قليل جداً من يعرف خبايا أمن الدولة ، و كيفية التعامل الداخلي في الجهاز الفظيع ده.
بس كتير شافوا دهاليز الجهاز من جوه ، لإنه ببساطة إعتقل ناس كتيرة جداً ، سواء في سجونه السرية أو المعلنة.
بس فعلاً كان جهاز مميز جداً، قوة السلطة الممنوحة لأقل درجة موجودة فيه، بمعنى مخبر أمن الدولة بمقام مأمور قسم ، إمال الظابط بقى بمقام مين ؟؟؟، تخيلوا بقى مدى الجبروت الممنوح ليهم.
لدرجة إن أجهزة الشرطة العادية تخاف جداً من أمن الدولة.
جرة قلم من ظابط أمن الدولة تمحي بني أدم أو تحيي بني أدم، ظباط أخدوا دور أعلى من دورهم بكتير، و من كتر جنون العظمة المسيطرة عليهم بقوا فاهميين إنهم يقدروا يقتلوا أو يحيوا إلي هما عاوزينه.
بالإضافة إنهم بياخدوا كل حاجة بلوشي، إرضاء سعادتهم واجبة على كل خلق الله.
يعني لو حد من عيلتك في الجهاز الفظيع ده، تكفي إنك تركب البلد كلها.
دلوقتي عاوزين نحاسب الظباط في أمن الدولة على سوء إستغلال السلطة.
طيب ينفع نحاسب عائلتهم و أصحابهم معاهم ، لإنهم برضوه إستغلوا السلطة معاهم.
في الحالة ديه بفتكر فيلم "زوجة رجل مهم" و مثل فيه أحمد ذكي دور ظابط أمن الدولة القوي الجبار، و مدى بطشهم و سيطرتهم على البلد من كل النواحي.
كان قرار وزير الداخلية هيبقى كويس جداً لو لغى أمن الدولة و بس ، من غير عمل نيولوك ليه.
و قال إيه هيستبعد كل الظباط الوحشيين و يجيب الظباط إلي محدش يعرفها، قال يعني الظباط ديه جاية من الجنة مش من أمن الدولة.
كان فيه ظابط أمن الدولة لما حد ينطق إسمه " يعني فلان باشا " يلحقه " صلى الله عليه و سلم " بجد الموضوع ده كان بيحصل بجد، تخيلوا مدى الكفر إلي وصلوا ليه، و إلي يضحك بجد إنهم كانوا بيحققوا مع عبدة الشيطان !!!!، إمال الظباط ديه كانوا بيعبدوا مين؟؟؟؟.
ياريت الوزير يفكر تاني، و يلغي الجهاز ده خالص، مش يعمل نيولوك و مباني جديدة تتكلف من ميزانية الدولة، و سجون سرية من ميزانية الدولة، و ياترى معدات التعذيب هيعفوها من الجمارك و لا إيه ؟؟؟؟، لإنها واقعة تحت بند خدمة المصلحة العامة !!!!.
كفاية إنك تسمع حكاوي معتقلين أمن الدولة، و شعر جسمك كله يقف من السمع بس، و تتخيل الناس ديه إستحملت إزاي ؟؟؟، المفروض بجد نعملهم تماثيل في كل الميادين لتخليد ذكرى أمن الدولة، بس الحمد الله الوزير محرمناش من أمن الدولة.
بجد البلد ديه لا ينفع معاها ثورة و لا ينفع معاها إنقلاب حتى ، المفروض نلم أصحاب السلطة أو مدمنين السلطة و نولع فيهم، عشان نوسع مكان لغيرهم و نديهم فرصة إنهم يطلعوا.
العجيب إنه مفيش في مصر كلها حد ينفع يمسك سلطة غير الناس القديمة، خلاص الناس ديه بقت مكتوبة علينا، إحنا نلم الشعب و ندور على حد يفك العمل المعمول !!!!.
نفسي بجد أشوف وشوش جديدة، و أهم من الشكل، عقول جديدة.
شباب بفكر جديد.
مش عقول متحجرة، أشكال قديمة، ماشية برضوه بالنيولوك، زاي من أمن الدولة للأمن الوطني، و عجبي!!!!.