بس للأسف إستغلال الكرامة هو الموضوع !!!!.
من حقك إنك تعيش بكرامة، تاكل بكرامة ، تشتغل بكرامة، إنما تتقتل عشان الكرامة؟؟؟، و ماله و لا عيب و لا حرام!!!.
موضوع الطالب إلي إتقتل من أفراد الأمن ، مات عشان الكرامة!!!، و إلي موته موته عشان الكرامة!!!.
من الفيديو إلي إتنشر مؤخراَ ، لموضوع الطالب إلي إتقتل، لو لاحظتوا كان ماشي إتجاه البوابة ، و هوبا مرة واحدة راح ضارب واحد واقف!!!، ليه؟؟؟، قال عشان مسمحش ليه و لمجموعة من الطلبة من الدخول بعربياتهم عشان متأخرين عن الإمتحان !!!!.
طبعاَ إلي إتضرب كرامته وجعته، راح رجع الضربة، الغريب إن البقية من أفراد الأمن جروا على أوضة جنب البوابة و راحوا ساحبين العصيان ، و تك الطالب وقع في الأرض قاطع النفس!!!، كل ده عشان الكرامة؟؟؟.
الطالبة كرامتهم وجعتهم إنهم مدخلوش بعربيتهم، و أمن المجمع لو محدش سمع كلامهم كرامتهم بتوجعهم قوي!!!، كانت هتفرق في إيه دخولهم بعربيتهم و لا لاء، و كانت هتفرق في إيه ركنتهم لعربيتهم بره المجمع ؟؟؟.
يا ترى ممكن الواحد يسمي الموضوع ده إيه؟؟؟، و ياريت حد يفهم!!!.
الموضوع التاني، برضوه كرامتنا و كرامتهم!!!.
المحامي إلي إتمسك في السعودية!!!، طبعاً ناس كتيرة سمعت القصص الرسمية ، إنه كان بيهرب مواد مخدرة مش عارف كام ألف قرص!!!، و طبعاً المستفز كان رد السفير المصري في السعودية!!!، يعني تقدر تقول البعثات الدبلوماسية المصرية عاوزة تتولع فيها ، لإنهم ملهومش أي نوع من اللازمة نهائي، تقدر تقول بطالة مقننة، إستنزاف للمصاريف و خلاص!!!.
طبعاً السفير كان متعصب ، إزاي الناس تقول إنه معتقل سياسي في السعودية!!!، ده مهرب!!!.
المسؤولين السعوديين أكدوا نفس القصة ، إنه مهرب و إتصور مع المظبوطات كمان!!!.
نمسك الموضوع شوية، واحد طالع يعمل عمرة، إيه ؟؟، أخد معاه شوية مخدرات يوزعهم و بعد كده يتوب؟؟؟؟.
ده بالنسبة للقصة الرسمية.
أما القصص إلي بيتداولها الناس، إنه داعية مصري ، يعمل مناظرات في الأديان، و ناس تانية بتقول إنه ثائر سياسي و إتمسك تخليص حق أما ناس تانية فبتقول إنه غلط في الملك!!!!.
هو فين الحقيقة في الأربع قصص دول، واحدة رسمية و تلاتة إفتكاس؟؟.
و طبعاً مقدرش أنسى إن المصري إتهدرت كرامته بره و جوه على مر سنين كتييييييييييييرة!!!، بس زاي مافيه وحش ، فيه كمان حلو!!!، و لا إيه؟؟؟.
على فكرة الشعب المصري مشترك في إهدار كرامته ، مش الحكومة بس هي المسؤولة، بلاش نتفة خبر بسيطة:
واحد راح يجدد فيزا الإقامة ، راحوا محولين ورقه كله لبوليس الأجانب ، ليه؟؟؟، لإن قبل كده كان فيه مصريين مقدمين برضوه على فيزا الإقامة و أوراقهم كانت مزورة!!!، إيه المفروض نقوم بطحن سفير الدولة الأجنبية لإنهم مرضوش بالورق المزيف؟؟؟.
السيئة تعم ، و الحسنة تخص!!!.
مملكة السعودية مملكة كبيرة في الحجم و المقدار، و منقدرش ننسى دور السعودية معانا على مر السنين، و مش كل شوية واحد يطلع و يقول إحنا إلي كنا بنأكل ، إحنا إلي كنا بنشرب!!!!.
طيب و لما السعودية وقفت جنب مصر ضد أمريكا ،و كان ملكهم رحمه الله في هذا الوقت على خلاف مع الرئيس المصري، و على كده نحى الخلاف ووقف جنب مصر!!!.
إيه ننكر دور السعودية في لحظة، خزانة السعودية إلي في وقت الحرب كانت مفتوحة لمصر على مصراعيها!!!، إيه إتنسيت ديه كمان، بمعنى أصح عملنا الواجب و ردوا لينا الواجب مضاعف.
و الغريب في الأمر، هو عشان نسترجع الكرامة أو نحافظ عليها ، لازم تكون بالدراع؟؟؟، مينفعش نتناقش؟؟؟، مينفعش نكون دبلوماسيين حتى على الأقل نعوض الدبلوماسية الخربانة بتاعتنا؟؟؟.
يروح طالعلك ناس كده من تحت الأرض و تقول:
"بس فيه نقطة مهمة جداً الناس غفلتها شوية، مدى حب العائلة الملكية لمبارك!!!!، يا ناس ديه عشرة أكتر من 30 سنة عاوزنها تروح كده"؟؟؟.
ديه حرية شخصية إلي يحب مبارك يحبه و إلي يكرهه يكرهه!!.
هو يعني الكفيل إلي كان بيظلم عامل أو موظف و يرحله !!!، كان على خلاف مع مبارك؟؟؟.
لازم نستعيد علاقتنا بالشعوب العربية ، إلي خسرناها بسبب غلطات أشخاص!!!.
مثال موضوع زاي بتاع الجزائر، كان مين الخسران ؟؟؟، مش الناس العادية هما الخسرانين، و لا الرؤساء و أولادهم هما إلي خسروا؟؟؟.
النقطة إحنا ليه نخسر أكتر ماإحنا خسرنا؟؟؟، ليه منتناقش و نوصل لأفضل الحلول؟؟؟، لو المحامي المصري غلط ياخد عقابه، و لو إتظلم ياخد حقه.
مش نطلع و نشتم الملك و السعوديين كلهم !!!، تفتكروا مستنيين منهم إيه؟؟؟.
هيردوا عليكم بدل المرة إتنين و نفس قصة الطالب سالفة الذكر هتتكرر بس على مستوى أوسع!!!، و في الأخر كرامتنا هتوجعنا و كرامتهم هتوجعهم!!!، و بدل مانبقى إيد واحدة هنفضل ضد بعض على طول الخط.
من السهل كسب صديق ، بس من الصعب الإحتفاظ بيه كصديق!!!، حد فهم حاجة؟؟؟
