الدول الإوروبية تفتح باب اللجوء

نصيحة كمل الموضوع للأخر، و مش هتندم، هيتحرق دمك بس!!.

طلع خبر و بيقول إن " مرسي مستخبي هو و عيلته في موقع تابع للقوات المسلحة"!!!!، ممكن.

بس مرسي قاعد مع مبارك في المستشفى شغالين في تحدي ، هتتنحى زايي و لا لاء!!!!.

يا ترى بقى هنحاسب مين المرة ديه ؟؟؟، المرشد و لا الجماعة كلها و لا مرسي و مستشاريه و لا مين بالظبط؟؟؟؟.


و بعد كده كلمعتاد زاي ماحصل مع مبارك ، هيحصل مع الإخوان و كلهم هيطلعوا براءة و الشعب هو إلي غلطان !!!!.

الإخوان زاي ماقلت قبل كده ، بارعيين جدا في اللعب تحت الترابيزة، إنما فوق الترابيزة إتفضحوا فضيحة المطهر!!!.

طلع علينا شفيق بكام فيديو ، و قال إنه كان فايز في الإنتخابات، و المخابرات العامة أكدتله الكلام ده، بس ماما أمريكا قالتله روح إتنيل على جنب إحنا عاوزين الإخوان هما إلي يحكموا!!!، راح شفيق واخد نافسه و طالع يعمل عمرة في أبو ظبي!!!.

و نكمل القصة، الإخوان إتولوا العرش ، أصلهم دفعوا رشوة لهيلاري بالجنيه الجبس!!!.

طيب أهيه هيلاري غسلت إيدها من الإخوان، ماما أمريكا بحالها سابت الليلة، الإتحاد الإوروبي إتنازل عن الإخوان، السلفيين إتنازلوا عن الإخوان!!!!، مش غريبة إن الكل إنسحب مرة واحدة؟؟؟؟، هو فيه إيه؟؟؟.

طيب بصوا بقى، تتطلعوا برة مصر ، و تقولوا البلد و الإخوان عاملين و مسويين ، تلاقي السياسيين الأمريكيين و الإوروبيين بيهاجموك بطريقة مفترية، شفتوا اللخبطة!!!.

من شوية أنا نفسي قلت إن الكل إتخلى عن الإخوان، و بعديها أنا برضوه إلي قلت إنه كله بيدافع عن الإخوان !!!، أنا إتجنيت!!!.
بس للأسف هو ده الوضع و بصراحة و بالحقيقة، معايا تقرير رسمي ،

1. إن مصر بعد مبارك هي في قمة الديموقراطية!!!!.
2. إن أي تجميد للأموال أو الممتلكات بيتم عن طريق حكم محكمة، إنما قانون الطواريء إتلغى!!!.
3. الإخوان لا يحكموا البلد، إنما الحاكم هو رئيس مدني منتخب من كل الشعب المصري سواء داخل مصر أو خارجها!!!!.
( معني أنا واحد منتخبتش خالص).
4. الأمن المصري الأن في قمة التواضع و الحنية !!!!.
5. من حق المواطن الأن أخد حقوقه الإنسانية!!!!، ( والله العظيم مكتوب كده).
6. كل الأحكام في مصر تتم بحكم من المحاكم المختلفة.
7. المسيحيين في مصر واخدين حقوقهم 100 في ال100!!!.
8. من حقك تغيير الديانة بدون إن حد يطبق عليك أي نوع من الحدود!!!!.
9. بالنسبة للعائديين للمسيحية ، عادي إرجع و الدولة هتطلعلك بطاقة بالديانة المسيحية على طول!!!!.
10. المسلم المتحول إلى المسيحية ، الدولة معندهاش أي مانع خالص في تغيير ديانته!!!.
11. الشيعة بيمارسوا حواديتهم عادي خالص، و معاهم البهائيين و الملحدين ، ده طلع في مصر عبدة شيطان بموافقة من الدولة!!!.
نفسي أعرف إلي كتب نقرير زاي ده جابه منين؟؟؟، ده من عند إمه!!!.
12. أما حبيب قلبي مبارك، فطلع إنه كان ديكتاتور، و فاسد ، إنما الشعب ثار عليه و شالوه من العرش و المجتمع الدولي ساند إرادة الشعب!!!، ( ده عند إمه يا .........).

هواريكوا بقى إني مجنون!!!،

معايا تقرير من أيام مبارك كالتالي:

1. مبارك أرسى قواعد الديموقراطية في خلال سنين حكمه!!!!.
2. مبارك غير الدستور و جعل من حق الناس إنها تترشح لمنصب الرئيس!!!.
3. الحياة السياسية في مصر 100%.
4. الأحزاب بتمارس نشاطها بمنتهى الحرية !!!!.
5. حرية الصحافة و عدم وجود أي نوع من الرقابة عليها!!!!.
6. المسيحيين واخدين حقوقهم و الدستور يكفل لهم ذلك!!!.
7. البهائيين و الشيعة و الملحدين ، مفيش حد بيدور عليهم أبداً!!!!.
8. القضاء مستقل، و تاخد حقك بالقضاء!!!!.
9. هناك بعض من العنف الشرطي و لكنها حالات فردية!!!.

ده تقريرين ، الفترة مابينهم سنة واحدة بس واحد كان 2010 ، و التاني 2011، تقرير بيمنح لأي طالب لجوء، أو أي حد بيحاول يثبت إن في مصر فيها مشاكل.

تقارير رسمية، معترف بيها من الدول الإوروبية و أمريكا!!!.

هاه، مين إلي مجنون أنا و لا الدول الإوروبية و أمريكا؟؟؟؟.

أكتر من ، أقول إيه ألافات خرجوا برة مصر ، وراحوا على الدول الإوروبية ، إلي هي بتقول إن فيه حقوق إنسان و حقوق حيوان و إلخ ......

 يجي المصري أو المسيحي أو الملحد أو البهائي أو الشيعي ، أو حتى عبدة الشيطان و يلبس في الحيطة .

يرجع يقول لنفسه لما مصر حلوة قوي و قمة الديموقراطية و الحقوق و لقمة العيش و الذي منه، و إن الشرطة العنف عندها حالات فردية!!!، طب هو الواحد ساب مصر ليه؟؟؟.

قولولي بقى ، إيه فايدة الثورة ، و الناس إلي بتموت ، و الحكام المدنيين إلي بيهلوا من صندوق الإنتخاب؟؟؟.

المجتمع الدولي إلي بيساند أي حد ييجي يقعد على الكرسي!!!!، مجتمع دولي إيه ؟؟، و حقوق إنسان منين ؟؟؟، و حريات و كلام فاضي!!!!.

المصيبة إن المجتمع الدولي عنده كل التواضع و التسامح، إن لو الرئيس قام عليه شعبة يتم منحه حق اللجوء في قصره ، قبل مايطلع من بابه!!!، يروح على الدولة ديه يلاقي أعضاء السفارة في إنتظاره، حراسة ، سكن و يا حبذة مجمع سكني ليه و للحاشية و العيال.

باب البلد و البلاد إلي جنبها مفتوحين على الأخر، مشاريع موجودة، يعني باشا في بلده و بره بلده.

 و لما واحد يروح يقول أنا متهان و متبهدل في بلدي ، يتقاله التقريرين إلي فوق!!!، ده غير الوضع المعيشي السيء، البهدلة و المهانة ، ده غير إنك مشترك مع الرئيس اللاجيء، عليك حراسة عشان سعادتك محبوس في معسكر، ديه الحاجة الوحيدة المشتركة.

أما بالنسبة لسعادتك فإنت برة و جوه متبهدل، و إشربوا حقوق الإنسان.

(ملحوظة): الصورة حقيقية عن غرفة في معسكر طالبين اللجوء في دولة إوروبية.

إقرأ المزيد... Résuméabuiyad GRAKOLLO

موقعة الجمل ، لبسني الحيطة و إخلع

علاء ، جمال ، صفوت الشريف ، وزيرة التأمينات اﻹجتماعية و وزير الصرف الصحي.

كل دول متهمين في موقعة الجمل، سواء أخدوا براءة ، أو لاء!!!!، بس المشكلة سهلة و بسيطة و ليها حل.

بس المشكلة البسيطة جدا ، إن عندنا 150 مسؤول بتصريحات مختلفة،

واحد بيقول إن كل القايمة السابقة ملهاش أي يد في مذبحة القلعة ، قصدي موقعة الجمل.
واحد بيقول إن بلطجية الداخلية و حبيب العادلي هما المسؤولين عن موقعة الجمل.
واحد بيقول إن اﻹخوان هما المسؤولين عن موقعة الجمل.
واحد بيقول إن العسكر هما المسؤولين عن موقعة الجمل.

بس على ما أعتقد إن الجمل هو المسؤول عن موقعة الجمل!!!!،



قبل كده في عز الحماس الثوري ، أي حاجة كان عندها إستعداد تلبس مبارك و نظامه، خاصة الصور المعروضة، واحد بسلاح و لاسلكي فوق المتحف المصري ، شكله بيوجه الجمل للموقعة بتاعته.

و طبعا في الوقت الثوري الحماسي مفيش حد عنده أي تفكير مين ممكن يكون مسؤول غير مبارك و نظامه.

بس في نفس الوقت طلع عندنا رأي!  إزاي ؟؟؟؟، إزاي مبارك قبلها بيوم طلع في خطاب مؤثر ، ناس كتيرة إتعاطفت معاه، ناس كتيرة قالت و ماله خليه يكمل المدة الباقية.

بس! !!!، تفتكروا مبارك و نظامه عندهم الغباء العالي ده ، إنهم يلبسوا نفسهم في الحيط، جت موقعة الجمل و لبس نظام مبارك فعلا في الحيط!!!!، و أسفاااااااه!!!!.

و تمر اﻷيام و اﻷسابيع و الشهووووووور، و يطلع علينا المجلس العسكري بمواقع أكتر من موقعة الجمل!!!!، و طلع علينا نفس الرأي السديد، إن فلول نظام مبارك و مبارك بعياله و مراته، عاوز يدبس العسكري في الحيطة!!!!.

سبحان الله!!!!.

و يطلع علينا ناس من العسكر نفسهم، و يطلع معاهم فيديوهات و صور ، بتقول إن اﻹخوان هما المسؤولين عن كل المواقع، بما فيها موقعة الجمل!!!!!، يعني كده اﻹخوان من فلول مبارك و نظامه؟؟؟؟.

يعني واحد من اﻹخوان إلي مشرف في سجن طره، هو إلي إتفق مع مبارك و نظامه ، إنهم يلبسوه في الحيط!!!!، و مبارك و عياله و مراته وافقوا؟؟؟؟، إيه الغباء ده!!!.

بس إستنى ، هو مبارك ساعة موقعة الجمل كان موجود فين؟؟؟؟، مش في طرة، و لا عياله كمان، أكيد إتفقوا مع مرسي و الشاطر عن طريق تليفونات القمر الصناعي!!!، فاكرينها لما مرسي كلم قناة الجزيرة بيها، ماهو التليفونات ديه بيبقى متخزن عليها اﻷرقام المباشرة لقناة الجزيرة! !!، ماعلينا مش موضوعنا، خلينا في موقعة الكلب ، قصدي الحصان، يييييه الجمل، ماهو كلهم ذوات أربعة.

و تمر اﻷيام ، الأسابيع و الشهووووووور، و يطلع علينا اﻹخوان بمواقع أكتر من فلول مبارك و العسكري!!!!، و المرة ديه مختلفة، كل ماقبل اﻹخوان فلول، الشعب ، مبارك، نظامه و حتى المباني، يا سيدي الفاضل أبو الهول طلع فلول، و هو المسؤول الوحيد و اﻷول عن موقعة الجمل، و أطالب بمحاكمة أبو الهول و هدمة، لإنه مسؤول ، و فلول و أصنام!!!!، جتكم خيبة!!!.

العملية كلها متلخبطة ، بس في النهاية سهلة و بسيطة، مبارك و نظامه فلول و عاوزين يدخلوا المجلس العسكري في الحيطة،
مبارك و نظامه و العسكري فلول و عاوزين يدخلوا اﻹخوان في الحيطة،
مبارك و نظامه و العسكري و اﻹخوان فلول و عاوزين يلبسوا الشعب الحيطة!!!!، شفتوا بسيطة و سهلة إزاي!!!!.

زاي من كام يوم، طلع علينا نفس الرأي السديد ، مبارك كان بيشوف ميدان التحرير و مصر كلها من قناة مشفرة، عشان كده أيام الثورة القنوات المصرية كانت جايبة الهدوء إلي في الشوارع!!!!، و بعدين يا رااااجل!!!!.

ده إنتوا طلعتوا كل قيادات التليفزيون براءة، لما هما كلهم مسؤولين عن التليفزيون ، و طلعوا براءة ، المسؤول عن القناة المشفرة بتاعت مبارك كانوا من زحل صح؟؟؟، عشان سرية القناة!!!!، بصراحة بشششكرك على رأيك السديد.

مبارك و أعوانه، تم قبول النقض، زاي ما مرسي قال بالظبط ، هيعيد المحاكمات تاني، بس الإعادة في صالح مين؟؟؟.

صفوت الشريف القواد طلعتوه ملاك بجناحين،
إسامة الشيخ طلعتوه براءة و هو رئيس إتحاد الإذاعة و التليفزيون، طبعا مكانش عنده أي فكرة بالقناة المشفرة،
عبد اللطيف المناوي طلعتوه بطل ساند الثورة و كتب كتاب و كل سنة و إنتوا طيبين،
فاروق حسني طلع ملهوش فيها!!!.

طيب المسؤول عن موقعة الجمل مفاجأة من العيار الثقيل،
المسؤوووووول هو
إنتم أيها الشعب، طبعا!!!، إلي قام بموقعة الجمل مصريين من الشعب.

و لا جايين من دول إخرى، و عملوا عملية إنزال لجمالهم في منطقة صحراوية!!!!، و لا من بلاد الواق واق؟؟؟؟.

على فكرة إحنا بنحب السيما قوي، و خاصة الزميل جيمس بوندق، نحب نعيش في أجواء المؤامرة و اﻹيد الخفية و الطرف ال 105، معن الموضوع سهل و بسيط ، إحنا لبسنا الحيطة يا شعب.

ناس عاوزة فلوس ، ناس خافت على نفسها من عودة مبارك ، و ناس تالتة عاوزة تخلع ، و ناس رابعة عاوزة تحكم، إضربها في الخلاط هيطلعلك مواقع جمل، مش موقعة واحدة!!!!.

عندي فكرة إحنا ممكن نخلد مواقع الجمل بمسرحية وحيدة ، عنوانها " لبسني الحيط و إخلع " .

مش تخليدا للناس لاسمح الله، ده تخليدا للجمل!!!.

إقرأ المزيد... Résuméabuiyad GRAKOLLO

إسرائيل من الداخل ، بطاطا في البتنجان

و أنا تايه في بحر اليوتيوب، لاقيت نفسي بفكر في كلمة من عادل إمام، إسرائيل عدو!!!، خاصة إنهم بقوا أصحاب اﻹخوان.

بس للأسف أنا معرفش عن هذا العدو ، أي حاجة خالص.

قلت لنفسي طيب ماتحاول تشوف أفلام ( إستغفر الله العظيم ) إسرائيلية.

قلت و ماله فكرة! إبتديت بكتابة كلمة إسرائيل، لاقيت عدد لا بأس به من الفيديوهات.

بعدين لاقيت الكتابة العبري بتظهر أكتر و أكتر، و طبعا أنا في البتنجان و لا فاهم أي حاجة، بس لاقيت أفلام عن الشرطة اﻹسرائيلية.

قلت جميل ، ده بداية الهجان الجديد، ندخل على اﻷجهزة اﻷمنية، و ألم معلومات.

في البداية عجبني البوليس اﻹسرائيلي، بس بعد كده شفت الهمجية، إكتشفت سر خطير، مدام برنامج في التليفزيون، لازم يطلع مية مية.

يعني إشرب يا معلم لو عاوز تجمع معلومات، بس لاقيت بعد كده الهمجية في الفيديوهات إلي الناس الطبيعية بتصورها.

البوليس عندهم مبيعرفش يتفاهم معاك ، غير و إنت متربط اﻷول!!!!، بعد كده يبتدي الكلام.

من ضمن الفيديوهات المتعلقة بالبوليس اﻹسرائيلي، ناس بتتكلم عربي!!!، أه بيتكلموا عبري مية مية ، بس لما يشتموا، يشتموا بالعربي.

بعد كده شفت فيديوهات عن المداهمات، إشي مداهمات الجيش الإسرائيلي لبيوت العرب، مداهمات البوليس لمحل بيبيع مقويات جنسية، طلع إن اﻹتجار في المقويات الجنسية جريمة، ( على كده الرجالة هناك حاجة فوق، بلد مفيهاش رجالة).

البوليس يشتبه في واحد، يروحوا معاه البيت و يفتشوه، بس للأمانة بيوصلوه البيت ببلاش.

نتكلم جد شوية،

كان فيه فترة بيتقال، إن إسرائيل فاتحة إيدها لمسيحيين مصر، أحب إنكم تشوفوا الفيديوهين دول، و تشوفوا مدى ترحاب الشعب اﻹسرائيلي الشقيق، بالمسيحيين هناك، بدون أي فرق هما جايين منين!!!!؛

و بعد كده شفت تفريق الجيش للمظاهرات اﻹسرائيلية، طلعوا إنهم مبيفرقوش مابين إسرائيلي و فلسطيني، و برضوه عاوزكم تشوفوا الحتة ديه ؛

العجيب الغريب، طلع عندهم سلفيين؛ و متعصبيين جدا جدا ، أنيل من السلفيين عندنا، و أحب أيضا أن تلتقوا مع الجهة السلفية في إسرائيل؛

ليه شبهتهم بالسلفيين؟؟؟، بسبب إنهم عايشيين في مجتمعات منفصلة، مكفرين كل من لا يتبع مجتمعهم، نفس الشكل نفس التكفير نفس الإسلوب بس في دولة ساكنة جنبنا، و بنقول عليهم أعداء.

في النهاية ، أحب أقولكم، إحنا عندنا مقومات أجدع من مليون إسرائيل، بس هما عرفوا يلموا الحتة إلي إستولوا عليها و يعملوها دولة، شوفوا الفيديوهات كويس.

إتحدوا و حطوا إيدهم في إيد بعض، سيبكم من فيديوهات السلفية اﻹسرائيلية ، خليكم في الباقي.

إحنا بقى عندنا حتة كبيرة، واخدنها بدمنا، و بدم أهلينا، و بتطل على إتنين مية، و ماشي في وسطها خط مية، و سايبنها خرابة.
تفتكروا لو اﻹسرائيلين عندهم الحتة ديه ، كانوا عملوها إيه؟؟؟؟.

و إحنا عندنا حتة كبيرة ملك، و مستنيين حد ييجي يعمر، و يوزع علينا، للأسف إحنا إلي عايشين بطاطا في البتنجان.

المعلومة المهمة، إن هناك زاي هنا!!!، البني أدم مهما كان في أي حتة، و مهما كان النظام إلي حواليه، ديمقراطي، علماني ، ديني و حتى بتنجاني، متوحش أكتر من أشرس الوحوش على اﻷرض.

اﻷسد ، ملك الغابة ، بياكل لما يكون جعان، أما البني أدم فهو جعان على طول!!!!!.

إقرأ المزيد... Résuméabuiyad GRAKOLLO

مرسي يتحدى القدر

عجبني خطاب السيد الرئيس الدكتور المهندس العظيم مرسي قدام مجلس الشورى و الشعب أصلهم 2 في 1، مش مشكلة.

قال بصوت جهوري إترجت ليه القاعة، إن ثورة 25 يناير العظيمة ، إلي الإخوان إشتركوا فيها من أول يوم!!!!، هي الطريق إلي موجه سعادته للأمام.

و إن الشعب قام على الديكتاتورية و الكلام الأهبل إلي لا بيأكل و لا بيشرب!!!!، بس عندي تعليق خفيف خالص، و هو بيقول الديكتاتورية متكسفش على نفسه كده، بصراحة مكنتش ديكتاتور قبل كده، فمعرفش تأثير الكلمة علي بتكون إزاي؟؟؟، أصلي عشت طول عمري تحت رجلين الديكتاتور، فأقدر أوصف الجزمة من تحت شكلها إيه، إنما من فوق مقدرش أفيدك قوي!!!!.

بس عندي سؤال عويس، هو الكتاتني كان حاضر إفتتاح مجلس الشورى ، ليه؟؟؟؟، دعوة؟؟؟، و لا لسه رئيس مجلس الشعب المنحل؟؟، زاي حكومة حماس المقالة!!!.

و بعدين يا سيدي راح شاطح يمين على القضية الفليسطينية، هما لو سابوا الفليسطينيين في حالهم هيخلصوا نفسهم بنفسهم، بس أهوه تقليد أخدنا عليه في كل إفتتاح مجلس شعب أو شورى ، لازم نحشي الخطاب.

و راح رامي شمال على القضية السورية، و هي ديه نقطة التسلية بتاعتي النهاردة!!!!.

تلاقي بشار أول لما سمع كلمة مرسي عملها على روحه، أو لسه قاعد في الحمام لغاية دلوقتي!!!!، المشكلة مش في بشار دلوقتي، المشكلة في اللاجئين السوريين إلي جم و إلي هييجوا، يا مراحب على العين و الراس!!!.

بس دولة مش عاطية كرامة لشعبها هتتدبي إزاي كرامة للضيوف؟؟؟؟، بصراحة صعبانين عليا، متبهدلين هناك على إيد بشار و جايين يتبهدلوا على إيد مرسي و جماعته!!!!.

أفتكر حاجة يمكن الكل يعرفها، مصر في يوم من الأيام كانت فاتحة الباب قدام السودانيين، السودانيين كانوا بالهبل في كل حتة، على الأرصفة و في كل مكان، و لما طلبوا حقوقهم كبني أدمين إطلق عليهم الأمن المركزي و راح إلي راح و عاش إلي عاش!!!!.

بلاش الأريتريين كانوا يجوا يقدموا لجوء في مصر و النظام يرحلهم على بلادهم، و ياخدوا إلي فيه النصيب هناك.

ياترى بقى مرسي و جماعته فاتحيين باب مصر لكل السوريين و لا لحاملين كارنيهات الإخوان المسلمين في سوريا؟؟؟؟.

مش تريقة بتكلم بجد ، السوريين إلي هيشرفوا مصر، سوريين إخوان و لا سوريين عاديين؟؟؟؟.

عن نفسي لو مرسي أمر بالتحرك العسكري على سوريا مش هروح، لإني مش عاوز الإخوان يفلتوا هناك من إيد بشار، لما بشار يخلص على السوريين الإخوان هناك هبقى أتحرك أنقذ الباقيين إلي عندهم أمل يعيشوا حياة كريمة، مش هما كمان يشيلوا ديكتاتور و يجيبوا جماعة ديكتاتورية تحكمهم، و يبقى ودنك منين يا جحا!!!.

نعدي موضوع سوريا و نمسك الإقتصاد، مرسي و جماعته لسه مصدقيين إن فيه طائر نهضة، و الفلوس هتجري أنهار، على إيه ؟؟؟، أحلام و لا على كدب؟؟؟.

مرسي شكله عنده زهايمر، أو بيعاني من إنفصام في الشخصية، نسى إن أغلببية المشاريع إذا مكنتش كلها ، إلي مسك فيها المقص و قص الشريط، كانت من أيام مبارك!!!!، يعني الجماعة ملهاش أي إيد في المشاريع ديه.

بلاش شفت من كام يوم ، إن رجال الأعمال بيشتكوا ، إن البنوك معندهمش عملة أجنبية ( الدولار العجيب )، رجل أعمال محترم عنده حساب بالعملة الصعبة يروح البنك عشان يسحب من فلوسه ، البنك يقوله سوري معندناش!!!!، و قال إيه أصل الأموال بتخرج من مصر !!!!.

يا سلام ، يا سيدي الفاضل هي الثورة بقالها قد إيه ؟؟؟، جاي دلوقتي بتقول إن فيه ناس بيهربوا أموال البلد !!!!، إمال الوقت إلي الفات ده كله كان إيه؟؟؟، بيسرسبوها!!!!.

هو فيه واحد من أباطرة النظام السابق كان سايب فلوس جوه عشان يخرجها بره؟؟؟، كانوا سايبين مصاريف العيال بس، و حتى ديه كانت بره !!!.

تفتكروا الراجل بتاع بنك الإئتمان الزراعي، مش فاكر إسمه، كان سايب في البيت 8 مليون جنيه، و لما سألوه إيه ده؟؟؟، كان الرد مصاريف للأولاد!!!.

تفتكروا بقى من ساعتها حد بيشيل حتى مصاريف الأولاد هنا؟؟؟، إمال التعليم في الخارج يعمل إيه، يا تعليم مجاني!!!.

 طيب بلاش يعمل إيه رجل الأعمال الكبير قوي خالص جدا ، الشاطر و هو شاطر، قضى طول عمره في المعتقلات و مع ذلك عمل مشاريع !!!، يمشي مشاريعه إزاي؟؟؟، يعني يرضيكم يروح البنك يقولولوا مفيش!!!!، ده يعزل مرسي بكلمة!!!، و لا مع ده البنك المركزي تحت أمره؟؟؟.

بس للأسف البنك المركزي طلع تصريح إن النقد الأجنبي إلي تحت إيده يدوبك يسدد، و يكفي الإستيراد، على رأي واحد مش فاكر مين هو ، الحكومة بتطلب للشعب أكل ديليفري من الخارج!!!.

الكلمة الوحيدة إلي عجبتني إن الشعب كله لازم يشترك عشان نترفع!!!!، أكتر من كده هنوصل القمر!!!!.

نرجع للمهم سيبك من كل إلي فوق ده، إقتصاد إيه إلي جاي تقول عليه؟؟؟، إقتصاد بلد ، و لا إقتصاد جماعة؟؟؟، لو على البلد الإقتصاد بيرفع الراية البيضا، إنما إقتصاد الجماعة نمسك الخشب، حدث و لا حرج، ربنا يخلي قطر!!!.

هو مش الدستور عدى، خلاص دخل جيب الجماعة الفلوس إلي قال عليها القرضاوي مش عارف كام مليار دولار عجيب!!!.

عمرو أديب كان بيسأل مصطفى الفقي ، فين الفلوس و الياقوت و المرجان ، إلي الإخوان قالوا هنمسك الحكم البلد هتعيش على جبال من الذهب !!!!، و لكن للأسف عشانا عليك يارب!!!.

هو ده القدر إلي كنا مستنيينه ، مرسي هو قدرنا و إحنا مش قدره، فهل عند مرسي الجرأة على تحدي القدر؟؟؟؟.

إقرأ المزيد... Résuméabuiyad GRAKOLLO

بيكاسو مصر

الظاهر إن الشعب مشغول في طائر النهضة، و أكيد الحكومة و الذي منه مشغولين جدا لدرجة إنهم نسوا ناس كتير خارج أسوار السجون.

من الأمثلة و ليس الحصر ، فاروق حسني ( بيكاسو مصر )، 23 سنة وزير ثقافة ، و مكانش فيه مانع يمسك وزارة الصحة!!!!.

بصراحة إلي فكرني بيه ، و أنا بعوم في بحر اليوتيوب ، لقيت لقاء لفاروق حسني بعنوان ( أخر إسبوعين في النظام ) ، العجيب إن عدح المشاهدات 700 مشاهدة بس، مفيش حد تاني نفسه ياخد فكرة إيه نظام فاروق حسني بعد الثورة.

سيبك من كل إلي إتقال ، إنه شاذ جنسيا، أو ليه علاقة بالسواق بتاعه،فضل 23 سنة عليه الإشاعات المغرضة إنما في يونيو 2011 نفى فاروق الشائعة التي مفادها أنه مثلي و اتهم صفوت الشريف بإطلاقها ، أو. ........... غيره، بس ممكن تكون الحكومة خايفة على فتنة المسجونين!!!!، ما علينا.

واحد زاي ده نهب 23 سنة من أموال الوزارة، و طبعا هو مكانش محتاج ياخد من فلوس الوزارة، ﻷسباب نصها كالتالي:

- ثري عربي،

- غني حرب،

- من العيلة الملكية ، كان واخد لقب ( برنس )،

- من عائلة ثرية ذاتيا،

- راجل عصامي ، بنى نفسه من بيع اللوحات!!!!.

من حقك إختيار اﻹجابة الصحيحة و ممكن تشربها.

طبعا فاروق حسني كان وزير ثقافة ، عنده وقت كبير يرسم لوح، يشوف أعمال الوزارة، ينشيء العديد من بيوت الثقافة و كمان يألف كتب!!!!، أصل يومه 48 ساعة مش عندنا 24 ساعة بس.

ده غير إن لوحاته من تحفتها كانت بتتخطف، لاء كانت بتتحجز من قبل ما يرسمها، بس كان فيه مشكلة، لازم يكون معاك دفتر شيكات، مش شوية فكة في جيبك.

من عظمته كفنان، كانت اللوحات بتتباع بملايين، مش بإلوفات، ده غير سعادتك مش أي حد ممكن يدخل معرض لوحاته، مكانش عندي عن نفسي تعامل مع وزارة الثقافة، عشان أروح المعرض.

حد ذكي هيسأل و هي وزارة الثقافة عندها إيه عشان يدفع ، ( إستغفر الله ) رشاوي، أو شراء لوحات، اﻹجابة بسيطة ، إوصل لغاية وزارة الثقافة أو إدخل على الرابط إلي فوق و شوف هما بيبيعوا إيه!!!!، هتلاقي حاجات تمت للثقافة و لغير الثقافة، و إلا مكانش ليها لازمة نعملها وزير أو وزارة، كنا دمجناها مع الإسكان.

كان فيه مقولة بتتقال : ( فاروق حسني حامل شنطة إيد سوزان مبارك ) ، عاوز شيال شنطة الملكة يكون رتبته إيه ؟؟؟؟.

كارت فاروق حسني كان بيكلف (بأمانة) 50 ألف جنيه، بيروحوا لمين؟؟، للمطبعة بتاعت الكروت، و لا لحامل الكروت، و لا لصاحب الكارت؟؟؟؟، جاوب صح تكسب كارت بتاع فاروق حسني (سينييه) أو لوحة زاي ديه.

و مش فاروق حسني بس ، إتعفى من زيارة طرة لاند، عاطف عبيد!!!!، راح فين، و لا عشان مراته نجد خميس جدها و عيلتها من قيادات اﻹخوان!!!!، إيه ؟؟؟؟، أخدوا إعفا، وحيد أبوه؟؟؟؟.

طيب فاروق حسني و خايفين على فتنة المساجين، طيب عبيد هيعمل إيه للمساجين ؟؟؟؟، شكله هيخصخص السجن!!!!.

بعدين ملاحظة تانية ، إلي هربوا من الوزرا برة مصر 2 بس، التالت بيعمل عمرة في أبوظبي، الباقيين يا سيدي الفاضل قعدين هنا بكل حرية و بجاحة، ده غير إلي في طرة لاند، و لا كإن كانوا بيعملوا أي حاجة خالص!!!!.

مفيش حتى حد قالهم تعالوا ندردش شوية، و لا نيابة و لا قاضي و لا حتى غفير!!!!، ده طبعا يرجع لسببين إتنين بس :

- براءة الذئب من دم إبن يعقوب.

- ضد مبارك و التوريث قبل الثورة.

بلاش صفوت الشريف ، أخد براءة من شيء و لبس قضية قال ( بيسند ﻷولاده أعمال بالأمر المباشر!!!!!)، لاء بجد قضية ممكن ياخد فيها إعدام مش براءة!!!!، ياراجل.

هو الفساد إنه كان بيساعد أولاده على بداية الطريق!!!!، حرام بجد حرام، قضاء مفتري!!!!.

طب بلاش سيبوا حبيب قلبي توفيق عكاشة عليه، مع ضمان إنه مش هيبوس إيده المرة ديه!!!، و هو هيجبلكم أرار صفوت الشريف، بلاش حطوهم هما اﻹتنين في إوضة ضالمة، و ساعة هتلاقوا صفوت الشريف بيبوس إيد القاضي إنه يحكم عليه باﻹعدام في التهمة كذا و كذا. ........ و إلخ، إيه رأيكم مش فكرة برضوه؟؟؟؟.

نتكلم جد شوية ،

إيه التهريج إلي بيحصل، الناس ديه كلها لازم تتقدم للتحقيق، و يبقى التحقيقات علنية، سيبكوا بقى من قصة اﻷمن الوطني و الكلام الفاضي، من حقي كبني أدم عايش على إم تراب البلد ديه إني أفهم، و لا الشفافية درجات؟؟؟.

لما نتكلم على النهضة ، يكتمونا و يقولوا أمن قومي، نشتم في مبارك يقولوا جميل كمل، نتكلم على بعض اﻹستفهامات يرجعوا يكتمونا و نرجع لقصة اﻷمن القومي.

بخصوص اﻷمن القومي، هو رئيس المخابرات المعزول بأمر من رئيس الجمهورية، أصبح دلوقتي ثروة قومية و ممكن نستعين بيه في حل مشكلة سينا؟؟؟؟؟، طيب ما كان أولى الراجل إلي كان واقف ورا عمر سليمان، أجدع مليون مرة من مدير مخابرات مش عارف يجيب معلومات يحمي بيها حدود بلده.


إلا بجد مش ناويين يجيبوا إلي قتلوا 16 جندي دمهم لسه بيصرخ.

لما بيحاسبوا نظام سابق على كلام فاضي!!!!، لسه هيشوفوا حق ناس إتقتلت و هي بتحمي حدود بلدها؟؟؟.

الحكومة و الرياسة مكانتش فاضية اﻷيام إلي فاتت، كان وراهم دستور لازم يطلع ، حتى لو الشعب كله قال لاء ، كان هيطلع برضوه، شغل عفاريت ياأبا، مرسي و حكومته بيعملوا جلسات تحضير أرواح، و لما اﻷرواح بتحضر هما إلي بيصوتوا للدستور، شغل على مية غسيل، مش أي أي و لا زاي زاي.

نرجع تاني للسادة أعضاء ، أو بمعنى أصح ، أباطرة النظام السابق، إلي واكلين بطيخ و عايشين في مية البطيخ، و لا كإنهم دفنوا ناس كتير تحت بطشهم، فين يوسف والي وزير الزراعة المبجل، صاحب أكبر رقم قياسي في قتل و مرض ملايين من المصريين.

بلاش يوسف والي كان محتكر منصب وزير الزراعة و نائب لأي رئيس وزرا بييجي، يعني رئيس الوزرا بيتغير و النائب بتاعه ثابت إلى الأبد، و لما عيلة والي سابت المنصب أخدتها العيلة الأباظية { على فكرة الرابط ده للأباظيون ممكن تتعرفوا عليهم }، وزارات عائلية الصراحة.

ده في عصره كان في الوزارة { إستغفر الله العظيم } أكبر نسبة خبراء إسرائيليين في فنون الزراعة و التعديل الوراثي و الجيني لمحصول البتنجان إلي جنن الناس!!!!، طبعا ً كلمة إسرائيل و إسرائيليين كفيلة تدخله السجن، طب خد عندك ديه،



إسرائيل و إسرائيليين،إسرائيل و إسرائيليين،إسرائيل و إسرائيليين،إسرائيل و إسرائيليين،إسرائيل و إسرائيليين،إسرائيل و إسرائيليين، على الكمية ديه ياخد إعدام!!!!.

فين وزرا التعليم ، إلي أفسدوا التعليم؟؟؟.

فين وزرا الشباب و الرياضة، إلي خلوا الشباب مكسحين؟؟؟؟.

فين وزرا الصحة، إلي لا يفهموا في صحة و لا يحزنون؟؟؟؟.

فين وزرا البيئة، إلي خلوا البيئة متصلحش للحيوانات قبل البني أدمين؟؟؟؟.

فين وزرا السياحة، إلي خلونا محرومين من السياحة في بلدنا؟؟؟؟.

فين زاهي حواس، المرشد السياحي الخاص برؤساء الدول؟؟؟؟، إلي كل إكتشافات اﻷثار كانت على إيده، و مورد رئيسي ﻷثار البلد لمبارك و عيلته عشان يدوها هدايا ، حتى لو هو بريء و كان بيتم كل ده بالضغط على أعصابه، ييجي و يثبت براءته.

فين وزرا الموارد المائية؟؟؟؟، إلي لا خالوا مائية و لا ساحلية.

و فين و فين و فين. ...... ؟؟؟؟.

ياترى التمثيلية بتاعت المحاكمات ، إلي هيطلع منها كل المتهمين براءة ، هتخلص إمتى؟؟؟؟.

عارفين، النظام السابق الحالي إلي مش هيروح أبدا، كانوا يعرفوا بنزول الناس في 25 يناير، و يمكن كانوا عارفين إن اﻹمور ممكن تتصاعد، راحوا لحبايبهم اﻹخوان و أخدوا منهم وعد إنهم مش هيشاركوا، و بس!!!، إنما اﻹخوان عملوا حاجة حلوة ( ولية و رجعت في كلامها ) ، هتعمل معاها إيه؟؟؟، عاملين زاي الضباع بياكلوا بعد ما الفريسة تكون عفنت، عشان كده هما إخوان معفنيين، و لسه سايبين العفن في البلد! !!!، عشان من غير العفن ميقدروش يعيشوا!!!!.

و لأن أترككم مع بعض من إبداعات فاروق حسني، لوح بملايين من الجنيهات الجبس، ياله خلي الشعب يتشل!!!!.

ملحوظة مهمة : أغلبية الروابط من ويكيبيديا الموسوعة الحرة!!!!، السبب: عاوزكم تشوفوا عيالكم هيشوفوا التاريخ إزاي؟؟؟؟.

إقرأ المزيد... Résuméabuiyad GRAKOLLO

أي كلام و ﺧﻼﺹ

طبعا فترة مش قصيرة على مسك مرسي الحكم، و منقدرش نقول عمل إيه موجب أو سالب!!.

بس عمل عمايل يستحق عليها الضحك للصبح، أيون.

نمسكها واحدة واحدة، بس قبل كل ده ليا تعليق بسيط.

أنا واحد من الناس إلي إتفرجوا على موكب مرسي، و قمة التواضع!!.

• هي عربيات الرياسة قلت كده ليه؟؟؟، هي عربيات الرياسة باعوها في مزاد علني؟؟؟.

طيب عربيت مبارك موجودة، و هي نفسها إلي ركبها مرسي.

إنما عربيات الحرس راحت فين؟؟؟، عربيات الحرس ال بي إم ديه أصلا عربيات حرس رئيس الوزرا السابق نظيف.

• طقم الحراسة إلي مع مرسي ، إلي بيتسمى الدايرة الإولى ، مالهم، مش طبيعيين ليه، ده الناس إلي كانوا في فيلم كود 36 ، عملوا دورهم أحسن من الطقم ده.

على ما أعتقد إن الطقم ده كله أول مرة يأمن شخصية مهمة.

• نرجع لعربيات الرياسة، و طقم الحراسة، ممكن تعمل مقارنة لعربيات الحراسة مابين مبارك و مرسي من اليوتيوب!!، و إنتوا تعرفوا أنا بتكلم في إيه.

الظاهر مبارك أخد معاه عربيات الحرس و تلاقيهم كمان إشترولوا عربية مصفحة جديدة، و ساب القديمة لمرسي.

لإنه أخد معاه طقم الحرس الشخصي، إلي بيعتبروا أكفأ طقم للحراسات، و مصروف عليهم مبالغ طائلة.

يكفي إنه كان يقال إن تكلفة إعداد واحد من حرس الرئيس الخاص بيتكلف بأكتر من مليون دولار و ده للتدريب بس!!.

ده غير إمتيازات الحرس، من شقق و عربيات و مكانة إجتماعية.

• عارفين مكافأة الحرس الخاص بتوع أديس بابا، إلي حموا مبارك ، كانت مليون جنيه لكل واحد، بالإضافة لإنضمام البعض لشغل وظايف في الرياسة.

إيه مرسي معندهوش إمكانيات مبارك؟؟؟، مش عارف يجيب واسطة في المجلس العسكري عشان يوفروله حرس زاي بتاع مبارك؟؟؟.

إمال بس واخدين دعم أمريكا في الوصول للحكم، و زيارات متبادلة؟؟؟.

و لا لسه الكرسي واسع؟؟؟، أول لما الكرسي يبقى على المقاس هنشوف حاجة تانية؟؟؟، هنشوف مرسي بعد التعديل؟؟؟.

• أصل لو رجعنا بالذاكرة لسنة 81 ، هنلاقي إن مبارك عمل زاي مرسي ، مواكب صغيرة، مقابلات متعددة مع الشعب، أما في سنة 2000، فالمواكب بقت أكبر و أشرس، و في 2010 كانت المواكب في الشارع و الناس في القمر.

ياترى الدواعي الأمنية هتوصلنا لفين؟؟؟.

أما لحركات الرئيس المضحكة، أو إنجازات الرئيس، فهي عديدة.

أكترها إنشاء لجان!!، أيون، أي حاجة تحصل في البلد، مرسي ينشاء لجنة!! و بس.

أه حاجة مضحكة تانية، مرسي بيدور على أي ورق يخص مبارك في القصر الجمهوري!!، إمال عزمي كان بيعمل إيه في القصر الرياسي؟؟؟.

ماعلينا، ملاقوش حاجة في القصر ، إنما سبحان الله الحرس الجمهوري كان محتفظ برسايل مابين مبارك و رؤساء العالم!!.

حرس جمهوري و رياسة الجمهورية أهيه نفس المسميات، ورق في الحرس الجمهوري زايه زاي ورق في سكرتارية الرياسة، عادي.

هو محدش قال لمرسي و الطقم إلي معاه، إن الموظفين إلي في الرياسة وقت قيام الثورة، كان عندهم ثورة داخلية للتخلص من كل حاجة، هو فاكر إن قصر الرياسة زاي أمن الدولة إفرم الورق و سيب الناس تكتشف؟؟؟.

• لو كان النظام في القصور الرياسية كده، كان زمان مبارك مفروم من زمان!!.

من أقوى إنجازات مرسي ، صدور قرار جمهوري بعودة برلمان أفغنستان، قصدي برلمان الثورة، إلي قعد طول الفترة إلي فاتت بيناقش و بس، و معملش حاجة غير المناقشة، بما لا يخالف شرع الله!!!.

بصراحة الشعب شال عيلة، و جاب جماعة للحكم!!، شلة لحكم مصر.

واحد كان عاوز إبنه يمسك الحكم، و التاني عاوز الجماعة تاخد الحكم ليها إلى الأبد.

إمال صحيح، هو الطرف التالت و الإيد الخفية، أخبارهم إيه اليومين دول؟؟؟، مختفيين بقالهم فترة، لعل المانع خير؟؟؟.

إقرأ المزيد... Résuméabuiyad GRAKOLLO

الرد البسيط على بدر العبيط

عجبني رد باسم يوسف لما ناس كتير على صفحته بيسألوه،
" هو إنت ليه مبتتريقش على القسس و المسيحيين، طبعا عشان متقدرش.......... " ، و إلخ من الكلام على هذا المنوال.

رد باسم كان صغير و جه في الصميم ، بيتريق على شيوخ اﻹسلام ﻹنهم من دينه ، بيفهم في دينه، إنما لو إنتقد المسيحيين ، يفهم إيه في دينهم؟؟؟؟.

قبل التفكير في الرد على بدر ، ( أسف مقدرش أقول عليه شيخ ) ، لاقيت إنه مدمن إلهام شاهين، لو بصيت على سنه ، هتلاقي إن فترة شبابه الضايع ، كانت إلهام شاهين مووووووزة السينما في الوقت ده.

السبب التاني في الرد ، صدع إلي خلفونا ، الدكتور لقب و لا فعل ؟؟؟؟، هبعد عن الموضوع شوية و هرجع تاني، في الويكيبيديا الخاصة بوجدي غنيم ( عقبال عندكم ، وجدي غنيم بقى ليه في الويكيبيديا، معنها من صنع الكفار ، بس ما علينا )، لاقيت إنه واخد دكتوراه مش من جامعة بتنجان في الولايات المتحدة، ماجيستير في البطيخ من الولايات المتحدة، و كاتبين إسم الجامعات العظيمة من تحت كده بخط صغير، أنا بقى عملت إيه ماإلا نسخ و لصق على المعلم جوجل، راح المعلم جوجل طلعلي النتايج إلي أنا عاوزها ، بس إلي مكنتش أتوقعها!!!!.

الجامعات موجودة ، بس مش جامعة زاي إلي إحنا نعرفها، لاء ، تدرس ترمين و تدفع كل ترم مش عارف كام 100 دولار و في النهاية مبروك معاك ماجيستير و بعد ذلك تدفع المعلوم مبروك معاك دكتوراه، في إيه ؟؟؟؟.

في الدين اﻹسلامي و منين ؟؟؟ ، من الولايات المتحدة اﻷمريكية، بلد الصليبيين و الكفار و الصهيو أمريكي و الماسونية و البتنجانية.
و تقدر تقول إنه معهوش دكتوراة ، يروح مطلع الشهادة و حاططها في. ......... عينك  (يا قليل اﻷدب).

طلع علينا بدر و أخرين ممن يحملون الدرجات العلمية الدكتوراه و فما فوق، طبعا الناس ديه أعلى من مراحل التعليم المختلفة، بياخدوا دكتوراه على طول، إمتى و فين ( الله أعلم ) ، بس معاهم مايثبت!!!.

تيجي تتكلم معاه أو معاهم لازم تحط اﻷول اللقب، ( هو الفلوس إلي إدفعت فيه كانت حرام و لا حرام ).

طيب أنا راضي ذمتكم ، واحد مر بمراحل تعليم مختلفة ، و مراحل تعليم عليا و مافوق العليا، و معندهوش أي نوع من اﻷدب ، عامل زاي واحد واقف بيثبت الناس على ناصية الحارة!!!!، شيخ إزاي ده؟؟؟؟، مين متخلف عقليا ممكن يسمعله.

حاولت أشوف مقاطع على اليوتيوب تختص ببدر ، يمكن أشوف حاجة تغير التفكير شوية، إنما ماإلا ، تهديد و ووعيد ، هعمل فيك ، هسوي فيك ، و الجديد هيدعوا إلى مليونية!!!، ياسلام.

بس عشان الصراحة ، الراجل قال كلمة عجبتني جدا، أيام مبارك كانت أرحم لبدر و أشكاله من اﻷيام ديه!!!!.

ردي :

 طبعا، كفاية إنك كنت متبهدل من كام مخبر و ظابط، و لما كنت بتطلع من أمن الدولة ، كانت الناس بتقول ياحرام ، الراجل عشان دينه مبهدلينه، إنما لما الناس شافتك و فهمت إنت بتقول إيه، بقيت وخداك غسيل و مكوى على نفس الدرجات العلمية بتاعتك.

أقدر أقولك فعلا نظام مبارك كان راحمنا من أشكالك، ده أمن الدولة كانوا أبطال، في تجنيدك، هما مش بيقولوا الفتنة أشد من القتل، طب تخيل بدر قتل كام واحد، بفتنه عليهم، و إن نسيت هات الدفاتر تتقرا.

كل واحد دلوقتي عاوز سبوبة يطلع على أي قناة من إياهم، و يقول قال الله و قال الرسول ، أصبح شيخ و ليه مريدين، و بياخد الدكتوراة على طول، إيه يا عم بدر ( إدفع تاخد ).

مثال:

كان فيه ظابط في أمن الدولة إسمه " فلان " ، كان كل مايتذكر إسمه كان لازم الكل يقول " فلان بيه صلى الله عليه و سلم " ، أهوه فلان ده بقى كان ماسك الطوق بتاع بدر، تخيلوا الشيخ العلامة الدكتور، قعد كام مرة يقول " فلان بيه صلى الله عليه و سلم" ، ماشي هنقول إنه تحت وطئة التعذيب كان الكل لازم يقول كده.

بس ياترى تحت وطئة التعذيب برضوه تكتب تقارير ، و تنسف ناس ، تدمر بيوت، إرضاء لفلان بيه!!!، و لا إبتغاء لكرمات فلان بيه.

كان نفسي في أوقات زيارة بدر لفلان بيه، يكون معايا كاميرا فيديو ، و أنا كنت خليتك أشهر من مايكل جاكسون، بس للأسف.

طبعا أنا متغاظ من بدر ، إنه بقى دكتور، و بيطلع في التليفزيون و بيدعوا إلى مليونيات، و كمان بعترف إن كان فيه تنافس شريف مابينا للفرجة على أفلام إلهام شاهين، و هذا إعتراف مني بذلك، الدكتور أنا، إشمعنى بدر.

الجميل إن اﻷزهر عطى لبدر الصابونة المتينة، و طلع و قال إن بدر لا ينتسب إلى اﻷزهر بتاتا، أله إمال ، الدكتوراة بتاعتك زاي دكتوراهات غنيم ( أبجني تعرفني )....؟؟؟؟، و لا أكيد الفلول و الطرف التالت عينه منك!!!.

كفاية بقى ضحك على الناس تحت ستار الدين، بني أدم مزيف، إيدك مليانة دم ناس كتير، شخصية أقل ماتوصف بتدني مستواها اﻷخلاقي و الديني، الناس زمان كانت فاهمة إن أمن الدولة بيعذب فيك، مكانوش يعرفوا إن أمن الدولة كان بيعلف فيك.

أه يازمن لا بتخلي إلي ماشي ماشي و لا إلي راكب راكب

إقرأ المزيد... Résuméabuiyad GRAKOLLO

أنا الرئيس يا جزم

أسف في اللفظ بس ده كان خطاب مرسي اﻷخير.

أنا الشرعية، أنا الدستور ( قصدي مسودة الدستور )، أنا إلي هجيب الديب من ديله!!!!!، و إلخ إلخ........... .

إيه الجديد؟؟؟؟، عربيات رياسة الجمهورية!!!!! ، إتبهدلت!!!!، أه و السواق إلي بسببكوا نايم في المستشفى بياخد رعاية كاملة، رياسة يا معلم.

أما بالنسبة للمصابيين و المتوفيين ، فمرسي عنده إحصائية كاملة بيهم، و بإذن الله النيابة العامة و القانون هياخدوا مجراهم!!!!، إبقى سلملي على الترماي.

المصاب هياخد رعاية كاملة ، بس من نوع تاني مش زاي بتاع الرياسة!!!!، رعاية أكبر، رعاية كده واخدة طعم اﻷمن الوطني ( أمن الدولة سايقا )، أما إلي مات فأخد رحمة ربنا.

أما بالنسبة للمحتجزين ، إلي إعترفوا بكامل إرادتهم، بدون أي ضغط على إنتمائهم للطرف التالت، ده طلعوا كمان في سركم حاملين لكرنيهات عضوية في نادي الطرف التالت، فهيتنفخوا نفخ، فاكرين المنفاخ بتاع أمن الدولة أبوا مقاسات، أهوه بقى اﻷمن الوطني عنده منه بس توماتيكي، يعني سعادتك زمان كان لازم تجرب كل المقاسات لغاية لما يوصلوا للمقاسةالمظبوط، دلوقتي يا باشا الرقم القومي فيها المقاس، تكنولوجيا العصر!!!!، تدخل على المنفاخ بتاعك من غير تجارب.

أما الطرف التالت ، فمرسي لهو بالمرصاد، يعني قريب جدا الشعب كله هيتنفخ، ماهو الطرف التالت طلع شعب مصر، من غير شعب اﻹخوان، إلي هما معهمش كارنيهات نادي الطرف التالت.

ده التاريخ ده ، ياما بيشيل، جماعة اﻹخوان هي مفجرة الثورة ، و المرشد حامي الثورة اﻷول، أما مرسي فهو حامي الثورة من ورا!!!!، و إنه لكم بالمرصاد.

زاي نكتة جديدة ، واحد شجب في مبرك إتفصل من شغله، وواحد شجب في مرسي إطحن!!!!!، ( نكتة ) صح؟؟؟؟.

عارفين لو مبارك كان إستمر بس أخر ست شهور ، كان زمان كل دول متعلقين على العواميد بتاعت الكهربا، و كان زمانا مريحين دماغنا منهم، و لا كنا لبسنا طرف تالت، و لا رابع، كانوا هما إلي هيلبسوها و يتنفخوا على الطريقة القديمة.

مش كان أحسن؟؟؟، فعلا شعب مش عارف يبص لقدام ، على طول كده بصين تحت رجليكم!!!!.

السؤال إلي محيرني جدا، هي الثورة قامت ليه؟؟؟؟، أنا عندي زهايمر!!!!!، كان نفسي مبارك يغوووووووووووووور، إنما طلع لمبارك وجوه إخرى ، أوسخ و أقذر ( كل الشتايم مش هتقدي الغرض ).

تفتكروا بقى لو، لو مرسي رضخ و تنازل عن الحكم ( في المشمش ) ، مش هيكون للجماعة ألف وش تاني أقذر من المتاح حاليا؟؟؟؟.

عاوزين الصراحة، إدوا لمرسي فرصة تانية يطلع عين إلي خلفونا فيها، عشان إحنا شعب نستاهل إلي بيحصل فينا!!!!، أيون.

ياإخونا إحنا محتاجين رئيس ميكونش مصري أصلا، تفاديا للوجوه المستنسخة، بلاش هو مش بتاع قطر نفسي يكون زعيم المنطقة العربية ، خلاص فرجت هاتوه و إنتخبوه رئيس لمصر ، و أهوه بالمرة نفتح قطر على مصر، و نخلص من اﻹخوان.

اﻹخوان بيلعبوا نفس دور مبارك، فاكرين لما مبارك كان ينزل ضرايب جديدة ، يروح مغلي البنزين، الناس تجري و تعمل طوابير قبل البنزين ما يغلى ( قال يعني تنك البنزين مش هيخلص و يعبي من الغالي )، و يقوموا الصبح زاي الشطار لابسين ضرايب جديدة و هما في مشكلة البنزين و غلوه.

بلاش حتة تانية من الاعيب مبارك، يطلع في عيد عمال أو غيره، و يقرر صرف العلاوة 10% ، و من ناحية تانية ييجي يوسف غالي يلمها 21% ، و الشعب فرحان هياخد 10% ، و معندهوش مشكلة إنه يرجعها 80%.

اﻹخوان ملبسين الشعب نفس الفكرة، تفتكروا لما مرسي عمل اﻹعلان الدستوري، مكانش عارف إن فيه مشاكل و بهدلة و طرف تالت و رابع و خامس، كان عارف بس سياسة اﻹلهاء، أصل هيغلي إيه ؟؟؟؟، عشان يسرح الناس فيه، إنما السهل نعمل مشاكل في الشارع، و نلبس الشعب الخازوق من الناحية التانية، يبقى الشعب بيلعب في الإعلان الدستوري و الدستور و الخوازيق شغالة، و بعد ما الشعب يتكيف، جرة قلم نلغي فيها اﻹعلان الدستوري.

مصر في مؤامرة، قوات و قنوات خارجية عاوزة تاكلنا، عدوان من كوالالمبور على اﻷبواب، يا حاصرة على إيه يا معلم، هيسخطك يا قرد، هيخليك إيه غزال!!!!.

ياإخونا فوقوا الخوازيق بناخدها كل يوم بمزاجنا و إحنا مش داريين، سياسة إلهاء، إتعلموا التاريخ بيعيد نفسه تاني، يخرب بيت كده عيشتوا مع مبارك 30 سنة و متعلمتوش أي حاجة!!!!!.

إقرأ المزيد... Résuméabuiyad GRAKOLLO

روبين هود مصر

مصر رايحة على فين...؟؟؟؟، أكيد سؤال مالهوش إجابة من زمان.

المصريين فرحوا جدا في إنتخابات الرئاسة، نزلوا طوابير ، عشان يدوا صوتهم، يا إما للإخوان أو للفلول!!!، معن مع الزمن مفرقتش كتير.

و جه الرئيس إلي ممكن يكون المصريين إنتخبوه!!!، و كل إنسان حس إن الزمن هيتغير ، و هيبقى فيه نظام و حياة و حرية، لكن تأتي الرياح بما لا تشتهي السفن!!!!.

جه مبارك تاني، بس بدقن.

مبارك إتعلم فينا فترة طويلة لغاية لما فهمناه و هو فهمنا، إنما مرسي لسه هيتعلم فينا فن إدارة شعب، و يا عالم مخه جزمة و لا بيتعلم بسرعة، بس من الواضح إن مخه جزمه، غير قابل للتعليم السريع.

فكرت، و عقبال أمالتكوا لما بفكر بطلع بأفكار بطيخية من الدرجة اﻹولى، لاقيت إن إحنا محتاجين واحد يعمل إسطورة روبين هود مصر، بس مش يسرق من الناس و يأكل ناس تانية، لاء المرة ديه هيسرق الحكم من الجماعة و يسلمه لناس تانية أو حتى لنفسه، بس تكون الناس راضية عنه......!!!!.

بس يا ترى مين روبين هود مصر؟؟؟؟، مين يقدر على الجماعة؟؟؟؟.

لاقيت مايقدر عليها غير ربنا و الناس البسيطة، محتاجين واحد عادي جدا من الناس هو إلي يكون رئيس، واحد يكون جرب العيش أبو مسامير، وقف طوابير الجمعية، إتبهدل في اﻹقسام.........و إلخ.

فيه ناس غبية هتقول ماهو مرسي و أغلبية الجماعة قعدوا في السجون!!!!!، أه بس ده كان إتفاق مع النظام، الجماعة و النظام وجهين لعملة واحدة.

الجماعة بارعة في اللعب تحت الترابيزة، و مبارك و نظامه كان بارع في اللعب فوق الترابيزة.

الجماعة فكروا ، طيب إحنا بنلعب تحت الترابيزة و بنساند النظام و شرعيته، طيب إيه المانع لما نمسك إحنا النظام و نمده بالشرعية، فشلوا تماما، ليه؟؟؟.

تحت الترابيزة مفيش نظام عالمي و دول و....إلخ، أما تحت الترابيزة مفيش كل الليلة ديه، فاكرين فيلم طيور الظلام بتاع عادل إمام، هو يجيب الثغرة، و المحامي الكبير يتكلم بالفصاحة و البلاغة.....و إلخ.

نفس الفكرة بين نظام مبارك و الجماعة!!!!.

دلوقتي بقى، مين ينفع يكون روبين هود مصر، يخلعنا من الجماعة و نظام مبارك، و فلوله و فلول الجماعة؟؟؟؟.

شكلها كده مفيش غير واحد من المريخ هو إلي ممكن ينفع، و عوضنا عليك يارب.

مبارك ليه وجوه كتيرة و الجماعة ليها وجوه أكتر، بالتالي مينفعش حد من مصر ينفع يكون الرئيس!!!!!، مفيش قدامنا غير اﻹستيراد!!!.

أو نشوف مكتب عالمي للتوظيف ينزل إعلان ، و يختارلنا الرئيس إلي يحكمنا، أو حل تاني نقف كلنا و ندعي إن ربنا ياخدنا و ميفضلش غير الجماعة و أعضاءها!!!!.

إقرأ المزيد... Résuméabuiyad GRAKOLLO

المؤامرة المستمرة

مصر بتتعرض لمؤامرات مستمرة، دول ورا المؤامرات!!!!.

نظام سابق ورا المؤامرات!!!.

كل ده كويس، بس فيه مشكلة صغيرة قوييييييييي، المؤامرات ديه سببها إيه؟؟؟.

يعني البلطجي إلي ماسك مطوة ، و بيثبت الناس في الشارع، إيه؟؟ ، عميل لدولة أجنبية؟؟؟.

بلاش اﻷبراج إلي طلعت بسرعة البرق، بدون معرفة مصادر تمويلها!!!، تمويل قطري و لا إسرائيلي؟؟؟.

الموظف المرتشي، مؤامرة حقيرة من النظام السابق!!!.

بقعة الزيت إلي في النيل، مؤامرة حقيرة من بعض التجمعات الخرافية في جزر القمر!!!.

التماسيح الصغيرة المتربية في المجاري و المياه' أكيد تعديل وراثي إسرائيلي لتحويل التماسيح للعيش في المجاري!

المخدرات، مؤامرة اتدمير شباب الوطن، الصيدلي إلي بيبيع أدوية المخدرات

مؤامرة لتدمير شباب الوطن إلي زاي الورد، إلي مبيحبوش يشربوا حشيش و لا أي نوع من المخدرات، و لا هما إلي بيتحرشوا بالبنات، و لا الستات إلي بتقص شعر المسيحيات بس في المترو.

شفتوا مصر بتتعرض لمؤامرات قد إيه!!!.

إنما حبايبي الحلويين الإخوان جم للرياسة و مجلس الشعب و كل حاجة في البلد بالعرق و الكفاح، و كيلو بطاطس و زيت و أنابيب البوتاجاز!!!.

إنما مساعدات من قوى خارجية ، محصلش أبدا!!!!، تمويل قطري أو مساعدات حماسية كل ده من تخيلات المصريين، ماهم المصريين بيتعرضوا لمؤامرات فوتوشوب!!!.

أما النظام السابق، إلي مفيش حد منهم ماسك أي منصب خالص برضوه مش مؤامرة ، ده تكملة لمسيرة وطن ضد المؤامرات!!!.

و التخيل النهائي ، المؤامرة مستمر!!!.

إقرأ المزيد... Résuméabuiyad GRAKOLLO