موضوع شيق جداً نظراً للسرية الشديدة عليه ، و طبعاً إحنا بلد شاطرة في الكلام الكتير فطلعت 66 تعليل و تصريف للموضوع ده :
1ـ فلوس قناة السويس كلها
2ـ فلوس من الوزارات
3ـ 20 جبل دهب فلوسهم رايحة للرياسة
تلات تصريفات بيدور حواليهم الكلام ده طيب إفتراض إن التلاتة كلهم بيروحوا رياسة الجمهورية ، يعني مبلغ ضخم جداً جداً .
كان نفسي بصراحة أشتغل رئيس جمهورية ، بس الأهم من كل ده الفلوس الكتيرة جداً ديه بتتصرف إزاي ؟؟؟.
أولاً
تكلفة صيانة القصور كبيرة جداً ، بمعنى تجديد قصر واحد بس ممكن يتكلف عشرات الملايين لإنه لازم يكون فخم و على أعلى مستوى ، يعني مثال بعيد شوية بيتقال إن مكتب عمر سليمان أفخم من مكاتب رؤساء و ملوك فتخيل لما مدير المخابرات كده ، إمال مكاتب رياسة الجمهورية هتكون إيه ، و بعدين مش كل الأثاث بيجي من بره لاء بيتعمل جزء كتير منه في مصر و ديه معلومة أنا متأكد منها ، يعني مثلاً كراسي الصالون ، بيكون معمولة على حسب مقاسات معينة بحيث الريس لما يجي يقوم ميحتجش يسند على دراع الكرسي ، و موضوع التأثيث ده بيدفع فيه فلوس كتيرة بس مش للمصانع إلي بتصنع ، لجيوب إلي بيشتروا الحاجات ديه ، مفيش صاحب مصنع أو معرض موبيليا بيورد لقصور الرياسة أثاث يقدر يتكلم أو يتناقش في الأسعار مع مندوبي الرياسة ؟
ثانياً
الملابس و أنا لغاية دلوقتي مجتش ناحية عيلة الريس ، أنا بتكلم بس عن رجال الرياسة ، و تعدادهم برئيس الجمهورية 2000 شخص ، موظفين ، حراسة و عاملين ( ميكانيكية ، مكوجية ، سباكين ، نظافة ...إلخ ) ، البدل الفاخمة لليلة بتاعة الرياسة بيتقال رأيين ، إنها كلها من بره و إن سكرتارية الريس الخاصة بيجيبوا الكتالوجات و يعرضوها على البيج بورص و هو يختار ، الرأي التاني إنه بيفصل حاجته في مصر و من الكتالوجات ديه على إيد صاحب مصنع ملابس مشهور ، في كلتا الحالتين بيتكلف الموضوع ده فلوس كتيرة ، لإن لازم مع البدلة إكسسوارات كتيرة من كرافت و زراير قميص و ساعات فخمة ، بالنسبة لموضوع الساعات كان الريس في زيارة للإمارات و كانت هدية رئيس الإمارات للطقم إلي جه مع الريس ، الطقم كله حتى الحراسة ساعات رولكس دهب ديه الهدايا إلي بتيجي ، ده غير إلي بيتم شراها ، و طبعاً مش الريس لاء و كل إلي حواليه من سكرتارية و رئيس ديوان و طقم الحراسة .
ثالثاً
تكلفة تدريب الحراسة بتتكلف ملايين من الدولارات ، لإن تدريبهم بيتم في أمريكا ، ده غير تكلفة تدريبهم في مصر ، بمعنى طقم الحراسة عند جيم خاص بيه في سكنات الحرس الجمهوري ملهوش مثيل في العالم كله ، لإن مبارك بيهتم جداً بحراسته الشخصية لإنه عنده خوف دايم من الموت . أحدث الأسلحة و كمان عشان يكون مطمن كان بيطلب ساعات المسدس من حراسته عشان يجربه و يتأكد إنه جاهز على طول ، غير المباني السكنية المبنية مخصوص للحراسات ، القصور الفخمة لأعضاء السكرتارية ، و كبار رجال الرياسة كل ديه من ميزانية رياسة الجمهورية ، و من ضمن التدريبات تدريب السواقين ، و دول ليهم تدريب خاص بيهم .
رابعاً
سيارات رياسة الجمهورية و طبعاً كتير منا شاف موكب رئيس الجمهورية ، تعداد العربيات إلي فيه و قمة الفخامة و العربيات ديه فيه منها المصفح و ديه تكلفتها عالية جداً بلإضافة لتكلفة الطلبات الزيادة الجانبية في رفاهية العربيات ديه و العربيات الغير مصفحة كتير منها أحدث موديل و ديه تكلفتها عالية برضوه ،و العربيات إلي في موكب رئيس الجمهورية مش هي ديه بس إلي في الرياسة فيه غيرهم أكتر ، العربيات الخاصة بالسكرتارية و كبار رجال الرياسة و الحرس برضوه على ميزانية الرياسة.