طبعا شغلته بتبقى 24 ساعة في 7 أيام في 30 أو 31 يوم في 365 أو 36 يوم في السنة يعني بصراحة الراجل تعب لغاية لما لم تحويشة العمر ، ده غير عمولات السلاح و تسقيع الأراضي و و و و و .........حاجات كتيرة خالص فرعون بقى !!!!!!!!!!. الأعجب من كده إن الجهات الرسمية المصرية بتقول عن أن مرتب مبارك الشخصي باعتباره رئيساً للدولة كان صغير للغاية، مكنش بيتجاوز 808 دولار فقط شهرياً، على كلام هذه المصادر.
بالنسبة للجزئية التانية فين الفلوس ؟ فمبارك مش عبيط عشان يسيب فلوسه سايلة في البنوك ، تحسب لأي ظروف ! مسألة التقصي عن ثروة مبارك بتواجه صعوبات وعقبات قانونية تتعلق بالطرق الي تم فيها استثمار الفلوس ديه.، يعني كفاية إنه يديها لإبنه جمال يشغلهاله. مبارك وعائلته اتبعوا ثلاث طرق في توظيف الفلوس ديه أولها تقوم على مشاركة بعض رجال الأعمال في الدول العربية لإقامة مشاريع ، وثانيها شراء أسهم وسندات أوروبية وأمريكية ، وثالثها شراء عقارات في أوروبا ودول الخليج .
أخر حاجة لسه قاريها إن جمال في 4 سنين بس ربحان 189 مليون من شركة هرميس بس ، يعني من شركة واحدة في مدة تعتبر صغيرة كاسب مئات الملايين ، إمال من باقية الشركات كاسب قد إيه ؟؟؟ بصراحة الناس ديه بتشقى !!!. وبحسب تقرير لصحيفة بازلر تسايتونغ السويسرية فإن خبراء مكافحة الفساد يؤكدون أن الجزء الأكبر من ثروة مبارك تعود في الأصل إلى صفقات عقدت في تسعينات القرن الماضي، تم من خلالها خصخصة الكثير من المؤسسات والشركات والأراضي التابعة للدولة.
فتخيل ناس بتربح على طول متعودتش على الخسارة ، و أصحاب بلد بأجهزتها إلي موراهاش غير تأمين و تنفيذ رغبات العيلة الفرعونية ، مش هيعرفوا يداروا الفلوس ديه من غير تعقبها ، ناس عارفة بالقوانين الدولية و طبعا مش هما إلي يعرفوا ، الجيش الجرار إلي في خدمتهم ، بيطلعوا على كل جديد في القوانين العالمية و مصادر الإستثمار الجديدة و كل ده من غير أي شبهة . بس العجيب إن مصر طلبت من ألمانيا تجميد الحسابات المصرفية لمسئولين بارزين في النظام المصري السابق ، من غير التطرق إلى حسابات مبارك.
و كانت سويسرا أول الدول الي أصدرت قراراً بتجميد الأصول المالية لمبارك وعائلته الموجودة في بنوكها . وحث خبراء مكافحة الفساد دول العالم الأخرى على الاحتذاء بقرار سويسرا. نهاية الكلام ده الفلوس إلي هترجع لمصر تاني ببساطة الفكة بس ، إنما تحويشة العمر ممكن ترجع بس عاوزة وقت الله أعلم قد إيه عشان تتبع شبكة عاملة زاي خيوط العنكبوت و قليل جداً من الناس إلي تعرف الشبكة ديه ماشية إزاي ، تحويشة عمر بقى !!!. والي تتجاوز ثروة بيل غيتس صاحب شركة مايكروسوفت للبرمجيات .