ليبيا

واحد صاحبي بيكلمني " شفت إلي حصل في ليبيا ؟ ، القذافي قاعد بيقتل في الناس مش زاي مبارك ".

كان ردي عليه بمنتهى البساطة القذافي ده مجنون ، مش عاقل . يعني مش عارف أقولها و أمري ل الله ميتخدش عليه !! ، للأسف واحد مجنون بيصدر أمر بالقتل ، يبقى المجنون إلي بينفذ . إنما هو هيطلع منها للأسف .

هتحاسب مجنون إزاي ؟ ، هيحكموا عليه إنه يتحط في مستشفى المجانين يعني ؟ ، للأسف هيجن المجانين .

أخر حاجة سمعتها إن القذافي هرب لفينزويلا ( مش أكيد ) ، برضه مبارك فضلوا يقولوا هرب السعودية ، ألمانيا عرضت عليه يتعالج كلها في النهاية إشاعات ، و القذافي عشان مجنون من عيلة مجنونة كلها معتقدش إنه يهرب ، ممكن أخر ماييأس من الوضع ده يعمل حاجة من إتنين 

1ـ يقتل الشعب الليبي بالكامل ( ممكن ).

2ـ ينزل مع الشعب و يتظاهر ضد النظام ( مجنون و يعملها ).

فعلاً صعب التفكير ممكن الراجل ده يعمل إيه ؟ ، و المشكلة دلوقتي ممكن يخلي نصف قارة أفريقيا تهرب على إوروبا و على حسابه كمان تفيذ لتهديده الجديد بإنه مش هيمنع الهجرة السرية .

كل واحد من الرؤساء العباقرة القدام عاوز يفهم العالم إنه ماسك حاجة و محدش غيره يقدر يحكمها ، مبارك ماسك الإرهاب و حامي العالم ، القذافي ماسك الهجرة السرية و من غيره محدش يقدر يهرب على إوروبا ، و بصراحة معرفش بن علي كان ماسك إيه ؟؟؟.

بنقول كلنا يارب لإن لو القذافي مشى يبقى خلصنا من أقدم الحكام ، الراجل ده عدى عليه رؤساء مصريين ، و عشرات من الرؤساء الأمريكان ، فعلاً ربنا يكون في عون الشعب الليبي و يمشي الصنم من ليبيا.