في بالي سؤال بقاله فترة ، و مسيطر على كل تفكيري في كل وقت .
ينفع أرجع مصر تاني ؟؟؟؟ ، سؤال ممكن أي حد يشوفه يقول ماترجع هو حد منعك ، أو حد يبقى بره مصر و يعوز يرجعلها تاني ، غاوي فقر ؟؟؟؟.
طيب لو صغت السؤال بشكل تاني " ينفع المطرودين أو المنفيين على إيد نظام مبارك يرجع تاني مصر ؟؟؟؟".
مع العلم إن الوضع دلوقتي مخيف ، الأجهزة الأمنية المسؤلة عن النفي و الطرد موجودة بصورة أو بإخرى .
يعني الخطر في الرجوع موجود ، البهدلة موجودة ، السؤال ده مش في عقلي أنا بس، لاء فيه ناس كتيرة مخها قرب يقف من كتر التفكير في السؤال ده !!!!.
الخوف برضوه موجود ، الواحد عايش بين نارين ، الرجوع أو الإنتظار لغاية لما الإمور تتضح ؟؟؟.
يعني بعد ما الواحد قال خلاص هقدر أرجع و رجعت الروح ليا ، أصبح الوضع غامض و مش عارف أجاوب أو أدي حل لنفسي .
بس إلي مخليني عايش ، إن فيه أمل للرجوع ، بعد ما مكانش فيه أي نوع من الأمل في الرجوع نهائياً .
إمنيتي إني أدفن في بلدي و أرضي ، و الإمنية التانية إني أشوف إلي باقي من المعارف.
سؤال فعلاً محير ، معرفش إجابته إيه؟؟؟.
لإن التسرع بالإجابة ، ممكن تعمل مشاكل الواحد في غنى عنها تماماً في الوقت الحالي ، لا صحياً ، نفسياً و لا أي حاجة ......... خالص.