بعض الإعلاميين دلوقتي مش عارف !!!، تحس كده إنه طالع يشمت ، طالع كده يحسسك إنه لسه بريق ليه بريق إعلامي!!!.
الكتير منهم مكانش بيطلع في التليفزيون أيام مبارك، يإما عشان المشاكل !!!، أو حد من النظام زعلان منه!!!، أو حب عدم الظهور (إلي بعيد عن العين بعيد عن القلب ).
كل ماكان مختفي، كل ماكان النظام ناسيه و الناس كمان !!!، و دلوقتي طالعين علينا بحملة مكثفة ، عشان نرجع نفتكرهم تاني !!!.
بس دلوقتي عشان البريق الإعلامي ، أو تقدر تقول رجوع البريق الإعلامي تاني ، لازم تاخد معاه دوا حموضة.
تفضل تقلب في القنوات ، و هما وراك وراك ، تغير قناة ، يطلعلك على قناة تانية ، أو برنامج تاني!!!، و تفضل تصارع مع التليفزيون لغاية لما يعفو عنك و تنتهي الجرعة!!!.
أسف على غلإطالة و الرغي، بس كانوا شوية كلام محشور!!!!.
لقاء عبد اللطيف المناوي مع عادل حمودة بخصوص كتاب الأول إلي هيصدر يوم 25 يناير 2012.
عبد اللطيف المناوي ناس كتيرة تعرف هو مين، إنما إلي تعبني إنه إحتاج يسافر للندن عشان يكتب الكتاب هناك!!!.
بصراحة عنده حق ، يعني لما يحب يكتب كتاب ، لازم يكون الجو المحيط مشجع!!!!.
يعني ينفع و قاعد يكتب ، يدخل عليه واحد بلطجي و يثبته مثلاً؟؟؟.
إنما في لندن ، الجو ، الهدوء و الوشوش السمحة!!!.
طبعاً لما عادل حمودة حب يقدم الضيف المهم جداً ، الحاصل على وسام مساعدة المجلس العسكري و الثورة في تسريب الشرائط!!!!، قدمه على إنه إلتقاه على رصيف إحدى الكافتريات في لندن!!!.
محسسني إن لندن إوضة ، صالة و عفشة مية!!!.
و مش بعيد قابلوا أشرف السعد و هو بيجري ورا عربيات الرش!!!.
كان بيشوف تسجيل الخطابات و كان مصلحة الدولة أهم عنده !!!، حاول يتكلم مع مبارك، و حاول يخلي مبارك ينجز !!!!.
فاضله صورة جنب الدبابة ، فيس بوك و يبقى هو مفجر الثورة المصرية !!!.
و من كلام المناوي إن المجلس العسكري صور الفيديو الشهير بتاع إجتماع المجلس العسكري قبل يوم كامل من إذاعته، حتى ده كان تسجيل؟!؟!؟.
و شكلها كده البيانات كانت مكتوبة و فاضل ساعة الصفر!!!.
كل ده طلع فيلم هندي!!، المجلس العسكري كان مستني مبارك ، هيعمل إيه !!!.
سربوا الفيلم المسجل لمبنى الإذاعة و التليفزيون بدون علم مبارك!!!، يعني كان مبارك في وادي و المجلس العسكري في وادي تاني!!!!.
رئيس بيموت في اسلطة و بيدور على حل، و ناس تانية قاعدة بتخطط لحل، و الدنيا كلها بتدور على حل، ده التاريخ ياما بيشيل!!!.
و بعد كده تكتشف إن كان فيه إتفاقيات ، المجلس العسكري يصور خطاب التنحي المشكوك فيه ، و يستنى مرات مبارك و يالهيسافروا و يطمنواعليهم!!!.
كان ناقص إيه ؟؟؟، تخلوا الناس مستنية لغاية لما مبارك يغسل رجليه و يشرب اللبن و ينام!!!، و بعد كده يتم إذاعة خبر التنحي؟؟؟.
إيه الجمال ده ، و في الأخر تجيبوا المناوي إنه يكون شاهد على العصر!!!.
طيب بما إن المناوي راجل جميل و بيفتكر كل حاجة كده زاي الشطار، طيب ماتخليه شجاع كده و يعمل كتاب عن قصة حياته و يقول فيه قصة كفاحه من ...............، لغاية لما سافر لندن عشان يكتب الكتاب!!!.
و لا هو شاهد على العصر في فترة زمنية لا تتعدى 18 يوم؟؟؟.
يا ريت شهادة العصر تمت للناس إلي ماتوا ، إنما سوزان هانم أخدت حباية النوم و قعدت مع عالم سمسم ، أما جمال و علاء فكانوا ماسكين مجلد ميكي ، و مبارك كان بيتفرج على كابتن ماجد الحلقة الأخيرة!!!، كل القصص ديه ملهاش أي لازمة!!!.
شهادة عصر أو حقبة زمنية ممكن إنها تتحط في التاريخ، مش في مزبلة التاريخ!!!.
كل إلي سعادتك عاوز تقوله ، جم ناس قبلك و قالوه، ده حتى توفيق عكاشة نبح صوته في الكلام ده كله!!!، : إن الجيش هو إلي حافظ على الثورة ، و هو إلي أجبر مبارك على التنحي!!!.
بدليل إنه صور إنعقاد المجلس العسكري ، و عرضوه تاني يوم ، و هربوا الشريط للتليفزيون، حتى شريط التنحي تم تهريبه للتليفزيون!!!، و فضلوا مستنيين لغاية لما العيلة الرئاسية بقوا في سلام !!!!، هاه و إيه كمان ؟؟، إيه كمالة القصة؟؟؟.
مفيش أي كمالة ، عاوز تفهمني إن واحد كان إيد المجلس العسكري في التليفزيون، و جاسوس على وزير الإعلام، و ناقل كل تحركات الإستوديو الرئاسي للمجلس العسكري، مستني مني إني أصدق إنك كنت خايف على البلد!!!، ماشي ألف مبروك بقيت وطني هاه و بعدين؟؟؟.
إيه الإضافة يا عم الوطني؟؟؟.
أرجع و أقول تاني ، تلميذ فاشل لمعلم أفشل، مجلس عسكري فاشل من غير معلمه!!!!.
المشير و مجلسه فاشل من غير رئيسهم مبارك!!!!.