فعلاً السن إلي و فيه خطر جداً ، معروف إن مخ الراجل بيصغر تاني كل ماكبر.
و مبارك مخه وداه في دهية خلاص.
قاعد الراجل بيلعب معانا عسكر و حرامية !!!، نبتدي الحكاية من الأول-
بعد ما ساب القصر الرياسي ، راح على شرم الشيخ ، و قعد هناك في قصر يقال إنه قصر و لا ألف ليلة و ليلة ( أنا مشفتش حاجة ، هما إلي بيقولوا، يعني أنا كنت معاه ، و مشفتش حاجة!!.).
و بعد كده طلع علينا مش فاكر مين بالضبط ، يمكن المجلس العسكري و قال إن مبارك في شرم الشيخ ، و لم يغادر مصر بتاتاً!!!!!.
و طلعت شائعات مغرضة بعد كده إنه في السودان ، السعودية ، إسرائيل ، الإمارات و حتى بلاد الواق واق، بس المم المجلس العسكري طلعهم كلهم إشاعات!!!.
ماعلينا !!!!!، بس لاء تعالى يا عم الحج ، فيه بلد إوروبي وحشة و فتانة كمان ، قالت في جرنال مشهور و بيتوزع مجاناً كمان ، إن مبارك كان موجود عندهم لمدة 3 أيام للعلاج في أشهر منتجعاتها الصحية ، و إتعامل كمان كرئيس لجمهورية ، من حيث الإستقبال و البروتوكول ، و معروف عن سفير المصري لدى الدولة ديه ، إنه من مؤيدين الثورة من أول يوم طبعاً ، بس للأسف إستقبل مبارك ياعيني غصباً عنه!!!!!.
و طبعاُ أول حرف من إسم الدولة ديه ( النمسا ).
ممكن يكون المجلس العسكري نسى مبارك راح فين ؟؟؟، جوه مصر و لا بره مصر ؟؟؟، ممكن !!!، يعني هما مخهم كمبيوتر!!!.
و فصل المجلس العسكري يحاول بكل الطرق إنه يثبت إن مبارك جوه البلد ، و كمان في شرم الشيخ بالتحديد.
مش عارف مين من السجل المدني ، راح و قابل مبارك وش لوش.
طلعله دقن و خس شوية ، كل شوية من الخبار ديه ، و عنها فاضل خبر إن مبارك إستحمى النهاردة ، ( قال لما نسمع كد ، هنقوم كلنا و نستحمى!!!، عيد يا إخوة ).
المهم الكلام ده كوم و إلي جاي كوم تاني ، ده غير طبعاً قصة سوزان مبارك ، إلي أول لما سمعت قصة إحالتها للمحاكمة ، تعبت و ماتت كمان في المستشفى !!!، و أول لما قالولها خلاص القصة إنتهت ، راحت واخدة الجلابية في سنانها ، و زارت جزها ، أصيلة يا إم علاء!!!( هو الكلام بفلوس).
المهم خبر جميل جداً يقال ، و الرجوع على إلي قال ، إن مدير مستشفى شرم الشيخ ( أصبح عضو في جهاو الأمن الوطني ، تصالح مع فئات الشعب )، بالتعاون مع الداخلية و مش عارف مين تاني ،( ممكن العدو الأول للمجتمع العربي كله ، الموساد الإسرائيلي ، أه )، إنه ياخد مفتاح غرفة كاميرات المراقبة من الموظف المختص ، و مش كده بس ، لاء كمان فصل كاميرات المراقبة في الدور التالت كله !!!، و معروف إن المريض الوحيد إلي في الدور التالت هو مبارك ، و لأمنه لازم الكاميرات ديه تفضل شغاله !!!، بس مدير المستشفى طبقاً لشغلته الجديدة شاف إن كده أحسن حل ( أكيد عاوز يخلص من مبارك ، قدموه للمحاكمة هو كمان!!).
و مدير المستشفى عمل كل ده ليييييييييييييييه؟؟؟؟، لإنهم إكتشفوا بعد المدة ديه كلها ، إن فيه تسريبات عن الحياة الشخصية لمبارك ، فبدل مايدقق في الدخول و الخروج ، طلع ذكي فصل كاميرات المراقبة ، ( طيب يا عم المدير ، متفصل الكهربا كمان!!).
و بعدين هي كاميرات المراقبة كان موجودة في الأوضة عنده جوه؟؟؟؟.
و طبعاً لزوم تحبيش الخبر عشان يبان إنه دواعي أمنية ، طاقم الحراسة الشديدة جداً ، جابوا معاهم شنط فيها أشياء شخصية ، عشان هيطولوا في القعاد ، للحراسة طبعاً!!!!،( محدش مخه يروح لبعيد!!).
يعني ممكن واحد مخه يلعب فيه إبليس و يقول ، إن تجهيز الشنط بالأياء الخاصة ممكن يعني ....، عشان فيه سفر مثلاً...، و ممكن كمان تكون في الشنط سندوتشات و حاجة ساقعة لطول فترة الوردية !!!....ممكن!!.
الخبر الأجدع من كده ، خبر صغير في اليوم السابع بيقول -
إنطلقت مسيرة حاشدة تضم نحو 300 من شباب الثورة
في إتجاه مستشفى شرم الشيخ ...................إلخ ،
لم تتواجد قات من الشرطة أو الجيش بأماكن الإحتجاجات ( عادي جداً)، و لا في مختلف أنحاء المدينة ، ( راحوا يناموا شوية!!)، فضلاً عن عدم تواجدها لتأمين مهبط الطائرات الخاص بالمستشفى على خلاف المعتاد!!!!!!!!!!!!!!!!!!!!.
فاضل إيه تاني ؟؟؟، فاضل يقول إن مبارك قاعد في الإوضة بتاعته بيلعب صلح مع الحرس!!!!!.
بذمتكوا الراجل ده تعبني معاه و لا لاء........؟؟؟؟.