بناء على تصريح من مدير مكتبه إن مجلس الشعب مازال قايم، أما بالنسبة للعربية إلي هي سبب إشكال كبير!، فهي هتستمر مع الكتاتني، و الحراسة كمان، و على الشعب خبط دماغه في أي حيطة.
إعتمد مدير مكتب الكتاتني، على رؤساء مجلس الشعب القدام في تقنين إحتفاظ الكتاتني بالعربية و الحراسة كمان!!!!!.
طيب هو كان فيه رئيس مجلس شعب قاعد في البيت؟؟؟، يعني على قد معرفتي، إلي قبل سرور كان المحجوب و إغتيل، فلا إحتفظ بعربية و لا حراسة، سرور قاعد في السجن و محدش قال إنه راكن العربية في الزنزانة إلي جنبه!!!، و أكيد معهوش حرسة في نفس العنبر!!!، و بعدين هو نسى إن إحنا بنحاول نغير وضع كان ماشي غلط؟؟؟؟، أو بيوحي للبعض إن الكتاتني هيكون رئيس مجلس الشعب القادم!!!، فعلا إيه بقى نرجع العربية و الحرس و بعد كده ناخدهم تاني!!!.
فكاهية الدستور؛
طبعاً الكل مستني الدستور ، و أنا واحد من الناس ديه، بس للأسف دخلت على موقع التأسيسية، و قريت المواد إلي رسوا عليها و إلي فيه مشاكل حواليها، و قريت كمان التعليقات بتاعة الناس.
أحب أتكلم الأول عن تعليقات الناس؛ عجبني جداً إن فيه ناس كتيرة بتبدي رايها في مواد الدستور، بس السؤال: هو فيه حد بيسمع أو بيقرا الكلام ده؟؟؟.
للأسف قريت تعليقات تحت بعض المواد إلي أقرتها التاسيسية، الناس بتطالب بحاجة و اللجنة إستقرت على حاجة تانية خالص!!!.
و بعد كده هيستفتوا الناس على مواد الدستور، طيب الراجل أو الست إلي بيفكوا الخط بالعافية و دول كتير قوي، هيستفتوهم إزاي؟؟؟، إيه هينظمولهم قاعات للإستماع لمواد الدستور مع وجود مفسرين؟؟؟.
و لا إبصمي يا ست ، إبصم ياعم و خد إلي فيه النصيب بعد ماتبصم؟؟؟.
سؤال تاني، هتستفتوا على الدستور إزاي؟؟، هتوزعوا على كل شخص الدستور كامل و بعد كده تطالبوه بعد إسبوع مثلاً يعدي عليكم يستفتي، و لا هيكون زاي الإعلان الدستوري، شوية مواد و إلطع الكريمة هنا؟؟؟.