كان فيه إجتماع لوزراء الداخلية للإتحاد الإوروبي ، لمناقشة التهديدات إلي جاية من أفريقيا .
و طبعاً التهديدات ديه عبارة عن سيول المهاجرين غير الشرعيين إلي جايين من دول أفريقية و عربية.
و كل التدفقات ديه بترمي على إيطاليا ، إلي طلبت مؤخراً مساعدة من الدول الإوروبية إنهم يشيلوا شوية من أعداد المهاجرين دول و ياخدوهم عندهم ، سيول متدفقة عليها من المهاجرين !!!!، و لكن الدول الإوروبية محترمة جداً ، قالت لاء ، و إتحججت بأعذار مختلفة .
فما كان من إيطاليا إلا إنها عطت اللاجئين دول إقامات مؤقتة و سربتهم على باقي الدول الإوروبية .
بصراحة الأخ بيرليسكوني ده مالهوش حل ، مخه ضارب زاي القذافي كده ، بس على مين ؟؟؟؟، راحت الدول الإوروبية شددت التفتيش على حدودها ، عشان الجراد إلي جاي من إيطاليا.
و طبعاً وقعوا في بعض ( الدول الإوروبية ) و بقت مشكلة كبيرة إستدعت إنهم يعملوا مؤتمر و يتناقشوا مع بعض ، و أخيراً إتوصلوا لقرار جميل جداً ، تشديد الرقابة على الحدود الإوروبية !!!، و ده معناه إن قارة إوروبا أصبحت قلعة حصينة ضد تدفق المهاجرين .
الأهم من ده كله إن القذافي كان على حق لما هدد إوروبا بفتح باب الهجرة غير الشرعية ، لإن إوروبا إعترفت إن القذافي كان الحارس لحدودها ضد التدفق الغير شرعي!!!!.
طيب ما إنتوا قلبتوا على القذافي !!!.
بس القذافي أجدع من بيرليسكوني بكتير ، راح عامل حركة تحفة جننت إوروبا كلها ، القذافي بقى متعودين على حركات غير عادية منه!!!.
بقى يحمل الناس على مراكب و يرميهم في البحر غصباً عنهم مش برضاهم ، يعني هتسافر إوروبا هتسافر إوروبا.
إلي عاوز يروح إوروبا ، يطلع على ليبيا دلوقتي ، و من غير ولا مليم ، هتتشحن على مركب و تطلع على إوروبا ، و لا كإنك في علبة سردين !!!.
بس على مين يا حلو ، هتشوف حاجتين إتنين ملهومش تالت ، أولاً ممكن المركب تغرق !!!، ممكن .
ثانياً هتوصل إوروبا بالسلامة و هيرحبوا بييك جداً ، بس شوية و هتترحل على مصر!!!.
حلوة ديه ، يعني خلصنا من مشكلة الناس إلي بتنصب بحجة السفر إلى إوروبا ، و أصبح كمان الهروب لإوروبا مجاني على إيد القذافي ، و إوروبا ترجعك تاني ؟!؟!؟! ، إيه الظلم ده ، و ممكن كمان يكون نحس !!.
بس لو جربت الفكرة هتلاقي إنك عملت رحلة مجانية ، الذهاب على حساب القذافي و العودة على حساب الدول الإوروبية !!.
مين بقى عاوز يسافر دلوقتي ؟؟؟؟؟؟.