الكشف عن أصحاب ( رشوة مرسيدس ) و النيابة تحيلهم ل( الجنايات ) محبوسين،
( المصري اليوم ).
قصة بجد مسلية !!، فضلوا من فترة طويلة ، إلحق شركة مرسيدس دفعت رشوة لمسؤول مصري !!!، مين السؤول ده ؟؟؟ ، كام المبلغ ؟؟؟، و كان الرد ( مش هقولك )، وواحد بيطلع لسانه!!.
طبعاً شركة مرسيدس شركة عريقة و كبيرة و إكتشفوا إنها بتدخل الأسواق عن طريق الرشاوي.
و قعدنا نتحايل فترة طويلة على المدعي العام الأمريكي على ما أعتقد ، و كان الرد لما يجي طلب رسمي من السلطات المصرية !!، و طبعاً لا حد بعت و لا حد إهتم غير دلوقتي !!!. طيب الحمد ل الله.
كانت الرشوة مقدمة لمسؤول كبير على أساس إنه يجبر بقيت المسؤولين على ركوب عربيات مرسيدس ، و بصراحة أنا لو مسؤول مش محتاج حد يضغط علي في ركوب العربية التحفة ماركة مرسيدس!!.
أما المضحك في الخبر بجد ، إن بطل القصة كلها يطلع رئيس مجلس إدارة سابق لإحدى شركات الهيئة العربية للتصنيع و مراته ، و رئيس مجلس الإدارة الحالي !!.
طيب بذمتكوا طلعوا حد تاني غير دول !!!، هو رئيس مجلس إدارة لإحدى الشركات و بكررها تاني لإحدى الشركات ، أصبح مسؤول كبير ؟؟؟، إمال رئيس مجلس إدارة الهيئة ككل يبقى إيه رئيس جمهورية ؟؟؟.
و العجيب وراه على طول مراته ، بصراحة بس الجنس اللطيف ميزعلش ، أصبح وراء كل مصيبة ست !!.
السؤال هنا إيه مدى تأثير الناس المتهمة ديه على المسؤولين المصريين ، في إجبارهم على ركوب عربيات مرسيدس؟؟.
و بعدين هي شركة مرسيدس علاقتها في مصر محدودة قوي للدرجة ديه ؟؟؟.
إيه مكانش فيه مسؤولين كبار ساعتها ؟؟؟.
مش بقولكم قصة مسلية جداً!!!.