مبارك زعيم الثورة

فريد الديب محامي الرئيس المخلوع، من عيلة كبيرة في إسكندرية، و مشهور من زمان، مش جديد على مهنة المحاماة، و لو حد يفتكر إنه كان من أعضاء لجنة إسترداد طابة.

الهم مش مدح في فريد الديب، بس فعلاً محامي مش سهل، هو يبان عليه إنه شكله طيب!!!، بس للأسف راجل يعرف القانون كويس، و تحت إيده طاقم كامل لا يستهان بيه.

و لما مبارك يختار محامي زاي فريد الديب، الواحد يبقى قلقان من خروج مبارك زاي الشعرة من العجينة!!!.

بس محدش قال هو أتعاب فريد الديب لدفاعه عن مبارك هياخدها من معاش مبارك و لا تبرع من أحباب مبارك، و لا يمكن من 8 مليون جنيه بتوع مبارك؟؟؟؟.

المهم فريد الديب بيقول إن هناك الملايين من مؤيدى مبارك فى مصر، طيب و إيه المانع لو كان ليه مؤيدين، أنا أفتخر إني من المعارضين!!!، عاوز إيه يعني؟؟؟.

لافتا إلى أنه ليس هناك أى مبرر على الإطلاق لوجود أى شكل من أشكال الإساءة لشخص حكم مصر طوال الفترة الماضية.

يا سلام، ليه إن شاء الله؟؟؟؟، هو مبارك إحترمني كبني أدم طوال 30 سنة حكم؟؟؟؟، لا إحترم أدميتي، لا إحترم خصوصية حياتي الشخصية، لا إحترم ..... لا إحترم ....... إلخ!!!!.

 

وأضاف الديب خلال حواره مع الإعلامى معتز الدمرداش فى برنامج (مصر الجديدة) أن مبارك أول من أيد الثورة!!!!، حيث قرر أن يرحل استجابة لمطالبها. 

طيب يا عم فريد، إرجع لخطابات مبارك و هتلاقيه كان بيتكلم على إن الثورة موجودة في بلد تانية غير مصر!!!!، كفاية إنه لو إستجاب لمطالب الناس، كان طلع هو بنفسه و قال جواب التنازل المزعوم، و أحب أكمل هو متنازلش، هو إتخلع حضرتك.

وقال الديب إن مبارك زعلان من الشعب بسبب الحملة الظالمة التى يتعرض لها، وهو ما أثر بشكل واضح على صحة الرئيس السابق الذى يقضى الكثير من الوقت فى حالة غيبوبة. 

طيب و إيه الجديد، ماهو مبارك أيام حكمه كان في غيبوبة برضوه!!!!، و بسبب الحملة الظالمة إلي كان قايم بيها على الشعب المصري، خلا 80 مليون بني أدم في غيبوبة تامة!!!!، الشعب كمان زعلان يا عم فريد.

السخرية حيث قال الديب أن مبارك هو أول من أيد ثورة 25 يناير، مدللا بقوله على أن مبارك استجاب لرغبة الشعب فى رحيله مضيفا من أراد التأكد من ذلك عليه الرجوع لخطابات مبارك أثناء الثورة.

أرجع و أقولك تاني، إرجع إنت للخطابات، ممكن تلاقيها على اليوتيوب!!!!، و شوف.

أه نسيت أقولك إنسى إنك فريد الديب و حط نفسك كمواطن مصري مهدور كرامته ل30 سنة، و قول إيه رأيك في الخطابات التاريخية النارية لمبارك!!!!.

مبارك يردد دائما (مفيش حاجة حلوة في 62 سنة خدمة) منتقدا ما اعتبره حملات للتشويه والسب والقذف التى يتعرض لها مبارك مبديا انزعاجه من تلك الحملات على الرغم من أن القضاء سيفصل فى الاتهامات الموجهه له. 

يا سيدي الفاضل، القضاء فاسد، ده أول القصيدة و عمر ماهيتم تنقية القضاء إلا بعد النظر في قضية مبارك و أعوانه، و بكررها تاني القضاء فاااااااااااااااااااااااااااااااااسد، و إلي عاوز يحاكمني على قولي إن القضاء فاسد يتفضل يحاكم!!!!.

بس للأسف هرفض المحاكمة تحت قضاء فاااااااااااااااااسد!!!!!!.

أما بالنسبة لسنين عمر مبارك في الحكم، فأحب أقولك إن أجمل حاجة عملها مبارك و أبدع فيها و حلوة بجد إنه خلانا نكرهه بجد، و هو كان فنان في كده!!!!.

أما بالنسبة إن مبارك في غيبوبة أو غيره، حتى لو فلت من محاكمات الدنيا كلها، هيروح فين من ربنا!!!!. 

 و لا نسيته إنه فيه ربنا، كل مشكلتكم إزاي مبارك يفلت من حكم البشر، طيب خليه يفكر كده هيقول إيه لربه يوم لما يموت!!!!. 

لا الديب و لا محامين الأرض كلهم هينفعوه ساعتها. 

 أحب أقول لمبارك متنساش فيه ملايين بيدعوا عليك كل يوم و كل ساعة و كل دقيقة و كل ثانية، هتروح من الدعوات ديه فين؟؟؟.