كان ماشي معانا برأي جميل ( هتروح مني فين يا مواطن )!!!.
الصبح أول لما تصحى و تمسك الجرنال تلاقيه في وشك.
تفتح الراديو أخباره و صوته.
تفتح التليفزيون تلاقيه.
تنزل الشارع صوره في كل مكان.
تركب العربية الشوارع و الميادين بإسمه.
و بصراحة كان فيه ناس بتخاف تفتح التلاجة ، ممكن يكون مستخبي جوه، أصله كان ليه حركات عجيبة شوية!!!.
المشكلة دلوقتي ، من كتر المعزة مابينا و بين مبارك بجد مش قادرين يبعد عننا ، أول لما إتسمع إنه هيسافر للعلاج بره ، الناس قامت (لاء لا يمكن يمشي و يسيبنا ) ، دخول الحمام مش زاي خروجه.
بس بقى كفاية هزار و نتكلم جد شوية ، بقى لو مبارك عاوز يسيب مصر و يروح أي حتة ، هو فيه حد هيعرف عن الموضوع ده؟؟.
بمعنى إحنا مش زاييه ، يعني لا بيشوفنا كل يوم في الجرايد و لا التليفزيون و لا حتى في مجلة ميكي!!!.
و إحنا كمان منعرفش عنه أي حاجة في الوقت الحالي ، غير من التسريبات الوهمية غير معلومة المصدر ، ( مصدر مقرب من العائلة الرئاسية السابقة ) ، و يطلع علينا جيشنا الظريف بحكاية إن مبارك محدد الإقامة ، بس لزيارات و التليفون مسموح مفيش مشكلة ، و الحرس الخاص بيه أيام ماكان رئيس هو نفس الحرس إلي بيحدد إقامته دلوقتي !!!، مفيش مشكلة من الموضوع ده مش مشكلتنا.
بس إلي عاوز أوصله ، إن إحنا لا يمكن نعرف مبارك في مصر و لا في السعودية و لا حتى في إسرائيل؟؟؟؟!!.
و مبقاش بيطلع من التلاجات دلوقتي !!، التصريحات هي البنج دلوقتي؟؟.
الجيش طلع و قال إن مبارك في مصر ، خلاص صادق مفيش مشكلة صح!!، و لا نسمع للمصادر المقربة من العيلة الرئاسية؟؟!!.
ولا عشان نستريح من الإرتباك ده كله نعمل معاه مقابلة تليفزيونية ، أو عندي إقتراح أحسن من كده إحنا نعمل قناة خاصة بحياة الرئيس السابق لايف ، فبكده نكون متتبعينه 7/24 إيه رأيكم في الإقتراح ده ، و من غير مايحس بالموضوع ده ، أه هنستخدم نفس الأجهزة الغالية إلي كان بيستخدمها معانا في التجسس على حياتنا الخاصة ، بس معاه إحنا مش بنتجسس ، إحنا بنحاول نعرف عاداته و تقاليده في الحياة بس !!!!.
المهم إحنا عاوزينه يفضل جنبنا على طول و يرجع إلي أخده ، لإنه أخد كتير قوي ، و ده السبب الرئيسي إن مبارك يفضل في قلوبنا.