بعدين مننساش إن مبارك ليه فضل كبير على عيلة الديب، من أشهر العائلات.
المهم فريد الديب واثق من البراءة لمبارك و عيلته و الفريق إلي معاه، أهوه فصص القانون، و إبتدت الثغرات تطلع.
الرئيس المخلوع، هيصبح الرئيس المخلوع الفريق/ حسني مبارك، و طبعاً طلب المحاكمة العسكرية أصبح واجب، يعني اللعبة كلها إتنقلت لإيد المشير.
حتى لو إفترضنا إن القضاء العسكري ده شريف، إفتراض، تفتكروا في الحياة العسكرية إلي كلها أوامر من القيادة إلى الأقل و هكذا، مبارك هيتحاكم محاكمة عادلة ترضي شعب إطحن 30 سنة؟؟، أشك!!، المشير برضوه لحم كتافه من مبارك، حتى لو المفروض عليه يحاكمه، مطالب برضوه يلاقي مخرج ليه.
حتى سامي عنان، إلي على كتافه من خير مبارك، كل المجلس العسكري إلي على كتافهم من خير مبارك.
و لما الناس أو القانونيون إبتدوا في حالة الهيجان ، و طبعاً المجلس العسكري راح طالع بتصريح غريب، إن مبارك معزول من رتبته العسكرية بمجرد التنحي!!!!، و ده غريب، يعني ممكن يكون فريق سابق، أو فريق على المعاش!!!، المهم راح الديب طلع بفتوة قانونية جديدة، إن المسؤول عن محاكمة حسني مبارك مجلس الشعب!!!!.
الديب ماشي ( ياما في الجراب يا حاوي!!!).
عجبني جداً ماكتبته جريدة الوفد بخصوص بلال فضل:
شبه الكاتب الصحفى بلال فضل فريد الديب محامى الرئيس المخلوع حسنى مبارك بـ"الصرصار العبيط" الذى يدافع من أجل الحصول على أتعاب مرافعته فقط .
وقال فضل عبر تغريدته على موقع التواصل الاجتماعي "تويتر": "من صرصار الليل العبيط إلى نسر الجو الجريح يارب تكون المرافعة عجبتك عشان محتاج دفعة من الأتعاب".
كما شبه فضل طلب الديب ببراءة مبارك وادعائه بأن الرئيس المخلوع مازال رئيسا لمصر بمحامى فتاة ليل يدعى فى مرافعته أنها رمز العفة والطهر، مؤكدا أن جرائم مبارك محفورة على أجساد ملايين المصريين وإنها ستظل تطارده للأبد.
وقال: "هى لو فتاة ليل جابت محامى وقال فى مرافعته إنها ست الطهر والعفاف هتبقى كده .. جرائم مبارك محفورة على أجساد الملايين وتسكن واقعهم وستطارده للابد".
و إبتدينا حاجة جديدة ، إن مبارك معرض لعمليات إغتيال، قال عشان تتهز الثقة العالمية في المجلس العسكري، يا سلام؟؟؟.
طيب ماهو أيام لما كان رئيس كان معرض لعمليات إغتيال، إيه الجديد؟؟؟، لاء الجديد إزاي نقنع الناس إن الحراسة إلي حوالين مبارك زاي مايكون رئيس الجمهورية، مش رئيس مخلوع تحت الإقامة الجبرية لحين محاكمته!!.
لو حد لاحظ أخبار وصوله أو نقله من المحاكمة، هنلاقي نفس طقم الحراسة أيام لما كان رئيس!!!، نفس الحارس الخاص و نفس أفراد التأمين.
مش بعيد بقى إن سوزان مبارك لما بتنزل الشارع عشان قال إيه تزور عيالها ، يقفلوا الشوارع زاي زمان!!!.
حتى كان فيه خبر كوميدي، إن سوزان مبارك إتعاركت مع أفراد من الحراسة على باب الفيلا ، لإنهم مقاموش على حيلهم و هي داخلة!!!.
كل ده كلام جرايد، مفيش أي حاجة تثبت العكس، أو تثبت صحته، ، و حتى لو الكلام صح و إن سوزان فقدت كل قوتها و حراستها، معني مش مصدق الكلام ده، إيه مفيش أي منظمة عاوزة تغتالها هي كمان، مش بعيد تطلع علينا الأخبار بعد كده و تقول( تم تشديد الحراسة على سوزان ، لأن أجهزة الأمن إكتشفت محاولات إغتيال من جهات عديدة، خاصةً منظمة الإيد الخفية، و الحراسة الأن من أقوى الحراسات التي شهدها التاريخ ، و هو المعروف أمنياً بتقليل درجة الوصول للهدف بنسبة مية في المية)، و عجبي!!!.
يعني مبارك بنسبة تسعين في المية إنما سوزان بنسبة مية في المية!!!، أهم من مبارك، لاء و العجب إن جمال و علاء عينهم إتغرقت بالدموع لما جابت النيابة سيرة سوزان، ماشي إمهم معاهم حق، بس هما ميعرفوش إن إمهم ملت عيون ناس تانية كتير بالدموع و الدم كمان، عشان هرست أعراضهم، حطمت أجسامهم، قتلت كرامتهم!!!، إيه ؟؟؟، خلاص بقت بريئة قوي دلوقتي.
ده مش بعيد بقى ، إن مبارك يلطم لما إتجابت سيرة مراته!!!.
المهم نرجع للموضوع الأصلي ، بتاع سيادة الفريق، هو رأي و ليس إلا، إحنا ممكن نأجل محاكمة مبارك لغاية لما يتوضع دستور جديد للبلد، أو يتم إنتخاب رئيس جمهورية.
منها هنقدر نقفل ثغرات فريد الديب، و منها هنقدر نحاكمه فعلاً عن كل حاجة!!!، متنسوش إن فيه قضايا كتير هو مشترك فيها و لا إتجاب سيرتها.
و بعدين منين تعزل عضو مجلس شعب عشان حامل لجنسية إخرى، و إنت كرئيس جمهورية و عيلتك حاملين لجنسية إخرى، فين القضية ديه؟؟؟.
سؤال بسيط ، لو فيه حرب بين مصر و إنجلترا، ولاد الريس هيكونوا في أنهيه جيش؟؟؟.
وزرا كتير إسمهم مصري، لكن جوزات سفرهم أجنبية، مين المسؤول عن إختيارهم؟؟؟.
لو قلنا رئيس الوزرا، طيب لما الوزرا بيحلفوا اليمين قدامك، مكانش فيه أي تقارير أمنية قبل الحلفان على مكتبك؟؟؟.
و قضايا كتير من فساد و عمولات و رشاوي و …. إلخ.
بعدين فكرة أو رأي تاني، لو خلينا رئيس الوزرا بالإنتخاب، و كذلك المحافظين، مش ده هيكون أحسن، و يكون منصب رئيس الجمهورية منصب شرفي، زاي دول كتيرة عاملة كده، و أهوه لسه الدستور هيتحط يعني ممكن نعمل التعديل ده؟؟؟.
كلها أراء، بس ممكن تتحقق لو إحنا إلي عاوزين ده، أه أنا عن نفسي رافض فكرة الخروج الأمن للمجلس العسكري، مبارك إبتدا بالقتل و هما جم كملوا نفس الطريق، بقى نمسك مبارك و نسيب تلامذته، مش المفروض كلهم يشرفوا مع بعض؟؟؟.
و بعدين إلي بيطالب إن عمرسليمان يكون رئيس الجمهورية من حقهم، بس فيه حتة كده نسيتوها و هتكلم عليها بإذن الله بإستفاضة!!!، هو عمر سليمان مش مسؤول برضوه على ملف تعذيب المعتقلين ولا إيه؟؟؟، مش كان فيه تعاون بين جهاز المخابرات الأمريكية و المصرية في عمليات التحقيق و الخطف و الإعتقال؟؟؟.
طيب واحد كان مسؤول عن التعذيب، الإعتقال و القتل أكرمه و أخليه رئيس جمهورية ، و لا أكرمه و أخليه مع الفريق مبارك في الحبس؟؟؟.
ياريت نفكر كويس، عشان الرئيس المخلوع الفريق/ حسني مبارك ناوي يدي 80 مليون بني أدم على قفاهم و بالقانون، يا بلد من غير أي قانون غير قانون الغاب!!!.