العدل أساس ........

هو الزمن ده فيه  عدل ؟؟؟؟، يعني لو رحت المحكمة هلاقي عدل؟؟؟.

أصل سعادتك القانون أعمى، طيب إيه العمل؟؟؟.

بص سعادتك ، زمان كان قاضي القضاة، أو أي كان مسماه بيحكم بإيه مش عارف، (أنا كلامي قبل الأديان.(

أما بعد نزول الأديان، أصبح القاضي هو مبعوث من الديان العادل.

بس هو دلوقتي نقدر نقول إن القضاة بتوع دلوقتي مبعوثين من فوق؟؟؟.

صعب يا محترم، كان زمان قوي قوي قوي، أما دلوقتي أو من فترة ليست بقريبة، أبوك مستشار سعادتك مستشار، أبوك وكيل نيابة سعادتك برضوه وكيل نيابة، منين هييجي العدل؟؟؟.

لما مفيش عدل في الإختيار، يبقى إلي قاعد بيحقق أو بيحكم هيجيب العدل منين؟؟؟.

سعادتك إلي بيحقق معاك أو بيحكم عليك، واخدها بالجينات الوراثية، أو بالجيوب المليانة.

يعني تبوس إيدك وش و دقن إنك مدخلتش محاكم، و ماشي تحت الحيطة.

نفسي أعرف اليافتة إلي ورا القاضي إيه لازمتها؟؟؟، لما ملهاش لازمة، زاي الحرامي إلي معلق يافتة " هذا من فضل ربي"، صحيح إيه الفرق؟؟؟.

على فكرة كلامي على كل القضاة الحاليين و السابقين، عشان مش كل شوية ، قلة هي إلي معندهاش بتنجان، كلهم سعادتك متعينين إما بالجينات أو بالجيوب، يعني كله شارب من مية البطيخ.

عندهم خبرة!!!، طيب ما لامؤاخذة الطالب إلي كان طالع بإمتياز في كلية الحقوق، و جه مكانه بتاع المقبول أبو جيوب و جينات، بتاع الإمتياز مكانش هيبقى عنده خبرة ؟؟؟، كان واخد إمتياز في تقشير البطاطا.

الكلام ده كله كان بداية للي جاي، إحنا بنطالب بالعدالة في كل شيء.

عدالة في المعيشة، الوظايف، الأكل، الشرب و إلخ.

طيب حل المعادلة ديه،

إلي بيفصل القوانين دافع دم قلبه من رشاوي و عمولات و الذي منه،

إلي بيفسر القوانين جاي بالخبرة الجينية،

إلي بيطبق القانون جاي بالجينات و الجيوب العمرانة.

و جاي تقولي عاوز ادالة ذا أخي أ............!!!.

قلتلكم قبل كده على الحل، أقوله تاني مش خسارة في طيبة قلبكم، إحنا ٩٠ مليون نعمل جمعية و ندور على واحد إبن حلال من القاعدة يتصرفلنا في حتة نووي و نفجر نفسنا و نخلص، و يجي بقى أي حد تاني يبني دولة من أول و جديد.

أه بالمناسبة سمعت كده خبر مش مؤكد، هو مرسي هيرجع حلايب و شلاتين؟؟؟، و موقع الإخوان مزل خريطة امصر من غيرهم؟؟؟؟.

لو الكلام ده صحيح، و هيرجع الجزء ده، يا ريت يرجع النوبة كمان، و يشيل سينا من الخريطة و يرجعها لإسرائيل، و تبقى من النيل للفرات.

و إم حرب أكتوبر، و إلي عملوها، و نخلص كمان من موضوع الضربة الجوية، و نلغي إم إحتفال ٦ أكتوبر، ونخلص بقى.

و على فكرة لما نرجع سينا لإسرائيل، فيها فايدة كبيرة لمصر ، هيبطلوا يقطعوا الكهربا، و تصديرها لغزة، و إسرائيل بقى تسكن إلي هي عوزاه، و تشيل همه.

أه و يجعله عامر ، عرفتوا بقى العدل أساس إيه؟؟؟؟.

إقرأ المزيد... Résuméabuiyad GRAKOLLO

الإخوان المسلمون و المسلمون , الجزء التاني

لو حبيت تعرف القصة من أولها خد عندك رابط الجزء الأول

نكمل القصة

أخر حاجة كانت : قاعدين نقول وحدة زفت وطنية , مش موجودة , عدم التكفير ذهب مع الريح.

ده غير الملحدين دول منضمين للكفار توماتيكي، و في سيرة الملحدين إتفرجت في اليوتيوب على مقاطع فيديو لملحد مصري ( هو إسمه كده على اليوتيوب )، قاعد في دولة أجنبية بدل مايجيبوا راسه.

الراجل ملحد مش عجبه لا الإسلام و لا المسيحية و لا أي دين، هو حر دماغه مودياه شمال يمين ملناش فيها، المهم، قبل الثورة كانت التعليقات على المقاطع " إن ده واحد مسيحي بيشتم في الإسلام "، أما بعد الثورة فطبعا لازم يكون فيه جديد " مسلم بيزدري الإسلام".

و بعد ما الإخوان مسكوا الحكم " أصبح كافر مسلم ملحد"!!!!!!، ثورة بقى!!!!!!!!!!.



بصراحة بعد الثورة بقى فيه متاهة كبيرة ، المسلم أصبح كافر ، المسيحي كافر من زمان ، و إزدياد في عدد الملحدين الكفار، كل ده ليه؟؟؟، مش هتلاقي إجابة محددة، أو أقولك روح إستشير المرشد، أو الشيخ رئيس الجمهورية.



المضحك في موضوع اليوتيوب بالمرة ، تلاقي مقاطع فيديو عناوينها :

إسلام مليون واحد على إيد الشيخ بتنجان، مسيحي بيولع في نفسه، ملحد يسب الرئيس، عناوييييييييييييييييين كتيرة على الحال ده.



القانون مش موجود واخد أجازة، الدستور يا سيادنا دستور، مجالس نيابية كلها مسلمين مؤمنين، مؤسسات الدولة كلها مؤمنين حاملين كرنيهات الإخوان و توابعها!!!.



حكاية مصر بتتغير واحدة واحدة مبقتش مبلوعة، باسم يوسف مش من حقه ينتقد حد ، و لا ينتقد نفسه أساساً!!!، واحد بيتريق على الواقع المر، و المسؤلين عن المرار مش عاجبهم الموضوع ، " واحد بيتريق علينا و بيكشفنا، لبسوه في الحيطة".

بلاش هو مش باسم يوسف جاب صور ليه مع السفيرة الأمريكية، طبعا في ظل الديمقراطية و المناخ الديمقراطي ، هيطلع واحد متخلف يرفع قضية على باسم عشان يجيب حق السفيرة ، إلي هي أصلاً من الكفار!!!!.



توفيق عكاشة ( حبيب قلبي ) ، بيطلع يتكلم، و عشان بيتكلم يروحوا يحاصروا مدينة الإنتاج الإعلامي ، و يسمح للمؤمنين فقط بلدخول!!!.



طيب خد ديه ، سيادة الرئيس المبجل المفخم الشيخ / مرسي ، في مؤتمر المرأة ، كان عامل زاي الولية الرداحة، واقف بينشر الغسيل و بيتكلم مع المنطيقة كلها!!!.



يا ترى ، و خد بالك ده سؤال مهم " إمتى شعب مصر هيكون من المؤمنين و ليسوا من الكفار ؟؟؟؟".

و إلى اللقاء في الحلقة القادمة.
 

إقرأ المزيد... Résuméabuiyad GRAKOLLO

اﻹخوان المسلمون و المسلمون

تصدقوا مش طلعت حماس تبع اﻹخوان!!!!!!!، يا حظا الله ، قديمة.

طيب بلاش ديه ، تعرفوا إن حزب النور و حزب اﻹخوان وجهين لعملة واحدة، إيه ده قديمة برضوه.

طيب خد ديه، تعرف إن اﻹخوان المسلمين و توابعها هما بس المسلمين في مصر!!!!!.

فيه مسلمين كتير في مصر، نقدر نقول 90% أو أقل، بس للأسف من الكفار.

حامل كرنيه اﻹخوان أو حرية و عدالة أو نور أو سلفي، هما بس المسلمين، أما الباقيين فإطفي النور عليهم.

ده غير الكفار الباقيين، بقييت ال 100% ، إلي هما ال10% أو أكتر، مسيحيين و بعض الأقليات اﻹخرى، دول كده كده كفار و لازم نخلصمنهم، و ناخد رقبتهم بحد السيف.

هما جماعة الإخوان و شوية اﻹضافات إلي تبعهم يطلعوا كام؟؟؟؟.

و الباقي من الشعب المصري، هنضمهم على اﻷقليات اﻹخرى، و إقطع الرقبة و إخلص، هو ده الوضع دلوقتي.

بس فيه حل، فيه توبة، و خطوات التوبة سهلة و بسيطة ، و تقدر ترجع تاني و تبقى مسلم.

أول لما أبو إسماعيل يقول حاصروا مدينة اﻹنتاج، إلحقوا نفسكم و إنزلوا حاصروا ، و بكده تبقى إنت مسلم رجع للإسلام!!!!.

طيب لو واحد مسيحي عاوز يحاصر مدينة اﻹنتاج يعمل إيه؟؟؟؟، ملهوش في التوبة خالص.

هاروح حتة تانية و بعد كده هرجع تاني لموضوع التوبة.

الحج الساويرسطلعوا نصاب، خدعوا البلد ، ضحكوا على البلد و مدفعوش الضرايب.

هو مرسي ماسك من إمتى؟؟؟؟؟.

أصل بقاله فترة شغال إشتغالات، ممكن يطلع موضوع الساويرس إشتغالة منه!!!.

أصل فيه مشكلة صغيرة، واحد متهرب ، أو عيلة متهربة من الضرايب، نروح واخدنهم و إديها تحقيقات و إرمي في السجون و لما يطلع براءة يبقى غلطة مطبعية.

شركاتهم في البورصة معروفة إنها فتوة البورصة، راح مرسي و مؤسساته قالوا إن العيلة ديهمتهربة مش عارف من كام مليار ، هوبا البورصة راحت لطمة ، ووقعت من طولها

معن عندنا دلوقتي مبدأ التصالح مع رموز النظام السابق، أما دول ، إزاي نتصالح معاهم و نقطع رزق الشاطر و جماعته؟؟؟؟.

و بعدين أنهيه هيئة رهيبة إكتشفت دلوقتي إنهم متهربين من الضرايب، الرقابة اﻹدارية مثلا؟؟؟.

إيه ده ، أكيد الساويرس عرفوا إن الملف جوه، راحوا حارقين المبنى بلي فيه.

طيب و المتاحف إلي كانت بتولع، الكنايس و مبنى الحزب الوطني،و،و،و،و، ......... إلخ، الساويرس كانوا عارفين إن ملفاتهم في كل اﻷماكن ديه، فقالوا نولع شوية شوية و بعد كده نخلع!!!!.

بجد أنفع أشتغل مستشار رئيس الجمهورية لتلبيس الناس تهم!!!!!.

خلصنا من الساوريس ، طيب و بقيت ال22 رجل أعمال، معندهمش أي حاجة غير التهرب الضريبي!!!!!.

و يقولك هربوا ليه؟؟؟، بمنتهى البساطة كانوا هيتعزقوا لغاية لما يبقى يثبتوا براءتهم، إنما لما يثبتها من برة ، هيرجع باشا، و عندكوا مثال، رامي لكح، أثبت براءته من بره و رجع تاني.

إرجع كده بالذاكرة شوية، شوية كتير، و نلاقي إن مرسي و شركاهبيطبقوا سياسة التأميم، و بعد لما النظاميتغير في القريب البعيد، نرجع للناس حاجتهاو فوقها تعويض، مش بيتصرف.

مرسي و شركاه عاوزين يعودوا بالزمن، عاوزين ينتقموا من الشعب برجوع نظام عبد الناصر ، إلي لبسهم في الحيط، قلبهم إسود قوي.
نظام عبد الناصر مطبق بالفعل:

الرقابة على الصحف.

الرقابة على الميديا موجودة و محاصرين مدينة اﻹنتاج لمراقبة القائمين على العمل.

رقابة على النت، موجودة و شالوا أفلام السكس

رقابة على التليفونات، موجودة ، و بقى سهل تحديد مكان الشخص، أصل التليفونات الجديدة مدمج فيها جهاز تحديد المواقع، حتى التكنولوجيا داعمة للإخوان

ده غير اﻹقتصاد ال 100 100 هيرتفع بعد تأميم كل ممتلكات رجال اﻷعمال، و عودتها ﻷصحاب الحق، اﻹخوان طبعا!!!.

الحريقة الأخيرة إلي راح ضحيتها مش عارف كام نفر, المهم دخلت على برنامج البالتوك، طلع واحد راسي كده و بيتكلم بكل هدوء و راح قايل " إلي ولع الحريقة هما المسيحيين!!!!، مش البلطجية، البلطجية عندهم سماحة عن المسيحيين!!!!"، يا سلام.

ده غير إنه عنده ملفات تخص الكنيسة و طتائب الطنيسة المسلحة ، ده غير الأسلحة إلي في الأديرة!!!!.

تعليق بسيط: من إمتى بيوت الله تبقى معسكرات؟؟؟؟

نكمل الطلام إلي يجيب الضغط، على مفس لسان الشخص بتاع البالتوك، المسيحي من صغره بياخد فرقة صاعقة في الكنيسة، فبيطلع بعد كده على ال ٧٧٧.

 

كلام متحلف من واحد متخلف، كل جادة دلوقتي بتلبس المسيحيين، و المسيحيين دول من الكفار، و نضيف عليهم المسلمين الكفار الغير منتمين للجماعة.

أموالهم و نسائهم و ممتلكاتهم و لنا.

قاعدين نقول الوحدة الزفت الوطنية ، مش موجودة ، و عدم التكفير ذهب مع الريح.

ده غير الملحدين ، منضمين توماتيكي للكفار.

و على ذكر الملحدين، هحكهلكم في الجزء التاني ، كفاية كده تعبت من الكتابة.


 

إقرأ المزيد... Résuméabuiyad GRAKOLLO

سيب طائر النهضة للإخوان

عندي فكرة أو مجموعة أفكار، عشان البلد يتصلح حالها، بس واقفة على شيء بسيط، لازم ناس تتحرك!!!.

بس للأسف هيطلع طائر النهضة و يبوظ كل حاجة، و ناس تانية مش هتتحرك عشان المشاريع متنسبش للإخوان.

بس سواء اﻹخوان نسبوها أو منسبوهاش لنفسهم ، مش هتفرق، إلي هتفرق إن الشعب هو إلي يستفاد.

الجميل في اﻷمر ، و إنت قاعد في البيت ممكن تلف العالم بتكة زرار، اﻹنترنت هو الحل السحري.

ناخد لفة في العالم و نشوف إيه إلي ممكن ننقله من كل دول العالم، و يفيد، مش نجيب حاجات المنظرة و خلصنا.

ناخد مثل، الصين، بيصنعوا من اﻹبرة للصاروخ، عندهم مشاكل كتيرة مع العالم بسبب عمليات النسخ إلي بيعملوها، و مشاكل لتقليد الماركات العالمية، بس ودنهم مبتسمعش غير إزاي نأكل مليار بني أدم.

بلاش شوفوا كوريا الجنوبية و قارنوها بكوريا الشمالية، هتلاقوا فرق شاسع.

كوريا الجنوبية الناس فيها هما إلي بيخترعوا الشغل، مثال شركات التوصيل، نهجهم توصيل أي حاجة ﻷي حتة في خلال 30 دقيقة، إحنا عندنا مشروع التوصيل السريع ، بس مش لكل حاجة.

الكورييون عندهم يوصلوا الطلاب للإمتحانات في خلال 30 دقيقة، ياخد الكلب لصالون الحلاقة، يروح يغيير لمبة في بيت، يقوم بشراء إحتيجاتك من السوق.

الوقت عندهم مبيكفيش، ال 24 ساعة عاوزنها تبقى 48 ساعة في اليوم، دولة تتسم بالسرعة في كل شيء.

سيبك من كل ده، إحنا عندنا شمس ناس بتيجي من بلاد بعيدة عشان تقعد في الشمس، خلاص إحنا ممكن نصدر الشمس ليهم، أو بمعنى أصح الدول بتتجه للطاقة النظيفة، و من أنواع الطاقة النظيفة الطاقة الشمسية.

و عشان أبوظها على اﻹخوان و مينسبوهاش لطائر النهضة، مشروع الطاقة الشمسية كان مشروع ألماني من عهد مبارك، و كان عبارة عن مد ألمانيا بالطاقة من خلال الخلايا الضوئية، و يتم تصديرها لألمانيا و بالفعل تم البدء في المشروع و إتحددت الأراضي و تم بناء الخلايا ، معرفش وقفت عند كام خلية، و مرة واحدة المشروع وقف!!!!، ليه؟؟؟؟، قامت ثورة في البلد، و المشروع وقف، باﻹضافة إنسحاب الشركاء.

ممكن إعادة فتح المشروع و تصدير الطاقة الشمسية لكل الدول إلي هتدفع، باﻹضافة إنه ممكن تصنيع الخلايا الضوئية في مصر، عندنا أراضي شاسعة ملهاش حد، يعني بنا مصنع في منطقة محدوفة ، يعني بعد كده يتبنى مدينة سكنية ، يعني إعمار مكان، و ممكن في يوم من اﻷيام تصبح محافظة، و يصبح المصنع مصانع، بس للأسف حلم.

بلاش الزراعة، ياريت تستحملوني شوية في الفكرة ديه، مشهور عن إسرائيل التقدم في الزراعة و اﻷمطار الصناعية، إحنا بنقول إن فيه إتفاقية سلام و تطبيع، و اﻹخوان مش هيمانعوا في التطبيع، و بعدين جه الوقت إلي نعيش فيه بسلام فعلي، نستفاد من خبراتهم و تقدمهم و نستعين بيهم في زراعة ملايين من اﻷفدنة، إلي هي عبارة عن شوية تراب و صحرا، عينك متجبش أخرها، إيه المانع؟؟؟.

هيطلع واحد أو مجموعة أذكياء و يقولي القضية الفلسطينية، الرد بسيط، بس فيه سؤال، هو حضرتك معاك بطاقة رقم قومي؟؟؟؟،
الرد ، أكيد ،
طيب ممكن تطلعها من جيبك،
أهيه،
هو الجنسية مكتوب إيه؟؟؟،
مصري،
جميل يعني مش فلسطيني، خلاص سيب الفلسطينيين يحلوا مشاكلهم، و خلي المصريين يحلوا مشاكلهم.

أنا أسف، يهمني بلدي اﻷول، و بعد كده أشوف مشاكل الجيران، خلصنا؟؟؟.

عشان تعمل مشاريع جديدة و الناس تتحرك، لازم نستعين بفكرة من أفكار السفاح الراحل ستالين، نهجر قرى كاملة للأماكن إلي عاوزين نعمرها!!!!، ماهو غير كده مفيش حد هيتحرك، و ديه ممكن نسيبها للإخوان ينسبوها لطائر النهضة.

عندنا متاحف مفتوحة، و كتيرة بس للأسف عبارة شوية حجارة متهمش ناس كتيرة، إنما فيه شعوب بتيجي عشان تتمتع بالنظر إليها، بلاش فيه في متحف اللوفر الفرنسي شوية أثار مصرية من طريقة العرض و اﻹضاءة، تتعجب هي الأثار ديه مصرية؟؟؟؟، تخيل بقى لو إحنا عدلنا العرض و الإضاءة تفتكر هنستفاد أد إيه؟؟؟، طبعا فيه متخلفين شايفيين اﻷثار أصنام!!!!، بس سيبك منهم أصنام أصنام بس بتجيب فلوس، عشان تشوفها بس.

و بعدين بدل مابتخلي الناس تحفر و تطلع أثار و تهربها، و بعد كده تجري ترفع قضايا و تصرف عشان ترجع حتة أثار، إفتح الباب لتجارة اﻷثار، واللهي شايف إن فيه واحد معاه حتة مهمة ، إشتريها منه، مش تصادرها منه و تديله على قفاه، و بعد كده تهديها لواحد تاني!!!!، فيد و إستفيد، و تجارة اﻷثار مش عيب و لا حرام و تقدر تفرض عليها الضرايب و الرسوم إلي إنت عاوزها، بلاش يا سيدي لو فرضنا إنك تعمل مرسوم قانون ، إنك شريك في حتة الأثار بنسبة معينة.

و ياما هدينا أثار نادرة لزعماء زاروا مصر، أو حبينا نطنطط عليهم.

مجرى النيل ، مجرى ملاحي كبير، ينفع يكون مجرى ملاحي للتجارة و للسياحة، و يكون كله، مش حتة أه و حتة لاء، و تستفادوا منه في تنظيم مسابقات عالمية للتجديف، و الزوارق، زاي اﻹمارات مثلا.

فيه حاجات كتيرة، ينفع و تنفع، بس للأسف محتاجة ناس تتحرك، و فيه دول عندها إستعداد تدي معونات و منح، يعني الفلوس مش مشكلة بس اﻹيد العاملة هي المشكلة.

و قبل ماتوقع على إسقبال المعونات و المنح، تقدر تشوف الشروط ، و تقدر تتناقش فيها، و تشوف إيه إلي في مصلحة البلد و إيه إلي ضد البلد.

و بصراحة لازم نراجع اﻹتفاقيات و البتنجان إلي النظام السابق وقعها، ﻹن فيها إتفاقيات مجحفة لينا.

براءة اﻹختراعات، عندنا ناس مخترعة بس للأسف مفيش حد بيراعي الناس ديه، شوفوا إيه المفيد، ده كل إختراع ممكن يكون بمصنع، يعني كام واحد ممكن يشتغل بسبب إختراع واحد؟؟؟.

النهاية، بإيدنا نبني البلد ، و دع طائر النهضة للإخوان.

إقرأ المزيد... Résuméabuiyad GRAKOLLO

الجهاد في سبيل الوطن

فكرة من بنات أفكاري، ممكن تنفع في الوقت الحالي.

مرسي و هو في ألمانيا ، إنجعص في الكرسي ، و قال إن فيه ناس معاهم جرينوف و طيارة من القوات المسلحة و الهرتلة إياها.

فيه نقطة ، إن الجيش مش ضد مرسي و جماعته، بل الجيش بينفذ أوامر الرئيس.

يعني مجلة على صلة بالمخابرات اﻷمريكية أو الهندية ، يقولوا إلي هما عاوزينه، إنما الجيش و الريس إيد واحدة، و عمر السيسي ماهينسى فضل مرسي عليه.

المهم، طبعا الأيام إلي فاتت ، شايفين جحافل قوات اﻷمن، و شراستها.

قوات اﻷمن ، أخدت خبرة من ثورة 25 يناير، فضلوا في الشوارع فترة لغاية لما جابوا أخرهم ، و راحوا ساحبين قواتهم و على معسكراتهم عدل.

خلاص ، المفروض الشعب يبقى أخد خبرة برضوه، بمعنى حرق عربيات الشرطة مش هي المفيد، هيشتروا غيرها و هيستوردوا أقوى منها.

زاي قنابل الغاز، دلوقتي أقوى و أشرس من اﻷول، يعني فترة السلام مابين الشعب و الشرطة ماإلا إعادة تنظيم و تعبئة.

الناس إفتكرت إنها بالخل و المية و الكمامة ، قدرت تتغلب على قنابل الغاز فترة 25 يناير 2011، إنما 25 يناير 2013 حاجة تانية خالص.

خلاص نتبع فكرة الجهاد ، بمعنى نستولى على مباني، نخطف بعض، و مفيش مانع يقع شوية قتلى و مصابيين، إيه المانع كل حرب و ليها الضحايا بتاعتها.

نعمل فيلم الإرهاب و الكباب ، بس على مستوى الدولة، هما مش كل مشكلتهم تأمين المباني، خلاص نستولى على المباني.

في الحالة ديه الشرطة هتواجه مين و لا مين.

باﻹضافة إن الشوية إلي في المعسكرات بيريحوا و يكونوا قوة دعم، هيكونوا مشغولين في تخليص مباني من اﻹحتلال.

و القوات إلي في الشارع مش هتقدر تصمد فترة طويلة من غير دعم، و بكده عرش مرسي و اﻹخوان هيتهز بصورة عنيفة.

عادي ساعتها مرسي و الداخلية هيطلبوا دعم القوات المسلحة.

مفيش أي مشكلة، هو مش الجيش على طول بيقول قدام العالم كله ، إنه من الشعب و إلى الشعب يعود، خليه يثبت الكلام ده عملي.

و بكده مفيش قدام مرسي و جماعته سوى الإستسلام للشعب و شرعيته.

بس خلي عندكوا خبرة شوية، لا يسمح ﻷي كان من مكتب اﻹرشاد و رياسة الجمهورية و مجلس الوزرا بمغادرة البلاد.

ساعتها الجهاد في سبيل الوطن هيجيب مفعول سريع و نافذ.

بس ياريت يكون عندنا إحنا الخبرة، و نكون الخبرة ، عشان بعد مرسي و جماعته ، إن مشوا و ده مشكوك فيه ، منكررش تاني فكرة المجلس العسكري، إنتخابات مجلس الشعب و الدستور و إلخ إلخ. ......... .

واحد كان بيقولي إن مرغسي في بلدكم ، أخد 70% من التصويت، كان سؤالي 70% من 90 مليون؟.

العالم برة مصر بيشوف و يقرا حاجة تانية خالص عن إلي بيحصل جوه مصر.

مثال موضوع الدستور، شايفين إن الناس هي إلي إختارت الدستور بمذاجها، و ميعرفوش أي حاجة الدستور ده إتعمل إزاي.

بس العالم خارج مصر بيهتم ، إن في الدولة الفلانية مجموعة إستولت على مبنى ، مجموعة إستولت على شوية حاجات حتى لو كانوا مجموعة أرانب ، و بكده فضايح اﻹخوان توصل برة مصر.

يعرفوا إن الشعب مخترش، مرشحش، منتخبش ، الغاية تبرر الوسيلة.

الجهاد في سبيل الوطن، هو الحل.

إقرأ المزيد... Résuméabuiyad GRAKOLLO

الدول الإوروبية تفتح باب اللجوء

نصيحة كمل الموضوع للأخر، و مش هتندم، هيتحرق دمك بس!!.

طلع خبر و بيقول إن " مرسي مستخبي هو و عيلته في موقع تابع للقوات المسلحة"!!!!، ممكن.

بس مرسي قاعد مع مبارك في المستشفى شغالين في تحدي ، هتتنحى زايي و لا لاء!!!!.

يا ترى بقى هنحاسب مين المرة ديه ؟؟؟، المرشد و لا الجماعة كلها و لا مرسي و مستشاريه و لا مين بالظبط؟؟؟؟.


و بعد كده كلمعتاد زاي ماحصل مع مبارك ، هيحصل مع الإخوان و كلهم هيطلعوا براءة و الشعب هو إلي غلطان !!!!.

الإخوان زاي ماقلت قبل كده ، بارعيين جدا في اللعب تحت الترابيزة، إنما فوق الترابيزة إتفضحوا فضيحة المطهر!!!.

طلع علينا شفيق بكام فيديو ، و قال إنه كان فايز في الإنتخابات، و المخابرات العامة أكدتله الكلام ده، بس ماما أمريكا قالتله روح إتنيل على جنب إحنا عاوزين الإخوان هما إلي يحكموا!!!، راح شفيق واخد نافسه و طالع يعمل عمرة في أبو ظبي!!!.

و نكمل القصة، الإخوان إتولوا العرش ، أصلهم دفعوا رشوة لهيلاري بالجنيه الجبس!!!.

طيب أهيه هيلاري غسلت إيدها من الإخوان، ماما أمريكا بحالها سابت الليلة، الإتحاد الإوروبي إتنازل عن الإخوان، السلفيين إتنازلوا عن الإخوان!!!!، مش غريبة إن الكل إنسحب مرة واحدة؟؟؟؟، هو فيه إيه؟؟؟.

طيب بصوا بقى، تتطلعوا برة مصر ، و تقولوا البلد و الإخوان عاملين و مسويين ، تلاقي السياسيين الأمريكيين و الإوروبيين بيهاجموك بطريقة مفترية، شفتوا اللخبطة!!!.

من شوية أنا نفسي قلت إن الكل إتخلى عن الإخوان، و بعديها أنا برضوه إلي قلت إنه كله بيدافع عن الإخوان !!!، أنا إتجنيت!!!.
بس للأسف هو ده الوضع و بصراحة و بالحقيقة، معايا تقرير رسمي ،

1. إن مصر بعد مبارك هي في قمة الديموقراطية!!!!.
2. إن أي تجميد للأموال أو الممتلكات بيتم عن طريق حكم محكمة، إنما قانون الطواريء إتلغى!!!.
3. الإخوان لا يحكموا البلد، إنما الحاكم هو رئيس مدني منتخب من كل الشعب المصري سواء داخل مصر أو خارجها!!!!.
( معني أنا واحد منتخبتش خالص).
4. الأمن المصري الأن في قمة التواضع و الحنية !!!!.
5. من حق المواطن الأن أخد حقوقه الإنسانية!!!!، ( والله العظيم مكتوب كده).
6. كل الأحكام في مصر تتم بحكم من المحاكم المختلفة.
7. المسيحيين في مصر واخدين حقوقهم 100 في ال100!!!.
8. من حقك تغيير الديانة بدون إن حد يطبق عليك أي نوع من الحدود!!!!.
9. بالنسبة للعائديين للمسيحية ، عادي إرجع و الدولة هتطلعلك بطاقة بالديانة المسيحية على طول!!!!.
10. المسلم المتحول إلى المسيحية ، الدولة معندهاش أي مانع خالص في تغيير ديانته!!!.
11. الشيعة بيمارسوا حواديتهم عادي خالص، و معاهم البهائيين و الملحدين ، ده طلع في مصر عبدة شيطان بموافقة من الدولة!!!.
نفسي أعرف إلي كتب نقرير زاي ده جابه منين؟؟؟، ده من عند إمه!!!.
12. أما حبيب قلبي مبارك، فطلع إنه كان ديكتاتور، و فاسد ، إنما الشعب ثار عليه و شالوه من العرش و المجتمع الدولي ساند إرادة الشعب!!!، ( ده عند إمه يا .........).

هواريكوا بقى إني مجنون!!!،

معايا تقرير من أيام مبارك كالتالي:

1. مبارك أرسى قواعد الديموقراطية في خلال سنين حكمه!!!!.
2. مبارك غير الدستور و جعل من حق الناس إنها تترشح لمنصب الرئيس!!!.
3. الحياة السياسية في مصر 100%.
4. الأحزاب بتمارس نشاطها بمنتهى الحرية !!!!.
5. حرية الصحافة و عدم وجود أي نوع من الرقابة عليها!!!!.
6. المسيحيين واخدين حقوقهم و الدستور يكفل لهم ذلك!!!.
7. البهائيين و الشيعة و الملحدين ، مفيش حد بيدور عليهم أبداً!!!!.
8. القضاء مستقل، و تاخد حقك بالقضاء!!!!.
9. هناك بعض من العنف الشرطي و لكنها حالات فردية!!!.

ده تقريرين ، الفترة مابينهم سنة واحدة بس واحد كان 2010 ، و التاني 2011، تقرير بيمنح لأي طالب لجوء، أو أي حد بيحاول يثبت إن في مصر فيها مشاكل.

تقارير رسمية، معترف بيها من الدول الإوروبية و أمريكا!!!.

هاه، مين إلي مجنون أنا و لا الدول الإوروبية و أمريكا؟؟؟؟.

أكتر من ، أقول إيه ألافات خرجوا برة مصر ، وراحوا على الدول الإوروبية ، إلي هي بتقول إن فيه حقوق إنسان و حقوق حيوان و إلخ ......

 يجي المصري أو المسيحي أو الملحد أو البهائي أو الشيعي ، أو حتى عبدة الشيطان و يلبس في الحيطة .

يرجع يقول لنفسه لما مصر حلوة قوي و قمة الديموقراطية و الحقوق و لقمة العيش و الذي منه، و إن الشرطة العنف عندها حالات فردية!!!، طب هو الواحد ساب مصر ليه؟؟؟.

قولولي بقى ، إيه فايدة الثورة ، و الناس إلي بتموت ، و الحكام المدنيين إلي بيهلوا من صندوق الإنتخاب؟؟؟.

المجتمع الدولي إلي بيساند أي حد ييجي يقعد على الكرسي!!!!، مجتمع دولي إيه ؟؟، و حقوق إنسان منين ؟؟؟، و حريات و كلام فاضي!!!!.

المصيبة إن المجتمع الدولي عنده كل التواضع و التسامح، إن لو الرئيس قام عليه شعبة يتم منحه حق اللجوء في قصره ، قبل مايطلع من بابه!!!، يروح على الدولة ديه يلاقي أعضاء السفارة في إنتظاره، حراسة ، سكن و يا حبذة مجمع سكني ليه و للحاشية و العيال.

باب البلد و البلاد إلي جنبها مفتوحين على الأخر، مشاريع موجودة، يعني باشا في بلده و بره بلده.

 و لما واحد يروح يقول أنا متهان و متبهدل في بلدي ، يتقاله التقريرين إلي فوق!!!، ده غير الوضع المعيشي السيء، البهدلة و المهانة ، ده غير إنك مشترك مع الرئيس اللاجيء، عليك حراسة عشان سعادتك محبوس في معسكر، ديه الحاجة الوحيدة المشتركة.

أما بالنسبة لسعادتك فإنت برة و جوه متبهدل، و إشربوا حقوق الإنسان.

(ملحوظة): الصورة حقيقية عن غرفة في معسكر طالبين اللجوء في دولة إوروبية.

إقرأ المزيد... Résuméabuiyad GRAKOLLO

موقعة الجمل ، لبسني الحيطة و إخلع

علاء ، جمال ، صفوت الشريف ، وزيرة التأمينات اﻹجتماعية و وزير الصرف الصحي.

كل دول متهمين في موقعة الجمل، سواء أخدوا براءة ، أو لاء!!!!، بس المشكلة سهلة و بسيطة و ليها حل.

بس المشكلة البسيطة جدا ، إن عندنا 150 مسؤول بتصريحات مختلفة،

واحد بيقول إن كل القايمة السابقة ملهاش أي يد في مذبحة القلعة ، قصدي موقعة الجمل.
واحد بيقول إن بلطجية الداخلية و حبيب العادلي هما المسؤولين عن موقعة الجمل.
واحد بيقول إن اﻹخوان هما المسؤولين عن موقعة الجمل.
واحد بيقول إن العسكر هما المسؤولين عن موقعة الجمل.

بس على ما أعتقد إن الجمل هو المسؤول عن موقعة الجمل!!!!،



قبل كده في عز الحماس الثوري ، أي حاجة كان عندها إستعداد تلبس مبارك و نظامه، خاصة الصور المعروضة، واحد بسلاح و لاسلكي فوق المتحف المصري ، شكله بيوجه الجمل للموقعة بتاعته.

و طبعا في الوقت الثوري الحماسي مفيش حد عنده أي تفكير مين ممكن يكون مسؤول غير مبارك و نظامه.

بس في نفس الوقت طلع عندنا رأي!  إزاي ؟؟؟؟، إزاي مبارك قبلها بيوم طلع في خطاب مؤثر ، ناس كتيرة إتعاطفت معاه، ناس كتيرة قالت و ماله خليه يكمل المدة الباقية.

بس! !!!، تفتكروا مبارك و نظامه عندهم الغباء العالي ده ، إنهم يلبسوا نفسهم في الحيط، جت موقعة الجمل و لبس نظام مبارك فعلا في الحيط!!!!، و أسفاااااااه!!!!.

و تمر اﻷيام و اﻷسابيع و الشهووووووور، و يطلع علينا المجلس العسكري بمواقع أكتر من موقعة الجمل!!!!، و طلع علينا نفس الرأي السديد، إن فلول نظام مبارك و مبارك بعياله و مراته، عاوز يدبس العسكري في الحيطة!!!!.

سبحان الله!!!!.

و يطلع علينا ناس من العسكر نفسهم، و يطلع معاهم فيديوهات و صور ، بتقول إن اﻹخوان هما المسؤولين عن كل المواقع، بما فيها موقعة الجمل!!!!!، يعني كده اﻹخوان من فلول مبارك و نظامه؟؟؟؟.

يعني واحد من اﻹخوان إلي مشرف في سجن طره، هو إلي إتفق مع مبارك و نظامه ، إنهم يلبسوه في الحيط!!!!، و مبارك و عياله و مراته وافقوا؟؟؟؟، إيه الغباء ده!!!.

بس إستنى ، هو مبارك ساعة موقعة الجمل كان موجود فين؟؟؟؟، مش في طرة، و لا عياله كمان، أكيد إتفقوا مع مرسي و الشاطر عن طريق تليفونات القمر الصناعي!!!، فاكرينها لما مرسي كلم قناة الجزيرة بيها، ماهو التليفونات ديه بيبقى متخزن عليها اﻷرقام المباشرة لقناة الجزيرة! !!، ماعلينا مش موضوعنا، خلينا في موقعة الكلب ، قصدي الحصان، يييييه الجمل، ماهو كلهم ذوات أربعة.

و تمر اﻷيام ، الأسابيع و الشهووووووور، و يطلع علينا اﻹخوان بمواقع أكتر من فلول مبارك و العسكري!!!!، و المرة ديه مختلفة، كل ماقبل اﻹخوان فلول، الشعب ، مبارك، نظامه و حتى المباني، يا سيدي الفاضل أبو الهول طلع فلول، و هو المسؤول الوحيد و اﻷول عن موقعة الجمل، و أطالب بمحاكمة أبو الهول و هدمة، لإنه مسؤول ، و فلول و أصنام!!!!، جتكم خيبة!!!.

العملية كلها متلخبطة ، بس في النهاية سهلة و بسيطة، مبارك و نظامه فلول و عاوزين يدخلوا المجلس العسكري في الحيطة،
مبارك و نظامه و العسكري فلول و عاوزين يدخلوا اﻹخوان في الحيطة،
مبارك و نظامه و العسكري و اﻹخوان فلول و عاوزين يلبسوا الشعب الحيطة!!!!، شفتوا بسيطة و سهلة إزاي!!!!.

زاي من كام يوم، طلع علينا نفس الرأي السديد ، مبارك كان بيشوف ميدان التحرير و مصر كلها من قناة مشفرة، عشان كده أيام الثورة القنوات المصرية كانت جايبة الهدوء إلي في الشوارع!!!!، و بعدين يا رااااجل!!!!.

ده إنتوا طلعتوا كل قيادات التليفزيون براءة، لما هما كلهم مسؤولين عن التليفزيون ، و طلعوا براءة ، المسؤول عن القناة المشفرة بتاعت مبارك كانوا من زحل صح؟؟؟، عشان سرية القناة!!!!، بصراحة بشششكرك على رأيك السديد.

مبارك و أعوانه، تم قبول النقض، زاي ما مرسي قال بالظبط ، هيعيد المحاكمات تاني، بس الإعادة في صالح مين؟؟؟.

صفوت الشريف القواد طلعتوه ملاك بجناحين،
إسامة الشيخ طلعتوه براءة و هو رئيس إتحاد الإذاعة و التليفزيون، طبعا مكانش عنده أي فكرة بالقناة المشفرة،
عبد اللطيف المناوي طلعتوه بطل ساند الثورة و كتب كتاب و كل سنة و إنتوا طيبين،
فاروق حسني طلع ملهوش فيها!!!.

طيب المسؤول عن موقعة الجمل مفاجأة من العيار الثقيل،
المسؤوووووول هو
إنتم أيها الشعب، طبعا!!!، إلي قام بموقعة الجمل مصريين من الشعب.

و لا جايين من دول إخرى، و عملوا عملية إنزال لجمالهم في منطقة صحراوية!!!!، و لا من بلاد الواق واق؟؟؟؟.

على فكرة إحنا بنحب السيما قوي، و خاصة الزميل جيمس بوندق، نحب نعيش في أجواء المؤامرة و اﻹيد الخفية و الطرف ال 105، معن الموضوع سهل و بسيط ، إحنا لبسنا الحيطة يا شعب.

ناس عاوزة فلوس ، ناس خافت على نفسها من عودة مبارك ، و ناس تالتة عاوزة تخلع ، و ناس رابعة عاوزة تحكم، إضربها في الخلاط هيطلعلك مواقع جمل، مش موقعة واحدة!!!!.

عندي فكرة إحنا ممكن نخلد مواقع الجمل بمسرحية وحيدة ، عنوانها " لبسني الحيط و إخلع " .

مش تخليدا للناس لاسمح الله، ده تخليدا للجمل!!!.

إقرأ المزيد... Résuméabuiyad GRAKOLLO

إسرائيل من الداخل ، بطاطا في البتنجان

و أنا تايه في بحر اليوتيوب، لاقيت نفسي بفكر في كلمة من عادل إمام، إسرائيل عدو!!!، خاصة إنهم بقوا أصحاب اﻹخوان.

بس للأسف أنا معرفش عن هذا العدو ، أي حاجة خالص.

قلت لنفسي طيب ماتحاول تشوف أفلام ( إستغفر الله العظيم ) إسرائيلية.

قلت و ماله فكرة! إبتديت بكتابة كلمة إسرائيل، لاقيت عدد لا بأس به من الفيديوهات.

بعدين لاقيت الكتابة العبري بتظهر أكتر و أكتر، و طبعا أنا في البتنجان و لا فاهم أي حاجة، بس لاقيت أفلام عن الشرطة اﻹسرائيلية.

قلت جميل ، ده بداية الهجان الجديد، ندخل على اﻷجهزة اﻷمنية، و ألم معلومات.

في البداية عجبني البوليس اﻹسرائيلي، بس بعد كده شفت الهمجية، إكتشفت سر خطير، مدام برنامج في التليفزيون، لازم يطلع مية مية.

يعني إشرب يا معلم لو عاوز تجمع معلومات، بس لاقيت بعد كده الهمجية في الفيديوهات إلي الناس الطبيعية بتصورها.

البوليس عندهم مبيعرفش يتفاهم معاك ، غير و إنت متربط اﻷول!!!!، بعد كده يبتدي الكلام.

من ضمن الفيديوهات المتعلقة بالبوليس اﻹسرائيلي، ناس بتتكلم عربي!!!، أه بيتكلموا عبري مية مية ، بس لما يشتموا، يشتموا بالعربي.

بعد كده شفت فيديوهات عن المداهمات، إشي مداهمات الجيش الإسرائيلي لبيوت العرب، مداهمات البوليس لمحل بيبيع مقويات جنسية، طلع إن اﻹتجار في المقويات الجنسية جريمة، ( على كده الرجالة هناك حاجة فوق، بلد مفيهاش رجالة).

البوليس يشتبه في واحد، يروحوا معاه البيت و يفتشوه، بس للأمانة بيوصلوه البيت ببلاش.

نتكلم جد شوية،

كان فيه فترة بيتقال، إن إسرائيل فاتحة إيدها لمسيحيين مصر، أحب إنكم تشوفوا الفيديوهين دول، و تشوفوا مدى ترحاب الشعب اﻹسرائيلي الشقيق، بالمسيحيين هناك، بدون أي فرق هما جايين منين!!!!؛

و بعد كده شفت تفريق الجيش للمظاهرات اﻹسرائيلية، طلعوا إنهم مبيفرقوش مابين إسرائيلي و فلسطيني، و برضوه عاوزكم تشوفوا الحتة ديه ؛

العجيب الغريب، طلع عندهم سلفيين؛ و متعصبيين جدا جدا ، أنيل من السلفيين عندنا، و أحب أيضا أن تلتقوا مع الجهة السلفية في إسرائيل؛

ليه شبهتهم بالسلفيين؟؟؟، بسبب إنهم عايشيين في مجتمعات منفصلة، مكفرين كل من لا يتبع مجتمعهم، نفس الشكل نفس التكفير نفس الإسلوب بس في دولة ساكنة جنبنا، و بنقول عليهم أعداء.

في النهاية ، أحب أقولكم، إحنا عندنا مقومات أجدع من مليون إسرائيل، بس هما عرفوا يلموا الحتة إلي إستولوا عليها و يعملوها دولة، شوفوا الفيديوهات كويس.

إتحدوا و حطوا إيدهم في إيد بعض، سيبكم من فيديوهات السلفية اﻹسرائيلية ، خليكم في الباقي.

إحنا بقى عندنا حتة كبيرة، واخدنها بدمنا، و بدم أهلينا، و بتطل على إتنين مية، و ماشي في وسطها خط مية، و سايبنها خرابة.
تفتكروا لو اﻹسرائيلين عندهم الحتة ديه ، كانوا عملوها إيه؟؟؟؟.

و إحنا عندنا حتة كبيرة ملك، و مستنيين حد ييجي يعمر، و يوزع علينا، للأسف إحنا إلي عايشين بطاطا في البتنجان.

المعلومة المهمة، إن هناك زاي هنا!!!، البني أدم مهما كان في أي حتة، و مهما كان النظام إلي حواليه، ديمقراطي، علماني ، ديني و حتى بتنجاني، متوحش أكتر من أشرس الوحوش على اﻷرض.

اﻷسد ، ملك الغابة ، بياكل لما يكون جعان، أما البني أدم فهو جعان على طول!!!!!.

إقرأ المزيد... Résuméabuiyad GRAKOLLO

مرسي يتحدى القدر

عجبني خطاب السيد الرئيس الدكتور المهندس العظيم مرسي قدام مجلس الشورى و الشعب أصلهم 2 في 1، مش مشكلة.

قال بصوت جهوري إترجت ليه القاعة، إن ثورة 25 يناير العظيمة ، إلي الإخوان إشتركوا فيها من أول يوم!!!!، هي الطريق إلي موجه سعادته للأمام.

و إن الشعب قام على الديكتاتورية و الكلام الأهبل إلي لا بيأكل و لا بيشرب!!!!، بس عندي تعليق خفيف خالص، و هو بيقول الديكتاتورية متكسفش على نفسه كده، بصراحة مكنتش ديكتاتور قبل كده، فمعرفش تأثير الكلمة علي بتكون إزاي؟؟؟، أصلي عشت طول عمري تحت رجلين الديكتاتور، فأقدر أوصف الجزمة من تحت شكلها إيه، إنما من فوق مقدرش أفيدك قوي!!!!.

بس عندي سؤال عويس، هو الكتاتني كان حاضر إفتتاح مجلس الشورى ، ليه؟؟؟؟، دعوة؟؟؟، و لا لسه رئيس مجلس الشعب المنحل؟؟، زاي حكومة حماس المقالة!!!.

و بعدين يا سيدي راح شاطح يمين على القضية الفليسطينية، هما لو سابوا الفليسطينيين في حالهم هيخلصوا نفسهم بنفسهم، بس أهوه تقليد أخدنا عليه في كل إفتتاح مجلس شعب أو شورى ، لازم نحشي الخطاب.

و راح رامي شمال على القضية السورية، و هي ديه نقطة التسلية بتاعتي النهاردة!!!!.

تلاقي بشار أول لما سمع كلمة مرسي عملها على روحه، أو لسه قاعد في الحمام لغاية دلوقتي!!!!، المشكلة مش في بشار دلوقتي، المشكلة في اللاجئين السوريين إلي جم و إلي هييجوا، يا مراحب على العين و الراس!!!.

بس دولة مش عاطية كرامة لشعبها هتتدبي إزاي كرامة للضيوف؟؟؟؟، بصراحة صعبانين عليا، متبهدلين هناك على إيد بشار و جايين يتبهدلوا على إيد مرسي و جماعته!!!!.

أفتكر حاجة يمكن الكل يعرفها، مصر في يوم من الأيام كانت فاتحة الباب قدام السودانيين، السودانيين كانوا بالهبل في كل حتة، على الأرصفة و في كل مكان، و لما طلبوا حقوقهم كبني أدمين إطلق عليهم الأمن المركزي و راح إلي راح و عاش إلي عاش!!!!.

بلاش الأريتريين كانوا يجوا يقدموا لجوء في مصر و النظام يرحلهم على بلادهم، و ياخدوا إلي فيه النصيب هناك.

ياترى بقى مرسي و جماعته فاتحيين باب مصر لكل السوريين و لا لحاملين كارنيهات الإخوان المسلمين في سوريا؟؟؟؟.

مش تريقة بتكلم بجد ، السوريين إلي هيشرفوا مصر، سوريين إخوان و لا سوريين عاديين؟؟؟؟.

عن نفسي لو مرسي أمر بالتحرك العسكري على سوريا مش هروح، لإني مش عاوز الإخوان يفلتوا هناك من إيد بشار، لما بشار يخلص على السوريين الإخوان هناك هبقى أتحرك أنقذ الباقيين إلي عندهم أمل يعيشوا حياة كريمة، مش هما كمان يشيلوا ديكتاتور و يجيبوا جماعة ديكتاتورية تحكمهم، و يبقى ودنك منين يا جحا!!!.

نعدي موضوع سوريا و نمسك الإقتصاد، مرسي و جماعته لسه مصدقيين إن فيه طائر نهضة، و الفلوس هتجري أنهار، على إيه ؟؟؟، أحلام و لا على كدب؟؟؟.

مرسي شكله عنده زهايمر، أو بيعاني من إنفصام في الشخصية، نسى إن أغلببية المشاريع إذا مكنتش كلها ، إلي مسك فيها المقص و قص الشريط، كانت من أيام مبارك!!!!، يعني الجماعة ملهاش أي إيد في المشاريع ديه.

بلاش شفت من كام يوم ، إن رجال الأعمال بيشتكوا ، إن البنوك معندهمش عملة أجنبية ( الدولار العجيب )، رجل أعمال محترم عنده حساب بالعملة الصعبة يروح البنك عشان يسحب من فلوسه ، البنك يقوله سوري معندناش!!!!، و قال إيه أصل الأموال بتخرج من مصر !!!!.

يا سلام ، يا سيدي الفاضل هي الثورة بقالها قد إيه ؟؟؟، جاي دلوقتي بتقول إن فيه ناس بيهربوا أموال البلد !!!!، إمال الوقت إلي الفات ده كله كان إيه؟؟؟، بيسرسبوها!!!!.

هو فيه واحد من أباطرة النظام السابق كان سايب فلوس جوه عشان يخرجها بره؟؟؟، كانوا سايبين مصاريف العيال بس، و حتى ديه كانت بره !!!.

تفتكروا الراجل بتاع بنك الإئتمان الزراعي، مش فاكر إسمه، كان سايب في البيت 8 مليون جنيه، و لما سألوه إيه ده؟؟؟، كان الرد مصاريف للأولاد!!!.

تفتكروا بقى من ساعتها حد بيشيل حتى مصاريف الأولاد هنا؟؟؟، إمال التعليم في الخارج يعمل إيه، يا تعليم مجاني!!!.

 طيب بلاش يعمل إيه رجل الأعمال الكبير قوي خالص جدا ، الشاطر و هو شاطر، قضى طول عمره في المعتقلات و مع ذلك عمل مشاريع !!!، يمشي مشاريعه إزاي؟؟؟، يعني يرضيكم يروح البنك يقولولوا مفيش!!!!، ده يعزل مرسي بكلمة!!!، و لا مع ده البنك المركزي تحت أمره؟؟؟.

بس للأسف البنك المركزي طلع تصريح إن النقد الأجنبي إلي تحت إيده يدوبك يسدد، و يكفي الإستيراد، على رأي واحد مش فاكر مين هو ، الحكومة بتطلب للشعب أكل ديليفري من الخارج!!!.

الكلمة الوحيدة إلي عجبتني إن الشعب كله لازم يشترك عشان نترفع!!!!، أكتر من كده هنوصل القمر!!!!.

نرجع للمهم سيبك من كل إلي فوق ده، إقتصاد إيه إلي جاي تقول عليه؟؟؟، إقتصاد بلد ، و لا إقتصاد جماعة؟؟؟، لو على البلد الإقتصاد بيرفع الراية البيضا، إنما إقتصاد الجماعة نمسك الخشب، حدث و لا حرج، ربنا يخلي قطر!!!.

هو مش الدستور عدى، خلاص دخل جيب الجماعة الفلوس إلي قال عليها القرضاوي مش عارف كام مليار دولار عجيب!!!.

عمرو أديب كان بيسأل مصطفى الفقي ، فين الفلوس و الياقوت و المرجان ، إلي الإخوان قالوا هنمسك الحكم البلد هتعيش على جبال من الذهب !!!!، و لكن للأسف عشانا عليك يارب!!!.

هو ده القدر إلي كنا مستنيينه ، مرسي هو قدرنا و إحنا مش قدره، فهل عند مرسي الجرأة على تحدي القدر؟؟؟؟.

إقرأ المزيد... Résuméabuiyad GRAKOLLO