حكومة زاي الفل

أهيه الحكومة ديه هتعلم شعب مصر العفة و الطهارة و نقاء اليد !!!!!، و على رأي المقولة الشهيرة (بكرة تشوف يا جميل).

و كل حاجة موجودة على عينك يا تاجر ، (نظرية الشفافية الثورية).

مثال واحد بيتصل بالحكومة :

- الحكومة المصرية  الثورية

- أيوة يافندم أمرك

- أنا عاوز أحتج عن .........

- حريتك يا باشا ، بس قولنا إيه إلي مزعلك و إحنا نحاول نحله ؟؟؟

- أنا زعلان من ..... و من ...........إلخ 

- حاضر نوعدك بدراسة الموضوع.

تفتكر الحوار خلص على كده !؟!؟!؟، نشوف 

- ألو أمن الدولة ( يييه قصدي الأمن الوطني )

- أيوة إحنا ، معاك الحكومة المصرية الثورية 

- عاوزين إيه ؟؟؟

- عندنا واحد محتج عن ..... عن ......إلخ 

- سيبوهلنا إحنا هنحل كل مشاكله.

و بكده إنتهت مشكلة الأخ بتاع الإحتجاج، و فعلاً الحكومة أثبتت حسن تعاونها مع المواطن و درست الموضوع بشكل جيد جداً و في الأخر أحالته للجهاز المختص.

عاوزين إيه تاني يا شعب ........... .

أما بالنسبة للسادة المسؤولين المحالين للمحاكمات سواء المستعجلة أو الأجلة !!، فبرضوه الحكومة حطاهم في بند إستقبال الشكاوي و الإعتراضات ، مثال :

- ألو، الحكومة المصرية الثورية 

- أيوة يافندم أمرك 

- أنا عندي إحتجاج عن ............ و عن .............. ، إلخ 

أه و على فكرة أنا فلان .... من سجن بورتو طره.

- تحت أمر معاليك إعتبر إن الموضوع منتهي ، في سلامة الله و رعايته سعادتك!!!.

تروح الحكومة المصرية الثورية (عاملة إيه ؟؟؟؟)،

- ألو، إحنا الحكومة المصرية الثورية 

-تحت أمرك 

- إزاي طلبات الباشا متتحققش، إنتوا مش من الحكومة المصرية الثورية، إنتوا عملاء على الثورة!!!!،

(و يصدر إعلان على صفحة الحكومة المصرية الثورية، إنه تم إكتشاف عميل داخل الحكومة الثورية المصرية، و طبعاً تمت إحالته ياإما للتقاعد أو الحل الأسهل للمحاكمة!!؟؟، أيهما أقرب !!!.).

( و على فكرة ده رأي شخصي و لا يعبر عن أي شيء ثوري ، بس الخوف من إلي جاي فظيع جداً).

للأسف الشخص و هو بعيد عن منصب بيقول كلام، و أول لما بيشوف الكرسي بيقول كلام ، و لما بيقعد على الكرسي بيقول حاجة تانية خالص!!!.

و للأسف تاني الطمع في الوصول للمناصب موجود، و مفيش مشكلة للطامع في الكرسي إنه يدوس على 80 مليون بني أدم و بكررها بني أدم، و يوصل للي هو عاوزه، على حساب الصحة ل80 مليون، المشاعر ل80 مليون و على حساب قدرة 80 مليون.

إذا كنا قمنا بالثورة ديه بعد 30 سنة من الطغيان و قيس عليها فترات قبل كده، هل من الممكن إنه لما ييجي ظالم تاني هنقوم بعد قد إيه؟؟، و يا ترى ولادنا هيكون مصيرهم إيه؟؟؟.

لما قام الجيش في 52، إلي مسك الكرسي بعد كده أخد كل الإحتراس إنه متقومش ثورة من الشعب عليه، و فضلنا ساكتين و في بداية أي ثورات بتكون الحكومة، أو ماسك الحكم حساس جداً في ترسيخ حكمه، فبالتالي بياخد كل الإحتراس من عدم قيام ثورة على حكمه.

تخيل شعب طول عمره محطوط تحت الإحتلال، مقهور من كل شخص حتى من شخصيات بلده، المصير هيكون إيه؟؟؟.

يا ريت نشوف بكره، بدل مانشوف تحت رجلينا، نفكر في مستقبل جيل جاي، زاي ماإحنا طنا جيل جاي لناس قبلنا يمكن كانوا بيفكروا إحنا هنعمل إيه بعديهم ؟؟؟، ممكن يكونوا فشلوا في التصور، بس إحنا لازم نكون زاي الحاكم إلي بيعمل على الإحتراس من قيام ثورة ضدده ، إحنا نكون شعب بيعمل على الإحتراس من مجيء حاكم زاي ده!!!.

عاوز حكومة تكون حكومة زاي الفل !!!.