كل شوية يطلعوا علينا بتصريحات مملة ملل ، و في الأخر ينسوا إلي إتقال و يطلعوا بواحد جديد .
الأجمل من كده و إلي مش قادر أصدقه و أسف إني مش قادر أبلعوه خالص لا بمية و حتى بمية نار ، إزاي واحد من تعينات مبارك ، و أي واحد كان بيتعين على إيد مبارك في المناصب الحساسة في الدولة كان لازم يكون لامؤاخذة ملهوش فيها ، يعني يمشي على ماهو مرسوم و لا يوجد طريق للإبتكار ، و أرجع تاني إزاي ينقلب بالسرعة ديه على مبارك ؟؟؟؟ ، و طبعاً يطلع من كبار مشجعي الثورة ضد مبارك من قرووووووووووون طويلة حتى من قبل مامبارك يتولد !!!!.
يعني بصراحة كده ، المجلس العسكري ، النائب العام و حتى الجهاز المركزي للمحاسبات !!!!.
كلهم أيام مبارك كانوا بيهجموا سياسته و كل واحد فيهم كان بيقول الحق و رزقه على الله ، إنما مبارك الوحش كان بيرفض يسمع ليهم .
قال يعني إلي كان بيتعين منهم كان ليه نفس يطلع منه أصلاً !!!، الله يرحم الشلاليط إلي كانوا بياخدوها من أقدام مبارك الطاهرة !!.
و بعدين الفيلم كله مش راكب على بعضه بصراحة ، يعني ياخدوا علاء و جمال الطفلين الموهبين و يدخلوهم السجن ؟؟!!، ده ينفع ؟؟.
و لما لجنة من الصحفيين تروح السجن عشان تشوف الأوضاع ، يروح الليلة إلي في السجن تهدد بالإضراب عن الأكل لو خالوا حد يشوف الزنزانة بتاعتهم !!!، يا سلام !!!.
طيب ما يضربوا عن الطعام ، إيه إلي فيها ؟؟؟، أول لما يشموا ريحة السيمون فيميه أو الجمبري المقلي بطنهم هتجري على الأكل تاني.
مش حسبة برمة هي!!.
و بعدين من إمتى مراعاة حقوق البنب أدمين في التعامل ؟؟، ده إنتوا مكانش عندكوا فكرة عن حقوق الحيوان ، عرفتوا منين حقوق البني أدمين ؟؟؟.
لاء و الأعجب من كده التسريبات المضروبة بقى ، كل شوية مكالمة حية من سجين في سجن طرة يوصف الوضع هناك !!، يعني مراعاة للحقوق بصراحة على أكمل وجه !!، يعني السجين متوفر له تليفون لاسلكي في أي وقت يقدر يتمشى في جنينة بورتوطره ، و يتكلم مع برامج التليفزيون ، و ده على حساب السجن !!!، كفاية بقى إشتغالات .
و طبعاً مع بعض التحبيش ، عربية مياه معدنية ، أكل من فنادق خمس نجوم ؟؟؟، ليه هو الورق إلي ملفوف بيه الأكل عليه شعار الفندق و نجومه ؟؟؟.
أما بالنسبة لماما سوزان ، كانت بتموت و مرة واحدة إتنازلت عن شقى عمرها 24 مليون جنيه !؟!؟، و أفرجوا عنها ، راحت واخدة الكرسي أبو عجلات و رايحة جري تزور حستي في المستشفى ، قلب الأم ياإخوانا هتعمل إيه ؟؟؟.
إمال الأرقام الفلكية ديه كانت إشاعات الظاهر ، عيلة بتشقى من أولها لأخرها !!.
بتفكرني بقصة يوسف عبد الرحمن ، مديربنك الإئتمان الزراعي لما لاقوا عنده 8 مليون جنيه في البيت و كان رده ( مصروف العيال).
بصراحة عيال الزمن ده مصاريفهم كتيرة قويييييييييي!!!.
الأجمل من كده الدولة كلها ، قصدي الحكومة ، بالمجلس العسكري بيتحايلوا على مبارك بقالهم إسبوع ، يا حستي لازم تروح بورتوطره ، و حسني لاء مش رايح !!، ده ولادك هناك و هيسلوك ، حسني لاء يا عم ممكن ميلعبوش معايا ، ده إحنا جيبنلك دش مركزي هناك و فيه أفلام كرتون من إلي إنت بتحبها ، و حستي رافض تماماً إنه يروح حتى زيارة إفتتاح لبورتوطره ؟!؟!؟.
أما بالنسبة للوزير العبقري طنطاوي ، وزير الدفاع ، فأصبح الأن الراعي الرسمي للثورة المصرية و ممكن كمان يكون هو إلي بدعها، و طبعاً مع شوية وثائق ويكيليكس ، مع شوية شهود على العصر ، و أصبح المعين من قبل مبارك هو إلي مش عاوز مبارك؟؟!!؟، يا سبحان الله !!!.
بجد لازم نرجع نتفرج على إستقبال وزير الدفاع لحسني مبارك في أي إفتتاح و نتفرج على الجهود المبزولة في الإحتفال بحسني مبارك و قدومه الميمون للإفتتاح.
و لا بلاش كفاية إن المستشفيات العسكرية بها أدوار كاملة لحسني مبارك و عائلته.
فعلاً الوزير من سنين طويلة مكانش عاوز مبارك خالص !!!!.
أما بالنسبة للمجلس العسكري أجمع ، إلي كل تحريات الأمن العادي و العسكري إتدخلت في التحريات عنهم ، إلي كانت بتترفع لحسني مبارك شخصياً ، و هو إلي كان بيصدر المراسيم بتعينهم ، للأسف بقوا مش معاه خالص !!!.
أهوه عنده كل الوقت لمراجعة التحريات المستمرة عنهم ، و مع وجود هذه التحريات ، ففيه حاجات تانية معاه مش بس التحريات ، يعني معنى كده مفيش مسؤول مش مهدد من مبارك أو من الورق !!.
هما يتصرفوا مع بعض مش مشكلتنا إحنا ، بس الفيلم لغاية دلوقتي مش مبلوع !!، مش عارف ليه يمكن ناقصه شوية أكشن ؟؟؟، عيب ده إحنا إلي دهنا الهوا دوكو !!، هناك مخطط لإغتيال كل الحكومة و طبعاً تشرف عليه إسرائيل ( أكيد يعني ) ، هو إحنا عندنا عدو تاني والإغتيال ده مش بس للبرة لاء و إلي جوه السجون .
و مع كل ده و التصريحات مش عاوزة تسكت ، يعني الكوميديا الكبيرة ،جهاز الكسب غير المشروع ، ماله ده كمان ، تلقى الجهاز تقارير من اللجان الفنية المشكلة لتقدير قيمة القصر، الذى اشتراه الرئيس السابق من رجل الأعمال الهارب حسين سالم، وانتقلت اللجنة وأجرت معاينة على الطبيعة لمكان القصر فى شرم الشيخ، وأفادت التقديرات بأن القصر بما عليه من مبان وحمام سباحة يفوق ٤٠ مليون جنيه ، يعني اللجنة إنتقلت و عاينت الديكور و الإضاءة ، و طبعاً قاست المونة و مواد البنى و الدهانات و الذي منه و وصلت إن تمنه يتعدى ال40 مليون جنيه!!!.
إنما السعر ده شامل الضريبة ؟؟؟.
بلاها نفس الجهاز ، عنده بصراحة تصريحات كتيرة جداً بس يا ملل الديناصور بجد ، اللواء محسن راضى، مدير إدارة الكسب غير المشروع بمباحث الأموال العامة، والعقيد حمدى هاشم، الضابط بمباحث الأموال العامة، اللذين أعدا التحريات التكميلية عن أسرة الرئيس السابق، والتى أفادت بوجود العديد من الممتلكات والحسابات البنكية الخاصة بـ«علاء مبارك»، الذى يقوم الجهاز بالتحقيق معه خلال الأسبوع المقبل، بانتقال رئيس هيئة الفحص والتحقيق وعضو اللجنة المكلفة باسترداد الأموال المهربة إلى الخارج، إلى سجن مزرعة طرة لبدء أولى جلسات التحقيق معه ، يعني لجنة بتسمع للجنة و ضابط اضابط و هاما جره و ربنا يسهل نوصل لحل !!!، ده في المشمش سعادتك !!!.
كما تلقى الجهاز تحريات عن حسابات جمال وعلاء فى البنوك، وتحريات عن تلاعب بعض المسؤولين فى أسهم شركات من أجل تربيح (علاء)، وتقول التحريات إن (علاء) سبق أن حصل على أكثر من ٥٠ مليوناً فى أسهم شركة صندوق الاستثمار فى ١٩٩٠،(طيب و الإخوة المسؤولين إلي مع الثورة دلوقتي كانوا فين من 90 لغاية 2011 ، أكيد خايفين من مبارك الوحش)، والاكتتاب المغلق على أسهم شركة بالم هيلز، وأن هذا الاكتتاب جعل السهم يرتفع من ١٠٠ إلى ٩٠٠ جنيه، وأنهم سهلوا لعلاء مبارك الشراء بـ٩٩ جنيهاً للسهم، وقام ببيعه بعد أسبوع واحد بـ٩٠٠ جنيه للسهم الواحد، ونتج عن هذا التلاعب تحقيق ٣٠ مليوناً دون وجه حق، كما تلقى صورة من التحقيقات التى تجريها نيابة الشؤون المالية والتجارية فى هذه الواقعة، وأن علاء مبارك له بعض الأسهم فى الخارج، خاصة شركة (جولدن)، وحقق مئات الملايين نتيجة الاكتتابات المغلقة التى كان المسؤولون يقومون بها، مجاملة لنجل الرئيس، خاصة فى صناديق الاستثمار حورس ١، وحورس ٢، وحورس ٣، وتبين أن هناك حسابات فى جمعية محمد علاء مبارك الخيرية، وجمعية تنمية مصر الجديدة، التى تترأسها سوزان مبارك، بها مبالغ بالملايين، إمال ال 24 مليون جنيه إلي إتنازلت عنهم دول كانوا إيه ؟؟؟، معونة الشتا !!!.
كان فيه تقرير أمريكي و أعتقد إنه إسرائيلي كمان ، إزاي دولة مغيبة من عصور ، تصبح فيها الشفافية زاي ملل الديناصور ده ، أتمنى بقى ياريت نهاية الفيلم عشان بدايته كانت ملل و نصفه ملل فياريت النهاية تكون ......!!!.
تحديث
على كلام اليوم السابع إن الداخلية أخيراً إفتكرت إن حستي مبارك موجود في مستشفى شرم الشيخ ، فعززت الكردون الأمني مساء يوم الجمعة ، بصراحة أنا لو مكان حستي و مفيش أمن حوالية ، أنا لازم أسيب البلد فوراً.!!!.
نص الخبر من اليوم السابع
تحديث
على كلام اليوم السابع إن الداخلية أخيراً إفتكرت إن حستي مبارك موجود في مستشفى شرم الشيخ ، فعززت الكردون الأمني مساء يوم الجمعة ، بصراحة أنا لو مكان حستي و مفيش أمن حوالية ، أنا لازم أسيب البلد فوراً.!!!.
نص الخبر من اليوم السابع