مبارك لسه عايش على قفانا

بعد كل إلي حصل، و إلي الناس قامت عشانه!!!، مبارك لسه عايش على قفانا!!!.

قاعد، واكل، نايم و شارب على حسابنا!!!!، و الدليل الخبر ده:

• كشف مصدر مقرب من عائلة الرئيس المخلوع حسنى مبارك أن جهات خاصة أخطرت أسرته بأن تكاليف حراسته ونقله تخطت فى 31 ديسمبر الماضى مبلغ عشرة ملايين جنيه وأن تكاليف نقله من محبسه بالمركز الطبى العالمى لقاعة المحاكمة تتكلف فى كل مرة ما يزيد على 10 آلاف دولار. مبارك الذى أعلن لاسرته أنه شخص مطلوب قتله داخل وخارج مصر قال: إن نقله للمركز الطبى نوع من التأمين. ويشارك 200 عنصر معظمهم من الداخلية فى حماية وتأمين وحراسة مبارك بعد إدانته من قبل النيابة العامة.

جميل جداً لغاية دلوقتي، بس فيه حاجة بسيطة خالص!!!.

سوزان مبارك في تسريب لبعض من مذكرتها، إن مبارك أمر الحرس الجمهوري بتأمين الحمام، عشان كان متوقع إن ناس من إلي حواليه هيقتلوه!!!.

بلاش الدليل بتاع سوزان، دليل تاني خالص، لما المخلوع كان رئيس، بعد محاولة الإغتيال ، أصبح تأمينه واخد شكل تاني.

ممنوع أي حد يمشي في الشارع ساعة مرور الموكب، بعد ماكان ممنوع مرور السيارات!!!، موضوع التمويه ، موكب و طيارات هليكوبتر، بحيث محدش يعرف هو على الأرض و لا في الجو.

الجيش كان مسؤول عن شرا أسلحة الحرس الخاص!!!، وجوده الدائم في مخصصات الرياسة، و الخروج خارج أسوارها للضروريات بس.

يعني مش عناصر خارجية و منظمات إجرامية عاوزة تسيء لمنظر الأمن المصري زاي ما بقيت الخبر بيقول:

•    وأكد المصدر أن السلطات المصرية شددت إجراءات الأمن والحراسات على الرئيس المخلوع وزوجته بشكل وبترتيبات غير مسبوقة استنادا على معلومات تفيد بأن هناك جهات تخطط للنيل منه خلال وجوده بالمركز الطبى العالمى، وأن من بين المخاطر التى تهدده وجود جهات أجنبية تهدف لقتله لتوريط مصر وتلويث سمعتها الأمنية عالميا.

طبعاً المصدر مقلش إذا كان التخطيط داخلي أو خارجي!!!، إنما المعلومات الخطيرة إن بوجوده في المركز الطبي العالمي في خطورة على حياته!!!.

خلاص فيه حل إنقلوه بورتو طره، أمان و إمتيازات!!!، هيكون مع أولاده، و نظامه!!!، و كمان سوزان هتيجي تزوره و تزور الأولاد بالمرة بدل تكايف إنتقال من البيت إلي المركز الطبي، من المركز الطبي للبيت و من البيت للمركز الطبي، لبورتو طره للبيت أو المركز الطبي!!!.

كل ده على قفانا، مش دافعين مليم من جيبهم!!!!.

و خاصةً إن الداخلية أعلنت الخبر ده:

  

• الداخلية شددت الحراسة مؤخرا حول سجن مزرعة طرة بشكل غير مسبوق وأن تشكيلات الحراسة الخاصة تنوعت لدرجة أنها أصبحت تشكيلات طوارئ مواجهات عسكرية حقيقية وأن هناك معلومات تؤكد تصاعد الحراسات مع اقتراب يوم 25 يناير تحسبا لتهديدات من الشارع باقتحام سجن مزرعة طرة.

يعني بمنتهى الإختصار ، ممكن تأمينه في أي حتة في مصر، مش لازم يكون المركز الطبي، ده غير إن الداخلية و الجيش بيفتخروا بالخبر ده

•   حراسة مبارك الآن تعد من أقوى أنواع الحراسات فى العالم طبقا لمعلومات مصدر مسئول، حيث تقلل من حيث المفهوم الأمنى الاستراتيجى للحراسات فرصة الوصول للهدف بنسبة 90٪ وهو ما يجعل الهدف بعيدا عن المخاطر.  وأكد المصدر أن رؤساء العالم مجتمعين بمن فيهم الرئيس الأمريكى لا يلقون نوعية الحراسة الخاصة التى يلقاها مبارك حاليا فى مصر.

طبعاً الداخلية معندهاش أي حجة دلوقتي في نقل مبارك لبورتو طرة!!!، بس للأسف مبارك رجع تاني يتعب و ينهار و يجيله تقلصات زاي العيال لما ميكونوش عايزين يروحوا المدرسة!!!.