قانون الطواريء و أخرتها

من ساعة لما المشير طلع علينا بهديته لثورة 25 يناير ، بإلغاءه قانون الطواريء و إنه يقتصر على البلطجة!!!، و أنا بصراحة بكلم نفسي.

هما هيلغوا قانون الطواريء مع قيام الساعة؟؟؟، الخوف إن قانون الطواريء يتحول لما يشبه الأميبا، و يبقى إلي نهاية الحياة و العالم، و شكله كده ناوي على البقاء حتى بعد فناء الإنسانية!!!.

قانون من أبو ديل!!!.

و شكله كده هيتطبق على أعمال البلطجة إلي بتم في ميدان التحرير، و أي مظاهرة هتم!!!، ببساطة الجيش معتبر الناس كلها بلطجية.

كل شوية يطلعوا بكلمة جميلة جداً، شباب 25 يناير مش هما إلي في التحرير دلوقتي!!!، فعلاً أنا مع الجملة ديه، شباب 25 يناير رحلوا للمريخ و تم مبادلتهم بعناصر مخربة من الفضاء!!!!.

و إنضم للبلطجة حالياً، عناصر نسائية، بس للأسف عناصر نسائية غير مدربة على أعمال البلطجة الصح، فعشان كده بينزلوا تحت جزم العساكر، و من كتر الحر تحت الجزم، بيقلعوا هدومهم، حر حر...!!!!!.

بس مسيرهم هياخدوا خبرة، إمتى مش عارف!!!!.

و ياريت مع الخبرة، حد يتبرع ببدل حديدية زاي بتاعت فرسان العهود القديمة، عشان تبقى سهلة القلع!!!.

المجلس العسكري في الفترة إلي فاتت ، أثبت أحسن مثال في قبول الرأي الأخر!!!!، " تناقشني، أناقشك....، تخالفني، أقتلك....!!".

المجلس العسكري تلميذ مبارك المخلوع ، مبدع في إنتهاج نفس الطريق، أنا عاطل، مراتي عاطلة و أولادي عاطلون، إنما الأسانسير شغال!!!، مش مشكلتهم إيه المشاكل، مشكلتم إزاي تتكلم على أسيادك، إزاي أشغلك بحاجة و أنا بعمل حاجة تانية.

ترفع إيدك عشان تعترض، تلاقي واحد بيرغمك و يقولك " نزل إيدك يا جدع إنت!!!"، شعار المجلس العسكري الحالي" إحنا بتوع فتح مطاوي، إنما أمخاخ لاء...!!!".

تيجي تفهم المجلس العسكري إن عنوان إلي حصل في 25 يناير كان إسمه " ثورة"، يرد عليك بمنتهى البساطة " خليك في عنوان بيتكوا...!!".

قعدنا 30 سنة معترضين على قانون الطواريء، طلع علينا المخلوع و قال " قانون الطواريء هيطبق على الإرهاب بس...!!".

و بعد كده إتضح إن الشعب كله إرهابيين!!!!.

طلع علينا المشير و قال " قانون الطواريء هيطبق على الأعمال التي تتسم بلبلطجة...".

و بعد كده إتضح إن الشعب كله بلطجية!!!.

بصراحة مش عارف مال قانون الطواريء و مالنا، و أخرتها معاه إيه؟؟؟.

إقرأ المزيد... Résuméabuiyad GRAKOLLO

الإخوان المسلمين إلى عرش مصر

أنا مش عارف الإخوان المسلمين عاوزين إيه ؟ عاوزين الكرسي الكبير للبلد ؟؟ ممكن.

طيب إفتراض وصلوا لكرسي الرياسة إفتراض !!! إيه إلي بعد كده ؟ . 

هيخلوا مصر بلد الخلافة الإسلامية ؟ ممكن .

طيب و ساعتها إيران و السعودية وووووو ..... إلخ هيبقى إيه موقفهم ؟ هيسيبوهم عادي كده و لا هيجيبولنا إيران بالثورة بتعتهم . 

إلي بيحصل في مصر من زمان مش عارف أقول إيه كل حاجة بنقول أو بيتقال إنه مخططات أجنبية و إن المخابرات الإيرانية و الإسرائيلية و .....إلخ عاوزة خراب البلد .

طيب و الإخوان المسلمين بكل خططهم الجبارة عاوزين إيه الأمان لمصر يعني ؟؟؟ و إيه إلي يمنع إن الإخوان المسلمين إيد الغرب أو أي بتنجان للخراب في مصر إيه المانع ؟؟؟. 
 

أنا أسف التخطيط كله من جوه البلد ! مش من بره كفاية بقى كدب و خداع ، الإخوان المسلمين قوة لا يمكن الإستهانة بيهم في الوقت الحالي ، إنما حسابهم جاي .

و لو كان مبارك مشي فجأة بدون أي مقدمات كان أكتر ناس أو منظمة مينفعش يتقال عليه حزب هو الوحيد إلي يقدر السيطرة على الرياسة لإنهم بمنتهى البساطة منظمين معروف مين الرئيس و معروف الوزرا ء فيهم ، عندهم هيكل إداري و نظام سياسي و مالي كبير و منظم ، لدرجة إن دول حاولت توصل للتنظيم المالي بتاعهم فشلت بدون تعاون داخلي من بعض أفراد الإخوان المسلمين السابقيين كما يقال أو المنقلبين على الإخوان المسلمبن.

تخيلوا دول فشلت في تتبع تنظيمهم المالي فقط !!!!.

المهم نرجع لبقية الكلام،  إنما أي حزب تاني غير الحزب الوطني كلهم مابين بعض، حروب و قضايا، فين التشكيل بتاعهم؟؟، فين السياسة أو الفكر للأحزاب ديه ؟؟؟؟ مفيش ، و بعدين الإخوان إلي بيعملوه ماشيين بالمثل ( نفسي فيه و بقول إخييه ) ، عاوزين كرسي الرياسة بس قدام الناس لاء مالناش نفس .

نفس طريقة حسني مبارك لما كان عاوز إبنه يمسك الحكم !!!.

و كمان إبنه كان ميجاوبش على السؤال ده ، إنما بعد إلي حصل، الإجابة كانت قاطعة إبن مبارك مش هيمسك الحكم !!!.

غريبة الإجابة القاطعة في وقت الزنقة . يعني ممكن الحاجة ديه تحصل مع الإخوان لما يتزنقوا ممكن !! بس السؤال إيه إلي ممكن يخليهم في موقف المزنوق ده ؟؟.

أرجع و أكمل فكرة إن الإخوان مسكوا الحكم ، و أمريكا وافقت و إسرائيل كمان وافقت بيهم ، محنا عشان حد يحكمنا المفروض ميكونش لينا رأي قبل أي حد من الدول ديه!!!، هما يوافقوا و إحنا ننفذ ديمقراطية بقى !!!!.

هتكون سياستهم الدينية متزمتة ؟؟؟،و لا هيعملوا زاي تركيا يغلفوا الدين بالعلمانية ؟؟؟.

أنا عن نفسي مينفعش معايا إم الإحتيال التركي ده !!!!.

طيب تركيا عندها مشكلة نفسها تنضم للإتحاد الإوروبي فبتغلف الدين بالعلمانية ، إنما الإخوان المسلمين مش هيضموا مصر للإتحاد الإوروبي !!!! يبقى مفيش قدامهم غير التزمت الديني ، يعني أخلص من حكم ديكتاتوري كانت كل حاجة فيه برضوه ماشية بالحرام و الحلال عشان خاطر الريس و الحاشية  بتاعته ، هيجي ناس برضه تحرم و تحلل إلي على مزاجها . لا كفاية أنا عاوز نظام علماني عاوز أكون متحرر من قوانين الدين و الحكام ، كفاية بقى نظام تسييس الدين و تديين السياسة عاوز أعيش حر من غير حرام و حلال ، و كمان حرام و حلال من وجهة رأيي أنا حاجة نسبية يختلف عليها إتنين و عشرة كمان . 

و برضه بكرر تاني الإخوان المسلمين عارفين إن على راسهم بطحة و ياريت واحدة بس لا كذا بطحة و ده كتير ، أفعالهم و مصايبهم كتيرة جدا .

و برجع و أقول أنا أرفع لتنظيم الإخوان المسلمين القبعة لتغلغلهم في كل مجالات الأجهزة الأمنية و سيطرتكم على الأجهزة الأمنية الحساسة في البلد ، إتعلمتوا الدروس بس للأسف لسه فيه حاجات كتيرة متعلمتوهاش لسه .

وصلتوا للرأي العام العالمي و فعلا في إيدكوا حاجات كتيرة للضغط أنا بجد مش عارف إحنا بنتعامل مع مين أرنب في صورة وحش و لا  وحش في صورة أرنب !! .

بس الوصول للحكم صعب جدا و ده يطمن شوية و أتمنى إن إلي يجي بعد مبارك ميروحش يبوس إيد المرشد لنوال البركة و التذكية إنه يمسك الحكم .

كفاية درس مبارك كان كفيل إنه يعرف بالقيمة بتاعتكوا و قوتكم قدام نظام مهلهل متقدروش غير على نظام عجوز .

إنما أكيد إلي جاي هيكون لسه شباب و يخلص على تنظيم الإخطبوط ، و ينهي عليه تماما . 

أتمنى فعلا نهاية قوية ليكم بس قدام إلي بيحصل فعلا إنتم أجبن مما أي حد ممكن يتخيل !!!!.

ده كان رأيي في 02/02/2011، إن النظام العالمي هيقدر يقف قدام الإخوان المسلمين، لإن النظام المتبع إن النظام العالمي يوافق أو يرفض و إحنا علينا التنفيذ، يعني تقدر تقول 80 مليون مسيرين و ليسوا مخيرين .


طبعاً دلوقتي مقدرش أقول إن النظام إتغير!!!، لاء إحنا ماشين على درب الرئيس المخلد {المخلوع}، مستنين الإنقاذ من دول متعرفش غير مصلحتها فقط لا غير!!!.

مش قصدي دول تحتل مصر، قصدي دول تكون مساندة لإرادة شعب عاوز يتحرر، من حكم لازق في الشعب،مثال الإتحاد الإوروبي، الإمم المتحدة !!!!.

لكن الواضح إن ملهومش أي قيمة، الإتنين دول بالذات طلعوا علينا 2005 و قالوا إن الإنتخابات كانت كلها ديموقراطية، و طلعوا علينا قبل كده و قالوا نظام مبارك كله ديموقراطية!!!.

طبعاً الإخوان وصلوا لمجلس الشعب و ربنا يسهل حيخدوا الشورى، و قدامهم الرياسة مفتوحة!!، مفيش أي مشكلة!!!، كنت متخوف من التشدد، إنما طلع التشدد ده خيال في دماغي، لغاية دلوقتي!!!.

طيب فيه خبر شدني شوية، إن محامي العادلي ، قال إن الإخوان كانوا متعاملين مع أمن الدولة، و طبعاً متحدث الإخوان و إعلاميين، وقفوا ضد الكلام ده، و قالوا إمال الإعتقالات، و السجون، ....إلخ!!.

طبعاً تأثيرهم على كل حاجة أو بمعنى أصح لما تكون ماسك في إيدك الخيوط، طبعاً بتكون واثق، و قيادات الإخوان واثقة إن كلام المحامي مجرد كلام بدون أي مستندات،لإن ببساطة ملفات أمن الدولة إلي إتفرم و إلي إستخبا يعني مطمنين إن كله تمام.

لكن المفاجأة الحقيقية إن الملفات موجودة و فيها إدانة واضحة جداً لوقوف الإخوان المسلمين مع أمن الدولة!!!. 

تعاون كامل!!!!.

طيب بلاش، خد ديه إزاي تقارير أمن الدولة كانت بتوصل لقيادات الإخوان؟؟؟؟.
   
إيه كان فيه ظباط أمن الدولة من الإخوان؟؟؟؟، ماهو مفيش غير كده!!!.

كل إلي كان بيحصل كان أفلام!!!.

 

إقرأ المزيد... Résuméabuiyad GRAKOLLO

إسرائيل إلى الأبد ؟؟؟؟؟؟؟ العقل و العقل الأخر

كل مرة تحصل حاجة في مصر تروح الصحافة طالعة علينا بأخبار حلوة جدا زاي كده صحيفة اليوم السابع طلعت بخبر لذيذ جدا ( الصحافة الإسرائيلية تشعل فتيل الفتنة الطائفية و تقول إن المسيحيين في مصر و كنائسهم في خطر ) جميل خبر حلو و جديد بقينا دلوقتي متابعين الصحافة الإسرائيلية بالنسبالي أنا بصحى الصبح أقرا الصحف المصرية مش الإسرائيلية .

يطلع واحد متخلف فاكر نفسه سياسي و حاجة كبيرة كده و كان بيشغل منصب حساس في الدولة و إنفصل منه عشان كان بيكلم واحدة و معاه على الخط التاني شخصية مهمة و إعتبروا إنه إلي عمله الأخ ده تسريب يالله مش مشكلتنا بس الأهم إنه بيقول إن ورا الفتنة الظائفية المخابرات الإسرائيلية و ماله وجهة نظره .

بس إحنا لغاية إمتى هنفضل كده أي حاجة تحصل يروحوا طالعين كده علينا و يقولوا إن كل حاجة تمام بس المخابرات الإسرائيلية الوحشة هيا السبب .

يعني لو الريس جاله إمساك يطلع المتحدث الرسمي بإسم الرئاسة و يقول ( أصاب السيد الرئيس حفظه الله بحالة إمساك شديد و كل شيء تحت السيطرة الأن و لكن نشك أن المخابرات الإسرائيلية وراء هذا الموضوع ).

ده يعقل و طيب و ليه متكنش حكومة مبارك هيا السبب في الفتنة و بما إن مصر بقت سهلة إن المخابرات الإسرائيلية تلعب فيها بسهولة إما دوشنا ليه بقصص الكفاح البطولي للمخابرات العامة و رأفت الهجان و مش عارف مين و مين جاب جهاز لاسلكي و بعته رسالة من المخابرات المصرية إلى المخابرات الإسرائيلية نشكركم و الأفلام و الحاجات ديه يبقى الغلط فين من الناس و لا من الحكومة إلي مش عارفة تحمي بلدها و بعدين قبل ما أي سياسي يطلع يقول إسرائيل هيا السبب يقدم إستقالته أحسن عشان هوا مينفعش يكمل كسياسي أو كحاكم لأنه مش عارف يحمي بلده .

و لا عارفين يمشوا في الشوارع بعربيات مصفحة زاي الدبابات و حراسة و لاسلكي و يا ويلك لو ساكن في بيت فيه شخصية مهمة يبقوا هيقلعوك هدومك و إنت طالع و إنت نازل و في الأخر مش فالحين غير إن هما يقولوا كلام فاضي مفيش عيل يصدقه و طبعا لو أنا طالع بيتنا و واقف مستني الأسانسير و يكون الباشا نازل أو طالع يسحبوني لغاية لما الباشا يعدي ليه هيا إسرائيل بعتاني أسكن في العمارة .

و بعدين نتكلم بعقلانية شوية بقى و كفاية بقى إم الفتنة ديه هيا المخابرات الإسرائيلية هيا إلي قالت للمحافظ يوقف العمل في بناء مبنى الخدمات و لا المحافظ و بعدين الأمن المركزي إتعامل معاهم على إنهم من حماس أو حزب الله يعني كده الحكومة هي المحتل مش المخابرات الإسرائيلية و بعدين إسرائيل هتتدخل إزاي من غير مباركة الخونة من الحكومة المصرية إلي مشيا على نظام ( أبجني تعرفني ) و الفساد بتاع مبارك و عيلته و الوزرا و عائلتهم برضه وراه المخابرات الإسرائيلية الفساد و الإنحراف الحكومي و السرقة الحكومية و الخصخصة كل ده وراه المخابرات الإسرائيلية مبارك و حاشيته هما السبب الأصلي لإلهاء الناس عن طريق الفتنة الطائفية عارفين كويس جدا إن صلب البني أدم المصري دينه و هما إلي بيلعبوا على النقط ديه سياسة الإلهاء.

إقرأ المزيد... Résuméabuiyad GRAKOLLO

ظلمنا الريس

العيلة الرئاسية ، إسم يترجله المدن ، إسم حلو تخيل نفسك تحت لقب العيلة الرئاسية هتلاقي جسمك قسعر ، منصب سياسي كبير العيلة الرئاسية ده .

أه إنك من العيلة الرئاسية فإنت بتحمل غصبن عنك منصب سياسي ، بيحصل في المنطقة العربية بس !!! ، إيه المشكلة .

المهم مش طلعنا ظلمنا الريس و مراته و عياله يا حرام ، و عارفين إلي يظلم العيلة الرئاسية عقابه إيه ؟؟؟؟ ، هيروح مارينا .

بس مش مارينا إياها ، لاء مارينا أجمل منها بكتير خالص ، مارينا العادلي سابقاً و الله أعلم بقت مارينا مين حالياً ؟؟؟.

بناء على جواب مرسل من الممثل القانوني للعيلة الرئاسية لجريدة المصري اليوم و إلي بقتبس منه :

«أولا ما جاء بشأن وجود حسابات لأربعة أرقام مختلفة تحت سيطرة وتصرف حرم الرئيس السابق بمبالغ كبيرة، فهو قول غير صحيح جملة وتفصيلاً، حيث إن تلك الحسابات هى حسابات تبرعات أعمال خيرية، وكل ما يعنيها فى شأن تلك الحسابات هو حق التوقيع عليها، بصفتها زوجة الرئيس، لا أكثر ولا أقل، وتشرف مؤسسة الرئاسة بموظفيها على كيفية الإنفاق من هذه الحسابات، إضافة وخصمًا، على أوجه متعددة، خيرية جمعاء».

يعني إيه عشان هيا مرات الريس من حقها التوقيع ليه ؟؟؟ ، هي مين بالظبط ؟؟؟.

أنه بمجرد تنحى الرئيس السابق تم تجميد هذه الحسابات وإبلاغ البنك المركزى بذلك من قبل رئاسة الجمهورية، عملاً بالقواعد القانونية المنظمة لانتفاء الصفة لزوجة الرئيس من تاريخ تنحيه. 

يعني البنك المركزي كان عارف بالحسابات ديه و ساكت ، طيب الجهاز المركزي للمحاسبات متكلمش في الحسابات ديه خالص ؟؟؟؟.

«ثانياً بالنسبة لما أثير عن حسابات مكتبة الإسكندرية، فإن تلك الحسابات ليس لأحد حق التوقيع عليها سوى رئيس الجمهورية بصفته، ولم يفوّض فى يوم ما أحدًا بذاته أو باعتباره فيها، كما أشيع كذبًا وافتراء، وتشرف مؤسسة الرئاسة بموظفيها على كيفية الإنفاق منها، ضمًّا وخصمًا، وبمجرد تنحى الرئيس جُمدت هذه الحسابات وأخطر البنك المركزى بها، عملا بالقواعد القانونية المنظمة».

طيب ليه كانت سوزان مبارك ليها حق تعيين رئيس المكتبة و الإشراف عليها كلياً ، و بالتأكيد حسابات المكتبة مملوكة ليها شخصياً توزع منها زاي ماهي عاوزة ، و لا نسيتم الأرض إلي جنب المكتبة ، كانت عاوزة تشيلها عشان تحافظ على الشكل الجمالي للمكتبة ، معنها مستشفى ، و هي ست الكرم و الإمومة و الطفولة ، ولا نسيتوا ماما سوزان و القراءة للجميع .

و لما هو مفوضش حد للنيابة عنه في الحسابات إلي كانت مخصصة للمكتبة ، إيه سوزان إغتصبت الحق ده يعني ؟؟؟ ، ياعيني عليك يا مبارك مظلوم حتى من مراتك !!!!.

«ثالثا بالنسبة لما أثير عن وجود حسابات متعددة بأسماء نجلى الرئيس السابق، علاء وجمال مبارك، فإننا نؤكد أنها كاذبة ولا تعبر عن الحقيقة، والمبالغ الموجودة أقل بكثير جداً مما ذُكر، وإن باقى الأموال الموجودة معروفة المصدر والجهة».

أهه مقولتش حاجة يا ظلمة ، أكيد أكيد إسرائيل هي إلي ورا الحسابات المشبوهة ديه ، إسرائيل جت مصر و فتحت حسابات للولدين من غير ما حد يحس !!!!!.

وشدد الممثل القانونى على أن أسرة الرئيس السابق تطلب وتلتمس من جميع الصحف والإعلاميين تحرى الدقة فى مصادر المعلومات، التى ترد إليها، مؤكداً ثقتها الكاملة فى أهمية الدور الإعلامى فى هذه المرحلة من مراحل الأمة.

عجبتني بصراحة كلمة تلتمس ديه ، عارفين لو زمان ، أيام العادلي مثلاً كان الإلتماس بغلق الصحيفة و إعتقال الصحفيين ، و عجبييييييييييييييييييييي !!!!!!.

إقرأ المزيد... Résuméabuiyad GRAKOLLO

الأمر بالمعروف و النهي عن المنكر

أحب أبتدي بحكاية بطلها خالي، واحد زاي أي واحد، بيدور على لقمة العيش، ملقهاش في مصر بس لقاها في السعودية، عادي لغاية دلوقتي.

بس إلي مش عادي إنه يكون في الشارع ماشي عشان يكمل شغله يطلع عليه مجموعة و ينزلوا فيه ضرب عشان مدخلش الجامع يصلي!!!.

الصلاة مش عيب، بس برضوه العمل عبادة؟!؟!، و لا مقولة برضوه؟؟؟؟.

ناس كتيرة فرحانة ببداية فرع الأمر بالمعروف و النهي عن المنكر في مصر!!!، و كان فيه تصريح مش عارف من مين، إن تسليحهم هيكون عصيان كهربا!!!، تسليحهم؟؟؟، و عصيان كهربا؟؟؟، ليه؟؟؟.

كل ده عشان تنهي عن المنكر؟؟؟، ماهو فيه مباحث الأداب، شرطة المصنفات الفنية و الداخلية كلها، يعني فيه أدوات كتيرة في الدولة، إنتوا بقى مين؟؟؟.

يعني مثال ظريف، و أسف إني أخد المثال ده، طفلين في الشارع( إلي بيقال عليهم أطفال الشوارع) بيعملوا الفحشاء مع بعض، إيه هتكهربوهم، و لا هتقتلوهم؟؟؟؟، معنهم موجودين في الشارع عشان مفيش مكان تاني، الشارع ده بيتهم.

بدل ماتصرفوا فلوس على شرا عصيان كهربا من دول الكفار، إصرفوهم على بيوت تلم الأطفال ديه من الشارع، و على فكرة مبقوش أطفال، دول بقوا أجيال.

و بعدين حضراتكم يعني لا مؤاخذة، مين وصاكم على الشعب؟؟؟، إيمان منكم، و خوف على مصلحة البني أدمين؟؟؟.

ده موقف مشرف، عاوزين كل الناس تدخل الجنة عشان ميكونش مصيرهم النار!!!.

بس فيه مقولة عجبتني" لما كله هيدخل الجنة، مين هيدخل النار؟؟"، ثانياً هي النار إتعمليت ليه؟؟؟، مش عشان فيه ناس هتدخل فيها؟؟؟، طيب واحد عاوز يدخل النار إنت بقى عاوز تمنعه ليه؟؟؟، ديه أرزاق!!!.

سيبكوا من الكلام ده، أولاً إنتم ملكومش أي حق إنكم تنصبوا نفسكم دراع الله على الأرض، طيب السعودية عملوا كده عشان تشارك في السلطة و سياسات داخلية بينهم.

إنتوا بقى هتشاركوا مين؟؟؟.

ثانياً أنا مش عاوز أصلي ، أنا حر، عاوز أرتكب الفحشاء، أنا حر، إنت بقى زعلان ليه، مش عارف ترتكب الفحشاء زايي، بسيطة تعالى و أعلمك.

بس أنا مش طريقي الفحشاء، لإني بخاف ربنا، من غير ماحد يجري ورايا بعصايا كهربا!!!.

بمعنى بغض وجهي عن المنكر، و بمشي بالمعروف!!!.

بسيطة.

إنما حضراتكم، لا عارفين تشتغلوا و لا عارفين تستفادوا بوقتكم!!!، و عاوزين سلطة، و سلطة قوية كمان.

أه زاي مافيه ناس فرحانة بوجودكم، فيه ناس كتيرة زعلانة بوجودكم برضوه و يمكن أكتر من الفرحانين بكتير.

بس في ديه أحب أقولكم بجد، مصر مش زاي السعودية، إنتوا معاكم عصيان كهربا فيه غيركم معاه سلاح ألي، يا حزن أهلكم عليكم ، ده هيروح منكم شهدا كتير!!!.

بس مش عارف إزاي مغتصب سلطة، يبقى شهيد؟؟؟.

أو بمعنى إيه الفرق بينكم و بين البلطجي!!!، هو بيخوفني، و إنتوا كمان بتخوفوني.

إنتوا بتغتصبوا حريتي، و هو كمان بيغتصب حريتي!!!.

المقارنة لو إستمرت هطول قوي.

يا ريت تخليكوا في حالكوا، إصرفوا الفلوس أياً كانت مسماها تبرعات، تحويلات أياً كان في حاجة تفيد مجتمع، مش تخنق مجتمع مش لاقي أي حاجة، أه و لا فكرة النار بتاكل الكل، يعني الناس مخنوقة و على أخرها، حرام تبقوا إنتوا كبش الفدا للخنقة ديه!!!.

إستفادوا بوقتكم أحسن في أي حاجة، أقولكم إعملوا مجموعة كبيرة و إعملوا شات جماعي مع أي حد في الصومال!!!.

بلاش إعملوا دوري كبير مابينكم للبلي مسافات طويلة، أي حاجة بس سيبكم مني و من غيري، و لا خلاص إتعودتوا على الضرب من الستات!!!.

الله إلي ممكن تكونوا تعرفوه أرحم علينا من ناس فاشلة زيكم، حتى لو كنت حامل لأسمى الدرجات العلمية، بس معاك كمان أسمى درجات الفشل المخي، و ربنا يرحم عبيده.

و للعلم أعلنت السعودية الخبر ده:

اعلن مصدر رسمي ان العاهل السعودي الملك عبد الله بن عبد العزيز اعفى الجمعة رئيس عام هيئة الامر بالمعروف والنهي عن المنكر، الشيخ عبد العزيز بن حمين الحمين من منصبه من دون ذكر الاسباب.

وتتولى هيئة الامر بالمعروف والنهي عن المنكر السهر على تطبيق الشريعية الاسلامية وتسير دوريات لاغلاق المحلات خلال اوقات الصلاة ولرصد الخلوات غير الشرعية بين رجال ونساء.

وذكرت الوكالة الرسمية ان الملك اعفى الحمين وقرر تعيين الشيخ عبد اللطيف بن عبدالعزيز آل الشيخ في هذا المنصب.

وقد عين الملك الحمين عام 2009 رئيسا للهيئة بهدف اصلاحها. وقام الحمين باستشارة حقوقيين وسعى الى تدريب عناصر الهيئة بشكل افضل للحد من التجاوزات.

ففي عام 2002، منع عناصر الهيئة رجال الانقاذ من دخول مدرسة للبنات اثر اندلاع حريق، فكانت النتيجة مقتل 14 شخصا.

أما الرئيس الجديد للهيئة له مواقف معروفة في مسالة الاختلاط التي يبيحها وفق "ضوابط شرعية محددة". وكانت له مداخلة نالت شهرة في مايو 2010 حين وقف الى جانب رجل الدين احمد الغامدي الذي طرد من الهيئة اثر اعلانه ان "الاختلاط مباح."

برضوه فيه حاجة لازم نشوفها، نشوف كان رئيس الهيئة قال إيه

• إباحة الإختلاط، وبطلان نظرية المعارضين من خلال إيراده النصوص الشرعية التي تفرِّق بين فعل الخلوة المحرمة والاختلاط المباح بحسب الجزيرة السعودية.

• وأوضح أن الاختلاط الذي كان في عهد أصحاب السماحة والفضيلة لا يتعارض مع ما بينوه في كتبهم وفتاواهم من الصور المحرمة للاختلاط، وإلا لتعارض قولهم مع فعلهم.

• وأضاف أنّه لا بد من عدم الخلط بين الخلوة والاختلاط.. فالاختلاط الجائز له ضوابط مثل الالتزام بعدم التبرج وكشف المرأة ما لا يجوز لها كشفه. وأن يكون الاختلاط في حدود ما تفرضه الحاجة دون إسراف أو توسع أو تعطيل عن واجبها الأساس في رعاية البيت وتربية الأبناء.

• كما ذكر بأنّ العاصمة السعودية الرياض عاشت في أزمنتها الإختلاط رغم وجود علماء أجلاء فيها.

 طبعاً واحد ماسك المنصب الكبير ده في السعودية، مؤمن بالكلام إلي بيقوله، و كمان عاوز ينفذه.

ديه مصيبة لناس كتيرة، إمال الهيئة بقى لازمتها إيه؟؟؟؟.

على فكرة كلامي ده مش موجه للسعوديين، السعودية ديه بلدكم، إنتم أحرار توافقوا بوجود الهيئة أو لاء، ديه مشكلتكم.

أنا بتكلم عن رفضي لفتح فرع تاني ليها في مصر، بدعم أو توجيه من ناس سعوديين، مصر مش زاي السعودية!!!.

كمان إغلاق المجتمع ممكن يودينا على طريق تاني، إحنا مش قده!!!، و خاصةً الفترة ديه.

ناس كتير كانت بتقول الكلام ده:

• مصر كانت بلد الموضة.
• مصر كانت أجمل من باريس.
• مصر كانت أقوى إقتصادياً من دول كتير.

أما دلوقتي!!!!، و لما نقفل على المجتمع هنبقى إيه؟؟؟، و برجع و أكرر تاني، عندنا حاجات كتيرة نهتم بيها أكتر من الأخلاق و الإختلاط، و ربنا يرحم!!!!.

إقرأ المزيد... Résuméabuiyad GRAKOLLO

أنا إتسرقت

ظهرت في الفترة الأخيرة، ظاهرة مش غريبة أو مش جديدة، ظاهرة خطف القبطيات!!!!.

كل شوية ينزل على اليوتيوب، فيلم قصير عن شخصية ما، بتقول الشهادة، و إزاي جت للإسلام ، و طبعاً المصور لازم يعمل زووم على وثيقة الإشهار، و الإسم قبل و بعد!!!.

كل ده جميل لغاية دلوقتي، بس بعد الفيلم الظريف، القصير ده، بتيجي المشاكل، أو تقدر تقول قبل و بعد الفيلم المشاكل موجودة!!!.

المشاكل بمنتهى البساطة، حاجة تافهة كده.......!!، يعني بيقولوا دلوقتي عليها، المسمى المتعارف عليه ده، إلي إسمه.....، الفتنة الطائفية !!!.

يعني تقدر تقول قريب جداً، هنقتل بعض على حس التعريف البسيط ده.

المهم، قبل ظهور الفيلم، بيكون فيه بلاغ من عيلة القبطية المخطوفة في قسم الشرطة، بخطف بنتهم، و الأهم الخاطف معروف ليهم!!!.
طبعاً الموضوع ده كان في إيد أمن الدولة سابقاً، الأمن الوطني  حالياً.

للمعلومة، أي مشكلة من زمان بين مسيحي و مسلم ، أياً كانت، بتروح على طول على أمن الدولة ، يعني لو فيه مشكلة في مية الغسيل بين مسلم و مسيحي، الإتنين بيروحوا على القسم، و من القسم لأمن الدولة، و من أمن الدولة للنيابة، و هلم جرة.....!!!.

نرجع لموضوع الأفلام، طبعاً البنت أو الست القبطية المخطوفة، مختفية، إنما أمن الدولة بطمن أهل الفتاة إنهم عارفين مكانها، و مكان الخاطف، و في ظرف أيام أو ساعات البنت أو الست هترجع.

بعد أيام أو ساعات أو حتى شهور، الخبر إلي يجي من أمن الدولة، إن البنت غيرت دينها، و أشهرت إسلامها!!!، و غيرت بطاقتها، و كل حاجة، و لو سمحتم منقدرش نعمل حاجة، ده كان أمن الدولة، بس ممكن يكون في الحلم..!!!.

إنما الغريب جداً، موضوع كبير حصل، وفاء قسطنطين، أو زوجة الكاهن !!!، إلي طلع كلام كتير إنها أسلمت بسبب واحد زميلها في الشغل، و كلام تاني إنها كانت عاوزة الطلاق من زوجها الكاهن و طبعاً الطلاق في المسيحية القبطية بيعتبر مستحيل!!!، فراحت للإسلام عشان يسقط الجواز ده...!!!.

و طبعاً إختفت، و قام الإقباط، و الدنيا إتقلبت، و طبعاً إلي إنتشر إن زوجة الكاهن إتخطفت!!!!.

و الموضوع إتحول لأمن الدولة طبعاً، و دخلت في الموضوع شخصيات كنسية ليها وضعها، على أساس إنهم من كبار رجال الدولة، و طبعاً أمن الدولة كالمعتاد، إحنا عارفين هي فين، و الأهم عارفين مين إلي خطفها!!!!.

السؤال، هي إتخطفت، و لا راحت بمزاجها ؟؟؟؟.

المهم، رجعت مرات الكاهن، و محدش سمع عنها أي حاجة!!!، طلع شخصية قبطية كبيرة و قال إنها هتظهر على التليفزيون، و لكن محصلش أي حاجة!!!.

راح مين إلي شال الموضوع على كتفه؟؟؟؟، ناس إعتبرت مرات الكاهن شهيدة ، و الأقباط هما إلي خطفوها!!!.

الغريب الأكتر من كده، بعد ظهور و إنتشار أفلام اليوتيوب لإشهار الإسلام، تطلع أفلام تانية و تاخد طريق الإنتشار برضوه، لنفس الفتاة أو السيدة، بس المرة ديه بتقول إن الفيلم الأول تم تصويره تحت تهديد، يعني إيه تحت التهديد؟؟؟؟.

إمال أمن الدولة إلي بتعرف النملة بتستخبة في أنهي مكان في الحيطة!!!!، معرفتش ليه إن الفتاة أو السيدة، راحت الإسلام مش بمزاجها إزاي؟؟؟؟.

و إن الأفلام المنتشرة، كلها تحت التهديد!!!!.

يمكن كان موضوع وفاء قسطنطين نام شوية في الماضي!!!، إنما جه بعديه موضوع في نفس الكبر، مرات كاهن تانية ، إنما مرات الكاهن ليها أفلام على اليوتيوب بتقول إنها مسيحية، و مش مسلمة!!.

إنما شيوخ، و ناس على نفس وتيرة الأفلام المنتشرة بيقولوا العكس!!!!.

نصدق مين في النهاية؟؟؟؟، الست أو الفتاة راحت للإسلام بمزاجها؟؟؟، و لا إتخطفت و أجبرت على إشهار الإسلام؟؟؟.

نصدق الشيوخ و الناس إلي بتتكلم و بتقول؟؟؟؟، و لا نصدق الفتاة أو السيدة نفسها؟؟؟.

أسئلة كتيرة بتطرح نفسها على الساحة!!!، لكن المهم هو إيه الفرق؟؟؟.

يعني واحد جه للإسلام، أو واحد جه للمسيحية!!!، مين هيقل و مين هيزيد!!!!.

لا الإسلام هيقل و لا المسيحية هتزيد، مفيش حد واقف بقلم و ورقة و قاعد بيكتب أرقام !!!.

الدعوة للدين مش حرام، بس الدعوة لدين و منع الدعوة لدين أخر؟؟؟؟، ديه تبقى إيه؟؟؟.

الإسلام دين الأكثرية، و المسيحية دين الأقلية!!!، طيب و بعدين؟؟؟، نسمح بالدعوة الإسلامية، و نمنع الدعوة المسيحية، طبعاً لإن الإسلام دين الأغلبية، طيب الأغلبية بتخاف من إنتشار دين الأقلية؟؟؟؟.

معتقدش، إنما بقت سبوبة، بمعنى ناس من الأغلبية بتنتفع ، و ناس من الأقلية بتنتفع ، و بقيت الناس العاديين بيقتلوا بعض !!!، جميل.

المهم، لما الأغلبية تكسب المعركة ديه، هتعمل إيه بعد كده؟؟؟؟، السلام هيعم مصر؟؟؟.

و لما الأقلية تغلب الأكثرية في المعركة ديه برضوه، هتعمل إيه بعد كده؟؟؟؟، هيعم الخير على مصر برضوه؟؟؟.

لا ده هيحصل و لا ده هيحصل، إنما إيه الحل؟؟؟؟.

موضوع الخطف ده هينتهي إمتى؟؟؟، و الأجمل منه الإستهزاء بالأديان برضوه هنخلص منه إمتى؟؟؟؟.

و الأجمل و الأجمل، منتفعي المصالح من الفريقين، هنخلص منهم إمتى؟؟؟.

و أخيراً، بقيت خايف جداً من المستقبل المصري، هو إحنا هنروح فين بعد كده؟؟؟، لما كل يوم مصر بتمتاز بأخبار جديدة و كلها تفرح العدو مش الصديق.

يمكن البطالة هي السبب؟؟؟، ممكن عشان مفيش شغل فنروح ........، نروح فين؟؟؟؟، نروح نخطف، نقتل و نطلب فدية؟؟؟.

إيه بعد كده واحد يسألني مالك؟؟؟؟، أقوله إتسرقت!!!، يقولي إيه إلي إتسرق، أقول إبني أو بنتي، أو حتى مراتي؟؟؟.

و أمشي في الشارع و أقول، أنا إتسرقت يا إخوانا!!!!.

و بعدين يا ريت الكل بيتخطف، إلا بقت لبانة هي كمان، واحدة عملت علاقة و إختفت عن البيت كام يوم، ترجع تقول أنا إتخطفت!!!، يا سلام.

و الأجمل من كده أهلها يقدموا بلاغات في واحد، و يتهموه بالخطف!!!، إنما فيه بنات فعلاً بتتخطف، و يطلب من أهلهم فدية أو ....إلخ.

بس بقت العملية لخبطة، لا معروف فين و لا منين.....يارب إستر على إلي جاي!!!.

إقرأ المزيد... Résuméabuiyad GRAKOLLO

التقشف هو الحل، يا سلام

طلع علينا كمال الجنزوري، و قال" يا شعب لازم التقشف، إحنا في موقف صعب"!!!!.

قعدت مع نفسي كده أفتكر مين كان بيطلع علينا دايماً بنفس الكلمة، و أول لما إفتكرت قلت " وجدته، مفيش غيره، مبارك حبيب قلبي".

مسبش عيد وطني، تكريم الإم المثالية و حتى ليلة القدر غير لما نوه عن الأزمة المالية إلي بنعشها، يعني بحسبة بسيطة بقالنا فوق التلاتين سنة، في تقشف، و بصراحة التقشف المصري زاي قانون الطوارئ، مش معروفله نهاية!!!!.

أه ، بالنسبة للجنزوري، كان طالع فيها و بيقول" إلي ميعرفنيش، يسأل أهله عني!!!".

و بعدين إنت مثال للتجدد في دماء مابعد الثورة!!!!، أيون شباب، وسامة و جاذبية، أكيد للشابات إلي في سنك.

طيب سيبك من كل ده، أنا سعادتك في موضوع التقشف ده من زمان، ممكن سعادتك تتفضل و تنضم للمتقشفين؟؟؟.

يعني فيه كام عربية في موكب سعادتك؟؟؟؟، و ماركتهم إيه؟؟؟؟.

بلاش هي ممكن البعثات الدبلوماسية الخارجية تتقشف مع الشعب؟؟؟، و لا ديه مش من فلوس البلد؟؟؟؟، ممكن تكون تبرعات أجنبية يعني؟؟؟.

مقرات السفارات المصرية برة، لازم تكون قصور بمساحات كبيرة!!!، و طبعاً بمبالغ كبيرة!!!.

فين التقشف؟؟؟، ده غير الخدمة المميزة للناس العقيمة حاملي جوازات السفر المصرية!!!!.

ممكن لو حامل لجنسية تانية ألاقي معاملة أحسن؟؟؟.

ده غير العربيات الفارهة، طبعاً منظر مصر قدام العالم لازم يكون مميز، إنما لما مصر تروح تشحت تبرعات، منظرها بيكون عامل إزاي؟؟؟؟.

و بعدين مباني البعثات الخارجية، أغلبيتها قصور و فيلل قديمة، و في دول بلاد برة، لازم تترمم المباني ديه عشان المظهر الحضاري، هو مبالغ الترميم ديه من فلوس الشعب المتقشف، و لا شعب تاني؟؟؟؟.

بلاش المباني الكبيرة ديه كلها، المواطن إلي عاوز مصلحة، بيدخل ملحق كده صغير، و بس!!!، أما بقيت المبنى فمبهم، طبعاً لأن البعثة حجمها كبير، طيب قللها!!!، عادي تقشف!!!.

و بعدين ياريت تخلي البعثات المصرية، تكون موجودة عشان حاملي جوازات السفر المصرية أولاً!!!، و بعد كده أي حاجة تانية، أصل عقبال عندك، عندي عقدة من أيام المخلوع!!، أصل كل البعثات الخارجية كانت للعيلة المالكة و القيادات، و عائلتهم و مشترياتهم، و تقدر تقول كده كانت فنادق في وقت الحاجة.

لاء و الأغرب، مع ضخامة المبنى، السفير عنده مكان تاني للإقامة!!!!، ده غير السواقين الأجانب، نظراً إن البعثات بتفتقد مع ضخامتها لسواقين، طيب ما تستبدل العمالة الأجنبية، و الناس الكتيرة بطاقم عمل من الجالية المصرية من الدولة إلي فيها البعثة، و الأعجب إن مفيش دولة مفيهاش جالية مصرية!!!، سبحان الله العدد جوه و بره كبير!!!!.

و لا العوامل الأمنية بتحتم الإستعانة بطقم أجنبي بالإضافة للعدد الرهيب من البعثة الدبلوماسية!!!!.

و المقولة"" مصر و صورة مصر!!!"""، أحب أقول لسعادتك يا التقشف يبقى علينا كلنا ، يا يبقى على سعادتك لواحدك، أنا بصراحة شبعت من التقشف!!!.

و لو سعادتك مش شايف غير التقشف هو الحل، خلاص أنا متنازل لحضرتك و للوزرا بالتقشف ده، إتقشفوا في عربياتكم و مكاتبكم و مرتباتكم، أصل نسيت أقولك مرتبي متقشف خلقة، و حياتي كلها تقشف، معنديش حاجة تانية أتقشف بيها!!!.

قال تقشف قال، يا سلام!!!.

إقرأ المزيد... Résuméabuiyad GRAKOLLO

أنا مش بني أدم

فيه مقال وقفت قدامه كتير!!، عنوانه " سوزان تهدد واشنطن بكشف أسماء عملاءها بحكومة نظيف إذا لم تنقذ مبارك "!!.

يعني ما جاء في الخبر:

• سوزان ثابت قرينة المخلوع حسنى مبارك تسببت فى أزمة أمنية لنفسها وسياسية لعدد من أعضاء الكونجرس الأمريكى بعد أن اتصلت بهم، وطالبتهم على أساس الصداقة القديمة بينهم وبين عائلتها أن يتدخلوا فورا لإنقاذ زوجها من مصير ينتظره بالإعدام الذي طالبت به النيابة المحكمة التى تحاكم زوجها ونجليها.

 صعب إنها تتسبب في أزمة أمنية، إمال المشير راح فين؟؟؟؟.


مكالمات سوزان كانت عادية

• بينما كان الفاكس الذى تلى المكالمات هو السبب الرئيسى فى الإحراج البالغ والتهديد الصريح منها للأجهزة الأمريكية حيث أرسلت سوزان من الفاكس 3 نسخ موحدة لثلاث شخصيات بارزة بالكونجرس معروف عنها أنها كانت على علاقة وطيدة بعائلتها.

 عيلة مبارك بعد كل سنين الحكم ، 30 سنة !!!، علاقتهم بس وطيدة بتلاتة!!!!، إمال بقيت الشلة فين؟؟؟؟.


أشارت فيه بوضوح صريح إلى أنها نفذت للإدارة الأمريكية عشرات المشروعات فى مصر التى كان مبارك لا يوافق عليها رسميا وأنها كانت تفضل الشركات ورجال الأعمال الأمريكان لنيل المناقصات المصرية الكبرى وكانت تساعد السفراء الأمريكيين فى مصر.

قديمة، إيه الجديد، ديه خلت المعونة الأمريكية ليها مكتب في كل مؤسسة، إبنها كان ماسك حاجة في غرفة التجارة المصرية الأمريكية، خريج الجامعة الأمريكية، و سوزان مبارك كانت واخدة كذا شهادة من الجامعة الأمريكية، بس للأسف فشلت في الحصول على الجنسية الأمريكية، و إكتفيت بالجنسية الإنجليزية، ماهو المصرية مكانش ليها أي لازمة!!!!.


كما كشفت فى الفاكس

• طريقة تجسس المخابرات المركزية الأمريكية على الرئيس المصرى وكيف أنها ومبارك والعائلة كانوا يعرفون أن هناك غرفة معينة بقصرهم مراقبة وأن مبارك عندما كان يريد إيصال رسالة معينة لأمريكا كان يدخل لتلك الغرفة ويتحدث بالقصد فيما يريد كشفه.

 أكيد عشان القصر كبير، فالمخابرات العامة كانت كاتبة ورقة على الباب،" إحترس المخابرات الأمريكية بالداخل!!!!".
و ده بقى من إيه ؟؟؟، نقص في المعلومات إلي كانت بتتبعت من المخابرات المصرية و لا نقص في تقارير الداخلية، و لا الأمريكان كانوا شاكين في ولاء العيلة المباركية لأمريكا!!!!.
ده العادلي الراجل الوطني المخلص لأمريكا، عطلهم نظام الرقم القومي كله، يعني أي ملف عن أي مواطن تمتلكه وزارة الداخلية المصرية، أمريكا بقى عندها نفس الملف، سبحان الله، العادلي كان أشد وطنية من عيلة مبارك، لأمريكا طبعاً!!!.


وفجرت سوزان مفاجأة كبيرة

• عندما ذكرت فى الفاكس أن لديها نسخًا من شيكات مالية صرفها عملاء الولايات المتحدة فى آخر حكومة خدمت تحت نظام زوجها وأن مبارك كان يعرفهم ويأمرهم بتمرير معلومات معينة لأمريكا حتى يستفيد منهم.
• نقطة في بحر، أمريكا برضوه عندها نسخ من شيكات مالية، صرفها مبارك، لإنه كان تحت خدمة أمريكا من زمان!!!.

• لقاءات تمت بين زوجها وممثلين عن الإدارة الأمريكية اتفقوا فيها مع مبارك خلال شهرى ديسمبر ويناير 2010 و2011 على مساعدته ونظامه على تصفية الثورة المصرية إذا وقعت وخلال ساعاتها الأولى.
• ماهو ده الغباء السياسي، أمريكا بتوعد، إيه إلي فيها؟؟؟؟، أمريكا كذابة عادي، وعدت مبارك على قتل الثورة، ووعدت ناس تانية على صعودهم على قفا الثورة!!!!. أمريكا مصلحتها ثم مصلحتها ثم مصلحتها، ثم الأراجوزات، زاي مبارك و غيره، إلي هما في المصطلح النظيف، عملاء!!!. 

كما أشارت سوزان إلى

• امتلاكها البروتوكولات التى سجلت فى لقاءات سرية تمت بين شخصيات أمريكية وبين نجلها جمال مبارك مؤكدة أن فكرة توريث جمال مبارك كانت فى الأصل فكرة أمريكية – إسرائيلية وليست فكرتها هى كما أشيع وهددت أنها ستفضح حوارات الرئيس الأمريكى الأسبق ''جورج دبليو بوش'' مع جمال مبارك وهو يعده بالوقوف بجانبه عندما يحين الوقت لتنصيبه رئيسا لمصر وأن بوش نادى جمال مبارك خلال لقائه معه فى إحدى تلك الزيارات السرية التى قام بها جمال لواشنطن وقابل خلالها جورج بوش بلقب ''الرئيس''.
• خلاص روحي حسبي بوش، أو أي حد، يا إم الرئيس!!!!.

وذكرتهم سوزان

• بأنها كانت المتحكمة الأولى فى بوابة الحدود مع غزة وأنها بناء على طلب زوجات الرؤساء الأمريكيين ومنهم ''ميشيل أوباما'' كانت تأمر بتمرير المساعدات إلى قطاع غزة وأنها استجابت من قبل لطلبات من زوجات زعماء الكونجرس وأخريات زوجات لسياسيين بريطانيين وعرب فى هذا الشأن وأنها لم تقف أمام أى مصالح أمريكية فى مصر ويجب رد الجميل لها.
• طيب، ده لواحده جريمة، يعني إنتي و كل زوجات الحكام، مشتركين في القتل الممنهج للفلسطينيين، و في الأخر بسببكوا إنتوا يا زوجات الحكام، مات كتير قوي!!!!.

وفى مفاجأة أخرى

• أثارت سوزان لأول مرة معلومة ملكيتها لقائمة أسماء 2000 شخصية مصرية كانت بين أكثر الشخصيات المصرية تأثيرا فى الوظائف المرفقية المصرية وأن هؤلاء على حد كشفها كانوا يحملون الجنسية الأمريكية بعلم مبارك مؤكدة أن زوجها كان يترك لأمريكا حرية الحصول على مساعداتهم لمساندة المصالح الأمريكية بشكل غير مسبوق فى التاريخ السياسى المصرى مطالبة بتدخل الإدارة الأمريكية فورا لإبعاد مبارك عن حبل المشنقة وعدم تركه يواجه مصير الإعدام مؤكدة أنها لن تقف صامتة.
• يعني على كده أي واحد معاه الجنسية الأمريكية خاين و مملوك للولايات المتحدة؟؟؟؟، يعني الأخ بتاع الفيمتو ثانية، أه زويل العالم، ده خاين و مملوك لأمريكا؟؟؟، أخيراً إكتشفت واحد من الإيد الخفية!!!، و كمان عاوز يعمل مدينة و لا جامعة علمية، عشان يجند الشباب المصري للعمالة ضد بلدهم!!!، عمو فيمتو ثانية، معندكش شغلانة فاضية لية؟؟؟؟.

المثير أن الشخصيات الأمريكية نقلوا الفاكس وفحوى الحوار مع سوزان خلال دقائق قليلة لأجهزة أمريكية عليا حيث أصبح بعدها فاكس سوزان ضمن الأسرار الأمريكية لدرجة طباعته فى شكل إفادات خبرية من جهاز المخابرات المركزية الأمريكية مع تحذير عن وجود إمكانية تسرب معلومات سرية أمريكية سيادية وغير مسبوقة عن عمليات أمريكية تمت فى مصر فى عهد مبارك تعرفها سوزان ثابت.

• أه، أصلهم كانوا مستنيين إن سوزان تبعت الفاكس دلوقتي، لإنها مكانتش مهدداهم قبل كده خالص، أو بمعنى أصح كانت المخابرات الأمريكية مش حاسة بخطورة سوزان مبارك، و لا كانوا عارفين إن العادلي مشغلها وزارة الداخلية، و عمر سليمان مشغل المخابرات لمبارك، و لا كانوا عارفين أي حاجة من ديه، إنما دلوقتي سوزان مبارك في خطر، إفرح يا مشير!!!، هتكسر وراها قولة!!!!.

الجدير بالذكر أن سوزان قد هاتفت وأرسلت العديد من الفاكسات فى ليلة 5 يناير 2012 إلى كل من ألمانيا وفرنسا وموسكو والسعودية وقطر والإمارات والبحرين وطالبت بتدخل زعماء تلك الدول حتى لا تتطور الأمور وتصل إلى حد الحكم على مبارك بالإعدام كما تطالب النيابة العامة المصرية وقد وعدتها بشكل شبه رسمى شخصيات سيادية بتلك الدول بالوقوف بجانبها وأنهم يرفضون مبدأ المطالبة بإعدام مبارك.

طيب لو إفتراضنا إن الكلام إلي قالته الست الخضرا ( زاي الرجل الأخضر، بتاع الأطفال)، يبقى على كده سوزان مبارك ماسكة على العالم حاجات كتيرة، عارفين إلي المفروض يقللك جداً، ساركوزي بتاع فرنسا، أصله لما كان بيخون مراته السابقة مع مراته الحالية الخيانة كانت بتم في مصر، أه عيلة مبارك كلها كانت إيريال للرئيس الفرنساوي!!!!.

كلام الجرايد ده ملهوش حل، و طبعاً الفاكس أبو أربع صفحات ،إرسل منه نسخة على المشير الأول و لا على الصحافة على طول؟؟؟.

و لو إفترضنا إن الكلام ده صح ، و إن كل إلي إتكتب ده صح!!!!،يعني معناه إيه، إيه المفروض إني لازم أفهمه؟؟؟؟، إن سوزان مبارك بتعترف عن نفسها و عن عيلتها كلها إنهم خونة، عملاء و يستحقوا الإعدام!!!!.

طيب لو شفت المقال أو بلاش المقال عشان لو فكرت بالمقال يبقى سوزان و عيلتها لازم يتعدموا دلوقتي في ميدان عام، بس لو فكرت بقلبي من غير عقلي هلاقي إن الست ديه بتحاول بكل الطرق إنقاذ أولادها و جوزها.

بس للأسف لو شغلت عقلي، كل إلي بتعمليه ملهوش فايدة، حتى لو أنقذتيهم من العقاب البشري ، هتروحي إنتي و هما من عقاب ربنا فين؟؟؟، غير كده إنتوا مرحمتوش 85 مليون بني أدم، من أطفال و ستات و رجالة، دستوا على كرامتهم و أدمىتهم، حطمتوا أحلامهم و طموحاتهم، عاوزين دلوقتي الرحمة؟؟؟؟.

ناس كتير إختفت لسنين طويلة في معتقلاتكم، أجيال ماتت و أجيال إتولدت بين جدران السجون!!!.

نظام عمل تسجيل إختراعات في أنظمة التعذيب، إنتوا كنتوا الراعي الرسمي و الوحيد لنظام أهدر أدمية ملايين.

فعلاً عندك حق لما تهددي أنظمة ساعدتكم ، فعلاً عندك حق إنك تفضلي في مكانك ، عشان إحنا إلي سايبينك، و سايبين ناس من عهدك لغاية دلوقتي!!!.

إنتوا كنتوا بتعذبوا البني أدمين من غير رحمة!!!، إنتوا السبب إن ناس كتير تنتحر عشان مش لاقية!!!، إنتوا و إنتوا...............، حاجات كتير.

إنتوا السبب في ضياع أجيال ملهمش أي ذنب، غير إنهم إتولدوا في مصر!!!.

ثروتكم بالمليارات، و ناس كتيرة مش لاقية ملاليم!!.

بس فعلاً، أنا مش بني أدم ، و لا هكون بني أدم إلا لما أخد حقي منك إنتي و عيلتك!!!!.

إقرأ المزيد... Résuméabuiyad GRAKOLLO

من 91 إلى 2011 و بعد كده بلانهاية

المشير محمد حسين طنطاوي!!!!، إسم ليه ثقل كبير في مصر!!!!.

الوقت الحالي،  إبتديت حملات تلميع المشير، دلوقتي المشير هو إلي حمى الثورة!!!!، طيب ، يعني معنى كده إن مبارك طلب التخليص على الثورة!!!!.

محدش رد، لغاية لما جت وقت الشهادة، و طلع المشير و قال:" أنا صادق و هفضل صادق!!!!"، مفيش مشكلة، طيب لما مبارك مطلبش هدم الثورة و الثوار، طيب الحماية كانت من إيه؟؟؟؟، أكيد من الإيد الخفية أو الطرف التالت!!!، و يمكن حمى الثورة من الفوتوشوب!!!.

بس حتى بعد الثورة الفوتوشوب موجود، الإيد الخفية برضوه موجودة و أخيراً و ليس أخراً، الطرف التالت برضوه موجود، إمال حمى الثورة من إيه؟؟؟، مش عارف!!!!.

بس ممكن أتكلم عن وجهة نظري ، يعني شوية حاجات حصلت و يمكن فيه ناس أخدت بالها ، أول طلائع الجيش إلي نزلت التحرير، كانت عربيات و مدرعات جيش تحمل لوح الحرس الجمهوري، و سبحان الله، لو فيه حد يفتكر إن قلة مندسة من الثوار حرقوا المدرعات و العربيات الخاصة بالجيش، أو بالحرس الجمهوري بمعنى أصح!!!!.

طيب ممكن نقول إن طنطاوي طلب من مبارك التنحي أو التخلي عن السلطة، مبارك رفض ، و راح طالب من الجيش الخاص الخاضع ليه، و هو الحرس الجمهوري، أو قوات النخبة صاحبة التسليح المميز و القوي، و مننساش إن قائد الحرس الجمهوري يعين من قبل رئيس الجمهورية، الحرس الجمهوري هو جيش العاصمة، و يعتبر في الوقت ده الحرس الخاص لرئيس الجمهورية!!!!.

يبقى نرجع تاني ، مبارك طلب المشير ينزل بالجيش ، المشير طلب بالتنحي، مبارك رفض، و قرر الإستعانة بالجيش الخاص بيه!!.

نقدر نقول إن المجلس العسكري عمل إنقلاب، فمبارك حب يهد الإنقلاب ده، نزل الحرس الجمهوري، راح الثوار الوحشين إلي هما القلة المندسة حرقوا مدرعات و عربيات الحرس الجمهوري!!!!.

طيب لما المجلس العسكري عمل إنقلاب، ليه الجيش العادي منزلش قبل الحرس الجمهوري؟؟؟؟، بمنتهى البساطة ثكنات الحرس الجمهوري جوه القاهرة ياباشا، و إستعدادها للتدخل، يبقى في الحالة ديه على أتم الإستعداد، و المهم إن المجلس العسكري مكنش يتوقع إن الموقف يوصل لغاية التدهور ده!!!!.

يعني كل مرة شوية ناس تطلع تعمل شوية مظاهرات، الشرطة و الأمن المركزي، بتقوم بالواجب و كل شيء ينتهي!!!، حتى زاي إلي حصل في المحلة، الدنيا قامت، و نزلوا صور مبارك، و ناس كتيرة قالت ديه شرارة الثورة، و هبههه، الأمن المركزي و جحافل الأجهزة الأمنية، سويت كل حاجة بالأرض.

فضل المجلس العسكري يراقب عن بعد، لغاية لما جت حركة حلوة من مبارك، لو تفتكروا الخطاب إلي قال فيه إنه ماشي بعد ستة شهور و إنه هيموت على أرض مصر، و إلخ.....!!!!.

ناس كتيرة إبتديت تقول ماشي نديله فرصة، و إبتدت ناس تنسحب من الميدان و من مصر كلها، التعاطف الشعبي مع مبارك جه ضربه كويسة لناس كانت عاوزة الناس تقوم و تنزل هي تساعد و تساند، عشان تبقى ثورة مش إنقلاب!!!!، و ده مهم قدام الرأي العالمي.

طيب لما الناس إبتدت تنسحب، طيب هما هيساندوا مين؟؟؟؟، راحت فكرة سريعة حلوة جت في ميعادها، نعمل موقعة إسمها موقعة الجمل، ناس جاية من أول الجيزة، لغاية ميدان التحرير، مروراً بمحطات كتيرة من الجيش، و لكن لأن الجيش لابس نظارات بتقوم بعمل الفوتوشوب، فمحدش شاف من الجيش الناس ديه، و هما راكبين جمال و حصنة!!!!.

لغاية لما وصلوا ميدان التحرير و حصلت موقعة الجمل الشهيرة ، إلي خلت ناس كتيرة تلغي التعاطف بتاعها و تنزل تاني أشرس من الأول!!!!.

و ياريت مننساش الأخ إلي كان واقف فوق المتحف المصري، و معاه البندقية، و كان بيتكلم في جهاز اللاسلكي!!!!، سبحان الله.
مبارك أخد على قفاه للمرة التانية.

و بعدين ياريت نفتكر حاجة مهمة إن طنطاوي، قبل ماييجي وزير دفاع، كان قائد الحرس الجمهوري، و تعينه في منصب وزير دفاع جت بعد إختبارات كتيرة لضمان ولاء طنطاوي لمبارك، و فعلاً طنطاوي نال الثقة!!!!، و جت الترقية لرتبة مشير سريعة بعد تلات سنين بس!!!!.

طلعت قصة جميلة برضوه ، إن مبارك طلب من المشير سحب إيده من الملف الإقتصادي!!!!، طيب إزاي؟؟؟؟، طيب مامبارك شايف إن المؤسسة العسكرية، بتدير شبكات قوية و طويلة من الأعمال!!!، ماهو يامبارك غبي!!!، ميعرفش إن الجيش مسيطر على 25% من إقتصاد مصر، ياإما كان لابس النظارة إياها بتاعت الفوتوشوب!!!!.

إزاي هيطلب من وزير دفاعه بسحب إيده من الملف الإقتصادي؟؟؟؟، يعني بمعنى كده إن الجيش بقى يسيب كل المشاريع و الشركات، و يقعدوا في البيت بقى، و ينسوا بقى مواضيع العمولات و الثروات الطائلة!!!!.

و بكده مبارك يخسر هو كمان العمولات و الأرباح الطويلة!!!!.

و الخبر الأغرب ، و ده الأغلبية سمعت بيه، إن الحرس الجمهوري أدى قسم الولاء و متجه لميدان التحرير!!!!!، يعني إيه الكلام ده؟؟؟؟.

أخر حاجة إتفرجت عليها فيديو بكري و الليثي!!!.

كل إلي بيقوم بيه بكري ، إنه يجعل المشير ملاك بيحيب مصر!!!، إمال القوات المسلحة كانت بنضرب نار على مين؟؟؟، يعني رفض كلام مبارك لهدم الثورة!!!، و بعد كده المشير بيقتل في الشعب؟؟؟، مش غريبة برضوه!!!!.

هو ده الملاك إلي بيحب مصر؟؟؟؟.

أما بالنسبة لبكري، عدوه اللدود السادات ، مات خلاص، و يمكن لو كان عايش كان هيعرف يرد عليه كويس!!!، و أخر معلومة قالها السادات عن بكري، إنه طفل الأمن القومي!!!، مدعوم من جهاز الأمن القومي!!!!.

برضوه معلومة نحطها في الإعتبار، هنقول إنها إشاعة، مش مشكلة، دلوقتي بناخد الإشاعات في الإعتبار، يمكن يطلع علينا اليوم إلي نأكد أو ننفي فيه الإشاعات!!!.

نرجع لموضوعنا تاني عن قصة المشير و الرئيس.

و الأهم من كده رجال طنطاوي المهدور دمهم!!!!. 


أصل طنطاوي دلوقتي هو إلي قال لاء في وش مبارك، طبعاً بكده أصبح طنطاوي صديق الثورة، فاضله صورة مع الدبابة، و إشتراك في الفيس بوك!!!!.

مبارك أقال طنطاوي قبل يوم من التنحي، لكن المناوي ساعد المشير على إخفاء خطاب الإقالة؟؟؟؟.

المناوي ساعد الجيش على إعلان خطاب التنحي من ورا وزير الإعلام!!!!!.

طيب لما المناوي ساعد الثورة ، الجيش و الثوار، حطينه في السجن ليه؟؟؟؟، ده المفروض على كده نعمله تمثال في ميدان التحرير!!!!، و نسقط عنه كل التهم ، لإنه بطل من أبطال 25 يناير!!!!.

أما بالنسبة للمشير، الحقيقة هي صراع بين المشير و الرئيس على السلطة!!!!، صراع بين الأقوياء، أو بمعنى أصح إزاي مبارك يضحي بيه عشان خاطر جمال مبارك؟؟؟، إزاي يرميه كده بمنتهى السهولة بعد ماأفنى حياته في خدمة مبارك؟؟؟؟.

بس نرجع تاني و نقول، إن مفاتيح المشير مع مبارك، حتى لو نسى المشير ذلك!!!!، و خدعوه كل إلي حواليه!!!.

ممكن المشير إتصارع مع مبارك مش على السلطة، إنما التصارع جه من مبدأ، إزاي يتخلى مبارك عنه؟؟؟، إزاي بعد العمر ده كله، يبقى تحت إيد جمال مبارك؟؟؟؟، و إلي وصل الأمر لما وصل إليه، إن إزاي قرارات جمال مبارك تمشي على المشير؟؟؟.

بس دلوقتي ، مفيش قدام المشير غير بعض الحلول:

1.  وفاة مبارك و بكده القصة كلها خلصت.
2. مبارك يطلع من القضية ديه، و يسانده المشير من وراْ الستار!!!. ( مبارك، أو أولاده إتحكم عليهم بلإعدام، سوزان مبارك مش هتسكت، الخيوط في إيدها، لغاية دلوقتي!!!).
3. كسب القوة من الشعب، و بالتالي يبقى معاه الجيش و الشعب.

و ده إلي المشيرشغال فيه، أو بمعنى أصح، المشير شغال على النقطة 2و3.

لإن النقطة 1، لو إتدخل المشير في قتل مبارك، هيكون كتب شهادة وفاته معاه!!!.

أما سوزان مبارك، بعبع المشير، فكفاية لغاية دلوقتي مع كل الإتهامات و المسؤوليات المنسوبة ليها!!!!، لا المشير ولا جيشه و لا مجلسه العسكري قادرين عليها.

فعلاً ورأ كل رجل معزول، إمرأة قوية، و فعلاً الواحد بيتعجب من قوة الست ديه!!!!.


المشير يا إخوة مش طامع في سلطة، و لا عاشق للسلطة، خالص، هو بس مدمن سلطة، لا أكتر ولا أقل.

زاي كده الظباط الأحرار قائدي إنقلاب 52، مكانوش عاوزين سلطة خالص، و لما جه محمد نجيب و قال نرجع السكنات و نسلم السلطة للمدنيين، حددوا إقامته و مسحوه من التاريخ بس!!!، إنما هما مكانوش عاوزين السلطة خالص!!!.


الكرسي ليه إغراء، لما تكون بعيد عن الأضواء، و مرة واحدة تبقى الكل في الكل، إزاي ترجع تاني بعيد عن الأضواء!!!.


أما للناس إلي بتقول أنا لو كنت مكان مش عارف مين، كنت هسيب السلطة بناء على رغبة مش عارف مين، أحب أقول لسعادتك ، إنت مقعدتش على الكرسي ده و متعرفش إذا كان الكرسي هيغيرك و لا لاء!!!، و الأهم من كده مفيش حد مبيحلمش إنه يكون ليه شنة و رنة، مبيحلمش إنه يأمر يطاع، كفاية الجملة الشهيرة " إنت مش عارف بتكلم مين؟؟؟؟"، إيه و لا إتنسيت؟؟؟؟.

و أخيراً ، أحب أقول للمشير، إتعظ من مبارك و الأخرين، الكرسي مش دايم!!!، و ديه حقيقة تاريخية، الدايم بس ذكرى البني أدم سواء كانت بالخير أو بالشر!!.

و أحب أضيف، إن المكتوب ده بناء على رأي شخصي، و تحليل لبعض الإمور من وجهة نظري الشخصية!!!.

إقرأ المزيد... Résuméabuiyad GRAKOLLO

مقاطع الأكل الصيني

الموضوع ده على قدر كبير من السرية يا ريت إلي يقراه ميقولش لحد على فضيحتي في الشرا من الصين!!!!!، ماشي متفقين؟؟؟؟.
أبتدي الحكاية من أولها زاي ماحصلت.

بص يا سيدي بصي يا سيتي، أول حاجة فكرت أشتري حاجات تنفع في البيت، و طبعاً الأسعار حالياً نار يا حبيبي نار، فكرت أشتري من الصين!!!!، و إيه إلي فيها؟؟؟؟.

قعدت فكرت ، طيب أشتري من الصين إزاي؟؟؟؟، عادي أروح للعم جوجل و هو إلي هيقولي أشتري منين!!!، صح؟؟.

مكدبتش خبر، و رحت على العم جوجل، و سألته، الراجل كتر خيره طلعلي ملايين المواقع!!!!، طيب و بعدين ؟؟؟؟، هدور في ملايين المواقع؟؟؟، ده على كده الشرا يتم عن طريق الورثة بقى!!!.

طبعاً مخي لما بيشتغل مقولكش ، يبقى المصيبة جاية بسرعة!!!!، قولت طيب أشوف أول موقع ، دخلت عليه و مسكته من أوله لأخره!!!، و ملاقتش إلي أنا عاوزه، أو بمعنى أصح كنت عاوز أشوف موقع تاني و أقارن.

دخلت على التاني من أوله لأخره، لاقيته حاجة زاي الفل، بس كان فيه معضلة بسيطة شوية، الأسعار كانت زاي الفل، بس الشرط البسيط إن الكمية بالألف!!!!!!، لا أنا عاوز بالواحدة؟!؟!؟.

رجعت للعم جوجل و خليت البحث محدد عن إلي أنا عاوزه من الصين و يكون بالواحدة.

العم جوجل طلع معايا كريم زاي كل مرة و عطاني مواقع بالملايين برضوه!!!!.

أول واحد دخلت عليه لاقيته تمام، الأسعار، بالواحدة و كمان منسق و يديلك مصاريف الشحن و طرق الدفع كمان، قلت يا سلام هو ده.
كنت كل لما ألاقي حاجة عاوزها أدوس على زرار شراء، و أكمل لحاجة تانية و هكذا لغاية لما جبت كل حاجة أنا عاوزها.

جيت في النهاية أشوف بقى الكمية إلي إشترتها و سعر الشحن و الذي منه بقى، لاقيت الأسعار تمام و سعر الشحن فوق الممتاز.

دفعت و كله تمام ، و الموقع ده بعتلي كشف كامل بكل حاجة طلبتها، و الأسعار و الشحن هيوصل إمتى ، قلت ده الشرا من الصين ده، حاجة كده،،،،، عجيبة.

نيجي بقى للقصة إلي حصلت، طبعاً الموقع أخد فلوسه، و بعتلي الكشف، حاجة كويسة، صح؟؟؟؟.

بس حب الفضول عندي كان قوي شوية، أولاً أول مرة أشتري من الصين، و ثانياً مش واثق فيهم!!!!.

شفت سياسة الشحن، فبيقولوا فيها إن الشحن بيتم في نفس اليوم مادام الطلب قبل الساعة 6 مساءً، قلت يا سلام ده الطلب بتاعي كان الساعة 5 مساءً ، يعني طلبي إتحرك على الساعة 6 في إتجاهي.

سياسة وصول الطلب ليك في خلال 3 إلى 5 أيام، لو مكانش فيه أجازات، ده الكلام ده مية مية، طلبي كان بوم الإتنين، يعني طلبي على الجمعة بالكتير هيكون عندي!!!.

عدى أول يوم ، عدى تاني يوم و جه اليوم التالت، قلت في عقلي الشركة ديه نسيت حاجة، فيه رقم بيدوهوني ، و أنا أقدر أتابع الطلب مع شركة الشحن ، عن طريق موقع شركة الشحن، بعتيلهم ميل، أسأل عن الرقم ده.

الظاهر إن الميل كان فيه غلط في حاجة؟؟؟؟، الإحساس ده جالي لإنه عدى بعد الميل حوالي يومين كمان من غير رد!!!!.

و جالي الرد، بس كان محبط شوية، طبعاً بعد السلامات و التحيات، و الذي منه، يأسفوا إن فيه بعض الطلبات بتاعتي مش متوفرة و ميعرفوش هتيجي إمتى!!!!، فهل من الممكن إني أخد حاجة تانية!!!!!!!!.

نعم!!!، ده أنا كنت متوقع إن طلبي في الطريق!!!!، ده أنا كنت بسأل عن رقم وثيقة الشحن!!!!.

طيب لما كنت على الموقع و أنا بطلب، مقاليش ليه إن الحاجة ديه مش موجودة؟؟؟؟، طيب إنتوا أخدتوا الفلوس ديه ليه؟؟؟؟.

كل ده كان أسئلة جواية، و كتبتها في ميل و بعته، و كانوا سايبين إسم للشات على السكايب، فدخلت عليهم.

و كانت الردود شلل، لما سألت مفيش أي تنويه على موقعكم الكريم إن الحاجات ديه مش موجودة، كان الرد ألذ، إحنا بنتعامل في 30000 ألف حاجة، طيب سعادتك أديني قولتلك غيروها بقى، و لا كأني قولت حاجة!!!!، أه و الأجمل إبقى أقرا عن تاريخنا؟؟؟.

حاضر هجيب كتب التاريخ و مش هقرا عن الشركة بس أنا هقرا عن الصين كلها، ماشي بس إيه الحل؟؟؟؟.

بعد عدة ميلات، و عدة محادثات ، إتوصلنا إني أغير الحاجات لحاجات تانية، و طبعاً مع كل إختيار كنت ببعت ميل أسأل الحاجة ديه متوافرة و لا لاء، إكتشفت إن من ال30000 ألف منتج، 25000 ألف مش موجود!!!!.

خلاص عرفت إن كل حاجة طلبتها موجودة، تمام، أه بس فيه فرق لازم يدفع ، قلت حاضر زاي الجزمة دفعت عشان أخلص.

ها الطلب هيتشحن النهاردة، أه الساعة 6 هيكون في شركة الشحن!!!!، رقم الوثيقة؟؟؟؟؟، النهاردة الساعة 6.

ماشي.

عديت الساعة 6، و بقينا تاني يوم؟؟؟؟؟؟، ها يا شركة إنتوا نسيتوا ، و لا الطلب مش موجود؟؟؟؟.

لاء إحنا هنبعته النهاردة، و الساعة 6 هيكون عندك رقم الوثيقة!!!!، أه و أسفين على التأخير يوم!!!!.

لا بجد كتر خيركم، إحنا بقالنا 3 أسابيع، جت على يوم؟؟؟؟.

المهم الساعة 6 أخيراً جالي رقم وثيقة الشحن!!!!، أخيراً إنتصرت على الصين و أخدت رقم الوثيقة.

و أهوه عدى 3 أيام و المفروض الطلب ييجي يوم من الأيام، بس إلي مطمني إن طلبي مع شركة الشحن حالياً.

السؤال هنا، طبعاً مش كل شركات الصين بنفس طريقة الشركة إلي وقعت فيها، بس لما يكون فيه كام شركة بالمنظر ده، يبقى الصين وصلت للي هيا فيه إزاي؟؟؟؟، مش عارف؟؟؟؟.

يعني التجار بتوع إستيراد الصين بيكون المنظر ده معاهم؟؟؟؟، لو كده بقى ربنا يكون في عون التجار!!!، يبقى لازم يطلعوا عيونا إحنا كمان؟؟؟، مشاركة من الشعب!!!!.

بصراحة إتوهمت و لو لفترة قليلة إن الصين ديه بلد ملتزمة، بس للأسف فعلاً أول و أخر مرة أجيب حاجة صيني أصلاً!!!!.

أنا بقى مقاطع المنتجات الصينية، أه و الأكل الصيني كمان!!!.

إقرأ المزيد... Résuméabuiyad GRAKOLLO