طلع علينا الفترة إلي فاتت، أخبار كتيرة عن فتح الدول الفلانية باب الهجرة لأقباط مصر!!!!.
و الأعجب ، فتح باب اللجوء على الأخر لأقباط مصر!!!!.
بس للأسف، ناس كتيرة بتروح على حس الإشاعات ديه، و تاخد رفض!!!!، ليه؟؟؟؟.
عشان بمنتهى البساطة ديه إشاعات!!!.
أه أمريكا بتعمل موضوع الهجرة العشوائي، بس مش للأقباط بس، بتاخد كمان مسلمين!!!.
أه دول إوروبية كتير فاتحة دراعتها، و تديك فيزا و إقامة مفتوحة كمان، بس للناس إلي هي محتاجاها!!!، أيوة ، لازم تكون الدولة ديه محتاجة حد معين، و بتاخده و توفرله إمكانيات، و تساعده، لإنه في النهاية و البداية هيدي الدولة ديه حاجة.
مش هيروح عشان يشتغل تحت السلم، أو يقعد في البيت و يزود نسبة البطالة!!!!.
و برضوه مش الأقباط بس إلي عندهم كفاءة، فيه كمان مسلمين عندهم كفاءة.
بكده ممكن تكون النقط إلي فاتت توضيح شوية لبعض العقول الضايعة!!!.
نيجي بقى لموضوع مهم، و هو اللجوء في الدول إلي فاتحة دراعتها للأقباط.
نمسك نقطة إولى كده نتكلم فيها، واحد هيروح سفارة أي دولة، هيروح طالب حق اللجوء من السفارة!!!، ممكن لو هو مجنون!!!، لإن السفارة مش هتمنحه حق اللجوء، خاصةً في مصر، عشان العلاقات الدولية أهم من مصلحة الفرد!!!.
الأخ ده هيطلب ياخد فيزا، و هيدور إزاي يطلع ورق للحصول على فيزا سياحة!!!، و ممكن يتقبل!!!، عشان دول كتيرة عارفة إن إلي هيطلع من مصر دلوقتي مش هيرجع تاني، و ده مش الكل بس فئة كبيرة مش هترجع تاني، و الكلام ده كمان كان قبل الثورة!!!، يعني مش جديد.
طلع الأخ ده برة، و أول لما نزل مطار الدولة مانحة الفيزا، راح طالب حق اللجوء!!!.
طبعاً مش هيمنح حق اللجوء ، بالسهولة كده، بمعنى مش هيقول أنا قبطي مضطهد في مصر، هيروحوا يقولولو إتفضل منحناك حق اللجوء!!.
بناء على كلام واحد معرفة قدم طلب لجوء، فبسراحة إتبهدل بهدلة، مشفهاش في مصر!!!، معنه عنده مشاكل مع نظام كامل!!!، بس ده مشفعلهوش ، ليه؟؟؟.
لإن جزء من البعثات الدبلوماسية الخارجية موجه للخارج عشان تحسين صورة النظام أياً كان، مبارك أو العسكر!!!.
و بيتبرعوا للدول ديه بتقارير وردية، تحسسك إن النظام المصري أياً كان، نظام ملايكة، تقعد بعد ماتسمع التقرير إلي مقدماه السفارة المصرية للدولة الأجنبية، إن مصر و نظامها أحسن من أنظمة دول العالم!!!، يا سلام!!!.
فطبعاً صاحبنا مقدم اللجوء بياخد حتة قفا، ميحلمش بيه!!!.
و تخيل بقى واحد عنده مشكلة فعلية بياخد على قفاه!!، إمال بقى إلي رايح و مألف قصة هيعملوا فيه إيه؟؟؟.
القصة كلها مش كلمتين هتقولهم و خلاص، لاء ده طلع فيه تحقيقات و سين و جيم، و بتتعامل على إنك متهم، مش صاحب قضية!!!، بمعنى إنت كداب و مطالب إنك تثبت كل كلمة، بالإضافة إن تقرير السفارة أقوى من أي دليل ممكن تقدمه!!!.
فيه ناس ممكن تكون تعرف الكلام ده، و فيه ناس تانية مغيبة!!.
و الأعجب فيه ناس بتدفع مبالغ خرافية، و في الأخر بتاخد على قفاها، زاي موضوع التهريب، يروح ممسوك و مترحل على مصر!!.
أو ينجح إنه يعدي، و يعيش فترة طويلة قلقان إن البوليس يقفشه ، لإنه معهوش ورق رسمي!!!، و مش على طول بتعرف تظبط ورق، بتاخد فترة!!!.
ده غير عصابات الجواز الوهمي، بياخدوا منك فلوس رز، الكلام ده في مصر!!، يجيبلك واحدة من برة، و تتجوزها في سفارة بلدها، و تاخد الفيزا و تسافر باشا، بعد ماتكون دفعت دم قلبك!!!.
و تروح سعادتك هناك ، و تفضل تحت رحمة الست ديه!!!، و تفضل تدفع يا إما تفشكل الجوازة و ترجع بالقفا برضوه!!.
و ناس كتيرة فاكرة إن الجواز أسهل طريقة، أو البوابة الذهبية!!!، لاء!!!، بوليس الأجانب مبيسبكش في حالك!!!، بيعملوا تفتيش، و لو شكوا في الجوازه ديه، عندهم أتم الإستعداد إنهم يحولوا حياتك لجحيم!!!.
موضوع الهجرة بره مصر، محتاج لتفكير طويل شوية، ناس كتير تقول أطلع بره أشتغل أي حاجة!!!، بس للأسف بره دلوقتي بقى فيها مشاكل، نسبة البطالة عالية، الشركات بتقفل، و القاعدين في البيت بقوا كتير!!!.
فسعادتك هتروح تقعد في البيت؟؟؟، لاء طبعاً!!!، مش هتجيب تمنها!!!.
طيب الحل!!!، الحل بسيط، لو دخلت سعادتك على الحج جوجل و إبتديت تدور على الدول طالبة إيه؟؟، هتقدر تعرف أنهيه بلد تقدر تروحها، ده غير إنك هتروح هناك فاهم إيه إلي بيحصل، أه بتاخد فترة طويلة، بس بتريحك في النهاية.
لإن سعادتك من غير ورق رسمي، أولاً هتضرب على قفاك ، و تبقى تحت رحمة شوية نصابين، و مفيش حد هيرحمك.
لإن فيه ناس بتبقى مستنية السادة الهاربين، ياخد الفلوس إلي معاك، و لما تشتغل هتبقى بتشتغل عشان تدي الفلوس للنصاب، يا إما يبلغ عليك!!.
أو يسرق منك الباسبور و برضوه يبلغ عليك!!!، و يبيع هو الباسبور، و لما تترحل يستقبلك أمن الدولة، أه نسيت الأمن الوطني، و أول سؤال هيكون بعت الباسبور بكام، إبقى إقعد إحكيله على الحكاية من أولها لأخرها عشان سعادتك هطول معاهم شوية!!!.
رقم إتنين في حصولك على ورق رسمي، إنه بيتوفر لك تأمين صحي، و بجد من غير التأمين الصحي ، لو جرالك أي مشكلة صحية الدكاترة و العلاج نار يا حبيبي نار!!.
بجد ديه نصيحة، ممكن أكون مسود الدنيا، بس أنا كاتب عن أسوء شيء ممكن يحصل، لازم تاخد بالك أو تاخدي بالك، بره الفلوس مش على الشجر تقطف و تشيل في شولة، لاء بره يعني تعب و شقى، أه في النهاية بتاخد فلوس، بس إحسبها هتلاقي إن الفلوس ديه ممكن تكفيك للمعيشة بره أو لاء، و ياريت تبطلوا تحسبوها على الجنيه المصري ، بمعنى تقول لنفسك هاخد مثلاً ١٠٠٠ دولار يعني ٦٠٠٠ جنيه هشيل كذا و أبعت كذا لمصر!!!، لاء يا باشا، ال ١٠٠٠ دولار دول في الوقت الحالي يادوبك يكفوك!!!، للمعيشة متنساش فيه إيجار، كهربة، مية، مواصلات و سجاير لو مدخن...... و إلخ!!!.
إحسبها صح، عشان ترتاح صح، فكر قبل ماتاخد قرار السفر، و لو عاوز تسافر ، سافر بس بطريقة صح!!!.
أه نسيت أقول إن بعض الشهادات العليا مطلوبة، و كمان إلي مطلوب جداً الحرفيين، لحام، نجار، خراط.... إلخ!!، يعني لو معاك شهادة عليا و جنبها حرفة، يبقى بكده قدامك كذا طريق بدل طريق واحد، و ربنا يوفق كل واحد عايز يهاجر!!!.
