( ده مش هجوم على قناة الجزيرة و دورها الإعلامي ، إنما حركات الرؤساء ، الإمراء و الملوك مع بعض ، و حبهم للإنتقام و التشفي ، و تسخيرهم للمواد الإعلامية و القنوات و كل شيء تحت إيدهم لتوجيه ضربات مؤلمة و مزعجة لبعض ، و بصراحة أنا مبسوط من كده و عاوزهم يخلصوا على بعض عشان منلاقيش حد يحكمنا ، و نبقى شعوب ماشية على حل شعرها ،،،،،.)
نفسي أعرف إيه حكاية قطر و أمير قطر و قناة الجزيرة كمان ؟؟؟؟.
يعني أي حاجة بتحصل في القطر العربي ، تلاقي على طول قطر طلعت في النص ، كده بدون أي مقدمات سواء كانت بقناة الجزيرة ، تمثيل دبلوماسي عالي أو الأمير شخصياً.
الغريب إن قناة الجزيرة كل يوم مش عاوز أقول كل ساعة ، تعرض على قنواتها التعسف و الإحتلال الإسرائيلي لفلسطين . و التليفزيونات العربية التانية ، بس الجزيرة ليها نسب مشاهدة أعلى من أي قناة تانية ، لإنها طورت طريقة نقل الأخبار ، و ده يخليها قناة قوية لتوجيه الضربات !!!!.
معن قطر على علاقات إقتصادية و سياسية قوية جداً مع إسرائيل !!!!.
و مش قطر بس ، لا دول عربية كتير بتعمل نفس الشيء ، توجه القنوات و الأفكار لفكر معين ، و المصالح تحت الترابيزة شغالة ، ليه ركوب الموجة بقى؟؟؟؟ ، مش مشكلتنا قوي كل حاكم حر في ركوب الموجة بتاعته.
نرجع تاني لقطر ، قطر على علاقة قوية جداً بأمريكا ، عندها أكبر قاعدة عسكرية أمريكية في المنطقة!!!.
بعد تنحي مبارك مباشرةً ، لاقينا أمير قطر عاوز يزور مصر و يهني الشعب المصري و ممكن يعزي مبارك كمان في مصابه الأليم ، كله واجب الصراحة ، و يقدم مليار دولار معونات عاجلة!!! ، إيه الحب ده كله ؟؟؟.
طيب الأمير بيحب المصريين جداً ، ممكن عقد عمل في قطر ، بمرتب مليون دولار في الشهر ؟؟؟.
و بعدين نلاقي قناة الجزيرة من أنشط القنوات الإخبارية في تغطية الثورة ، لحظة بلحظة ، و بصراحة دور جميل معملهوش تليفزيونا العظيم و لكن بيقول البعض "( هو ده مش ممكن يكون تجميع معلومات مباشرة يخدم أطراف تانية ؟؟. )" ، مش مشكلتي ديه مشكلة جهاز المخابرات العامة القوي بتاع رأفت الهجان!!!!.
نرجع تاني لقطر و نشوف قناة الجزيرة أثناء تغطية الثورة التونسية ، مكانتش زاي تغطيتها للمصرية أو الليبية!!!.
و حصل موضوع الثورة الليبية و القذافي ، و طبعاً قناة الجزيرة رشقة في ليبيا ، سواء بقناة الجزيرة الإخبارية ، الجزيرة مباشر و فاضل تغطية الجزيرة الرياضية !!!!. جميل لنقل الصورة الواقعية في الأحداث ، طيب و اليمن فين من التغطية ديه ؟؟؟. و لا العين القطرية على القذافي و مبارك بس ؟؟؟؟.
إمتى ممكن يكون الإعلام العربي مستقل ، مستقل عن إستغلاله في توجيه الضربات و توجيه الشعوب لفكر معين يسبب الكراهية و العداء؟؟؟.
و أول دولة تتبرع بالدخول في الضربة العسكرية ضد ليبيا!!!.
إيه إلي ممكن نفهمه من سياسة النظام القطري؟؟؟.
بعدين فيه سؤال مضايقني شوية ، لو حصل تغيير أو ثورة في قطر ، أنهيه قناة عربية ممكن تغطي الحدث العظيم ده ؟؟؟.
بصراحة مفيش بس ممكن أرشح قناة إسرائيل الإولى ممكن تغطي حكاية قطر العجيبة !!!!.