عاوز أرشح نفسي لرئاسة الجمهورية ، ممكن ؟؟.
الأسباب : بحب السلطة جداً ، عاوز أكون نفسي و كمان عاوز أعتقل إلي بيضايقني!!.
أما بالنسبة للبرنامج بتاعي فهو بسيط جداً ، مكون من ؛
- هلغي الفلوس الورقية و المعدنية ، و هيبقى البيع و الشرا بالبطاقة.
( البطاقة هتكون فيها شريحة عليها كل البيانات بالإضافة للمرتب ، و بكده هنلغي الفلوس و مش هيبقى فيه سرقات ، و هنقدر نساعد جهاز الإحصاء و المباحث كمان ).
- التعليم لغاية الإعدادي مجاني على الدولة ، التعليم الثانوي المهني هيكون مدعم نصفه على الدولة ، أما الثانوية العامة مجاني للمتفوق فقط ، الجامعات برضه مجانية للمتفوقين بس ، ( هيبقى عندنا طبقة حرفية كتيرة ، و نقلل من البطالة حاملة الشهادات العليا ، و نقدر نرجع عملية التفوق و الإستحقاق للتعليم العالي ).
- الدخل من السياحة الداخلية مهم جداً ( من حق المصري إنه يستمتع ببلده ) ، و للمصري أسعار خاصة لإنه صاحب البلد ، الأجنبي لازم يدفع مقابل إستمتاعه بالبلد .
- أي أجنبي عاوز يدخل مصر لازم ياخد تأشيرة دخول من السفارات المصرية مقابل مصاريف و تفعيل نظرية المعاملة بالمثل ( بمعنى كل بلد متبعة معانا نظام هنتبعه زيهم - هيغلوا في التأشيرات هنغليها عليهم - هيلغوا التأشيرات هنلغيها ).
- لازم نرجع أهمية الباسبور المصري ، و لحامله المعاملة الكريمة في أي بلد يكون فيها.
الدول إلي بترغم أي متجنس بالتنازل عن جنسيته الأصلية للتجنس بجنسيتها ، تسقط عنه الجنسية المصرية و لا يستحق إستردادها و يعامل كأجنبي في كل المعاملات.
تقوية دور سفارتنا بالخارج ، ليكون دورها الأول خدمة الجالية المصرية ( إحنا مش أقل من الفلبين ).
- عمل نظام تأمين صحي شامل لكل المصريين ، و يكون مبلغ التأمين الشهري حسب الدخل .
- مراجعة كافة الإتفاقيات المبرمة معنا و إلغاء فوري للي غير صالح لينا أو يتعارض مع مصلحتنا.
- أي موكب سواء رئيس ، وزير مفيش حاجة إسمها قفل الشارع ، قوة التأمين إلي حواليه تتعب شوية و تأمنه وسط الناس.
- كرئيس هنزل مرة كل إسبوع لمحافظة و ألتقي مع المجلس المحلي للمحافظات.
- كرئيس للجمهورية هحضر مرة كل ستة أشهر لمجلس الشعب لمناقشة إلي حصل في خلال الفترة و مناقشة ما سوف.
- المحافظين بالإنتخاب ، و ليس بالتعيين.
- كرامة المصري في بلده أهم من أي شيء تاني.
- تفعيل الهجرة الداخلية ، مع إنشاء المدن المليونية.
- وضع قوانين لتنظيم عمل الأجانب ، ووضع حد أدنى و أقصى للمرتبات ككل ، و أولوية العمل للمصري ثم الأجنبي.
- إنشاء مكتب العمل و يكون مسؤول عن المساعدة في البحث على وظائف و توفيرها و ليس للقطاع العام فقط بل و الخاص أيضاً.
وضع نظام كامل للمعاشات ، مع تحديد سن المعاش و لا يراعى التجديد في الميعاد أبداً ( معاش يعني معاش على بيتكوا).
- الإنتفاع ببراءات الإختراع ( المناسب من الإختراعات ، هيلاقي تعاون كامل من الدولة ، و ممكن الدولة تدخل معاه شريك في مشروعه ).
ده طلع عشان أحط الكام نقطة موضوع صعب جداً ، لو الواحد عاوز يعمل حاجة ، إنما لو دش و خلاص يبقى لازم أشوف إسطنبة الحزب الوطني !!!.
إحنا طلع عندنا خلل في حاجات كتيرة جداً ، مش عارف إزاي ممكن رئيس جمهورية منتخب لفترة ٤ سنين يقدر يعدل في الفترة ديه خلل عشرات السنين ، يعني الرئيس إلي جاي هيطلع من الرئاسة عقله ضارب ، محتاج يشتغل ٢٤ ساعة لمدة ٤ سنين من غير أجازات عشان يبتدي يعمل نظام و بلد من أول و جديد.
فعلاً مشاكل البيت مش زاي مشاكل بلد ، عشان كده أنا مش عاوز أكون رئيس الجمهورية ، يفتح الله يا عم .