لأول مرة أحس إني نفسي أوجه جواب أو رسالة للسيد مبارك ، و يستحق عن جدارة لقب السيد .
في أول الأمر أحب أن أتوجه للسيد مبارك بالشكر ، أيوة بالشكر لأقذر شخص ممكن يكون على الكرة الأرضية كلها في الوقت الحالي ، و أحب كمان أقول لأي شخص بيتعاطف مع البني أدم ده ، إيه نسيتوه .... نسيتوه 30 سنة من الظلم و البهدلة ، نسيتوه دم الناس إلي ماتوا ، مش بس في الأيام ديه لاء و قبل كده ، نسيتوه الإعتقالات بالظلم ، نسيتوه التعذيب .
جميل عاوز أقف عند كلمة التعذيب من وجهة نظر البعد إن كلمة تعذيب تدل على الوحشية ، أحب أقول بتدل على الوحشية إنما لو إتحطيت تحت كلمة الوحشية ديه فعليا هتلاقي إن الكلمة ديه مفيهاش أي دلالة للوحشية الفعلية ، نظام كانت عنده ميزانية لإستيراد أدوات التعذيب و إختراعها كمان لما يتناسب مع المواطن المصري ، لدرجة إني لسا قاري خبر إن ال إف بي أي كان بيدرب الظباط المصريين على ممارسة التعذيب ، بيعذبوا في مين بيعذبوا في المصريين يا معلم مش في العدو ، أيوة إحنا أهل البلد و أصحابها بيعذبوا فينا ، في طبعا وجهات نظر بتقول طيب و مبارك ماله من كل ده هوا مش مسؤول عن كل ده ، معاك حق بس رد واحد بس ممكن أرد بيه هوا فيه وزير و لا مسؤول كبير بياخد أوامره غير من مبارك ؟؟؟ و بعدين مبارك بأجهزته الجبارة المتغلغلة في كل الدولة للمحافظة على نظامه قايم محدش منهم كتبله تقرير إن فلان بيعذب في خلق الله ؟؟؟ يا ناس إتقوا ربنا ، مبارك مسؤول كل المسؤولية عن البهدلة و الظلم و قلة القيمة و قلة الكرامة إلي إحنا فيها . مفيش وزير عندنا بياخد قرار منفرد من غير لما يعود لمبارك . الحرامية الكبار سيبك من الصغيرين حد يقدر يسرق بدون مباركة أل مبارك ، كفاية النكت إلي كانت بتطلع على شراكة إبن الريس في كل حاجة ، خلاص دلوقتي بقت الإهانة إلي بتعرضلها وجعاكوا أوي ، طيب و بهدلتكوا في 30 سنة عادي فعلا بقول للحلويين دول إنتم فعلا معندكمش أي نوع من الكرامة !!! عملين بالمقولة ( متعودين دايما ) أه متعودين على البهدلة .
و أكتر حاجة تضايق جدا واحد فاكر نفسه ممثل معن عن نفسي شايفه تافه و متسلق شغال نهنهة و عياط و أصبح الناس إلي بطالب بعودة الكرامة هما القلة المندسة إلي هانوا عظمة فخامة الريس ، يا سلام يعني حضرتك قعدت معاه ساعتين و طالع محسس الناس إنك الوحيد إلي فاهم مبارك بيفكر إزاي و الناس إلي معاه بقالهم 30 سنة مش فاهمين حاجة .
وواحدة ممثلة برضوه محنا بقينا في زمن الساسة الفنانين إحرقوا الناس إلي في التحرير ، فعلا بقى إنتي واحدة معندكيش أي نوع من الكرامة و كفاية إنه مشكوك فيكي ذكر و لا إنثى ، بقت بالسهل نولع في الناس و نحرق و نشيل و نعذب و نسجن و نقتل .
كام واحد في عصر مبارك معتقل سياسياً ؟؟ ، كام واحد إختفى ؟؟؟ ، كام واحد محش يعرف طريقه فين ؟؟؟ ، كام واحد لاجيء سياسي في دول كتيرة ؟؟؟ ، كام واحد منفي برة مصر هربان بسبب مبارك ؟؟؟ و كام و كام .....؟؟؟.
بقيت كتير قوي كده ، و بعدين دلوقتي بقت لقمة العيش واقفة ؟؟ ، مين إلي وقفها ؟؟ ، الناس إلي محتاجاها و لا إلي بيمن عليهم بيها ؟؟؟ ، 45 % من الشعب المصري تحت خط الفقر عارفين يعني إيه ؟؟؟ ، برضوه الناس بتاعت دلوقتي هيا إلي خلت 45% من الناس تحت خط الفقر ؟؟؟ سبحان الله و يمكن كمان مسؤولين على زلزال 90 كمان أه و مسؤولين عن إنتشار أنفلونزا الخنازير و الطيور كمان ، و هما إلي بيبيعوا مصر كلها و هما سبب الخصخصة و ضرب العمولات كمان .
كفاية بقى كفاية !!! و فعلاً بقول لمبارك عن نفسي لن أنساك أبداً